དཱ༌ནི༌ཨེལ༌ 6
6
སིང༌གེ༌ དོང༌ངི༌ ནང༌ང༌ དཱ༌ནི༌ཨེལ༌།
6:1-28
1གྱལ༌པོ༌ གྲ༌རི༌ཡས༌སི༌ ཁོ༌རང༌ངི༌ གྱལ༌སྲིད༌པོ༌ ཡུལ༌ཇོངས༌ 120 ནང༌ང༌ བགོས༌ ཡང༌ ཏེ༌ རེ༌རེ༌ཀ༌ ཝང༌ སྲུལ༌ཁན༌ནི༌ ཀའ༌ལོན༌ སྐོས༌། 2ཏེ༌ ཀའ༌ལོན༌གུན༌ནི༌ གྱལ༌པོའེ༌ ཕན༌ཐོགས༌སི༌ ཕིའ༌ ལས༌ ཅོ༌ཅེས༌ ཏན༌ཏན༌ ཅོ༌ཅེས༌ལ༌ གྱལ༌པོའེ༌ ལྟའ༌ཁན༌ནི༌ མི༌ སུམ༌ སྐོས༌, དཱ༌ནི༌ཨེལ༌ ཁོང༌གུན༌ནི༌ ནང༌ནེ༌ ཅིག༌ ཨིན༌པིན༌། 3ཏུས༌ ཉུ༌ངུན༌ ཞིག༌གི༌ ནང༌ང༌ དཱ༌ནི༌ཨེལ༌ལི༌ ལས༌ མ༌ གྱལ༌ལ༌ ཅོས༌ཏེ༌ ཁོ༌རང༌ངི༌ ཕྲོ༌པ༌གུན༌ དང༌ ཀའ༌ལོན༌གུན༌ནི༌ སང༌ མང༌ང༌ ཇོན༌པོ༌ ཨིན༌ཁན༌བོ༌ སྟནས༌ ཏེ༌བོའེ༌ཕིའ༌ གྱལ༌པོའེ༌ ཁོ༌ གྱལ༌སྲིད༌ གང༌པོའེ༌ཀ༌ འུ༌སྐྱོང༌ང༌ སྐོ༌ཅེས༌ ཐག༌ཅདས༌། 4ཏེ༌བོའེ༌ ཞས༌ཏེ༌ ཁོའེ༌ ཕྲོ༌པ༌ ཉིས༌ཀོ༌ དང༌ ཀའ༌ལོན༌གུན༌ནི༌ དཱ༌ནི༌ཨེལ༌ལི༌ ལས༌སི༌ ནང༌ང༌ སྐྱོན༌ ཙལས༌ ཨིན༌ནའང༌ ཁོང༌གུན༌ལ༌ ཅའང༌ མ༌ཐོབ༌ ཅིའ༌ཟེར༌ན༌ དཱ༌ནི༌ཨེལ༌ ཨིད༌ཤེས༌ཅན༌, ཁོ༌རང༌ངི༌ ལས༌ལ༌ སྣང༌མེད༌ མ༌ཅོ༌ཁན༌ ཡང༌ ཕག༌སུབ༌བི༌ པེ༌ནེ༌ མ༌ནེ༌ ལེན༌ན༌ མེད༌པིན༌། 5སྟིང༌ཇུག༌ག༌ ཁོང༌གུན༌ནི༌ ཟེརས༌, “ཁོའེ༌ ཁོ༌རང༌ངི༌ དཀོན༌མཆོག༌གི༌ ཁྲིམས༌ མི༌ཅག༌ཅེས༌ མ༌སྟོག༌ ང༌དང༌ང༌ འི༌ མི༌བོའེ༌ ནང༌ང༌ ཅའང༌ སྐྱོན༌ མི༌ ཐོབ༌།”
6ཏེ༌བོའེ༌ཕིའ༌ ཁོའེ༌ ཕྲོ༌པ༌ ཉིས༌ཀོ༌ དང༌ ཀའ༌ལོན༌གུན༌ གྱལ༌པོའེ༌ཀ༌ སོང༌ཏེ༌ ཟེརས༌, “གྱལ༌པོ༌ གྲ༌རི༌ཡས༌སི༌ སྐུ༌ཚེ༌ སྟན༌ཤིག༌། 7ང༌ཞའ༌, ཉེ༌རང༌ངི༌ ལས༌གུན༌ལ༌ ལྟའ༌ཁན༌, ཀའ༌ལོན༌གུན༌, ཁ༌དའ༌ ཏང༌ཁན༌གུན༌ དང༌ སྤོན༌བོ༌ ཚང༌མ༌ ཁའ༌ ཆམས༌ཏེ༌ གྱལ༌པོའ༌ བཀའ༌ཁྲིམས༌ ཤིག༌ སལ༌ཅེས༌ལ༌ ཞུ༌ཝ༌ ཕུལ༌ལད༌། ཡོང༌ཅེས༌ཅན༌ནི༌ ཞག༌ སུམ༌ཅུའི༌ ནང༌ང༌ སུ༌ཞིག༌གི༌ ཉེ༌རང༌ མན༌པ༌ ཞན༌ མི༌ ཡ༌ ལྷ༌ལྷ༌མོ༌ སུ༌ཞིག༌ག༌ ཅོལ༌ན༌ ཏེ༌ མི༌བོ༌ སིང༌གེ༌ དོང༌ངི༌ ནང༌ང༌ ཕང༌ཅེས༌སི༌ བཀའ༌ སལ༌ལ༌ ཛད༌། 8གྱལ༌པོ༌ ཁྱེན༌, ཏེ༌ ཁྲིམས༌པོ༌ བྲི༌ཅེས༌ལ༌ བཀའ༌ སལ༌ ཏེ༌ནེ༌ ཏེ༌བོའ༌ སུ༌ཞིག༌གིའང༌ གྱབ༌གལ༌ ཅོ༌མི༌ཉན༌ ཡང༌ མེ༌དིའ༌པ༌ དང༌ པར༌ཤིའ༌པ༌ གུན༌ནི༌ ཁྲིམས༌ ནང༌ཞིན༌ སུ༌ཞིག༌གིའང༌ ཏེ༌བོ༌ གྱུར༌ མི༌ཉན༌།” 9ཏེ༌ནེ༌ གྱལ༌པོ༌ གྲ༌རི༌ཡས༌སི༌ ཏེ༌ ཁྲིམས༌པོ༌ བྲི༌ ཅུགས༌།
10དཱ༌ནི༌ཨེལ༌ལ༌ གྱལ༌པོའེ༌ བཀའ༌ ཁྲིམས༌པོ༌ གྱུས༌ ཡོད༌ཏེའང༌ ཁོ༌ ཁོ༌རང༌ངི༌ ཁང༌པའེ༌ ཡེ༌རུ༌ཤ༌ལེམ༌ ཆོགས༌ལ༌ ཀར༌ཁུང༌ ཡོད༌ཁན༌ ཁེ༌ཐོག༌གི༌ ནང༌ང༌ སོང༌ ཡང༌ ཏུས༌གྱུན༌ ཙོགས༌ལ༌ ཞག༌ཏང༌ ལན༌ སུམ༌ པིག༌དོང༌ ཙུགས༌ཏེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུ༌ཨིན༌ མོས༌ལམ༌ ཞུའད༌པིན༌། 11ཏེ༌ནེ༌ ཁྲིམས༌ བྲི༌ ཅུག༌ཁན༌ནི༌ མི༌གུན༌ དཱ༌ནི༌ཨེལ༌ལི༌ ཁང༌པ༌ སོང༌ ཡང༌ ཁོའེ༌ དཀོན༌མཆོག༌ག༌ རོགས༌ ཛད༌ཅེས༌ལ༌ མོས༌ལམ༌ ཞུ༌ཨིན༌ ཐོང༌། 12ཁོང༌གུན༌ གྱལ༌པོ༌ ཡོད༌ས༌ སོང༌ཏེ༌ ཁྲིམས༌པོ༌ ཨིད༌ཏུ༌ སྐུལས༌, “ཡོང༌ཅེས༌ཅན༌ནི༌ ཞག༌ སུམ༌ཅུའི༌ ནང༌ང༌ ཉེ༌རང༌ མན༌པ༌ ཞན༌ མི༌ ཡ༌ ལྷ༌ལྷ༌མོ༌ སུ༌ཞིག༌ག༌ ཅོལ༌ན༌ ཏེ༌ མི༌བོ༌ སིང༌གེ༌ དོང༌ངི༌ ནང༌ང༌ ཕང༌ཅེས༌སི༌ བཀའ༌ སལ༌ལ༌ མ༌ཛད༌པིན༌ན༌?”
