དཱ༌ནི༌ཨེལ༌ 8

དཱ༌ནི༌ཨེལ༌ལི༌ ཞལ༌ཟིགས༌སི༌ ནང༌ང༌ ར༌བོ༌ དང༌ ལུག༌ཕོ༌།

8:1-14

1གྱལ༌པོ༌ བེལ༌ཤའེ༌ཟར༌རི༌ ཝང༌སྲུལ༌ལི༌ ལོ༌ སུམ༌པའེ༌ ནང༌ང༌ ང༌, དཱ༌ནི༌ཨེལ༌ལ༌ ཡང༌སྐྱར༌ ཞལ༌ཟིགས༌ཤིག༌ ཐོང༌། 2ཏེ༌ ཞལ༌ཟིགས༌པོའེ༌ ནང༌ང༌ ང༌ ཨེ༌ལམ༌ ཡུལ༌ཇོངས༌སི༌ གྱང༌སྐོར༌ ཐོན༌པོ༌ ཡོད༌སའེ༌ གྱལ༌ས༌ སུ༌སཱའེ༌ ནང༌ང༌ ཨུ༌ལཱའེ༌ ཡུ༌རའེ༌ ཐའ༌མའ༌ ལངས༌ཏེ༌ དུག༌པིན༌། 3ངའེ༌ ཀེན༌ལ༌ ལྟའ༌ཅིག༌ ངའ༌ རཱ༌ཅོ༌ རིང༌མོ༌ ཉིས༌ ཡོད༌ཁན༌ ལུག༌ཕོ༌ཞིག༌ ཡུ༌རའེ༌ ཐའ༌མའ༌ ལངས༌ཏེ༌ ཐོང༌། སྟིང༌ནེ༌ སྐྱེ༌ཁན༌ནི༌ རཱ༌ཅོ༌ སྔུན༌ལ༌ སྐྱེ༌ཁན༌བོའེ༌ སང༌ རིང༌ང༌ དུག༌པིན༌། 4ལུག༌ཕོ༌བོའེ༌ ནུབ༌, བྱང༌ དང༌ ལྷོ༌ ཆོགས༌ ཚང༌མ༌ ནོལ༌ཅེས༌ལ༌ གྱུགས༌ ཡང༌ ཁོའེ༌ དུན༌ལ༌ སེམས༌ཅན༌ ཅིག༌གའང༌ ལངས༌ མ༌ཉན༌ ཡ༌ མ༌སྐྱོན༌ ཆ༌ཅེས༌ནེ༌ སྐྱོབ༌ མ༌ཉན༌། ཏེ༌ ལུག༌ཕོ༌བོའེ༌ ཁོ༌རང༌ ཐད༌ཁན༌བོ༌ ཅོས༌ ཡང༌ ཀྲག༌པོ༌ གྱུར༌།

5ངའེ༌ ཏེ༌བོ༌ ལྟེན༌ ཡོད༌ ཟ༌ནེ༌ ཧུན༌མེད༌ལ༌ མིག༌གུན༌ནི༌ པར༌ལ༌ རཱ༌ཅོ༌ ཆེན༌མོ༌ ཡོད༌ཁན༌ནི༌ ར༌བོ༌ཞིག༌ ནུབ༌ ཆོགས༌ནེ༌ བིང༌ཏེ༌ རྐང༌པ༌ སའ༌ མ༌ཐུག༌ཁན༌ ཙོགས༌ འི༌ཟམ༌ གྱོགས༌པ༌ ཇིག༌རྟེན༌ གང༌པོའེ༌ཀ༌ བང༌ཏང༌ཨིན༌ ཐོང༌། 6ཁོ༌ ངའ༌ ཡུ༌རའེ༌ དུན༌ལ༌ ལངས༌ཏེ༌ ཐོང༌ཁན༌ རཱ༌ཅོ༌ ཉིས༌ ཡོད༌ཁན༌ནི༌ ལུག༌ཕོ༌ ཡོད༌ས༌ གྱུགས༌ཏེ༌ སོང༌། 7ར༌བོའེ༌ ལུག༌ཕོ༌བོའ༌ གོ༌ཙུག༌ སྲན༌ཏྲེ༌ ཏངས༌ཏེ༌ ཁོའེ༌ རཱ༌ཅོ༌ ཉིས༌ཀོ༌ ཅགས༌། ལུག༌ཕོ༌ ཤེད༌མེད༌ གྱུར༌ཏེ༌ ར༌བོའེ༌ གྱབ༌གལ༌ལ༌ ནོལ༌ མ༌ཉན༌། ར༌བོའེ༌ ལུག༌ཕོ༌ སའེ༌ཀ༌ ལྡབས༌ཏེ༌ ཁོ༌རང༌ངི༌ ཀང༌པའེ༌ ཡོག༌ག༌ ནནས༌ ཡང༌ སུའང༌ ཁོ༌ ར༌བོའེ༌ ཀ༌ནེ༌ སྐྱོབ༌ མ༌ཉན༌། 8ར༌བོ༌ མ༌ ཤེད༌ཅན༌ གྱུར༌ ཡང༌ ཁོའེ༌ ཝང༌སྲུལ༌བོ༌ ཚང༌མའེ༌ སང༌ ཤེད༌ཅན༌ ཡོད༌དི༌ ཏུས༌ལ༌ ཁོའེ༌ རཱ༌ཅོ༌ ཆག༌། ཏེ༌བོའེ༌ ཚབས༌ལ༌ ཇིག༌རྟེན༌ནི༌ ཆོགས༌ ཞི༌ཀོ༌ ཆོགས༌ལ༌ ཆའ༌ཁན༌ནི༌ རཱ༌ཅོ༌ ཤེད༌ཅན༌ ཆེན༌མོ༌ ཞི༌ སྐྱེས༌།

