དཱ༌ནི༌ཨེལ༌ 5
5
རྩིག༌པའེ༌ཀ༌ བྲི༌ཁན༌ནི༌ ལག༌པ༌།
5:1-31
1གྱལ༌པོ༌ བེལ༌ཤའེ༌ཟར༌རི༌ ཁོ༌རང༌ངི༌ 1000 ལོན༌པོ༌གུན༌ལ༌ གྲོན༌ ཀྲག༌པོ༌ ཏངས༌ཏེ༌ ཁོང༌གུན༌ ཉམ༌པོ༌ རྒུན༌ཆང༌ ཐུངས༌། 2གྱལ༌པོ༌ ར༌རོས༌ པ༌སང༌ ཁོ༌རང༌, ཁོའེ༌ ན༌མ༌གུན༌, ཚེ༌ཡོག༌ ན༌མ༌གུན༌ ཡང༌ ལོན༌པོ༌གུན༌ ཆང༌ ཐུང༌ཅེས༌སི༌ ཕིའ༌ ཁོའེ༌ ཨ༌བ༌ ནེ༌བུ༌ཀཱ༌ནེ༌ཟཱར༌རི༌ ཡེ༌རུ༌ཤ༌ལེམ༌མི༌ ཆོད༌ཁང༌ནེ༌ ཁྱོང༌ཁན༌ནི༌ སེར༌ དང༌ མུལ༌ལི༌ ཀོ༌རེ༌གུན༌ ཁྱོང༌ཅེས༌ལ༌ གྱལ༌པོའེ༌ བཀའ༌ ཏངས༌། 3ཏེ༌ནེ༌ ཞབ༌ཤི༌གུན༌ནི༌ ཡེ༌རུ༌ཤ༌ལེམ༌མི༌ དཀོན༌མཆོག༌གི༌ ཆོད༌ཁང༌ནེ༌ ཁྱོང༌ཁན༌ནི༌ སེར༌རི༌ ཀོ༌རེ༌གུན༌ ཁྱོངས༌ ཡང༌ གྱལ༌པོ༌, ཁོའེ༌ ན༌མ༌གུན༌ དང༌ ལོན༌པོ༌གུན༌ནི༌ ཏེ༌ནང༌ང༌ རྒུན༌ཆང༌ ཐུངས༌། 4ཆང༌ ཐུང༌ཨིན༌ ཁོང༌གུན༌ནི༌ སེར༌, མུལ༌, ར༌གན༌, ལྕགས༌, ཤིང༌ དང༌ རྡོའ༌ ཅོ༌ཁན༌ ཁོ༌རང༌གུན༌ནི༌ ལྷ༌ལྷ༌མོ༌གུན༌ལ༌ སྟོད༌པ༌ ཕུལས༌།
5ཧུན༌མེད༌ལ༌ ལག༌པ༌ཞིག༌ སྔོན༌ཏེ༌ འོད༌སྟག༌གི༌ དུན༌ལ༌ ཁར༌རི༌ རྩིག༌པའེ༌ཀ༌ བྲིའ༌ ཛདས༌། གྱལ༌པོའེ༌ ཏེ༌ ལག༌པའེ༌ བྲི༌ཨིན༌ ཡོད༌ཁན༌བོའ༌ ལྟའད༌པིན༌། 6ཁོའེ༌ ལྡོང༌ སེར༌པོ༌ གྱུརས༌ ཡང༌ ཁོ༌ མ༌ སྲན༌ཏྲེ༌ ཇིགས༌ཏེ༌ ཁོའེ༌ པིག༌མོ༌ དང༌ སྐང༌གུན༌ དར༌ཨིན༌ གྱལ༌པོ༌ སའེ༌ཀ༌ མ༌ཁད༌།
