དཱ༌ནི༌ཨེལ༌ 11
11
1“གྲ༌རི༌ཡས༌ མེ༌དིའ༌པ༌ གྱལ༌པོའེ༌ ཝང༌སྲུལ༌ལི༌ གོ༌མའེ༌ ལོའེ༌ ཏུས༌ ངའེ༌ ཕོ༌ཉའེ༌ འུ༌སྐྱོང༌ ཅིག༌ མའེ༌ཀལ༌ལ༌ རོགས༌ ཅོས༌ཏེ༌ སྐྱོབས༌པིན༌།༽”
སི༌རི༌ཡཱ༌ དང༌ ཨི༌ཇིབ༌བི༌ གྱལ༌པོ༌ གུན༌།
11:2-45
2“ཏ༌ ངའེ༌ ཁྱོ༌རང༌ང༌ ཀྲང༌པོ༌བོ༌ སྔོན༌ ཅུག༌ཨིན༌། པར༌ཤིའ༌པ༌ ཞན༌ གྱལ༌པོ༌ སུམ༌མི༌ ཝང༌ སྲུལ༌ཨིན༌, ཏེ༌སྟིང༌ནེ༌ ཁོང༌ ཚང༌མའེ༌ སང༌ མང༌ང༌ ཆུག༌པོ༌ གྱལ༌པོ༌ ཞི༌པ༌ ཡོང༌ཨིན༌། ཁོ༌རང༌ངི༌ གྱུ༌ནོར༌ གྱུད༌ཏེ༌ ཁོ༌ ཝང༌ཅན༌ གྱུར༌ར༌ཅིག༌ ཁོའེ༌ ཞན༌ གྱལ༌པོ༌ ཚང༌མ༌ གརིས༌སི༌ གྱལ༌པོའེ༌ གྱབ༌གལ༌ ཅོ༌ཅེས༌ལ༌ ལང༌ཅུག༌ཨིན༌། 3ཏེ༌ནེ༌ ཁྱུད༌ཅན༌ གྱལ༌པོ༌ཞིག༌ བིང༌ཏེ༌ ཝང༌ ཀྲག༌པོ༌ སྲུལ༌ཏེ༌ ཁོ༌རང༌ ཐད༌ཁན༌ ཅོ༌ཨིན༌། 4ཝང༌སྲུལ༌ ཀྲག༌པོ༌ ཡོད༌དི༌ ཏུས༌ ཁོ༌ ཤི༌ཨིན༌ ཡང༌ ཁོའེ༌ གྱལ༌སྲིད༌ལ༌ པོ༌བུད༌ཏེ༌ ཁག༌ ཞི༌ གྱུར༌ཨིན༌། གྱལ༌པོའེ༌ པུར༌གྱུད༌གུན༌ནི༌ ཝང༌ མི༌སྲུལ༌ ཡ༌ ཁོ༌ ཙོགས༌ ཁྱུད༌ཅན༌ མི༌ཡོང༌ ཅིའ༌ཟེར༌ན༌ ཁོའེ༌ གྱལ༌སྲིད༌པོ༌ པ༌ཀྲག༌ནེ༌ ཕུད༌ཏེ༌ ཞན༌གུན༌ལ༌ ཏང༌ཨིན༌།
5ཨི༌ཇིབ༌བི༌ གྱལ༌པོ༌ ཤེད༌ཅན༌ གྱུར༌ཨིན༌ ཨིན༌ནའང༌ ཁོའེ༌ མག༌སྤོན༌ ཅིག༌ཅིག༌ ཁོའེ༌ སང༌ ཁྱུད༌ཅན༌ གྱུར༌ཏེ༌ ཁོ༌རང༌ངི༌ གྱལ༌སྲིད༌དི༌ཀ༌ ཝང༌ ཀྲག༌པོ༌ སྲུལ༌ཨིན༌། 6ལོ༌ ཁ༌ཅིག༌གི༌ སྟིང༌ནེ༌ སི༌རི༌ཡཱ༌ དང༌ ཨི༌ཇིབ༌བི༌ གྱལ༌པོ༌ གུན༌ནི༌ ཅིག༌ དང༌ ཅིག༌ག༌ རོགས༌ ཅོ༌ཅེས༌ལ༌ ཆད༌དོན༌ ཅོས༌ཏེ༌ ཨི༌ཇིབ༌བི༌ གྱལ༌པོའེ༌ ཁོ༌རང༌ངི༌ བུ༌མོ༌ སི༌རི༌ཡཱའེ༌ གྱལ༌པོའ༌ ན༌མ༌ ཏང༌ཨིན༌ ཨིན༌ནའང༌ ཆད༌དོན༌བོ༌ ཁྲངས༌པོ༌ མི༌ལུས༌ ཅིའ༌ཟེར༌ན༌ བུ༌མོ༌, ཁོའེ༌ མག༌པ༌, ཕྲུ༌གུ༌ དང༌ ཁོའ༌ ཆོགས༌སྐྱོར༌ ཅོ༌ཁན༌གུན༌ ཕིངས༌ཏེ༌ ཏང༌ཨིན༌།”
7“ཁོའེ༌ གྱུད༌དི༌ ནང༌ནེ༌ བུ༌ཚ༌ ཅིག༌ ཨི༌ཇིབ༌བི༌ གྱལ༌པོ༌ གྱུར༌ཨིན༌ ཡང༌ ཁོའེ༌ མག༌མིའི༌ སི༌རི༌ཡཱའེ༌ གྱལ༌པོའ༌ མག༌ ཏངས༌ཏེ༌ ཕམ༌ཀལ༌ཨིན༌། 8ཁོ༌ ལོགས༌ཏེ༌ ཡོང༌ ཟ༌ནེ༌ ཁོའེ༌ ཁོང༌གུན༌ནི༌ ལྷ༌ལྷ༌མོའེ༌ སྐུན༌དྲ༌གུན༌ ཡང༌ སེར༌ དང༌ མུལ༌ལི༌ ཅ༌ལག༌གུན༌ ཁུར༌ཏེ༌ ཨི༌ཇིབ༌བ༌ ཁྱོང༌ཨིན༌། ཁོའེ༌ སི༌རི༌ཡཱའེ༌ གྱལ༌པོ༌ ལོ༌ ཁ༌ཅིག༌གི༌ ཕིའ༌ ཅིག༌པོ༌ བོར༌ཨིན༌། 9ཏེ༌ སྟིང༌ནེ༌ སི༌རི༌ཡཱའེ༌ གྱལ༌པོའེ༌ ཨི༌ཇིབ༌བི༌ གྱལ༌སྲིད༌དི༌ཀ༌ སྤུང༌གོལ༌ ཅོ༌ཨིན༌ ཨིན༌ནའང༌ ཁོ༌རང༌ངི༌ ཡུལ༌ལ༌ གྱོགས༌པ༌ ལོགས༌ཏེ༌ ཆ༌གོས༌ཨིན༌། 10སི༌རི༌ཡཱའེ༌ གྱལ༌པོའེ༌ བུ༌ཚ༌གུན༌ནི༌ མག༌མི༌ མང༌པོ༌ ཛོམས༌ ཅུགས༌ཏེ༌ མག༌ ཏང༌ཅེས༌ལ༌ གྲལ༌གྲིག༌ ཅོ༌ཨིན༌། ཁོའེ༌ མག༌མི༌ མ༌མང༌པོ༌ ཨིས༌ར༌ཨེལ༌ གང༌པོའེ༌ ནང༌ང༌ ཆུ༌ལོག༌ ཡོང༌ཁན༌ ཙོགས༌ལ༌ ཕེལ༌ཏེ༌ ཨི༌ཇིབ༌བི༌ གྱལ༌པོའེ༌ གྱལ༌སའེ༌ གྱང༌སྐོར༌ ཚོག༌པ༌ ལེབ༌ཨིན༌།”
