དཱ༌ནི༌ཨེལ༌ 7
7
དཱ༌ནི༌ཨེལ༌ལི༌ ཉི༌ལམ༌།
7:1-14
1བ༌བེ༌ལོན༌ནི༌ གྱལ༌པོ༌ བེལ༌ཤའེ༌ཟར༌རི༌ ཝང༌སྲུལ༌ལི༌ གོ༌མའེ༌ ལོའེ༌ ནང༌ང༌ དཱ༌ནི༌ཨེལ༌ལ༌ ཉི༌ལམ༌ཞིག༌ ཐོང༌། ཁོ༌ མལ༌ཙའེ༌ཀ༌ ཡོད༌ ཟ༌ནེ༌ ཁོའ༌ ཞལ༌ཟིགས༌ཤིག༌ ཐོང༌ ཡང༌ ཁོའེ༌ ཏེ༌ ནང༌ང༌ ཐོང༌ཁན༌གུན༌ བྲིས༌། 2དཱ༌ནི༌ཨེལ༌ལི༌ བྲིས༌, “ཚན༌ལ༌ ངའ༌ ཐོང༌ཁན༌ནི༌ ཉི༌ལམ༌མི༌ ནང༌ང༌, ཆོགས༌ ཞི༌ཀོ༌ནེ༌ ལུངས༌པོ༌ ཀྲག༌པོ༌ ཡོངས༌ཏེ༌ གྱ༌ཚོའེ༌ ཆུ༌ སྲན༌ཏྲེ༌ སྲུག༌ དུག༌པིན༌། 3གྱ༌ཚོའེ༌ ནང༌ནེ༌ ཇིགས༌ནང༌ཅན༌ནི༌ སེམས༌ཅན༌ ཞི༌ བིངས༌ཏེ༌ ཡོངས༌ ཡང༌ ཏེ༌གུན༌ སོ༌སོ༌, ཅིག༌གའང༌ ཙོགས༌ མི༌དུག༌པིན༌།”
4“སེམས༌ཅན༌ ཏང༌པོ༌ ལག༌གི༌ ཤོག༌པ༌ ཡོད༌ཁན༌ སིང༌གེ༌ ཙོགས༌ དུག༌པིན༌། ངའེ༌ ལྟེན༌ ཡོད༌ཏུས༌ ཏེ༌བོའེ༌ ཤོག༌པ༌ ཀོགས༌ཏེ༌ ཕེས༌ ཡང༌ ཏེ༌བོ༌ མི༌ ཙོགས༌ལ༌ གྱབ༌བི༌ ཀང༌པའེ༌ཀ༌ ལངས༌ཏེ༌ དུག༌ཅུགས༌། ཏེ༌བོའ༌ མི༌ ལྡད༌པ༌ ཏངས༌།”
5“སེམས༌ཅན༌ ཉིས༌པ༌ དྲེན༌མོ༌ ཙོགས༌, པིག༌མོའེ༌ཀ༌ ལངས༌ཏེ༌ སོའེ༌ པར༌ལ༌ རྩིབ༌མའེ༌ རུས༌པ༌ སུམ༌ ཁུར༌ཏེ༌ དུག༌པིན༌ ཡང༌ སྐད༌ཅིག༌གི༌ ཏེ༌བོའ༌, ‘ལོངས༌, མི༌ མང༌པོ༌ སད༌ཏེ༌ ཟའ༌ ཉན༌ཁན༌ ཟོ༌’ ཟེར༌ཁན༌བོ༌ ངའ༌ ཚོར༌།”
6“ལྟེན༌ ཡོད༌ཏུས༌ སེམས༌ཅན༌ སུམ༌པ༌ བིང༌ཏེ༌ ཡོངས༌ ཡང༌ ཏེ༌བོ༌ ཤན༌ ཙོགས༌ དུག༌། ཏེ༌ སེམས༌ཅན༌ནི༌ གྱབ༌པོའེ༌ཀ༌ ཅི༌པའེ༌ ཤོག༌པ༌ ཞི༌ དང༌ གོ༌ ཞི༌ དུག༌ ཡང༌ ཏེ༌བོའ༌ ཝང༌སྲུལ༌ཅེས༌སི༌ ཝང༌ཆ༌ ཏངས༌།”
