ལུ༌ཀ༌ 5
5
ཡེ༌ཤུའི༌ ལོབ༌ཕྲུགས༌ ཏང༌པོ༌།
5:1-11
1ཞག༌ཤིག༌ གཙོ༌བོ༌ ཡེ༌ཤུ༌ གེ༌ནེ༌ས༌རེད༌ ཚོའེ༌ ཐའ༌མ༌ ཞངས༌ཏེ༌ ཡོད༌ཏུས༌, དཀོན༌མཆོག༌གི༌ བཀའ༌ ཉན༌ཅེས༌ལ༌ ཁོང༌ང༌ མི༌ཚོགས༌ ཆེན༌མོ༌ཞིག༌གི༌ སྐོར༌ཏེ༌ ནན༌ཨིན༌ ཁྱོང༌ངད༌པིན༌། 2ཁོང༌ངི༌ གྲུ༌ཟིང༌ ཉིས༌ ཚོའེ༌ ཐའ༌མ༌ བོར༌ཏེ༌ ཟིགས༌, ཉ༌པ༌གུན༌ ཏེ༌ནང༌ནེ༌ བིངས༌ཏེ༌ ཉ༌དོལ༌གུན༌ ཁྲུ༌འད༌པིན༌། 3ཤི༌མོན༌ པི༌ཏྲར༌རི༌ ཨིན༌ཁན༌ནི༌ གྲུ༌ཟིང༌བོའེ༌ ནང༌ང༌ སྐྱོད༌ཏེ༌ ཡེ༌ཤུའི༌ ཁོའ༌ གྲུ༌ཟིང༌བོ༌ ཐའ༌མ༌ནེ༌ ཙ༌པིག༌ ཆུའི༌ ནང༌ང༌ ཁྱེར༌ཅེས༌ལ༌ མོལས༌ ཡང༌ གྲུ༌ཟིང༌ངི༌ཀ༌ ཞུགས༌ཏེ༌ མི༌ཚོགས༌ལ༌ ལབ༌ཞ༌ སལས༌།
4ལབ༌ཞ༌ སལ༌ ཚར༌ར༌ཅིག༌ ཁོང༌ངི༌ ཤི༌མོན༌ལ༌ མོལས༌, “ཆུ༌ ཀོན༌དྲོ༌ ཡོད༌ས༌ གྲུ༌ཟིང༌ ཁྱེར༌ཏེ༌ ཉ༌ ཟུམ༌ཅེས༌ལ༌ ཉ༌དོལ༌བོ༌ ཕོང༌།”
5ཤི༌མོན༌ནི༌ ཁོང༌ང༌ ཟེརས༌, “སྤོན༌བོ༌ལེ༌, ང༌ཞའེ༌ ཚན༌ གང༌པོ༌ རྩོན༌གྲུས༌ སྲན༌ཏྲེ༌ ཅོས༌ཏེའང༌ ཉ༌ ཅིག༌གའང༌ མ༌ཁད༌། ཨིན༌ནའང༌ ཉེ༌རང༌ངི༌ མོལ༌ པ༌སང༌ ངའེ༌ ཉ༌དོལ༌ ཕང༌ཨིན༌།” 6ཡང༌ ཁོང༌གུན༌ནི༌ ཏེ༌ཟུག༌ ཅོའ༌ཅིག༌, ཉ༌ མ༌མང༌པོ༌ ཁད༌ཏེ༌ ཁོང༌གུན༌ནི༌ ཉ༌དོལ༌ ཆད༌ཀྱིས༌ སོང༌། 7ཞན༌ གྲུ༌ཟིང༌ངི༌ ནང༌ང༌ ཡོད༌ཁན༌ ཕྲོ༌པ༌གུན༌ལ༌ ལག༌པ༌ ཡུགས༌ཏེ༌ རོགས༌ ཅོའ༌ལ༌ ཡོང༌ ཟེརས༌། ཁོང༌གུན༌ ཡོངས༌ཏེ༌ གྲུ༌ཟིང༌ ཉིས༌ཀོ༌ ཆུའི༌ ནང༌ང༌ ནུབ༌ཀྱིས༌ ཆ༌ཆ༌ ཚོག༌པ༌ ཉའེ༌ སྐངས༌།