11ཏེ༌ནེ༌ ཨི༌ཇིབ༌བི༌ གྱལ༌པོའ༌ སྲོ༌ སྲན༌ཏྲེ༌ ཡོངས༌ཏེ༌ སི༌རི༌ཡཱའེ༌ གྱལ༌པོའ༌ མག༌ ཏང༌ང༌ བིང༌ཨིན༌། ཁོའེ༌ གྱབ༌གལ༌ལ༌ སི༌རི༌ཡཱའེ༌ གྱལ༌པོའེ༌ མག༌མི༌ མ༌ མང༌པོའེ༌ ནོལ༌ཨིན༌ ཨིན༌ནའང༌ ཨི༌ཇིབ༌བི༌ གྱལ༌པོའེ༌ ཁོང༌གུན༌ལ༌ ཕམ༌ ཀལ༌ཨིན༌། 12ཏེ༌ཟམ༌ མང༌པོ༌ མག༌མི༌ ཟུམས༌ཏེ༌ ཕམ༌ཀལ༌ པ༌སང༌ ཨི༌ཇིབ༌བི༌ གྱལ༌པོ༌ མ༌ ཕོ༌སོ༌ཅན༌ གྱུར༌ཏེ༌ སྟོང༌ཁྲག༌གི༌ ནང༌ང༌ མག༌མི༌གུན༌ སད༌ཨིན༌ ཨིན༌ནའང༌ ཁོའེ༌ གྱལ༌ཁ༌བོ༌ ཏུས༌རིང༌མོ༌ མི༌ ལུས༌ 13ཅིའ༌ཟེར༌ན༌ ལོ༌ ཁ༌ཅིག༌གི༌ སྟིང༌ནེ༌ སི༌རི༌ཡཱའེ༌ གྱལ༌པོ༌ སྔུན༌ནི༌ སང༌ མང༌ང༌ མག༌མི༌ དང༌ ཚོན༌ཆ༌ ཉམ༌པོ༌ ཡང༌སྐྱར༌ མག༌ཏང༌ང༌ ཡོང༌ཨིན༌།”
14“ཏེ༌ ཏུས༌ལ༌ ཨི༌ཇིབ༌བི༌ གྱལ༌པོའེ༌ གྱབ༌གལ༌ལ༌ ཞན༌ མང༌པོ༌ ལང༌ཨིན༌། ཞལ༌ཟིགས༌པོ༌ དྲན༌དྲའ༌ གྲུབ༌ཅེས༌ལ༌ ཏེ༌ནང༌ང༌ ཁྱོ༌རང༌ངི༌ མི༌གུན༌ནི༌ ཕྲོ༌ནེ༌ སྲོན༌ཇན༌ ནོལ༌ལ༌ ཐད༌ཁན༌ མང༌པོ༌ ཐེས༌ཏེ༌ ཨིན༌ནོག༌ ཨིན༌ནའང༌ ཁོང༌གུན༌ ཁྲངས༌པོ༌ མི༌ ལུས༌། 15ཏེ༌ཏུས༌ལ༌ སི༌རི༌ཡཱའེ༌ གྱལ༌པོ༌ ཡོངས༌ཏེ༌ ཨི༌ཇིབ༌བི༌ གྱལ༌སའེ༌ ནང༌ང༌ ཞུག༌ཅེས༌ལ༌ ལམ༌ ཁྲེད༌ཁྲེད༌ རྩིགས༌ཏེ༌ ཏེ༌བོ༌ ང༌ཡོག༌ག༌ ལེན༌ཨིན༌། ཨི༌ཇིབ༌པ༌ མག༌མི༌གུན༌ལ༌ ཏེ༌བོ༌ སྒག༌ མི༌ཐུབ༌, མག༌མི༌ ཀྲག༌ཤོག༌ གུན༌ནའང༌ ཁོང༌གུན༌ནི༌ གྱབ༌གལ༌ལ༌ ནོལ༌ མི༌ཐུབ༌། 16སྤུང༌གོལ༌ ཅོ༌ཁན༌གུན༌ནི༌ ཁོ༌རང༌གུན༌ ཐད༌ཁན༌ ཅོ༌ཨིན༌, སུའང༌ ཁོང༌གུན༌ནི༌ གྱབ༌གལ༌ལ༌ ནོལ༌ མི༌ཐུབ༌། ཁོ༌ ཨིས༌ར༌ཨེལ༌ལི༌ ས༌ཀྱད༌ ལྡེ༌མོའེ༌ ནང༌ང༌ ཚུགས༌ཏེ༌ ཏེ༌བོ༌ མེད༌ཁན༌ ཅོ༌ཅེས༌སི༌ ཝང༌ ཁོའ༌ ཡོད༌ཏེ༌ ཨིན༌ནོག༌། 17ཁོའེ༌ ཁོ༌རང༌ངི༌ གྱལ༌སྲིད༌ གང༌པོའེ༌ མག༌མི༌ ཉམ༌པོ༌ སྤུང༌གོལ༌ ཅོས༌ཏེ༌ གོབ༌སྐོར༌ཅེས༌ལ༌ ཨི༌ཇིབ༌བི༌ གྱལ༌པོ༌ ཉམ༌པོ༌ ཐུན༌བྲེལ༌ ཅོ༌ཅེས༌སི༌ ཐབ༌ལྡིངས༌། ཁོའེ༌ ཨི༌ཇིབ༌བི༌ གྱལ༌སྲིད༌ མེད༌ཁན༌ ཅོ༌ཅེས༌ལ༌ ཁོ༌རང༌ངི༌ བུ༌མོ༌ ཁོའ༌ ན༌མ༌ ཏང༌ཨིན༌ ཨིན༌ནའང༌ ཏེ༌ ཐབས༌པོ༌ ཁྲངས༌པོ༌ མི༌ལུས༌། 18ཏེ༌ནེ༌ སི༌རི༌ཡཱའེ༌ གྱལ༌པོའེ༌ གྱ༌ཚོའེ༌ ཐའ༌མའེ༌ ཡུལ༌གུན༌ལ༌ སྤུང༌གོལ༌ ཅོས༌ཏེ༌ གྱལ༌སའ༌ མང༌པོ༌ ང༌ཡོག༌ག༌ ཁྱོང༌ཨིན༌ ཨིན༌ནའང༌ མག༌མི༌ འུ༌སྐྱོང༌ཞིག༌གི༌ ཁོའ༌ ཕམ༌ཀལ༌ཏེ༌ ཁོའེ༌ ཕོ༌སོ༌བོ༌ མེད༌ཁན༌ ཅོ༌ཨིན༌ ཡང༌ ཞན༌གུན༌ལ༌ ཁོའེ༌ ཅོ༌ཁན༌ ཙོགས༌ ཁོའ༌ ཅོས༌ཏེ༌ ཁྲེལ༌བ༌ སྟན༌ཨིན༌། 19ཏེ༌ནེ༌ སི༌རི༌ཡཱའེ༌ གྱལ༌པོ༌ ཁོ༌རང༌ངི༌ ཡུལ༌ལ༌ གྱང༌སྐོར༌ ཐོན༌པོ༌ ཡོད༌སའེ༌ ཁོ༌རང༌ངི༌ གྱལ༌ས༌ ལོགས༌ཏེ༌ ཆེན༌ ཨིན༌ནའང༌ ཁོའ༌ མག༌གི༌ ནང༌ང༌ ཕམ༌ ཀལ༌ཏེ༌ སད༌ཨིན༌།”