7གྱལ༌པོའེ༌ ཁོ༌རང༌ངི༌ ཤི༌ཁན༌ནི༌ སེམས༌ཉིད༌ བོད༌ཁན༌, སྐར༌རྩིས༌ ཏང༌ཁན༌ དང༌ མ༌ཡོངས༌པའེ༌ ཏུས༌སི༌ སྐོར༌ལ༌ ཤད༌ཁན༌ ཚང༌མ༌ ཀུ༌ཅོ༌ ཏངས༌ཏེ༌ བོདས༌། གྱལ༌པོའེ༌ ཏེ༌ ཤེས༌རབས༌ཅན༌ མི༌གུན༌ལ༌ ཟེརས༌, “འི༌ བྲིས༌ཁན༌བོ༌ སིལ༌ཏེ༌ ཏེ༌བོའེ༌ ཏོན༌ ཤད༌ཁན༌བོའ༌ ངའེ༌ གྱལ༌པོ༌ ཙོགས༌སི༌ ཀོས༌ སྐོན༌ཏེ༌ སེར༌རི༌ ཉག༌ཐག༌ སྐྱེའ༌ སྐར༌ཨིན༌ ཡང༌ ཁོའ༌ གྱལ༌སྲིད༌དི༌ ནང༌ང༌ ཐོ༌ཤོག༌ ཀོ༌ས༌ སུམ༌པ༌བོ༌ ཏང༌ཨིན༌།”
8གྱལ༌པོའེ༌ ཤེས༌རབ༌ཅན༌ མི༌ ཚང༌མ༌ ཡོངས༌ ཨིན༌ནའང༌ ཁོང༌གུན༌ལ༌ ཏེ༌ བྲིའ༌ ཛད༌ཁན༌བོ༌ སིལ༌ ཡ༌ ཏེ༌བོའེ༌ ཏོན༌ ཤད༌ མ༌ཉན༌། 9ཏེ༌ནེ༌ གྱལ༌པོ༌ བེལ༌ཤའེ༌ཟར༌ མ༌ སྲན༌ཏྲེ༌ ཇིགས༌ཏེ༌ ཁོང༌ངི༌ ལྡོང༌ མང༌ང༌ སེར༌པོ༌ གྱུར༌། ཁོང༌ངི༌ ལོན༌པོ༌གུན༌ ཐེ༌ཚོམས༌ སོང༌ཏེ༌ ཅི༌ ཅོ༌ཅེས༌པོ༌ ཧ༌མ༌གོ༌།
10གྱལ༌པོ༌ དང༌ ལོན༌པོ༌ གུན༌ནི༌ སྐད༌ ཚོར༌ཏེ༌ ཨ༌མ༌ གྱལ༌མོ༌ གྲོན༌ ཏང༌སའེ༌ ནང༌ང༌ ཡོངས༌ཏེ༌ ཟེརས༌, “གྱལ༌པོའེ༌ སྐུ༌ཚེ༌ སྟན༌ཤིག༌། ཇིགས༌ཏེ༌ སེར༌པོ༌ ཆའ༌ མ༌ཛད༌། 11ཉེ༌རང༌ངི༌ གྱལ༌སྲིད༌དི༌ ནང༌ང༌ ཏམ༌པ༌ ལྷ༌ལྷ༌མོ༌གུན༌ནི༌ ཐུག༌ཉིད༌ ཡོད༌ཁན༌ མི༌ཞིག༌ ཡོད༌། ཉེ༌རང༌ངི༌ ཨ༌བ༌ གྱལ༌པོ༌ ནེ༌བུ༌ཀཱ༌ནེ༌ཟཱར༌རི༌ ཏུས༌ལ༌ ཁོ༌ ལྷ༌ལྷ༌མོ༌གུན༌ ཙོགས༌ ཤེས༌རབས༌ཅན༌, རིག༌པ༌ཅན༌ དང༌ ཁས༌པ༌ ཡོད༌ཁན༌བོ༌ ཐོང༌ཏེ༌ ཁོའ༌ མོ༌ ཏབ༌ཁན༌, ཤི༌ཁན༌ནི༌ སེམས༌ཉིད༌ བོད༌ཁན༌, སྐར༌རྩིས༌ཏང༌ཁན༌ ཏང༌ མ༌ཡོངས༌པའེ༌ ཏུས༌སི༌ སྐོར༌ལ༌ ཤད༌ཁན༌ གུན༌ནི༌ འུ༌སྐྱོང༌ང༌ སྐོས༌། 12ཏེ༌ མི༌ དཱ༌ནི༌ཨེལ༌ལ༌ གྱལ༌པོའེ༌ བེལ༌ཏེ༌ཤ༌ཟར༌ ཟེར༌རད༌པིན༌, ཁོ༌ མ༌ ཤེས༌རབས༌ཅན༌, རིག༌པ༌ཅན༌ དང༌ ཁས༌པ༌ ཡོད༌ཁན༌བོ༌ གྱུས༌སོང༌ ཡང༌ ཁོའ༌ ཉི༌ལམ༌མི༌ ཏོན༌, སྐ༌ལས༌ ཀགས༌པོ༌ ཡང༌ ཚོད༌ལེན༌ གུན༌ སེལ༌ ཉན༌ནད༌པིན༌། དཱ༌ནི༌ཨེལ༌ལ༌ བོད༌ཏེ༌ འི༌ བྲིའ༌ ཛད༌ཁན༌ནི༌ ཏོན༌བོ༌ ཤད༌ ཅུག༌།”
13ཏེ༌ནེ༌ དཱ༌ནི༌ཨེལ༌ གྱལ༌པོའེ༌ དུན༌ལ༌ ཁྱོངས༌ ཡང༌ ཁོའེ༌ ཟེརས༌, “ཁྱོ༌རང༌ ངའེ༌ ཨ༌བ༌ གྱལ༌པོའེ༌ ཡ༌ཧུ༌དཱ༌ནེ༌ ཟུམས༌ཏེ༌ ཁྱོང༌ཁན༌ དཱ༌ནི༌ཨེལ༌ ཨིན༌ན༌? 14ཁྱོ༌རང༌ངི༌ ནང༌ང༌ ལྷ༌ལྷ༌མོ༌གུན༌ནི༌ ཐུག༌ཉིད༌ གངས༌ཏེ༌ ཁྱོ༌རང༌ མ༌ རིག༌པ༌ཅན༌, ཤེས༌རབས༌ཅན༌ དང༌ ཁས༌པ༌ ཡོད༌ཁན༌བོ༌ ངའེ༌ ཚོར༌། 15ངའེ༌ མི༌ ཤེས༌རབ༌ཅན༌ དང༌ སྐར༌རྩིས༌ ཏང༌ཁན༌ གུན༌ལ༌ བོད༌པིན༌ ཨིན༌ནའང༌ ཁོང༌གུན༌ལ༌ འི༌བོའེ༌ ཏོན༌ ཤད༌ མ༌ཉན༌། 16ཁྱོ༌རང༌ང༌ ཉི༌ལམ༌མི༌ ཏོན༌ དང༌ སྐ༌ལས༌ ཀགས༌པོ༌གུན༌ སེལ༌ ཉན༌དུག༌ ཟེར༌ཏེ༌ ངའ༌ ཚོར༌། ཀལ༌ཏེས༌ ཁྱོ༌རང༌ངི༌ འི༌ བྲིས༌ཁན༌བོ༌ སིལ༌ཏེ༌ ཏེ༌བོའེ༌ ཏོན༌བོ༌ ཤད༌ན༌ ངའེ༌ ཁྱོ༌རང༌ང༌ གྱལ༌པོ༌ ཙོགས༌སི༌ ཀོས༌ སྐོན༌ཏེ༌ སེར༌རི༌ ཉག༌ཐག༌ སྐྱེའ༌ སྐར༌ཨིན༌ ཡང༌ གྱལ༌སྲིད༌དི༌ ནང༌ང༌ ཐོ༌ཤོག༌ ཀོ༌ས༌ སུམ༌པ༌ ཏང༌ཨིན༌།”
17ཏེ༌ནེ༌ དཱ༌ནི༌ཨེལ༌ལི༌ གྱལ༌པོའ༌ ལན༌ཏངས༌, “སོལ༌རས༌གུན༌ ཉེ༌རང༌ངི༌ བོར༌ར༌ ཛད༌ ཡ༌ ཞན༌ཞིག༌ག༌ སལ༌ལ༌ ཛད༌ ཨིན༌ནའང༌ ངའེ༌ ཉེ༌རང༌ང༌ འི༌ བྲིས༌ཁན༌བོ༌ སིལ༌ཏེ༌ ཏེ༌བོའེ༌ ཏོན༌བོ༌ ཤད༌ཨིན༌།