7“ཏེ༌ནེ༌ ངའ༌ སེམས༌ཅན༌ ཞི༌པ༌ ཐོང༌། ཏེ༌བོ༌ མ༌ ཇིགས༌ནང༌ཅན༌ དང༌ ཇིགས༌པ༌ ཡང༌ མ༌ ཤེད༌ཅན༌ དུག༌པིན༌། ཏེ༌བོའ༌ ལྕགས༌སི༌ སོ༌ ཆེན༌མོ༌ ཀ༌བོའེ༌ ཅི༌ཚང༌མ༌ ཅད༌ཏེ༌ སྟུབས༌ཏེ༌ ཟོས༌ཏེ༌ ལུས༌ཁན༌བོ༌ ཀང༌པའེ༌ ཐིལ༌ལ༌ ཉེས༌ཏེ༌ མེད༌ཁན༌ ཅོ༌ དུག༌པིན༌། ཞི༌པ༌བོ༌ ཞན༌གུན༌ནི༌ སང༌ སོ༌སོ༌, ཏེ༌བོའ༌ རཱ༌ཅོ༌ རྕུ༌ དུག༌པིན༌།”
8“ཏེ༌ རཱ༌ཅོ༌གུན༌ནི༌ སྐོར༌ལ༌ སམ༌བ༌ ཏང༌ཨིན༌ ཡོད༌ཏུས༌ ཏེ༌གུན༌ནི༌ ཕྲོ༌ནེ༌ ཡང༌ རཱ༌ཅོ༌ ཆུ༌ངུན༌ཞིག༌ བིང༌ཏེ༌ སྔུན༌ནི༌ རཱ༌ཅོ༌ སུམ༌བོ༌ པ༌ཀྲག༌ནེ༌ མེད༌ཁན༌ ཅོས༌། རཱ༌ཅོ༌ ཆུ༌ངུན༌བོའ༌ མི༌ ཙོགས༌སི༌ མིག༌ ཡང༌ ཕོ༌སོ༌ཅན༌ནི༌ སྤེ༌ར༌ ཏང༌ཁན༌ནི༌ ཁའ༌ དུག༌པིན༌།”
9“ལྟེན༌ ཡོད༌ཏུས༌,
ཁྲིས༌གུན༌ ནས༌སའེ༌ཀ༌ བོརས༌
ཡང༌ ཏུས༌གྱུན༌ སོན༌པོ༌ ཞུགས༌ཁན༌བོ༌ ཁོང༌རང༌ངི༌ ཁྲིས༌སི༌ཀ༌ ཞུགས༌།
ཁོང༌ངི༌ ནམ༌ཟ༌ ཁ༌ ཙོགས༌ ཀར༌པོ༌,
ཁོང༌ངི༌ ཨུ༌སྲ༌ བལ༌ ཙོགས༌ ཀར༌པོ༌,
ཁོང༌ངི༌ ཁྲིས༌ མེའེ༌ མེལ༌ཇབ༌
ཡང༌ ཏེ༌བོའེ༌ ཁོར༌ལོ༌གུན༌ མེའ༌ཞེན༌ དུག༌པིན༌།
10ཁོང༌ངི༌ ནང༌ནེ༌ མེ༌ ལྩངས༌པོ༌
བིངས༌ཏེ༌ གྱུག༌དུག༌པིན༌།
སྟོང༌ཁྲག༌ ཕོ༌ཉ༌གུན༌ནི༌ ཁོང༌ང༌ ཞབ༌ཞི༌ ཞུ༌ དུག༌པིན༌
ཡང༌ བུམ༌ཁྲག༌ མང༌པོའེ༌ ཁོང༌ང༌ ཁོར༌ཏེ༌ དུག༌པིན༌།
ཁྲིམས༌ཁུང༌ངི༌ ལས༌ གོ༌ཟུག༌
ཡང༌ སྤེ༌ཆ༌གུན༌ ཕེས༌།”