8ཏེ༌བོ༌ ཐོང༌ང༌ཅིག༌ ཤི༌མོན༌ པི༌ཏྲར༌ ཡེ༌ཤུའི༌ དུན༌ལ༌ གྱེལ༌ཏེ༌ ཟེརས༌, “གཙོ༌བོ༌, ང༌ནེ༌ ཐག༌རིང༌ང༌ སྐྱོད༌ ང༌ སྡིག༌ཅན༌ཞིག༌ ཨིན༌།” 9ཅིའ༌ཟེར༌ན༌ ཁོ༌ དང༌ ཁོའེ༌ ཕྲོ༌པ༌གུན༌ ཉ༌ ཁད༌ཁན༌ནི༌ ཛད༌པ༌བོ༌ ཐོང༌ཏེ༌ མ༌ ཧ༌ལས༌ 10ཡང༌ ཤི༌མོན༌ནི༌ ཚོང༌པ༌ ཕྲོ༌པ༌ ཟེ༌བེད༌དིའི༌ བུ༌ཚ༌ ཡ༌ཀོབ༌ དང༌ ཡོ༌ཧཱ༌ནན༌ནའང༌ ཧ༌ལས༌། ཡེ༌ཤུའི༌ ཤི༌མོན༌ལ༌ མོལས༌, “མ༌ཇིགས༌ཤིག༌, ཏ༌ནེ༌ཕར༌ལ༌ ཁྱོ༌ཞའེ༌ ཉའེ༌ ཚབས༌ལ༌ མི༌གུན༌ ཟུམ༌ཡིན༌།” 11ཏེ༌ནེ༌ ཁོང༌གུན༌ནི༌ གྲུ༌ཟིང༌གུན༌ ཐའ༌མ༌ ཁྱོངས༌ ཡང༌ ཅི༌ཚང༌མ༌ ཕངས༌ཏེ༌ ཡེ༌ཤུའི༌ གྱབ༌ནེ༌ བྲངས༌།
ཡེ༌ཤུའི༌ ཛེ༌ནད༌ ཡོད༌ཁན༌ཞིག༌ ཕན༌ཅུག༌ག༌ ཛདས༌།
5:12-16
12གཙོ༌བོ༌ ཡེ༌ཤུ༌ གྲོང༌ཁྱེར༌ཞིག༌གི༌ ནང༌ང༌ ཡོད༌ཏུས༌ ཏེ༌རུ༌ ཟུགས༌པོ༌ གང༌པོའ༌ ཛེ༌ནད༌ ཡོད༌ཁན༌ནི༌ མི༌ཞིག༌ ཡོད༌པིན༌། ཁོའེ༌ ཡེ༌ཤུ༌ ཇལ༌ལ༌ཅིག༌, སའེ༌ཀ༌ གྱེལ༌ཏེ༌ ཇུ༌ཇུ༌ ཞུ༌ཨིན༌ ཟེརས༌, “གཙོ༌བོ༌ལེ༌, ཉེ༌རང༌ ཐུགས༌ཐད༌ན༌ ང༌ གྱལ༌ཅུགས༌ཏེ༌ རྩང༌མ༌ ཛད༌ ཉན༌ན༌ནོག༌།”
13ཡེ༌ཤུའི༌ ཆག༌ རྐྱངས༌ཏེ༌ ཁོའ༌ ཐུག༌ཅུག༌ག༌ ཛད༌ཏེ༌ མོལས༌, “ང༌ ཁྱོ༌རང༌ གྱལ༌ ཅུག༌ཏེ༌ རྩང༌མ༌ ཅོའ༌ ཐད༌ད༌རག༌།” ཏེན༌ན༌མལ༌ལ༌ ཛེ༌ནད༌པོ༌ མེད༌ཁན༌ སོང༌། 14ཏེ༌ནེ༌ ཁོང༌ངི༌ ཁོའ༌ བཀའ༌ སལས༌, “སུའང༌ མ༌ཤད༌, ཨིན༌ནའང༌ སོང༌ཏེ༌ རང༌ངི༌ ཟུགས༌པོ༌ བླ༌མ༌ སྟོན༌ ཡང༌ ལུང༌སྟོན༌པ༌ མོ༌ཟེས༌སི༌ བཀའ༌ སལ༌ཁན༌ ནང༌ཞིན༌ དཀོན༌མཆོག༌ག༌ ཆོད༌པ༌ ཕུལ༌, ཏེ༌བོ༌ མི༌གུན༌ལ༌ ཁྱོ༌རང༌ རྩང༌མ༌ ཆའ༌ཁན༌ནི༌ སྤང༌པོ༌ ཨིན༌།”