གྱལ༌པོའེ༌ ལན༌ཏངས༌, “ཁྲིམས༌པོ༌ སྟན༌པོ༌ ཨིན༌། མེ༌དིའ༌པ༌ དང༌ པར༌ཤིའ༌པ༌ གུན༌ནི༌ ཁྲིམས༌ ནང༌ཞིན༌ ཏེ༌བོ༌ སུའང༌ གྱུར༌ མི༌ཉན༌།”
13ཏེ༌ནེ༌ ཁོང༌གུན༌ནི༌ གྱལ༌པོའ༌ ཟེརས༌, “ཡ༌ཧུ༌དཱ༌ནེ༌ ཁྱོང༌ཁན༌ནི༌ མི༌ དཱ༌ནི༌ཨེལ༌ལི༌ ཉེ༌རང༌ དང༌ ཉེ༌རང༌ངི༌ ཁྲིམས༌པོ༌ ཁའ༌ མ༌ཉན༌ན༌ ཞག༌ཏང༌ ལན༌ སུམ༌ ཁོ༌རང༌ངི༌ དཀོན༌མཆོག༌ག༌ མོས༌ལམ༌ ཞུ༌དུག༌།” 14ཏེ༌བོ༌ ཚོར༌ར༌ཅིག༌ གྱལ༌པོའ༌ སྲན༌ཏྲེ༌ ཚེར༌ཁ༌ ཡོངས༌ ཡང༌ ཁོང༌ངི༌ ཉི༌མ༌ སྐྱོད༌ སྐྱོད༌ ཚག༌པ༌ དཱ༌ནི༌ཨེལ༌ སྐྱོབ༌ཅེས༌སི༌ རྩོན༌གྲུས༌ སྲན༌ཏྲེ༌ ཅོས༌།
15ཏེ༌ནེ༌ ཏེ༌ མི༌གུན༌ གྱལ༌པོ༌ ཡོད༌ས༌ སོང༌ཏེ༌ ཟེརས༌, “གྱལ༌པོ༌ ལེ༌, ཨིད༌ཏུ༌ ཛད༌, མེ༌དིའ༌པ༌ དང༌ པར༌ཤིའ༌པ༌ གུན༌ནི༌ ཁྲིམས༌ ནང༌ཞིན༌ གྱལ༌པོའེ༌ སལ༌ཁན༌ནི༌ བཀའ༌ཁྲིམས༌ གྱུར༌ མི༌ཉན༌།”
16ཏེ༌བོའེ༌ཕིའ༌ གྱལ༌པོའེ༌ བཀའ༌ ཏངས༌ ཡང༌ ཁོང༌གུན༌ནི༌ དཱ༌ནི༌ཨེལ༌ ཁྱོངས༌ཏེ༌ སིང༌གེ༌ དོང༌ངི༌ ནང༌ང༌ ཕངས༌། གྱལ༌པོའེ༌ དཱ༌ནི༌ཨེལ༌ལ༌ ཟེརས༌, “ཁྱོ༌རང༌ངི༌ ཨིད༌ཤེས༌ ཅོས༌ཏེ༌ ཞབས༌ཏོག༌ ཞུ༌ཁན༌ དཀོན༌མཆོག༌གི༌ ཁྱོ༌རང༌ སྐྱོབ༌བ༌ ཛད༌ཤིག༌།”