11“ངའ༌ རཱ༌ཅོ༌ ཆུ༌ངུན༌ནི༌ ཕོ༌སོ༌ཅན༌ནི༌ སྤེ༌རའ༌ ཏང༌ཅེས༌པའེ༌ ངའེ༌ ཏེ༌བོའ༌ ལྟེན༌ དུགས༌པིན༌། ཏེ༌ ཇིགས༌ནང༌ཅན༌ནི༌ སེམས༌ཅན༌བོ༌ སད༌ཏེ༌ ཁོའེ༌ ཟུགས༌པོ༌ མེ༌ ནང༌ང༌ ཕངས༌ཏེ༌ མེད༌ཁན༌ ཅོ༌ཅོ༌ ང༌ ལྟེན༌ དུགས༌པིན༌། 12ཞན༌ ཇིགས༌ནང༌ཅན༌ནི༌ སེམས༌ཅན༌ སུམ༌ཀོའེ༌ ཝང༌ཆ༌གུན༌ ཀོགས༌ཏེ༌ ཁྱོངས༌ ཨིན༌ནའང༌ ཏེ༌གུན༌ ཏུས༌ བན༌ཤིག༌ སོན༌ཏེའ༌ བོར༌ར༌ ཛད༌།”
13“ཏེ༌ ཚན༌ལ༌ ཞལ༌ཟིགས༌སི༌ ནང༌ང༌ ངའ༌ མི༌རིགས༌སི༌བུ༌ ཙོགས༌ཤིག༌ ནམ༌ཁའ༌ནེ༌ སྲིན༌གུན༌ནི༌ ནང༌ང༌ སྐྱོད༌ཨིན༌ ཐོང༌། ཁོང༌ ཏུས༌གྱུན༌ སོན༌པོ༌ ཞུགས༌ཁན༌བོའེ༌ཀ༌ སྐྱོདས༌ ཡང༌ ཁོང༌ ཁོང༌ངི༌ སྐུན༌དུན༌ལ༌ ཁྱེར༌ར༌ ཛདས༌། 14གྱལ༌ཁམས༌, སྐད༌ དང༌ མི༌ ཚང༌མའེ༌ ཅོལ༌ཅེས༌སི༌ ཕིའ༌ ཁོང༌ངི༌ མི༌རིགས༌སི༌བུའ༌ ཝང༌ཆ༌, སྤལ༌ དང༌ གྱལ༌པོའེ༌ ཝང༌ཆ༌ སལ༌ལ༌ ཛདས༌། ཁོང༌ངི༌ ཝང༌སྲུལ༌ ཏུས༌གྱུན༌ ལུས༌ཨིན༌, མེད༌ཁན༌ མི༌ཆ༌ ཡང༌ ཁོང༌ངི༌ གྱལ༌སྲིད༌ མེད༌ཁན༌ མ༌ནེ༌ ཅོ༌ མི༌ཉན༌།”
ཉི༌ལམ༌མི༌ ཏོན༌།
7:15-28
15“ང༌ དཱ༌ནི༌ཨེལ༌ལ༌ སེམས༌ཉིད༌དི༌ ནང༌ང༌ མ༌སྲན༌ཏྲེ༌ ནགས༌ ཐོང༌ ཡང༌ ཞལ༌ཟིགས༌སི༌ ངའེ༌ སེམས༌ལ༌ རྡུག༌ངལ༌ ཐོང༌ ཅུགས༌། 16ཏེ༌ཀ༌ ཞུགས༌ཏེ༌ ཡོད༌ཁན༌ ཕོ༌ཉ༌ ཅིག༌གི༌ དུན༌ལ༌ ངའ༌ སོང༌ཏེ༌ འི༌ ཚང༌མའེ༌ ཏོན༌ ཏྲིས༌པིན༌།
“ཁོང༌ངི༌ ང༌ ཏེ༌གུན༌ནི༌ ཏོན༌ ཤད༌ད༌ ཛདས༌, 17‘ཇིགས༌ནང༌ཅན༌ནི༌ སེམས༌ཅན༌ ཞི༌ ནི༌ ཇིག༌རྟེན༌ནི༌ཀ༌ ཇུང༌ཅེས༌ཅན༌ གྱལ༌སྲིད༌ ཞི༌ ཨིན༌ནོག༌། 18ཨིན༌ནའང༌ ཀུན༌ཝང༌ དཀོན༌མཆོག༌གི༌ ཏམ༌པ༌ མི༌གུན༌ལ༌ ཁོ༌རང༌གུན༌ནི༌ གྱལ༌སྲིད༌ ཏང༌ཨིན༌ ཡང༌ ཏེ༌བོ༌ ཁོང༌གུན༌ནི༌ ལག༌ག༌ ཏུས༌གྱུན༌ནེ༌གྱུན༌ ལུས༌ཨིན༌, འོ༌ན༌ ཏུས༌གྱུན༌ནེ༌གྱུན༌།’”