15ཨིན༌ནའང༌ ཁོང༌ངི༌ སྐོར༌ལ༌ ནས༌ཚུལ༌བོ༌ མང༌ང༌ ཕེལ༌། ཏེ༌བོའེ༌ ཞས༌ཏེ༌ མི༌ཚོགས༌གུན༌ ཁོང༌ང༌ ཉན༌ཅེས༌ དང༌ ནད༌ནེ༌ ཕན༌ཅེས༌ལ༌ ཁོང༌ ཡོད༌ས༌ ཡོངས༌། 16ཨིན༌ནའང༌ ཡེ༌ཤུ༌ ཡང༌ནེ༌ ཡང༌ མོས༌ལམ༌ ཞུའ༌ལ༌ སུའང༌ མེད༌སའེ༌ ནས༌ས༌ སྐྱོད༌དད༌པིན༌།
ཡེ༌ཤུའི༌ ཁོངས༌ཁན༌ཞིག༌ ཕན༌ཅུག༌ག༌ ཛདས༌།
5:17-26
17ཞག༌ཤིག༌ གཙོ༌བོ༌ ཡེ༌ཤུའི༌ ལབ༌ཞ༌ སལ༌ལ༌ ཛད༌ ཟ༌ནེ༌ གཱ༌ལིལ༌ལི༌ དང༌ ཡ༌ཧུ༌དཱའེ༌ གམ༌ཡུལ༌ ཚང༌མ༌ དང༌ ཡེ༌རུ༌ཤ༌ལེམ༌ གྱལ༌ས༌ནེ༌ ཡོངས༌ཁན༌ནི༌ ཕ༌རུ༌ཤི༌པ༌གུན༌ དང༌ ཆོས༌ཁྲིམས༌ལ༌ ཁས༌པ༌གུན༌ ཏེ༌རུ༌ སའེ༌ཀ༌ དུགས༌ཏེ༌ ཡོད༌པིན༌, ཡང༌ ཕན༌ཅུག༌ཅེས༌སི༌ དཀོན༌མཆོག༌གི༌ སྟོབས༌ ཡེ༌ཤུ༌ ཉམ༌པོ༌ ཡོད༌པིན༌།
18ཏེ༌ནེ༌ མི༌ ཁ༌ཅིག༌གི༌ ཟའ༌ཕོག༌ཁན༌ཞིག༌ མལ༌ཙའེ༌ཀ༌ ཁུར༌ཏེ༌ ཁྱོངས༌ ཡང༌ ཁང༌པའེ༌ ནང༌ང༌ ཡེ༌ཤུ༌ ཡོད༌ས༌ ཁྱེར༌ཅེས༌སི༌ རྩོན༌གྲུས༌ ཅོས༌། 19མི༌ཚོགས༌སི༌ ཞས༌ཏེ༌ ཁོང༌གུན༌ལ༌ ཁོ༌ ནང༌ཀུག༌ག༌ ཁྱེར༌ མ༌ཉན༌། ཁོང༌གུན༌ ཁང༌པའེ༌ ཁེ༌ཐོག༌ག༌ སོང༌ཏེ༌ ཐོགས༌ས༌ ཀོགས༌ཏེ༌ མལ༌ཙའ༌ ཉམ༌པོ༌ ཁོ༌ མི༌ཚོགས༌སི༌ ཞུང༌ང༌ ཡེ༌ཤུའི༌ དུན༌ལ༌ ཕབས༌། 20ཁོང༌གུན༌ནི༌ མི༌བོ༌ གྱལ༌ཅུག༌ཅེས༌སི༌ ཏད༌པ༌ ཅོ༌ཁན༌བོ༌ ཡེ༌ཤུའི༌ ཟིགས༌ཏེ༌ ཁོང༌ངི༌ ཟའ༌ཕོག༌ཁན༌བོའ༌ མོལས༌, “ཛ༌འོ༌, ངའེ༌ ཁྱོ༌རང༌ངི༌ སྡིག༌པ༌གུན༌ལ༌ ཤགས༌པ༌ ཏང༌ངད༌།”