9ཏེན༌ན༌ ཅིག༌གི༌ ནང༌ནེ༌ ཡང༌ རཱ༌ཅོ༌ ཆུ༌ངུན༌ཞིག༌ བིང༌ ཀ༌བོ༌ ཤར༌ དང༌ ནུབ༌ ཡང༌ ལྡེ༌མོ༌ ས༌ཀྱད༌ ཡང༌ན༌ ཨིས༌ར༌ཨེལ༌ གུན༌ ཆོགས༌ལ༌ མ༌ ཤེད༌ཅན༌ གྱུར༌། 10ཏེ༌བོའེ༌ ཤེད༌པོ༌ ནམ༌ཁའ༌ ཚག༌པ༌ ལེབ༌ ཡང༌ ཁོའེ༌ ནམ༌ཁའེ༌ མག༌མི༌ དང༌ སྐར༌མ༌ ཁ༌ཅིག༌ ཇིག༌རྟེན༌ནི༌ཀ༌ ཕངས༌ཏེ༌ ཀང༌པའེ༌ ཡོག༌ག༌ ནནས༌། 11ཁོའེ༌ ནམ༌ཁའེ༌ མག༌མི༌ གྱལ༌ལུའི༌ སང༌ ཁོ༌རང༌ ཀྲག༌ག༌ ཐེས༌ཏེ༌ ཁོང༌ང༌ ཕུལ༌ཁན༌ནི༌ ཆོད༌པ༌གུན༌ ཕུལ༌ མ༌ཅུགས༌ ཡང༌ ཆོད༌ཁང༌ངི༌ ནས༌ས༌ ཚི༌ཏུ༌ གྱུར༌ཅུགས༌། 12ཏེ༌བོའེ༌ ཞས༌ཏེ༌ ནམ༌ཁའེ༌ མག༌མི༌གུན༌ ཁོའེ༌ ལག༌ག༌ སྟད༌ཏེ༌ ཆོད༌པ༌གུན༌ ཁོའ༌ ཕུལ༌ཅུག༌ག༌ ཛདས༌། ཁོ༌ ཅི༌ ཚང༌མའེ༌ ནང༌ང༌ ཡར༌གྱས༌ ཅོ༌ཨིན༌ སོང༌ཏེ༌ ཀྲང༌པོ༌ ལས༌གུན༌ མེད༌ཁན༌ ཅོས༌།

13ཏེ༌ནེ༌ ང༌ ཏམ༌པ༌ ཕོ༌ཉ༌ ཉིས༌སི༌ ཞལ༌ཏ༌ སལ༌ཨིན༌ ཚོར༌། ཁོང༌ ཅིག༌པོའེ༌ ཞན༌ ཅིག༌པོའ༌ མོལས༌, “འི༌ ཞལ༌ཟིགས༌པོ༌ གྲུབ༌ཅེས༌ལ༌ ཏུས༌ ཙམ༌ཤིག༌ གོར༌ཅེས༌ ཨིན༌ནོག༌? ནམ༌ ཚག༌པ༌ དཀོན༌མཆོག༌ག༌ གྱབ༌གལ༌ ཅོ༌ཁན༌བོའེ༌ ཆོད༌ཁང༌ངི༌ ནང༌ང༌ ཚི༌ཏུ༌ བོར༌ཏེ༌ བླ༌མ༌གུན༌ལ༌ ཆོད༌པ༌ ཕུལ༌ མི༌ཅུག༌? ཁོའེ༌ ནམ༌ཁའེ༌ མག༌མི༌གུན༌ ཀང༌པའེ༌ ཡོག༌ག༌ བོར༌ཏེ༌ ཆོད༌ཁང༌ ཁོའེ༌ ཝང༌ངི༌ ཡོག༌ག༌ ནམ༌ ཚོག༌པ༌ ལུས༌ཨིན༌?” 14ཞན༌ ཏམ༌པ༌ ཕོ༌ཉ༌བོའེ༌ མོལས༌, “2,300 ང༌མོ༌ དང༌ ཕི༌ཏོག༌གི༌ སྟིང༌ནེ༌ ཆོད༌ཁང༌ ཡང༌སྐྱར༌ ཏམ༌པ༌ ཛད༌ཨིན༌།”

