དཱ༌ནི༌ཨེལ༌ 9
9
དཱ༌ནི༌ཨེལ༌ལི༌ ཨིས༌ར༌ཨེལ༌པ༌གུན༌ནི༌ ཕིའ༌ མོས༌ལམ༌ ཞུས༌།
9:1-19
1བ༌བེ༌ལོན༌ནི༌ ནང༌ང༌ ཟེརཀ༌སེས༌སི༌ བུ༌ཚ༌ མེ༌དིའ༌པ༌ གྲ༌རི༌ཡས༌ གྱལ༌པོའེ༌ ཝང༌སྲུལ༌ལི༌ གོ༌མའེ༌ ལོའེ༌ ནང༌ང༌ 2ལུང༌སྟོན༌པ༌ ཡེ༌རེམ༌ཡཱའི༌ གྱུད༌ཏེ༌ ཡ༌ཝ༌ དཀོན༌མཆོག༌གི༌ སལ༌ཁན༌ བཀའ༌ ནང༌ཞིན༌ ཡེ༌རུ༌ཤ༌ལེམ༌ ཁྲེས༌ཏོར༌ སོང༌ཏེ༌ ལོ༌ རྡུན༌ཅུ༌ སྟོང༌པ༌ ལུས༌ཤེས༌པོ༌ ང༌ དཱ༌ནི༌ཨེལ༌ལ༌ ཧ༌གོ༌། 3ཏེ༌ནེ༌ ངའེ༌ ཉེ༌ནས༌ བོར༌ཏེ༌, ཕ༌ཙའ༌ གོན༌ཏེ༌ ཀོག༌ཐལ༌ ཡོགས༌ཏེ༌ ཡ༌ཝ༌ དཀོན༌མཆོག༌ག༌ ཞུ༌ཝ༌ ཕུལ༌ཨིན༌ མོས༌ལམ༌ ཞུས༌པིན༌།
4ངའེ༌ མོས༌ལམ༌ ཞུ༌ཨིན༌ ང༌ཞའེ༌ སྡིག༌པ༌ ཅོ༌ཁན༌གུན༌ ཡ༌ཝའ༌ ཤད༌ཏེ༌ ཟེར༌པིན༌, “གཙོ༌བོ༌ལེ༌ ཉེ༌རང༌ ཀྲག༌པོ༌ དང༌ ཁྱུད༌ཅན༌, ཆད༌དོན༌ ཛད༌ཁན༌ནི༌ ནང༌ང༌ ཨིད༌ཤེས༌ཅན༌ ཡང༌ ཉེ༌རང༌ངི༌ བཀའ༌རྒྱ༌ ཁའ༌ཉན༌ཏེ༌ ཉེ༌རང༌ང༌ ཡ༌ཤ༌ ཅོ༌ཁན༌གུན༌ལ༌ ཉེ༌རང༌ངི༌ ཏུས༌གྱུན༌ ཡ༌ཤ༌ ཛད༌ཅེས༌ ཁ༌ཆད༌ ཛད༌དུག༌། 5ང༌ཞའེ༌ སྡིག༌པ༌ དང༌ ངན༌པ༌ ཡང༌ ཉེ༌རང༌ངི༌ གྱབ༌གལ༌ ཅོས༌ཏེ༌ ཉེ༌རང༌ངི༌ བཀའ༌ ཏང༌ ཁྲིམས༌ གུན༌ ཕངས༌ཏེ༌ ཨིན༌ནོག༌། 6ཉེ༌རང༌ངི༌ ལུང༌སྟོན༌པ༌གུན༌ གྱུད༌ཏེ༌ ང༌ཞའེ༌ གྱལ༌པོ༌, གྱལ༌ལུ༌, ཕ༌མེས༌པོ༌ དང༌ མི༌ ཚང༌མ༌ལ༌ མོལ༌ལ༌ ཛད༌ཁན༌ ཚང༌མ༌ ང༌ཞའེ༌ མ༌ཉནས༌།”
7“གཙོ༌བོ༌ ཉེ༌རང༌ངི༌ ཐག༌ཅད༌ ཀྲང༌པོ༌ ཨིན༌ནའང༌ ཉེ༌རང༌ ཉམ༌པོ༌ ཨིད༌ཤེས༌ཅན༌ མི༌དུག༌ཅེས༌པའེ༌ འི༌ཏུས༌ལ༌ ང༌ཞའ༌ ཡ༌ཧུ༌དཱ༌པ༌, ཡེ༌རུ༌ཤ༌ལེམ༌པ༌ དང༌ ཨིས༌ར༌ཨེལ༌པ༌ ཚང༌མ༌, ཉེ༌མོ༌ དང༌ ཐག༌རིང༌ ཡང༌ ང༌ཞའ༌ ཕེའ༌ ཛད༌ཁན༌ནི༌ ཡུལ༌ ཚང༌མའེ༌ ནང༌ང༌ ཁྲེལ༌བ༌ སོང༌ཏེ༌ ཨིན༌ནོག༌། 8གཙོ༌བོ༌ལེ༌ ཉེ༌རང༌ངི༌ གྱབ༌གལ༌ལ༌ སྡིག༌པ༌ ཅོ༌ཅེས༌པའེ༌ ང༌ཞའ༌, ང༌ཞའེ༌ གྱལ༌པོ༌, གྱལ༌ལུ༌ དང༌ ཕ༌མེས༌པོ༌ ཚང༌མ༌ ཁྲེལ༌བའེ༌ གང༌ཏེ༌ ཨིན༌ནོག༌། 9ང༌ཞའེ༌ ཉེ༌རང༌ངི༌ གྱབ༌གལ༌ ཅོ༌ནའང༌ གཙོ༌བོ༌ ང༌ཞའེ༌ དཀོན༌མཆོག༌ ཉེ༌རང༌ སྙིང༌རྗེའེ༌ དང༌ ཤགས༌པ༌ ཛད༌ཁན༌ ཞུགས༌ཏེ༌ ཨིན༌ནོག༌། 10ཡ༌ཝ༌ ང༌ཞའེ༌ དཀོན༌མཆོག༌ ཉེ༌རང༌ངི༌ ཁའ༌ ང༌ཞའེ༌ མ༌ཉན༌ན༌ ཡང༌ ཉེ༌རང༌ངི༌ ལུང༌སྟོན༌པ༌གུན༌ གྱུད༌ཏེ༌ སལ༌ཁན༌ནི༌ ཁྲིམས༌གུན༌ མ༌ སྲུང༌ང༌ ཨིན༌ནོག༌། 11ཨིས༌ར༌ཨེལ༌པ༌ ཚང༌མའེ༌ ཉེ༌རང༌ངི༌ ཁྲིམས༌ ཅགས༌ཏེ༌ ཉེ༌རང༌ནེ༌ ཐག༌རིང༌ང༌ སོང༌ཏེ༌ ཉེ༌རང༌ངི༌ ཁའ༌ མ༌ཉན༌ན༌ ཨིན༌ནོག༌།”
“ཏེ༌བོའེ༌ཕིའ༌ ཉེ༌རང༌ངི༌ ཞབས༌ཏོག༌པ༌ མོ༌ཟེས༌སི༌ ཁྲིམས༌སི༌ ནང༌ང༌ བྲིས༌ཁན༌ནི༌ ངན༌ དང༌ ཆད༌པ༌ གུན༌ ང༌ཞའེ༌ཀ༌ བབས༌ཏེ༌ ཨིན༌ནོག༌ ཅིའ༌ཟེར༌ན༌ ང༌ཞའེ༌ ཉེ༌རང༌ངི༌ གྱབ༌གལ༌ལ༌ སྡིག༌པ༌ ཅོས༌ཏེ༌ ཨིན༌ནོག༌། 12ཉེ༌རང༌ངི༌ ང༌ཞའེ༌ ཝང༌སྲུལ༌པ༌ དང༌ ང༌ཞ༌གུན༌ནི༌ཀ༌ ཆད༌པ༌ ཀྲག༌པོ༌ སལ༌ཏེ༌ ཉེ༌རང༌ངི༌ ང༌ཞའེ༌ གྱབ༌གལ༌ལ༌ མོལ༌ཁན༌བོ༌ གྲུབ༌ཅུག༌ག༌ ཛད༌ཏེ༌ ཨིན༌ནོག༌། ཡེ༌རུ༌ཤ༌ལེམ༌མི༌ གྱལ༌སའ༌ ཛད༌ཁན༌ ཙོགས༌ ནམ༌ཁའེ༌ ཡོག༌ག༌ ཡོད༌ཁན༌ ཀ༌རུའང༌ མ༌ ཛདས༌། 13མོ༌ཟེས༌སི༌ ཁྲིམས༌སི༌ ནང༌ང༌ བྲིས༌ཁན༌ ནང༌ཞིན༌ ཏེ༌ རྡུག༌ངལ༌ ཚང༌མ༌ ང༌ཞའེ༌ཀ༌ བབས༌ཏེ༌ ཨིན༌ནོག༌ ཏེ༌ནེའང༌ ང༌ཞའེ༌ སྡིག༌པ༌གུན༌ ཕངས༌ཏེ༌ ཉེ༌རང༌ ཆོགས༌ལ༌ སེམས༌ གྱུར༌ཏེ༌ ཉེ༌རང༌ངི༌ ཀྲང༌པོ༌ ལམ༌མི༌ཀ༌ མ༌གྲུལས༌། 14ཏེན༌ན༌བོའེ༌ཕིའ༌ ཡ༌ཝ༌ ཉེ༌རང༌ངི༌ གྲལ༌གྲིག༌ ཛད༌ཁན༌ ཀྲག༌པོ༌ རྡུག༌ངལ༌ ང༌ཞའེ༌ཀ༌ ཁྱོང༌ང༌ ཛདས༌ ཅིའ༌ཟེར༌ན༌ དཀོན༌མཆོག༌གི༌ འོས༌པ༌ ཨིན༌ཁན༌བོ༌ ཛད༌ད༌ནོག༌ ཨིན༌ནའང༌ ང༌ཞའེ༌ ཁོང༌ངི༌ ཁའ༌ མ༌ཉན༌ན༌ ཨིན༌ནོག༌།”
15“ཏ༌ གཙོ༌བོ༌ ང༌ཞའེ༌ དཀོན༌མཆོག༌, ཉེ༌རང༌ངི༌ ཨི༌ཇིབ༌ནེ༌ ཉེ༌རང༌ངི༌ མི༌གུན༌ ཁྱུད༌ ཀྲག༌པོ༌ ཉམ༌པོ༌ ཕིངས༌ཏེ༌ ཁྱོང༌ང༌ ཛད༌ཏེ༌ ཉེ༌རང༌ངི༌ ཚན༌ ཀྲག༌པོ༌ ཏུས༌གྱུན༌ ལུས༌ཤུག༌ག༌ ཛདས༌ ཨིན༌ནའང༌ ང༌ཞ༌གུན༌ ངན༌པ༌ དང༌ སྡིག༌པའེ༌ གངས༌ཏེ༌ ཡོད༌ཏེ༌ ཨིན༌ནོག༌། 16གཙོ༌བོ༌ལེ༌ ཉེ༌རང༌ངི༌ ཨིད༌ཤེས༌ཅན༌ སྙིང༌རྗེ༌ ནང༌ང༌ ཉེ༌རང༌ངི༌ ཐུག༌སྲོ༌ སྲན༌ཏྲེ༌ དང༌ ཆད༌པ༌ གུན༌ ཡེ༌རུ༌ཤ༌ལེམ༌, ཉེ༌རང༌ངི༌ ཏམ༌པ༌ གྱལ༌སའེ༌ ཀ༌ནེ༌ ཐེན༌ན༌ ཛད༌། ང༌ཞའ༌ དང༌ ང༌ཞའེ༌ ཕ༌མེས༌པོ༌གུན༌ནི༌ སྡིག༌པ༌ ཅོས༌ཏེ༌ ཡེ༌རུ༌ཤ༌ལེམ༌མི༌ གྱལ༌ས༌ དང༌ ཉེ༌རང༌ངི༌ མི༌གུན༌ལ༌ ཉེ༌ཁོར༌རི༌ གྱལ༌ཁམས༌གུན༌ནི༌ ཚིག༌ ཏང༌ང༌ནོག༌།”
17“ཏ༌ ང༌ཞའེ༌ དཀོན༌མཆོག༌, ངའེ༌ མོས༌ལམ༌ དང༌ ཞུ༌ཝ༌ གུན༌ སན༌ན༌ ཛད༌། ཉེ༌རང༌ངི༌ ཏོན༌ལ༌ གཙོ༌བོ༌ལེ༌, ཁྲེས༌ཏོར༌ ཆའ༌ཁན༌ནི༌ ཉེ༌རང༌ངི༌ ཆོད༌ཁང༌ངི༌ཀ༌ ཡང༌སྐྱར༌ ཐུག༌རྗེ༌ ཟིགས༌ས༌ ཛད༌། 18ང༌ཞའེ༌ དཀོན༌མཆོག༌, གུའ༌ཛད༌ཏེ༌ ཉན༌ན༌ ཛད༌དའང༌; མིག༌ ཕེའ༌ ཛད༌ཏེ༌ ཉེ༌རང༌ངི༌ ཚན༌ ནམས༌ཁན༌ནི༌ གྱལ༌ས༌ ཞིག༌ཁན༌བོའ༌ ཟིགས༌སའང༌། ང༌ཞ༌གུན༌ ཀྲང༌པོ༌ ཨིན༌ཅེས༌པའེ༌ མན༌པ༌ ཉེ༌རང༌ངི༌ སྙིང༌རྗེ༌ ཀྲག༌པོའེ༌ ཞས༌ཏེ༌ ངའེ༌ ཞུ༌ཝ༌ ཕུལ༌ལད༌། 19གཙོ༌བོ༌ལེ༌, གཙོ༌བོ༌ལེ༌ ཤགས༌པ༌ ཛད༌དའང༌། གཙོ༌བོ༌ལེ༌ ཉན༌ན༌ ཛད༌ཏེ༌ ལག༌ལེན༌ ཛད༌དའང༌། ཉེ༌རང༌ངི༌ ཏོན༌ལ༌ གཙོ༌བོ༌ལེ༌, གོར༌ ཅུག༌ག༌ མ༌ཛད༌ ཅིའ༌ཟེར༌ན༌ ཉེ༌རང༌ངི༌ གྱལ༌ས༌ དང༌ མི༌གུན༌ནི༌ ཉེ༌རང༌ངི༌ ཚན༌ ནམས༌ཏེ༌ ཨིན༌ནོག༌།”
ལྡམ༌མ༌ ཛད༌ཁན༌ ཏམ༌པ༌བོའེ༌ སྐོར༌ལ༌ གབ༌རི༌ཨེལ༌ལི༌ ལོན༌ ཁྱོངས༌།
9:20-27
20ངའེ༌ མོས༌ལམ༌ ཞུ༌ཨིན༌ ང༌རང༌ དང༌ ཨིས༌ར༌ཨེལ༌པ༌གུན༌ནི༌ སྡིག༌པ༌གུན༌ ཤད༌ཨིན༌ ཡ༌ཝ༌ དཀོན༌མཆོག༌ག༌ ཏམ༌པའེ༌ རིའི༌ཀ༌ ཁོང༌ངི༌ ཆོད༌ཁང༌ངི༌ ཕིའ༌ ཞུ༌ཝའ༌ ཕུལ༌ཨིན༌ ཡོད༌ ཟ༌ནེ༌ 21སྔོན༌ནི༌ ལྟས༌སི༌ ནང༌ང༌ ངའ༌ ཇལ༌ཁན༌ ཕོ༌ཉ༌ གབ༌རི༌ཨེལ༌, ཕི༌ཏོག༌གི༌ ཆོད༌པ༌ ཕུལ༌ཅེས༌སི༌ ཏུས༌ལ༌ ང༌ ཡོད༌ས༌ སྐྱོདས༌། 22ཁོང༌ངི༌ ང༌ མོལ༌ལ༌ རག༌, “དཱ༌ནི༌ཨེལ༌ ང༌ དཀོན༌མཆོག༌གི༌ ལུང༌སྟོན༌པ༌ ཡེ༌རེམ༌ཡཱའི༌ སལ༌ཁན༌ནི༌ ལོན༌བོའེ༌ ཏོན༌ སལ༌པོ༌ ཅོས༌ཏེ༌ ཁྱོ༌རང༌ང༌ ཧ༌གོ༌ ཅུག༌ག༌ ཡོངས༌པིན༌། 23ཁྱོ༌རང༌ངི༌ མོས༌ལམ༌ ཞུ༌ཅེས༌ གོ༌ཟུག༌ག༌ཅིག༌ བཀའ༌ཞིག༌ སལས༌། ང༌ ཏེ༌བོ༌ ཁྱོ༌རང༌ང༌ ཤད༌ད༌ ཡོངས༌པིན༌ ཅིའ༌ཟེར༌ན༌ ཁྱོ༌རང༌ དཀོན༌མཆོག༌གི༌ ཕིའ༌ མ༌ རིན༌ཅན༌ ཨིན༌ནོག༌། ཏེ༌བོའེ༌ཕིའ༌ ལོན༌བོ༌ ཉོན༌ ཡང༌ ཡེ༌རེམ༌ཡཱའི༌ སལ༌ཁན༌ནི༌ ལོན༌བོ༌ ཧ༌གོ༌།”
24“ཁྱོ༌རང༌ངི༌ མི༌གུན༌ དང༌ ཏམ༌པ༌ གྱལ༌སའེ༌ དཀོན༌མཆོག༌ག༌ གྱབ༌གལ༌ ཅོ༌ཅེས༌ མེད༌ཁན༌ ཆ༌ཅེས༌, ཁོང༌གུན༌ནི༌ སྡིག༌པའེ༌ སྐྱོན༌ མེད༌ཁན༌ ཅོས༌ཏེ༌ རྩང༌མ༌ ཅོ༌ཅེས༌, ཐའ༌མེད༌པའེ༌ ཀྲང༌པོ༌ ཁྱོང༌ཅེས༌, ཡེ༌རེམ༌ཡཱའི༌ ལུང༌སྟན༌པོ༌ དྲན༌དྲའ༌ གྲུབ༌བ༌ ཛད༌ཅེས༌ ཡང༌ ཚང༌མའེ༌ སང༌ ཏམ༌པ༌ ནས༌ས༌ རྩང༌མ༌ ཛད༌ཅེས༌ལ༌ ལོ༌ རྡུན༌ཅུ༌ ལྡབ༌ རྡུན༌ གོར༌ཅེས༌ ཐག༌ཅད༌ ཛདས༌། 25ཏ༌ ཉོན༌ ཡང༌ ཧ༌གོ༌། ཡེ༌རུ༌ཤ༌ལེམ༌མི༌ གྱལ༌ས༌ ཡང༌སྐྱར༌ རྩིག༌ཅེས༌ལ༌ བཀའ༌ ཏངས༌ཏེ༌ སྟིང༌ནེ༌ ལྡམ༌མ༌ ཛད༌ཁན༌ ཝང༌སྲུལ༌པ༌ སྐྱོད༌ཅེས༌ལ༌ རྡུན༌ ལྡབ༌ རྡུན༌ དང༌ དྲུག༌ཅུ༌རག༌ཉིས༌ ལྡབ༌ རྡུན༌ ལོ༌ གོར༌ཨིན༌། ཏུས༌ ཀགས༌པོ༌ ཡོད༌ནའང༌ ལམ༌གུན༌ དང༌ སྲུང༌སྐྱོབ༌ སྟན༌པོ༌ཅན༌ ཡེ༌རུ༌ཤ༌ལེམ༌ ཡང༌སྐྱར༌ རྩིག༌ཨིན༌།”
26དྲུག༌ཅུ༌རག༌ཉིས༌ ལྡབ༌ རྡུན༌ ལོའེ༌ སྟིང༌ནེ༌ ལྡམ༌མ༌ ཛད༌ཁན༌བོ༌ སད༌ཏེ༌ ཅའང༌མི༌ཏང༌ ཡང༌ ཡོང༌ཅེས༌ཅན༌ ཝང༌སྲུལ༌པའེ༌ མི༌གུན༌ནི༌ ཏམ༌པ༌ གྱལ༌ས༌ དང༌ ཆོད༌ཁང༌ མེད༌ཁན༌ ཅོ༌ཨིན༌། སྟིང༌ཇུག༌པོ༌ མ༌ གྱོགས༌པ༌ ཆུ༌ལོག༌ ཙོགས༌ལ༌ ཡོང༌ཨིན༌: དཀོན༌མཆོག༌གི༌ བཀའ༌ སལ༌ཁན༌ ནང༌ཞིན༌ ཏེ༌བོ༌ མག༌ དང༌ ཁྲེས༌ཏོར༌ ཅོ༌ཅེས༌སི༌ གོ༌ཟུག༌པོ༌ ཨིན༌ནོག༌། 27ཝང༌སྲུལ༌ཁན༌བོའེ༌ མི༌གུན༌ ཉམ༌པོ༌ ལོ༌ རྡུན༌ནི༌ ཕིའ༌ ཆད༌དོན༌ ཅོ༌ཨིན༌ ཨིན༌ནའང༌ ཏེ༌ ཏུས༌པོ༌ ཕེད༌ ཆའ༌ཅིག༌ ཁོའེ༌ ཆོད༌པ༌ དང༌ བུལ༌དུད༌ ཕུལ༌ཅེས༌ལ༌ སྒག༌ཞའ༌ ཏངས༌ཏེ༌ ཆོད༌ཁང༌ངི༌ ཏམ༌པ༌ ནས༌སའེ༌ཀ༌ ཁམ༌ལོག༌ ཚི༌ཏུ༌ ཅོ༌ཁན༌བོ༌ བོར༌ཨིན༌ ཡང༌ ཏེ༌བོ༌ ཏེན༌ནེ༌ཀ༌ ལུས༌ཨིན༌ ནམ༌ཚག༌པ༌ དཀོན༌མཆོག༌གི༌ ཏེ༌ ཝང༌སྲུལ༌ཁན༌བོ༌ མེད༌ཁན༌ མི༌ཛད༌།”
Currently Selected:
དཱ༌ནི༌ཨེལ༌ 9: lbj
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