21ཏེ༌ནེ༌ ཆོས༌ཁྲིམས༌ལ༌ ཁས༌པ༌ དང༌ ཕ༌རུ༌ཤི༌པ༌ གུན༌ནི༌ སེམས༌སི༌ ནང༌ང༌ སམས༌, “དད༌ལོག༌ ཞུ༌ཁན༌ནི༌ འི༌ མི༌བོ༌ སུ༌ ཨིན༌ནོག༌། དཀོན༌མཆོག༌ མ༌སྟོག༌ སུའ༌ སྡིག༌པ༌ ཤགས༌པ༌ སལ༌ ཉན༌ཨིན༌།”
22ཁོང༌གུན༌ནི༌ སམ༌ཁན༌བོ༌ ཡེ༌ཤུའི༌ ཁྱེན༌ཏེ༌ ཏྲིའ༌ ཛདས༌, “ཁྱོ༌ཞའེ༌ ཁྱོ༌ཞ༌རང༌ངི༌ སེམས༌སི༌ ནང༌ང༌ འི༌ཟུག༌ ཅིའ༌ སམ༌མད༌? 23ཅི༌ སམ༌མ༌རག༌, ‘ཁྱོ༌རང༌ངི༌ སྡིག༌པའ༌ ཤགས༌པ༌ ཏངས༌ཏེ༌ ཨིན༌’ ཟེར༌ཅེས༌པོ༌ ལ༌མོ༌ ཨིན༌ནོག༌ག༌ ཡ༌ ‘ལངས༌ཏེ༌ གྲུལ༌’ ཟེར༌ཅེས༌པོ༌? 24ཨིན༌ནའང༌ མི༌རིགས༌སི༌བུའ༌ ཇིག༌རྟེན༌ནི༌ཀ༌ སྡིག༌པའ༌ ཤགས༌པ༌ ཏང༌ཅེས༌སི༌ ཝང༌ཆའ༌ ཡོད༌ཁན༌བོ༌ ངའེ༌ ཁྱོ༌ཞའ༌ སྟན༌ཨིན༌།” ཏེ༌ནེ༌ ཡེ༌ཤུའི༌ ཟའ༌ཕོག༌ཁན༌བོའ༌ མོལས༌, “ངའེ༌ ཁྱོ༌རང༌ ཟེར༌རད༌, ལོངས༌, རང༌ངི༌ མལ༌ཙ༌ ཁུར༌ཏེ༌ ཁང༌པ༌ སོང༌།”
25ཏེན༌ན༌མལ༌ལ༌ ཁོང༌གུན༌ནི༌ དུན༌ལ༌ ཁོ༌ ལངས༌ཏེ༌ ཁོ༌རང༌ ཉལ༌ཁན༌ནི༌ མལ༌ཙ༌བོ༌ ཁུར༌ཏེ༌ དཀོན༌མཆོག༌ག༌ སྟོད༌པ༌ ཕུལ༌ཨིན༌ ཁང༌པ༌ སོང༌། 26མི༌ཚང༌མ༌ ཧ༌ལས༌ཏེ༌ དཀོན༌མཆོག༌ག༌ སྟོད༌པ༌ ཕུལས༌, ཡང༌ རྩི༌ཝ༌ དང༌ ཇིགས༌སི༌ ནང༌ང༌ ཟེརས༌, “དི༌རིང༌ ང༌དང༌གུན༌ནི༌ ཧ༌ལས༌ཤེས༌སི༌ ཆག༌ལས༌ ཐོང༌།”
ཡེ༌ཤུའི༌ ཁྲལ༌ནེན༌ཁན༌ ལི༌ཝིའ༌ བོད༌ད༌ ཛདས༌།
5:27-32