20“ཁོའེ༌ སྟིང༌ནེ༌ ཡོང༌ཁན༌ནི༌ གྱལ༌པོའེ༌ ཁོ༌རང༌ངི༌ གྱལ༌སྲིད༌དི༌ སྤལ༌གུན༌ ལུས༌ཤུག༌ཅེས༌ལ༌ མི༌གུན༌ནི༌ཀ༌ ཁྲལ༌ ལྕིན༌ཏྲེ༌ ཀལ༌ཨིན༌། ཏུས༌ ཉུ༌ངུན༌ ཞིག༌གི༌ སྟིང༌ནེ༌ ཁོ༌ ཤི༌ཨིན༌ ཨིན༌ནའང༌ མག༌ ཡ༌ ཛིང༌མོའེ༌ ཞས༌ཏེ༌ མི༌ཤི༌།”
21“ཁོའེ༌ སྟིང༌ནེ༌ གྱལ༌པོ༌ གྱུར༌ཁན༌བོ༌ གྱལ༌གྱུད༌ནེ༌ མན༌ཁན༌ ངན༌པ༌ མི༌ཞིག༌ ཡོང༌ཨིན༌། ཞི༌དེ༌ ཡོད༌ཏུས༌ མི༌གུན༌ལ༌ ཁས༌པ༌ ཉམ༌པོ༌ སྐྱོན༌ ཀོལ༌ཏེ༌ ཁོ༌ གྱལ༌པོ༌ གྱུར༌ཨིན༌། 22ཏེ༌ནེ༌ ཁོའེ༌ མག༌མི༌གུན༌ནི༌ ཁོའ༌ གྱབ༌གལ༌ ཅོ༌ཁན༌ནི༌ མག༌མི༌གུན༌ སད༌ཨིན༌། ཁོང༌གུན༌ནི༌ དཀོན༌མཆོག༌གི༌ བླ༌མ༌ ཆེན༌མོའང༌ སད༌ཨིན༌། 23ཁོའེ༌ གོབ༌སྐོར༌ར༌ལ༌ ཞན༌ ཝང༌སྲུལ༌པ༌གུན༌ ཉམ༌པོ༌ ཐུན༌བྲེལ༌ལི༌ ཁ༌ཆད༌ ཅོ༌ཨིན༌། ཁོའ༌ ཆོགས༌སྐྱོར༌ ཅོ༌ཁན༌ ཉུང༌ངུན༌ཞིག༌ མ༌ནེ༌ མེད༌ནའང༌ ཁོ༌ མ༌ ཤེད༌ཅན༌ ཝང༌ སྲུལ༌པ༌ གྱུར༌ཨིན༌། 24ཆུག༌པོ༌ ཡུལ༌གུན༌ནི༌ ནང༌ང༌ ཞི༌དེ༌ དང༌ ཡར༌གྱས༌ ཡོད༌ཏུས༌ ཏེ༌གུན༌ནི༌ཀ༌ སྤུང༌གོལ༌ ཅོས༌ཏེ༌ ཁོའེ༌ ཕ༌མེས༌པོ༌གུན༌ ཁྲངས༌པོ༌ མ༌ ལུས༌ཁན༌ནི༌ ལས༌གུན༌ གྲུབ༌ཅུག༌ཨིན༌། མག༌གི༌ ནང༌ང༌ ཕམ༌ཀལ༌ཁན༌གུན༌ནི༌ ཀ༌ནེ༌ ཅོམས༌ཁན༌ གྱུ༌ནོར༌ དང༌ ས༌ཀྱད༌གུན༌ ཁོའ༌ ཆོགས༌སྐྱོར༌ ཅོ༌ཁན༌གུན༌ལ༌ བགོས༌ཏེ༌ ཏང༌ཨིན༌ ཡང༌ ཁོའེ༌ གྱལ༌ས༌གུན༌ ཁྲེས༌ཏོར༌ ཅོ༌ཅེས༌ལ༌ ཐབས༌ལྡིང༌ཨིན༌། ཨིན༌ནའང༌ ཁོའེ༌ ཝང༌སྲུལ༌ལི༌ ཏུས༌ རིང༌མོ༌ མི༌ལུས༌།
