དཱ༌ནི༌ཨེལ༌ 10

དཱ༌ནི༌ཨེལ༌ལ༌ ཞལ༌ཟིགས༌ ཧ༌གོ༌ ཅུག༌ཁན༌ནི༌ ཕོ༌ཉ༌།

10:1-11:1

1པར༌ཤིའ༌པ༌ གྱལ༌པོ༌ སཱེ༌རས༌སི༌ ཝང༌སྲུལ༌ལི༌ ལོ༌ སུམ༌པའེ༌ ནང༌ང༌ བེལ༌ཏེ༌ཤ༌ཟར ཡང༌ན༌ དཱ༌ནི༌ཨེལ༌ལ༌ དཀོན༌མཆོག༌གི༌ ཆོགས༌ནེ༌ ལོན༌ཞིག༌ ཐོབ༌། ཏེ༌ ནང༌ང༌ མོལ༌ཁན༌གུན༌ ཀྲང༌པོ༌ ཡང༌ ཏེ༌བོ༌ མག༌ ཀྲག༌པོ༌ ཞིག༌གི༌ སྐོར༌ ཨིན༌པིན༌། ཏེ༌ ལོན༌བོ༌ ཁོའ༌ ཞལ༌ཟིགས༌ཤིག༌ གྱུད༌ཏེ༌ ཧ༌གོ༌ཅུག༌ག༌ ཛདས༌།

2ཏེ༌ ཏུས༌ ང༌ དཱ༌ནི༌ཨེལ༌ལི༌ རྡུན༌ཞག༌ སུམ༌ རྡུག༌པོ༌ ཅོས༌པིན༌། 3ཏེ༌ ཏུས༌ གང༌པོ༌ ངའེ༌ ཟན༌ ཞིམ༌པོ༌ མ༌ ཟའ༌, ཤ༌ ཡ༌ རྒུན༌ཆང༌ ཁའ༌ མ༌ ཏུག༌ག༌ ཡང༌ མར༌ མ༌ སྐུའ༌ དུགས༌པིན༌།

4ཟླ༌ཝ༌ ཏང༌པོའེ༌ ཞག༌ 24 པའེ༌ ཞག༌ག༌ ངའ༌ ལྩངས༌པོ༌ ཀྲག༌པོ༌ ཏྲེག༌རིས༌སི༌ ཐའ༌མ༌ ལངས༌ཏེ༌ ཡོད༌ ཟ༌ནེ༌ 5ཀེན༌ལ༌ ལྟའ༌ཅིག༌ ངའ༌ ངའེ༌ དུན༌ལ༌ རས༌ རིན༌ཅན༌ནི༌ ཀོས༌ གོན༌ཁན༌ མི༌ཞིག༌ ཐོང༌ ཡང༌ ཁོང༌ངི༌ སྐྱེད༌པ༌ ཅའང༌ མ༌ གྲེས༌ཁན༌ སེར༌རི༌ སྐྱེ༌རག༌ ཅིངས༌ཏེ༌ དུག༌པིན༌། 6ཁོང༌ངི༌ ཟུགས༌པོ༌ ཁྲ༌ རིན༌ཅན༌ ཙོགས༌, ལྡོང༌ སྐམ༌ལག༌ བར༌ཁན༌ ཙོགས༌, མིག༌ མེའེ༌ པམ༌བར༌ ཙོགས༌, རྐང༌ལག༌གུན༌ རྩི༌ ཏང༌ཁན༌ནི༌ ཟངས༌ ཙོགས༌ ཡང༌ སྐད༌ མི༌མངས༌སི༌ སྐད༌ ཙོགས༌ རག༌པིན༌།

7ང༌ དཱ༌ནི༌ཨེལ༌ ཅིག༌པོའ༌ ཏེ༌ ལྟས༌པོ༌ ཐོང༌, ང༌ ཉམ༌པོ༌ ཡོད༌ཁན༌གུན༌ལ༌ ཏེ༌བོ༌ མ༌ ཐོང༌ ཨིན༌ནའང༌ ཁོང༌གུན༌ མ༌སྲན༌ཏྲེ༌ ཇིགས༌ཏེ༌ ཤོར༌ ཡང༌ ཨིབས༌། 8ཏེ༌བོའེ༌ཕིའ༌ ཏེ༌ ཞལ༌ཟིགས༌ ཀྲག༌པོའ༌ ལྟའ༌ལ༌ ང༌ ཅིག༌པོ༌ ལུས༌། ང༌ ཤེད༌མེད༌ གྱུར༌, ངའེ༌ ལྡོང༌ སེར༌པོ༌ སོང༌ ཡང༌ ངའེ༌ ནང༌ང༌ ཤེད༌ ལུས༌ཏེ༌ མེ༌རག༌པིན༌། 9ཏེ༌ནེ༌ ང༌ ཁོང༌ངི༌ མོལ༌ཨིན༌ ཚོར༌ ཡང༌ ངའེ༌ ཁོང༌ང༌ ཉན༌པིན༌། ངའ༌ ཉིད༌ ལྕིན༌ཏྲེ༌ ཡོངས༌ཏེ༌ གྱེལ༌ ཡང༌ ངའེ༌ ལྡོང༌ སའ༌ ཐུག༌།