27ཏེ༌ སྟིང༌ནེ༌ གཙོ༌བོ༌ ཡེ༌ཤུ༌ ཕི༌ལོག༌ག༌ སྐྱོདས༌ ཡང༌ ལི༌ཝི༌ ཟེར༌ཁན༌བོ༌ ཁྲལ༌ནེན༌སའེ༌ ནས༌སའེ༌ཀ༌ དུགས༌ཏེ༌ ཡོད༌ད༌ ཟིགས༌ ཡང༌ ཁོང༌ངི༌ ཁོའ༌ མོལས༌, “ངའེ༌ སྟིང༌རང༌ནེ༌ བྲོངས༌།” 28ཁོ༌ ལངས༌ ཡང༌ ཅི༌ཚང༌མ༌ ཕངས༌ཏེ༌ ཡེ༌ཤུའི༌ སྟིང༌རང༌ནེ༌ བྲངས༌།
29ཏེ༌ནེ༌ ལི༌ཝི༌ ཡེ༌ཤུའི༌ ཕིའ༌ ཁོ༌རང༌ངི༌ ཁང༌པ༌ གྲོན༌ ཆེན༌མོ༌ཞིག༌ ཏངས༌། ཁྲལ༌ལེན༌ཁན༌ དང༌ ཞན༌, མི༌ཚོགས༌ ཆེན༌མོ༌ཞིག༌གི༌ ཁོང༌གུན༌ ཉམ༌པོ༌ ཁར༌ཇི༌ ཟའད༌པིན༌། 30ཨིན༌ནའང༌ ཕ༌རུ༌ཤི༌པ༌གུན༌ དང༌ ཏེན༌ན༌ སྡེ༌ ཆོས༌ཁྲིམས༌ལ༌ ཁས༌པ༌གུན༌ནི༌ ཡེ༌ཤུའི༌ ལོབ༌ཕྲུགས༌གུན༌ལ༌ སྐྱོན༌རྗོད༌ ཅོ༌ཨིན༌ ཟེརས༌, “ཁྱོ༌ཞའེ༌ ཁྲལ༌ལེན༌ཁན༌ དང༌ སྡིག༌ཅན༌ མི༌གུན༌ ཉམ༌པོ༌ ཅིའ༌ ཟའད༌ ཡང༌ ཐུང༌ངད༌?”
31ཡེ༌ཤུའི༌ ཁོང༌གུན༌ལ༌ ལན༌སལས༌, “ཟུ༌མོ༌ ཡོང༌ཁན༌ཞིག༌ག༌ མ༌ནེ༌ ཁམ༌ཟང༌ མི༌ཞིག༌ག༌ ཨམ༌ཆི༌ གོས༌ས༌ མ༌ནོག༌། 32ངའ༌ ཁྱོ༌ཞ༌ ཀྲང༌པོ༌ ཨིན༌ སམ༌ཁན༌གུན༌ལ༌ མན༌པ༌, སྡིག༌ཅན༌གུན༌ལ༌ གྱོད༌པ༌ ཅོ༌ཅེས༌ལ༌ བོད༌ད༌ ཡོངས༌པིན༌།”
རོ༌ཟཱ༌ དུགས༌ཅེས༌སི༌ སྐོར༌།
5:33-39
33ཏེ༌ནེ༌ ཁོང༌གུན༌ནི༌ ཡེ༌ཤུའ༌ ཟེརས༌, “ཡོ༌ཧཱ༌ནན༌ནི༌ ལོབ༌ཕྲུགས༌གུན༌ དང༌ ཕ༌རུ༌ཤི༌པའེ༌ ལོབ༌ཕྲུགས༌གུན༌ ལན༌ མང༌པོ༌ ཉེ༌ནས༌ལ༌ དུགས༌ཏེ༌ མོས༌ལམ༌ ཞུ༌རུག༌, ཨིན༌ནའང༌ ཉེ༌རང༌ངི༌ ལོབ༌ཕྲུགས༌གུན༌ ཏུས༌གྱུན༌ ཟེན༌ ཐུང༌ཨིན༌ ཅིའ༌ དུག༌ག༌ནོག༌?”