25ཨི༌ཇིབ༌བི༌ གྱལ༌པོའ༌ སྤུང༌གོལ༌ ཅོ༌ཅེས༌ལ༌ ཁོའེ༌ སྟོབས༌ དང༌ སྤོས༌པ༌ ཉམ༌པོ༌ མག༌མི༌ ཆེན༌མོ༌ ལྡུམ༌ཨིན༌། ཨི༌ཇིབ༌བི༌ གྱལ༌པོའེ༌ མ༌ སྟོབས༌ཅན༌ མག༌མི༌ མང༌པོ༌ ཉམ༌པོ༌ ནོལ༌ཅེས༌ལ༌ གྲལ༌གྲིག༌ ཅོ༌ཨིན༌ ཨིན༌ནའང༌ ཁོའེ༌ གྱབ༌གལ༌ལ༌ ཅུས༌ངན༌གུན༌ ལྡིང༌ཅེས༌པོའེ༌ ཁོའ༌ གྱལ༌ཁའ༌ མི༌ཐོབ༌། 26གྱལ༌པོ༌ ཉམ༌པོ༌ ཟན༌ ཟའ༌ཁན༌གུན༌ནི༌ ཁོ༌ མེད༌ཁན༌ ཅོ༌ཅེས༌སི༌ རྩོན༌གྲུས༌ ཅོ༌ཨིན༌། ཁོའེ༌ མག༌མིའ༌ ཕམ༌ ཀྲག༌པོ༌ ཀལ༌ཏེ༌ མག༌གི༌ ནང༌ང༌ མང༌པོ༌ ཤི༌ཨིན༌། 27ངན༌ སེམས༌ཅན༌ནི༌ གྱལ༌པོ༌ ཉིས༌ཀོ༌ ཅོག༌ཙེ༌ ཅིག༌གི༌ཀ༌ དུགས༌ཏེ༌ ཟན༌ ཟེན༌ ཅིག༌ དང༌ ཅིག༌ག༌ ཟུན༌ ཏང༌ཨིན༌ ཨིན༌ནའང༌ ཏེ༌བོ༌ ཁྲངས༌པོ༌ མི༌ལུས༌ ཅིའ༌ཟེར༌ན༌ ལྡམ༌མ༌ ཛད༌ཁན༌ནི༌ ཏུས༌སི༌ཀ༌ ཁོང༌གུན༌ནི༌ ཐའ༌མ༌ ལེབ༌ཨིན༌། 28སི༌རི༌ཡཱའེ༌ གྱལ༌པོ༌ གྱུ༌ནོར༌ མང༌པོ༌ ཉམ༌པོ༌ ཁོ༌རང༌ངི༌ ཡུལ༌ལ༌ ལོགས༌ཏེ༌ ཆེན༌ ཡོད༌ ཟ༌ནེ༌ ཁའེ༌ སེམས༌སི༌ ནང༌ང༌ དཀོན༌མཆོག༌གི༌ ཆད༌དོན༌ ཁ༌ ཉན༌ཁན༌ ཏམ༌པ༌ མི༌གུན༌ནི༌ ཆོགས༌ལ༌ ངན༌པ༌ ལངས༌ཏེ༌ ཁོའེ༌ ཁོང༌གུན༌ལ༌ ནོད༌པ༌ མང༌པོ༌ སྐྱལ༌ཨིན༌།”
29“ལྡམས༌ཁན༌ནི༌ ཏུས༌སི༌ཀ༌ ཁོའེ༌ ཡང༌སྐྱར༌ ཨི༌ཇིབ༌བ༌ སྤུང༌གོལ༌ ཅོ༌ཨིན༌ ཨིན༌ནའང༌ འི༌ཏུས༌ ཇུག༌བྲས༌པོ༌ སྔུན༌ནི༌ སང༌ སོ༌སོ༌ ཡོང༌ཨིན༌། 30རོམ༌མི༌ མག༌གི༌ གྲུ༌ཟིང༌གུན༌ནི༌ ཁོའེ༌ གྱབ༌གལ༌ ཅོ༌ཅེས༌པའེ༌ ཁོའེ༌ སེམ༌སྟོབས༌ ཆག༌ཨིན༌། ཏེ༌བོའེ༌ཕིའ༌ ཁོའེ༌ དཀོན༌མཆོག༌གི༌ ཆད༌དོན༌ ཁ༌ ཉན༌ཁན༌ནི༌ ཏམ༌པ༌ མི༌གུན༌ནི༌ གྱབ༌གལ༌ལ༌ ཁོ༌རང༌ངི༌ སྲོ༌ སྲུག༌ཨིན༌། ཁོའེ༌ དཀོན༌མཆོག༌གི༌ ཏམ༌པ༌ ཆད༌དོན༌ ཕང༌ཁན༌གུན༌ལ༌ རྩི༌ཝ༌ ཏང༌ཨིན༌།”
31“ཁོའེ༌ མག༌མི༌གུན༌ནི༌ ཏམ༌པ༌ ཆོད༌ཁང༌ ང༌ཡོག༌ག༌ ཁྱོངས༌ཏེ༌ ཏེ༌བོ༌ ཚི༌ཏུ༌ ཅོ༌ཨིན༌། ཞག༌ཏང༌ངི༌ ཆོད༌པ༌ ཕུལ༌ཅེས༌གུན༌ སྒག༌ཨིན༌ ཡང༌ ཏེ༌ ནང༌ང༌ ཁམ༌ལོག༌ ཚི༌ཏུ༌ ཅོ༌ཁན༌བོ༌ བོར༌ཏེ༌ ཆོད༌ཁང༌ ཚི༌ཏུ༌ གྱུར༌ ཅུག༌ཨིན༌། 32ཁོའེ༌ སྐྱོན༌ ཀོལ༌ཏེ༌ ཏད༌པ༌ ཕང༌ཁན༌གུན༌ ཁོ༌རང༌ངི༌ ཆོགས༌ལ༌ ཁྱོངས༌ཏེ༌ ཁོ༌ ཐད༌ཁན༌བོ༌ ཅོ༌ཅུག༌ཨིན༌ ཨིན༌ནའང༌ དཀོན༌མཆོག༌ ཤེས༌ཁན༌གུན༌ ཏད༌པའེ༌ ནང༌ང༌ སྟན༌པོ༌ དུགས༌ཏེ༌ ཁོའེ༌ གྱབ༌ནེ༌ མི༌ཆ༌།”
33“ཤེས༌རབས༌ཅན༌གུན༌ནི༌ མང༌པོའ༌ ལབ༌ཞ༌ ཏང༌ཨིན༌ ཨིན༌ནའང༌ ཏུས༌ ཉུ༌ངུན༌ཞིག༌གི༌ ཕིའ༌ ཁོང༌གུན༌ ར༌འི༌ ཉམ༌པོ༌ སད༌ཨིན༌ ཡ༌ མེའ༌ སྲག༌ཨིན༌ ཡ༌ ཁོང༌གུན༌ ཅོམ༌ཨིན༌ ཡ༌ ཙོན༌ཁང༌ངི༌ ནང༌ང༌ ཀག༌ཨིན༌། 34ཁོང༌གུན༌ལ༌ རྡུག༌ངལ༌ ཐོང༌ ཟ༌ནེ༌ ཁོང༌ང༌ རོགས༌ ཙ༌པིག༌ ཐོབ༌ཨིན༌ ཨིན༌ནའང༌ ཁོང༌གུན༌ནི༌ ཕྲོ༌ནེ༌ ཁ༌ཅིག༌གི༌ དོད༌པ༌ ངན༌པ༌ ཉམ༌པོ༌ རོགས༌ ཅོ༌ཨིན༌། 35ཞན༌ མང༌པོ༌ ཏམ༌པ༌ གྱུར༌ཅེས༌སི༌ ཕིའ༌ ཐའ༌མའེ༌ ཏུས༌ ཚོག༌པ༌ ཤེས༌རབས༌ཅན༌ ཁ༌ཅིག༌ ཤི༌ གོས༌ཨིན༌ ཅིའ༌ཟེར༌ན༌ ལྡམས༌ཁན༌ནི༌ ཏུས༌ ལེབ༌ཅེས༌ ཨིན༌ནོག༌།”