10ཏེན༌ན༌ ཏུས༌, ཆག༌ཤིག༌གི༌ ཐམས༌ཏེ༌ ངའ༌ ལག༌པ༌ དང༌ པིག༌མོའེ༌ཀ༌ ལང༌ང༌ ཛདས༌ ཨིན༌ནའང༌ ང༌ དར༌རད༌པིན༌། 11ཁོང༌ངི༌ མོལས༌, “དཱ༌ནི༌ཨེལ༌ དཀོན༌མཆོག༌གི༌ སྐུན༌དུན༌ལ༌ ཁྱོ༌རང༌ རིན༌ཅན༌ ཨིན༌ནོག༌། ངའ༌ ཁྱོ༌རང༌ ཡོད༌ས༌ ཀལ༌ཏེ༌ ཨིན༌ནོག༌ ཏེ༌བོའེ༌ཕིའ༌ ལངས༌ཏེ༌ ངའེ༌ ཟེར༌ཅེས༌ཅན༌བོའ༌ གྱལ༌ལ༌ ཅོས༌ཏེ༌ ཉོན༌།” ཁོང༌ངི༌ ཏེ༌ཟུག༌ མོལ༌ལ༌ཅིག༌ ངའ༌ དར༌ཨིན༌ ལངས༌པིན༌།

12ཏེ༌ནེ༌ ཁོང༌ངི༌ མོལས༌, “ཇིགས༌ མ༌ ཇིགས༌, དཱ༌ནི༌ཨེལ༌། གོ༌མའེ༌ ཞག༌ག༌ ཁྱོ༌རང༌ངི༌ དཀོན༌མཆོག༌གི༌ སྐུན༌དུན༌ལ༌ བོལ༌མོ༌ གྱུར༌ཏེ༌ ཧ༌གོ༌ཅེས༌ལ༌ མོས༌ལམ༌ ཞུ༌ཁན༌གུན༌, ཁོང༌ངི༌ སན༌ན༌ ཛད༌ཏེ༌ ཏེ༌བོའེ༌ ལན༌ལ༌ ང༌ ཀལ༌ལ༌ ཛདས༌། 13ཨིན༌ནའང༌ པར༌ཤིའ༌པའེ༌ གྱལ༌སྲིད༌ སྐྱོབ༌ཁན༌ནི༌ ངན༌པ༌ ཕོ༌ཉའེ༌ ཞག༌ 21 ང༌ སྒགས༌ཏེ༌ བོརས༌། ཏེ༌ནེ༌ མའེ༌ཀལ༌, ཕོ༌ཉ༌གུན༌ནི༌ འུ༌སྐྱོང༌ ཅིག༌ ངའ༌ རོགས༌ ཛད༌ད༌ སྐྱོད༌ ཅིའ༌ཟེར༌ན༌ ང༌ ཏེ༌རུ༌ ཏེ༌ ངན༌པ༌ ཕོ༌ཉའེ༌ སྒགས༌ཏེ༌ བོརས༌། 14ཏ༌ ཁྱོ༌རང༌ང༌ ཡོང༌ཅེས༌ཅན༌ནི༌ ཏུས༌སི༌ ནང༌ང༌ ཁྱོ༌རང༌ངི༌ མི༌གུན༌ ཉམ༌པོ༌ ཇུང༌ཅེས༌ཅན༌བོ༌ ཤད༌ད༌ལ༌ ང༌ ཡོངས༌པིན༌། འི༌ ཞལ༌ཟིགས༌པོ༌ མ༌ཡོངས༌པའེ༌ ཏུས༌སི༌ སྐོར༌ལ༌ ཨིན༌ནོག༌།”