34ཡེ༌ཤུའི༌ ལན༌སལས༌, “བག༌སྟོན༌ནི༌ ནང༌ང༌ མག༌པ༌ ཉམ༌པོ༌ ཡོད༌ ཟ༌ནེ༌ ཁོའེ༌ གྲོན༌པོ༌གུན༌ ཉེ༌ནས༌ལ༌ དུག༌ཨིན༌ན༌? མི༌དུག༌། 35ཨིན༌ནའང༌ ཏུས༌པོ༌ ལེབ༌ཨིན༌ ནམ༌ མག༌པ༌ གྲོན༌པོ༌གུན༌ནེ༌ ཕེས༌ཏེ༌ ཁྱེར༌ཨིན༌, ཏེ༌ནེ༌ ཁོང༌གུན༌ནི༌ རྡུག༌པོ༌ ཅོས༌ཏེ༌ ཉེ༌ནས༌ལ༌ དུག༌ཨིན༌།”
36ཡེ༌ཤུའི༌ འི༌ རུངས༌པོ༌ ཤད༌ད༌ ཛདས༌, “སུ༌ཞིག༌གིའང༌ ཀོས༌ལག༌ སོ༌མ༌ ཅད༌ཏེ༌ སྙིང༌པའེ༌ཀ༌ ལྷན༌བ༌ ཏབ༌བ༌ མ༌ནོག༌, ཀལ༌ཏེས༌ ཏབ༌ན༌ ཀོས༌ལག༌ སོ༌མ༌བོ༌ ཆད༌ཨིན༌ ཡང༌ ལམ༌བ༌ སོ༌མ༌བོ༌ སྙིང༌པའེ༌ཀ༌ མི༌ཟོབས༌།”
37“ཏེན༌ན༌ ཙོགས༌ལ༌ ཆང༌ སོ༌མ༌ པགས༌པའེ༌ སྐྱ༌པ༌ སྙིང༌པའེ༌ ནང༌ང༌ མི༌ལུག༌། ཀལ༌ཏེས༌ ལུག༌ན༌ ཆང༌བོའ༌ སྐྱུར༌ ལངས༌ཏེ༌ པགས༌པའེ༌ སྐྱ༌པ༌ བོས༌ཏེ༌ ཆད༌ཨིན༌, ཆང༌ བོ༌ཏེ༌ སྐྱ༌པའང༌ དོད༌མེད༌ ཆེན༌། 38ཆང༌ སོ༌མ༌ སྐྱ༌པ༌ སོ༌མའེ༌ ནང༌ང༌ གྱང༌གོས༌། 39ཡང༌ ཆང༌ སྙིང༌པ༌ ཐུངས༌ཏེ༌ སྟིང༌ནེ༌ སུ༌ཞིག༌གིའང༌ སོ༌མ༌ ཐུང༌ཨིན༌ གྲོའ༌ མ༌ནོག༌། ‘ཆང༌ སྙིང༌པ༌ བྲོད༌ཅན༌ རག༌’ ཟེར༌ཨིན༌།”
Currently Selected:
ལུ༌ཀ༌ 5: lbj
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