19“ཏེ༌ནེ༌ ང༌ སེམས༌ཅན༌ ཞི༌པ༌ ཀ༌བོ༌ ཞན༌གུན༌ནི༌ སང༌ སོ༌སོ༌, མ༌ ཇིགས༌ནང༌ཅན༌, ལྕགས༌སི༌ སོ༌ དང༌ ཀང༌པའེ༌ སེན༌མོ༌གུན༌ ཟངས༌སི༌ ཡོད༌ཁན༌བོའེ༌ ཏོན༌བོ༌ ཧ༌གོ༌ཉིན༌ ཡོད༌པིན༌། ཏེ༌བོའེ༌ ཅི༌ཚང༌མ༌ ཅད༌ཏེ༌ སྟུབས༌ཏེ༌ ཟོས༌ཏེ༌ ལུས༌ཁན༌བོ༌ ཀང༌པའེ༌ ཐིལ༌ལ༌ ཉེས༌ཏེ༌ མེད༌ཁན༌ ཅོ༌ དུག༌པིན༌། 20ཏེ༌བོའེ༌ གོའེ༌ཀ༌ ཡོད༌ཁན༌ རཱ༌ཅོ༌ རྕུ༌ ཡང༌ ར༌ཅོ༌ ཆུ༌ངུན༌ བིང༌ཏེ༌ ཞན༌ རཱ༌ཅོ༌ སུམ༌ མེད༌ཁན༌ ཅོ༌ཁན༌, མི༌ མིག༌ ཙོགས༌ དང༌ ཕོ༌སོ༌ཅན༌ནི༌ སྤེ༌ར༌ ཏང༌ཁན༌ནི༌ ཏོན༌བོའང༌ ངའ༌ ཧ༌གོ༌ཉིན༌ ཡོད༌པིན༌། ཏེ༌བོ༌ ཞན༌གུན༌ནི༌ སང༌ མང༌ང༌ ཇིགས༌ནང༌ཅན༌ ཡོད༌པིན༌། 21ལྟེན༌ ཡོད༌ཏུས༌ ཏེ༌ རཱ༌ཅོའེ༌ དཀོན༌མཆོག༌གི༌ ཏམ༌པ༌ མི༌གུན༌ ཉམ༌པོ༌ མག༌ ཏངས༌ཏེ༌ ཁོང༌གུན༌ལ༌ ཕམ༌ ཀལ༌ལད༌པིན༌, 22ནམ༌ ཚོག༌པ༌ ཏུས༌གྱུན༌ སོན༌པོ༌ ཞུགས༌ཁན༌བོ༌ སྐྱོད༌ཏེ༌ ཀུན༌ཝང༌ དཀོན༌མཆོག༌གི༌ ཏམ༌པ༌ མི༌གུན༌ནི༌ ཆོག༌སྐྱོར༌ལ༌ ཐག༌ཅད༌ མ༌སལས༌། ཏེ༌ནེ༌ ཁོང༌གུན༌ནི༌ གྱལ༌སྲིད༌ ལེན༌ཅེས༌སི༌ ཏུས༌པོ༌ ལེབ༌།”
23“ཁོང༌ངི༌ ང༌ ཏོན༌བོ༌ ཤད༌ད༌ ཛདས༌, ‘སེམས༌ཅན༌ ཞི༌པ༌ ཇིག༌རྟེན༌ནི༌ཀ༌ ཇུང༌ཅེས༌ཅན༌ གྱལ༌སྲིད༌ ཞི༌པ༌བོ༌ ཨིན༌ནོག༌། ཏེ༌བོ༌ ཞན༌ གྱལ༌སྲིད༌གུན༌ནི༌ སང༌ སོ༌སོ༌ ཡང༌ ཏེ༌བོའེ༌ ཇིག༌རྟེན༌ གང༌པོ༌ ཅད༌ཏེ༌ སྟུབས༌ཏེ༌ མེད༌ཁན༌ ཅོ༌ཨིན༌། 24རཱ༌ཅོ༌ རྕུ༌བོ༌ ཏེ༌ གྱལ༌སྲིད༌དི༌ ནང༌ནེ༌ བིང༌ཁན༌ གྱལ༌པོ༌ རྕུ༌ ཨིན༌ནོག༌། ཁོང༌གུན༌ནི༌ སྟིང༌ནེ༌ ཞན༌ གྱལ༌པོ༌ སོ༌སོ༌ཞིག༌ བིང༌ཨིན༌ ཀ༌བོའེ༌ ཁོང༌གུན༌ནི༌ ཕྲོ༌ནེ༌ སུམ༌མ༌ ཕམ༌ཀལ༌ཏེ༌ མེད༌ཁན༌ ཅོ༌ཨིན༌། 25ཀུན༌ཝང༌ དཀོན༌མཆོག༌གི༌ གྱབ༌གལ༌ལ༌ ཟེར༌ཏེ༌ ཁོའེ༌ ཁོང༌ངི༌ ཏམ༌པ༌ མི༌གུན༌ལ༌ ནགས༌ སྟན༌ཨིན༌ ཡང༌ ལྡམ༌མ༌ ཛད༌ཁན༌ནི༌ ཏུས༌ དང༌ ཁྲིམས༌ གུན༌ གྱུར༌ཅེས༌སི༌ རྩོན༌གྲུས༌ ཅོ༌ཨིན༌། ཏམ༌པ༌ མི༌གུན༌ ཁོའེ༌ ལག༌ག༌ སྟད༌ད༌ ཛད༌ཨིན༌ ཡང༌ ཁོའེ༌ ཁོང༌གུན༌ ལོ༌ སུམ༌ ནང༌ ཕེད༌ ཁོ༌རང༌ངི༌ ཝང༌ངི༌ ཡོག༌ག༌ བོར༌ཨིན༌།’”
26“‘ཨིན༌ནའང༌ ནམ༌ཁའེ༌ ཁྲིམས༌ཁུང༌ ཙུགས༌ཏེ༌ ཁོའེ༌ ཀ༌ནེ༌ ཝང༌བོ༌ ཁྱེར༌ཏེ༌ ཏུས༌གྱུན༌ནི༌ ཕིའ༌ མེད༌ཁན༌ ཅོ༌ཨིན༌། 27ཏེ༌ནེ༌ ནམ༌ཁའེ༌ ཡོག༌ག༌ ཡོད༌ཁན༌ གྱལ༌སྲིད༌གུན༌ནི༌ ཝང༌, ཁྱུད༌ དང༌ སྟོབས༌ ཚང༌མ༌, ཀུན༌ཝང༌ དཀོན༌མཆོག༌གི༌ ཏམ༌པ༌ མི༌གུན༌ནི༌ ལག༌ག༌ སལ༌ལ༌ ཛད༌ཨིན༌། ཁོང༌ངི༌ གྱལ༌སྲིད༌ ཏུས༌གྱུན༌ནེ༌གྱུན༌ ལུས༌ཨིན༌ ཡང༌ ཝང༌སྲུལ༌པ༌ ཚང༌མའེ༌ ཁོང༌ངི༌ ཁའ༌ཉན༌ཏེ༌ ཁོང༌ང༌ ཞབས༌ཏོག༌ ཞུ༌ཨིན༌།’”
28“ཞལ༌ཟིགས༌པོའེ༌ ནང༌ང༌ ངའ༌ ཏེན༌ན༌བོ༌ ཐོང༌། ང༌, དཱ༌ནི༌ཨེལ༌ལི༌ སེམས༌ལ༌ སྲན༌ཏྲེ༌ ནགས༌ ཐོང༌ ཡང༌ ངའེ༌ ལྡོང༌ སེར༌པོ༌ གྱུར༌ ཨིན༌ནའང༌ ངའེ༌ ཏེ༌ ཞལ༌ཟིགས༌པོ༌ སུའང༌ མ༌ཤད༌པིན༌།”
Currently Selected:
དཱ༌ནི༌ཨེལ༌ 7: lbj
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