17རྡོའ༌ རིལ༌ཏེ༌ དོང༌ངི༌ ཁའེ༌ཀ༌ ཀབས༌ ཡང༌ སུའང༌ དཱ༌ནི༌ཨེལ༌ སྐྱོབ༌ མི༌ཉན༌ཅེས༌ལ༌ གྱལ༌པོ༌ ཏང༌ ལོན༌པོ༌གུན༌ནི༌ ཐེ༌ཙེ༌ ཏེ༌ཀ༌ ཏངས༌། 18ཏེ༌ནེ༌ གྱལ༌པོ༌ ཁར༌ལ༌ སོང༌ཏེ༌ ཏེ༌ ཚན༌བོ༌ ཟན༌ མ༌ཟོས༌ ཡང༌ སྐྱིད༌པོ༌ མ༌ཅོས༌ ཡང༌ ཁོའ༌ ཉིད༌དའང༌ མ༌ཡོངས༌།
19ང༌མོ༌ ནམ༌ལངས༌ས༌ཅིག༌ གྱལ༌པོ༌ ལངས༌ཏེ༌ གྱོགས༌པ༌ སིང༌གེ༌ དོང༌ ཡོད༌ས༌ སོང༌། 20དུན༌ལ༌ ལེབ༌བ༌ཅིག༌ ཁོང༌ངི༌ དཱ༌ནི༌ཨེལ༌ལ༌ བོད༌ཏེ༌ སེམས༌ཚེར༌ ཉམ༌པོ༌ ཟེརས༌, “ཨིད༌ཤེས༌ ཅོས༌ཏེ༌ དཀོན༌མཆོག༌ སོན༌པོའ༌ ཞབས༌ཏོག༌ ཞུ༌ཁན༌ དཱ༌ནི༌ཨེལ༌, སིང༌གེ༌གུན༌ནི༌ ཀ༌ནེ༌ ཁོང༌ང༌ ཁྱོ༌རང༌ སྐྱོབ༌ཐུབ༌བ༌?”
21དཱ༌ནི༌ཨེལ༌ལི༌ ལན༌ ཏངས༌, “གྱལ༌པོའེ༌ སྐུ༌ཚེ༌ སྟན༌ཤིག༌། 22ངའེ༌ དཀོན༌མཆོག༌གི༌ ཁོང༌རང༌ངི༌ ཕོ༌ཉ༌ ཀལ༌ལ༌ ཛད༌ཏེ༌ སིང༌གེ༌གུན༌ནི༌ ཁའ༌ ལྡམ༌མ༌ ཛདས༌། ཏེ༌གུན༌ནི༌ ང༌ ཅའང༌ ནོད༌པ༌ མ༌ཏངས༌ ཅིའ༌ཟེར༌ན༌ ཁོང༌ངི༌ སྐུན༌དུན༌ལ༌ ང༌ ནོངས༌མེད༌ ཨིན༌པིན༌ ཡང༌ ངའེ༌, གྱལ༌པོ༌ ཉེ༌རང༌ངའང༌ ངན༌པ༌ མ༌ ཅོས༌པིན༌།”
23གྱལ༌པོ༌ མ༌སྲན༌ཏྲེ༌ ཐད༌ ཡང༌ དཱ༌ནི༌ཨེལ༌ དོང༌ནེ༌ ཕིང༌ཅེས༌ལ༌ བཀའ༌ ཏངས༌། དོང༌ནེ༌ ཕིང༌ང༌ཅིག༌ དཱ༌ནི༌ཨེལ༌ལི༌ ཟུགས༌པོའ༌ ཅའང༌ མ༌སྐྱོན༌ སོང༌ཏེ༌ མེད༌པིན༌ ཅིའ༌ཟེར༌ན༌ ཁོའེ༌ ཁོ༌རང༌ངི༌ དཀོན༌མཆོག༌གི༌ཀ༌ ཨིད༌ཤེས༌ ཅོས༌།