15ཁོང༌ངི༌ ཏེ༌གུན༌ མོལ༌ ཟ༌ནེ༌ ངའེ༌ གོ༌ སྒུས༌ཏེ༌ ས༌ ལྟས༌པིན༌ ཡང༌ ངའ༌ ཅའང༌ ཟེར༌ མ༌ ཉན༌། 16ཏེ༌ནེ༌ མི༌ ཙོགས༌ ཐོང༌ཁན༌བོའེ༌ ངའེ༌ ཁལ༌པག༌ག༌ ཆག༌ རྩེའ༌ ཛདས༌ ཡང༌ ངའ༌ སྤེ༌ར༌ ཏང༌ཉན༌། ངའེ༌ དུན༌ལ༌ ཞངས༌ཏེ༌ ཡོད༌ཁན༌བོའ༌ ངའེ༌ ཟེར༌པིན༌, “ཞལ༌ཟིགས༌པོའེ༌ ཞས༌ཏེ༌ ངའ༌ རྡུག༌ངལ༌ སྲན༌ཏྲེ༌ ཐོང༌པ༌ ངའེ༌ གཙོ༌བོ༌, ངའེ༌ ནང༌ང༌ ཤེད༌ ལུས༌ཏེ༌ མེ༌རག༌། 17ངའེ༌ གཙོ༌བོ༌, ཉེ༌རང༌ངི༌ ཡོག༌པོ༌ ང༌ ཙོགས༌ཤིག༌གི༌ ཉེ༌རང༌ང༌ སྤེ༌ར༌ ཏང༌ཅེས༌སི༌ ཧམ༌པ༌ ཀ༌ཟུག༌གི༌ ཅོ༌ཨིན༌? ངའེ༌ ཤེད༌པོ༌ མེད༌ཁན༌ སོང༌ཏེ༌ ང༌ འུགས༌ ལེན༌ཅེས༌ལའང༌ ཀགས༌པོ༌ ཆའ༌རག༌།” 18མི༌ ཙོགས༌ ཐོང༌ཁན༌བོའེ༌ ཡང༌སྐྱར༌ ང༌ ཐམས༌ས༌ ཛད༌ཏེ༌ ངའ༌ ཤེད༌ སལས༌། 19ཁོང༌ངི༌ མོལས༌, “དཀོན༌མཆོག༌གི༌ སྐུན༌དུན༌ལ༌ རིན༌ཅན༌ མི༌, ཇིགས༌ མ༌ ཇིགས༌, ཤེད༌ཅན༌ གྱུར༌།”

ཁོང༌ངི༌ ཞལ༌ཏ༌ སལ༌ལ༌ཅིག༌ ང༌ ཤེད༌ཅན༌ གྱུར༌ཏེ༌ ངའེ༌ ཟེར༌པིན༌, “མོལ༌ལ༌ ཛད༌ གཙོ༌བོ༌ལེ༌ ཅིའ༌ཟེར༌ན༌ ཉེ༌རང༌ངི༌ ང༌ ཤེད༌ སལ༌ལ༌ ཛདས༌།” 20ཁོང༌ངི༌ མོལས༌, “ཁྱོ༌རང༌ ཡོད༌ས༌ ང༌ ཅི༌ཕིའ༌ ཡོངས༌, གྱུས༌ ཡོད༌ད༌? ངའ༌ པར༌ཤིའ༌པའེ༌ གྱལ༌སྲིད༌ སྐྱོབ༌ཁན༌ ངན༌པ༌ ཕོ༌ཉ༌ ཉམ༌པོ༌ ནོལ༌ལ༌ ལོགས༌ཏེ༌ ཡོང༌ཨིན༌ ཡང༌ ཁོའ༌ ཕམ༌ཀལ༌ཏེ༌ ང༌ ཆའ༌ཅིག༌ གི༌རིས༌པའེ༌ གྱལ༌སྲིད༌ སྐྱོབ༌ཁན༌ ངན༌པ༌ ཕོ༌ཉ༌ ཡོང༌ཨིན༌། 21ཨིན༌ནའང༌ ཁྱོ༌རང༌ང༌ ཀྲང༌པོ༌ སྤེ༌ཆའེ༌ ནང༌ང༌ བྲིས༌ཁན༌བོ༌ ཤད༌ཨིན༌། ༼ཏེ༌གུན༌ནི༌ གྱབ༌གལ༌ལ༌ ཨིས༌ར༌ཨེལ༌པ༌གུན༌ སྐྱོབ༌ཁན༌ནི༌ ཕོ༌ཉ༌ མའེ༌ཀལ༌ ཅིག༌པོའེ༌ ངའ༌ རོགས༌ ཅོའ༌ནོག༌།”

Currently Selected:

དཱ༌ནི༌ཨེལ༌ 10: lbj

Highlight

Copy