ཞལ༌ཟིགས༌སི༌ ཏོན༌།

8:15-27

15ང༌, དཱ༌ནི༌ཨེལ༌ལི༌ ཞལ༌ཟིགས༌པོ༌ ཧ༌གོ༌ཅེས༌སི༌ རྩོན༌གྲུས༌ ཅོ༌ཨིན༌ ཡོད༌ ཟ༌ནེ༌ ངའེ༌ དུན༌ལ༌ མི༌ ཙོགས༌ ཐོང༌ཁན༌ནི༌ ཕོ༌ཉ༌ཞིག༌ ཞངས༌ཏེ༌ ཞུགས༌། 16ཡང༌ ངའ༌ ཨུ༌ལཱའེ༌ ཡུ༌རའེ༌ ནང༌ནེ༌, “གྱེབ༌རི༌ཨེལ༌ འི༌ མི༌བོའ༌ ཞལ༌ཟིགས༌སི༌ ཏོན༌བོ༌ ཤོད༌” མོལ༌ཨིན༌ ཚོར༌།

17ཁོང༌ ངའེ༌ དུན༌ལ༌ སྐྱོད༌ ཟ༌ནེ༌ ང༌ སྲན༌ཏྲེ༌ ཇིགས༌ཏེ༌ སའེ༌ཀ༌ གྱེལ༌ ཨིན༌ནའང༌ ཁོང༌ངི༌ ང༌ མོལས༌, “མིའི༌ ཕྲུ༌གུ༌, འི༌ ཞལ༌ཟིགས༌ ཐའ༌མའེ༌ ཏུས༌སི༌ སྐོར༌ལ༌ ཨིན༌ཁན༌ ཁོ༌རང༌ང༌ ཧ༌གོ༌ གོས༌།”

18ཁོང༌ངི༌ ཞལ༌ཏ༌ སལ༌ ཟ༌ནེ༌ ང༌ མུན༌ཏེ༌ སའེ༌ཀ༌ གྱེལ༌། ཏེ༌ནེ༌ ཁོང༌ངི༌ ཆག༌རྩེའ༌ ཛད༌ཏེ༌ ང༌ ལང༌ཅེས༌ལ༌ རོགས༌ ཛདས༌།

19ཁོང༌ངི༌ མོལས༌, “དཀོན༌མཆོག༌ག༌ ཐུག༌སྲོ༌ སྐྱོད༌དི༌ ཏུས༌ལ༌ ཇུང༌ཅེས༌ཅན༌གུན༌ ངའེ༌ ཁྱོ༌རང༌ང༌ ཤད༌ཨིན༌། འི༌གུན༌ ཇིག༌རྟེན༌ནི༌ ཐའ༌མའེ༌ ཏུས༌ལ༌ ཇུང༌ཨིན༌། 20རཱ༌ཅོ༌ ཉིས༌ ཡོད༌ཁན༌ནི༌ ལུག༌ཕོ༌ ནི༌ མེ༌དིའ༌པ༌ དང༌ པར༌ཤིའ༌པ༌ གྱལ༌པོ༌གུན༌ ཨིན༌ནོག༌། 21ར༌བོ༌ གརིས༌སི༌ གྱལ༌སྲིད༌ ཡང༌ ཁོའེ༌ མིག༌གུན༌ནི༌ པར༌རི༌ རཱ༌ཅོ༌ གྱལ༌པོ༌ ཏང༌པོ༌བོ༌ ཨིན༌ནོག༌། 22ཏེ༌བོའེ༌ ཚབས༌ལ༌ རཱ༌ཅོ༌ ཞི༌ སྐྱེ༌ཁན༌ནི༌ ཏོན༌བོ༌, ཏེ༌ གྱལ༌སྲིད༌པོའ༌ ཁག༌ ཞི༌ བུད༌ཅེས༌ ཨིན༌ནའང༌ ཁོང༌ ཅིག༌གའང༌ གྱལ༌པོ༌ ཏང༌པོ༌ ཙོགས༌ ཀྲག༌པོ༌ མི༌ཡོང།