24གྱལ༌པོའེ༌ བཀའ༌ ནང༌ཞིན༌, ན༌མ༌ དང༌ ཕྲུ༌གུ༌གུན༌ ཐེས༌ཏེ༌ དཱ༌ནི༌ཨེལ༌ལ༌ སེམས༌ངན༌ ཉམ༌པོ༌ གྱབ༌གལ༌ ཅོ༌ཁན༌གུན༌ ཁྱོངས༌ཏེ༌ སིང༌གེ༌ དོང༌ངི༌ ནང༌ང༌ ཕངས༌། དོང༌ངི༌ སའེ༌ཀ༌ ལེབ༌བི༌ སང༌ སྔུན༌ལ༌ སིང༌གེ༌གུན༌ ཁོང༌གུན༌ནི༌ཀ༌ ཆོམས༌ ཡང༌ ཤ༌ ཟོས༌ཏེ༌ རུས༌པ༌ ཚང༌མ༌ ཅགས༌།
25ཏེ༌ནེ༌ གྱལ༌པོ༌ གྲ༌རི༌ཡས༌སི༌ གྱལ༌ཁམས༌, སྐད༌ དང༌ མི༌ ཚང༌མ༌ བྲིས༌,
“ཁྱོ༌ཞའ༌ ཡར༌གྱས༌ ཀྲག༌པོ༌ ཆ༌ཤིག༌།
26ངའེ༌ བཀའ༌ ཏང༌ངད༌,
གྱལ༌སྲིད༌ གང༌པོའེ༌ མི༌ ཚང༌མའེ༌ དཱ༌ནི༌ཨེལ༌ལི༌ དཀོན༌མཆོག༌གི༌ ཇིགས༌ དང༌
རྩི༌ཝའེ༌ ནང༌ང༌ མི༌ཚེ༌ ཕུད༌གོས༌
ཅིའ༌ཟེར༌ན༌ ཁོང༌ སོན༌པོ༌ དཀོན༌མཆོག༌,
ཁོང༌ ཏུས༌གྱུན༌ ཞུགས༌ཁན༌,
ཁོང༌ངི༌ གྱལ༌སྲིད༌ མ༌ནེ༌ མི༌ཞིག༌
ཡང༌ ཁོང༌ངི༌ ཝང༌སྲུལ༌ལ༌ ཐའ༌མ༌ མེད༌ཏེ༌ ཨིན༌ནོག༌།
27ཁོང༌ངི༌ ཁོང༌རང༌ངི༌ མི༌གུན༌ སྐྱོབ༌ཅེས༌ དང༌ ཐར༌ཅུག༌ག༌ ཛད༌ད༌ནོག༌,
ཁོང༌ངི༌ ནམ༌ཁའ༌ དང༌ ས༌ཞི༌ཀ༌
སྟགས༌ དང༌ ལྟས༌ གུན༌ ཛད༌ད༌ནོག༌།
ཁོང༌ངི༌ དཱ༌ནི༌ཨེལ༌ ཤེད༌ཅན༌ སིང༌གེ༌གུན༌ནི༌ ཀ༌ནེ༌ སྐྱོབ༌བ༌ ཛདས༌།”
28པར༌ཤིའ༌པ༌ གྱལ༌པོ༌ གྲ༌རི༌ཡས༌ དང༌ སཱེ༌རས༌སི༌ ཝང༌སྲུལ༌ལི༌ ཏུས༌ལ༌ དཱ༌ནི༌ཨེལ༌ མ༌ ཁྲངས༌པོ༌ ལུས༌ཏེ༌ ཡར༌གྱས༌ ཅོས༌།
Currently Selected:
དཱ༌ནི༌ཨེལ༌ 6: lbj
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