18“གྱལ༌པོ༌ ཁྱེན༌, ཀུན༌ཝང༌ དཀོན༌མཆོག༌གི༌, ཉེ༌རང༌ངི༌ ཨ༌བ༌ ནེ༌བུ༌ཀཱ༌ནེ༌ཟཱར༌ལ༌ ཝང༌, ཁྱུད༌, སྤལ༌ དང༌ རྩི༌ཝ༌ སལ༌ལ༌ ཛདས༌། 19ཁོའ༌ ཀོ༌ས༌ ཇིགས༌པོ༌ སལ༌ལ༌ ཛད༌ཅེས༌པོའེ༌ གྱལ༌ཁམས༌, སྐད༌ དང༌ མི༌ ཚང༌མ༌ ཁོང༌ང༌ ཇིགས༌ཏེ༌ དར༌རད༌པིན༌། གྱལ༌པོའེ༌ སད༌ ཉིན༌ གྲོ༌ཁན༌གུན༌ སད༌དད༌པིན༌, པུད༌ད༌ ཐད༌ཁན༌གུན༌ པུད༌དད༌པིན༌, སྟག༌ག༌ ཐད༌ཁན༌གུན༌ སྟག༌གད༌པིན༌ ཡང༌ ཕབ༌བ༌ ཐད༌ཁན༌གུན༌ ཕབ༌བད༌པིན༌། 20ཨིན༌ནའང༌ ཁོའེ༌ སྙིང༌ ཕོ༌སོ༌ཅན༌ སྐྱོང༌པོ༌ གྱུར༌ར༌ཅིག༌, དཀོན༌མཆོག༌གི༌ ཁོ༌ གྱལ༌པོའེ༌ ཁྲིས༌སི༌ ཀ༌ནེ༌ ཕབས༌ཏེ༌ ཁོའེ༌ སྤལ༌བོ༌ མེད༌ཁན༌ ཛདས༌། 21ཁོ༌ མི༌གུན༌ནི༌ ཕྲོ༌ནེ༌ ཕིངས༌ཏེ༌ ཁོའ༌ སེམས༌ཅན༌ནི༌ ལྡད༌པ༌ སལས༌། ཁོ༌ ནག༌ཚོགས༌སི༌ བུང༌བུ༌གུན༌ ཉམ༌པོ༌ དུགས༌ཏེ༌ བ༌ལང༌ ཙོགས༌ལ༌ རྩའ༌ ཟོས༌ ཡང༌ ཁོའེ༌ ཟུགས༌པོའ༌ ཟིལ༌པའེ༌ ཆུ༌ ཕོག༌ ནམ༌ ཚག༌པ༌ ཁོའེ༌ ཀུན༌ཝང༌ དཀོན༌མཆོག༌གི༌ ཇིག༌རྟེན༌ནི༌ གྱལ༌སྲིད༌ ཚང༌མའེ༌ཀ༌ ཝང༌སྲུལ༌ལ༌ ཛད༌ཅེས༌ ཡང༌ ཁོང༌ ཐུགས༌ཐད༌ཁན༌བོ༌ ཏེ༌གུན༌ནི༌ཀ༌ ཝང༌སྲུལ༌པ༌ སྐོའ༌ ཛད༌ཅེས༌པོ༌ ཁས༌ལེན༌ མ༌ཅོས༌།”
22“ཨིན༌ནའང༌ ཁོང༌ངི༌ བུ༌ཚ༌ བེལ༌ཤའེ༌ཟར༌ ཉེ༌རང༌ང༌ ཏེ༌གུན༌ གྱུས༌ཡོད༌ཏེའང༌ པས༌མོ༌ མ༌གྱུར༌། 23མ༌ཚད༌ ཉེ༌རང༌ངི༌ ནམ༌ཁའེ༌ གཙོ༌བོ༌ དཀོན༌མཆོག༌གི༌ གྱབ༌གལ༌ ཅོས༌ཏེ༌ ཁོང༌ངི༌ ཆོད༌ཁང༌ངི༌ ཏམ༌པ༌ ཀོ༌རེ༌གུན༌ ཁྱོངས༌ཏེ༌ ཉེ༌རང༌, ཉེ༌རང༌ངི༌ ན༌མ༌གུན༌, ཚེ༌ཡོག༌ ན༌མ༌གུན༌ ཡང༌ ལོན༌པོ༌གུན༌ལ༌ རྒུན༌ཆང༌ ཐུང༌ཅེས༌ལ༌ ཏངས༌། ཉེ༌རང༌ངི༌ མ༌ཐོང༌ཁན༌, མ༌ཚོར༌ཁན༌ དང༌ ཧ༌མ༌གོ༌ཁན༌ སེར༌, མུལ༌, ར༌གན༌, ལྕགས༌, ཤིང༌ དང༌ རྡོའེ༌ སྐུན༌དྲའ༌གུན༌ལ༌ སྟོད༌པ༌ ཕུལས༌ ཨིན༌ནའང༌ ཉེ༌རང༌ངི༌ སྲོག༌ དང༌ ཉེ༌རང༌ངི༌ མི༌ཚེ༌ ནང༌ང༌ ཅོ༌ཅེས༌ཅན༌ ཚང༌མའེ༌ཀ༌ ཝང༌ ཡོད༌ཁན༌ དཀོན༌མཆོག༌ག༌ ཉེ༌རང༌ངི༌ རྩི༌ཝ༌ མ༌སལས༌། 24ཏེ༌བོའེ༌ཕིའ༌ ཁོང༌ངི༌ བྲི༌ཅེས༌ལ༌ འི༌ ལག༌པ༌ ཀལ༌ལ༌ ཛདས༌། 25ཏེ༌ བྲིས༌ཁན༌བོ༌ འི༌བོ༌ ཨིན༌ནོག༌:
མེ༌ནེ༌, མེ༌ནེ༌, ཏེ༌ཀེལ༌, པར༌སིན༌།
26མེ༌ནེ༌ ཏོན༌ ནི༌ དཀོན༌མཆོག༌གི༌ ཉེ༌རང༌ངི༌ ཝང༌སྲུལ༌ལི༌ ཞག༌པོ༌ རྩིའ༌ ཛད༌ཏེ༌ མེད༌ཁན༌ ཅོའ༌ ཛད༌ཨིན༌།
27ཏེ༌ཀེལ༌ལི༌ ཏོན༌ ནི༌ ཉེ༌རང༌ སྐར༌ར༌ ཛདས༌ ཨིན༌ནའང༌ མ༌ ཡང༌མོ༌ བིང༌།
28པར༌སིན༌ནི༌ ཏོན༌ ནི༌ ཉེ༌རང༌ངི༌ གྱལ༌སྲིད༌ལ༌ ཁག༌ པུད༌ཏེ༌ མེ༌དིའ༌པ༌ དང༌ པར༌ཤིའ༌པ༌ གུན༌ལ༌ ཏང༌ཨིན༌།”
29ཏེ༌ནེ༌ བེལ༌ཤའེ༌ཟར༌རི༌ བཀའ༌ ནང༌ཞིན༌ དཱ༌ནི༌ཨེལ༌ལ༌ གྱལ༌པོ༌ ཙོགས༌ ཀོས༌ སྐོན༌ཏེ༌ སྐྱེའ༌ སེར༌རི༌ ཉག༌ཐག༌ སྐརས༌ ཡང༌ ཁོའ༌ གྱལ༌སྲིད༌དི༌ ནང༌ང༌ ཐོ༌ཤོག༌ ཀོ༌ས༌ སུམ༌པའེ༌ཀ༌ སྐོས༌།
30ཏེན༌ན༌ ཚན༌ལ༌ གྲ༌འོ༌གུན༌ནི༌ བ༌བེ༌ལོན༌ནི༌ གྱལ༌པོ༌ བེལ༌ཤའེ༌ཟར༌ སད༌ཏེ༌ 31མེ༌དིའ༌པ༌ གྲ༌རི༌ཡས༌སི༌ གྱལ༌སྲིད༌པོ༌ ང༌ཡོག༌ག༌ ལེནས༌། ཏེ༌ ཏུས༌ གྲ༌རི༌ཡས༌ལ༌ ལོ༌ 62 ཆའད༌པིན༌།
Currently Selected:
དཱ༌ནི༌ཨེལ༌ 5: lbj
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