23ཏེ༌ ཝང༌སྲུལ༌ལི༌ སྟིང༌ཇུག༌གི༌ ཏུས༌ ནམ༌ ངན༌པ༌ ཚད༌ནེ༌ ཐལ༌ཏེ༌ གྱས༌ས༌ཅིག༌ གོབ༌སྐོར༌ཁན༌, ཕོ༌སོ༌ཅན༌ མ༌ ངན༌པ༌ གྱལ༌པོ༌ཞིག༌ བིང༌ཨིན༌། 24ཁོ༌ མ༌ ཤེད༌ཅན༌ གྱུར༌ཨིན༌ ཨིན༌ནའང༌ ཁོ༌རང༌ངི༌ ཁྱུད༌དི༌ ཞས༌ཏེ༌ མི༌གྱུར༌། ཁོའེ༌ གྱལ༌སྲིད༌ མང༌པོ༌ ཁྲེས༌ཏོར༌ ཅོ༌ཨིན༌ ཡང༌ ཁོའེ༌ ཅོ༌ཁན༌ནི༌ ལས༌ ཚང༌མའེ༌ ནང༌ང༌ ཁོ༌ ཁྲངས༌པོ༌ ལུས༌ཨིན༌། ཁོའེ༌ ཤེད༌ཅན༌ མི༌གུན༌ དང༌ དཀོན༌མཆོག༌གི༌ ཏམ༌པ༌ མི༌གུན༌ མེད༌ཁན༌ ཅོ༌ཨིན༌། 25ཁོའེ༌ ངན༌པ༌ ཏར༌ ཅུགས༌ཏེ༌ ཁོ༌ མ༌ ཕོ༌སོ༌ཅན༌ གྱུར༌ཨིན༌། ཞི༌དེ༌ ཡོད༌དི༌ ཏུས༌ ཧུན༌མེད༌ལ༌ ཁོའེ༌ མི༌མང༌པོ༌ སད༌ཏེ༌ གྱལ༌པོ༌གུན༌ནི༌ གྱལ༌པོའ༌ གྱབ༌གལ༌ ཅོ༌ཨིན༌། ཨིན༌ནའང༌ མི༌ ཤེད༌ གྱུད༌ཏེ༌ མན༌པ༌ དཀོན༌མཆོག༌ ཁོང༌རང༌ངི༌ ཁོ༌ མེད༌ཁན༌ ཛད༌ཨིན༌།”

26“ང༌མོ༌ དང༌ ཕི༌ཏོག༌གི༌ ཞལ༌ཟིགས༌ ཐོང༌ཁན༌བོ༌ ཀྲང༌པོ༌ ཨིན༌ནོག༌ ཨིན༌ནའང༌ ཏེ༌བོ༌ ཏུས༌རིང༌མོའེ༌ སྟིང༌ནེ༌ མན༌ནེ༌ ཇུང༌ཅེས༌ མན༌ པ༌སང༌ ཏེ༌བོ༌ སང༌ཝའེ༌ ནང༌ང༌ བོར༌།”

27ང༌, དཱ༌ནི༌ཨེལ༌ མ༌ སྲན༌ཏྲེ༌ ངལ༌ ཡང༌ ཞག༌ ཁ༌ཅིག༌ ཟུ༌མོ༌ ཡོངས༌ཏེ༌ ལུས༌། ཟུ༌མོ༌ གྱལ༌ཏེ༌ སྟིང༌ནེ༌ ངའེ༌ ཡང༌སྐྱར༌ གྱལ༌པོའེ༌ ཞབ༌ཞི༌ ཞུ༌ཅེས༌ གོ༌ཟུག༌ ཅོས༌པིན༌། ཏེ༌ ཞལ༌ཟིགས༌པོའེ༌ ང༌ ཧ༌ལས༌ཏེ༌ ཐེ༌ཚོམས༌ ཆ༌ཅུགས༌ ཡང༌ ཏེ༌བོ༌ ངའེ༌ ཧ༌གོ༌ནེ༌ ཐལ༌ཏེ༌ དུག༌པིན༌།

Currently Selected:

དཱ༌ནི༌ཨེལ༌ 8: lbj

Highlight

Copy