36“ཏེ༌ནེ༌ སི༌རི༌ཡཱའེ༌ གྱལ༌པོའེ༌ ཁོ༌རང༌ ཐད༌ཁན༌ ཅོ༌ཨིན༌། ཁོའེ༌ ཁོ༌རང༌ང༌ སྤལ༌ ཏངས༌ཏེ༌ ཁོ༌རང༌ ལྷ༌ལྷ༌མོ༌ ཚང༌མའེ༌ སང༌ ཀྲག༌ག༌ ཐེན༌ ཡང༌ ཀུན༌ཝང༌ དཀོན༌མཆོག༌གའང༌ དད༌ལོག༌ ཞུ༌ཨིན༌། དཀོན༌མཆོག༌གི༌ ཆད༌པའེ༌ ཏུས༌ ལེབ༌ལེབ༌ ཚག༌པ༌ ཁོའེ༌ ཡར༌གྱས༌ ཅོ༌ཨིན༌ ཅིའ༌ཟེར༌ན༌ དཀོན༌མཆོག༌གི༌ ཐབས༌ལྡིང༌ང༌ ཛད༌ཁན༌བོ༌ གྲུབ༌གོས༌། 37གྱལ༌པོའེ༌ ཁོ༌རང༌ངི༌ ཕ༌མེས༌པོ༌གུན༌ནི༌ ལྷ༌ལྷ༌མོ༌ ཡ༌ བུ༌མོ༌གུན༌ནི༌ ཅམས༌པ༌ ཅོ༌ཁན༌ ལྷ༌ ཡ༌ ཞན༌ ལྷ༌ལྷ༌མོ༌གུན༌ལ༌ རྩི༌ཝ༌ མི༌ཏང༌ ཅིའ༌ཟེར༌ན༌ ཁོའེ༌ ཁོ༌རང༌ ཁོང༌ ཚང༌མའེ༌ སང༌ ཀྲག༌པོ༌ ཐེས༌ཏེ༌ ཕོ༌སོ༌ ཅོའ༌ནོག༌། 38ཏེ༌གུན༌ནི༌ ཚབས༌ལ༌ ཁོའེ༌ གྱང༌སྐོར༌ ཐོན༌པོའེ༌ གྱལ༌ས༌ སྐྱོབ༌ཁན༌ནི༌ ལྷའ༌ རྩི༌ཝ༌ ཏང༌ཨིན༌ ཡང༌ ཁོའེ༌ ཕ༌མེས༌པོ༌གུན༌ནི༌ མ༌ཤེས༌ཁན༌ནི༌ ལྷའ༌ སེར༌, མུལ༌, གྱན༌ཆ༌ དང༌ ཞན༌ རིན༌ཅན༌ སྐྱེས༌གུན༌ ཕུལ༌ཏེ༌ རྩི༌ཝ༌ ཏང༌ཨིན༌། 39ཞན༌ ལྷ༌ལྷ༌མོའེ༌ རོགས༌ ལེན༌ཏེ༌ ཁོའེ༌ གྱང༌སྐོར༌ ཐོན༌པོ༌ཅན༌ནི༌ གྱལ༌ས༌གུན༌ནི༌ཀ༌ སྤུང༌གོལ༌ ཅོ༌ཨིན༌ ཡང༌ ཁོའེ༌ ཆོགས༌པ༌གུན༌ལ༌ རྩི༌ཝ༌ ཀྲག༌པོ༌ ཏངས༌ཏེ༌ ཁོང༌གུན༌ ཝང༌སྲུལ༌པ༌ སྐོ༌ཨིན༌། ཁོང༌གུན༌ལ༌ རྔན༌པའེ༌ ཚུལ༌ལ༌ ས༌ཀྱད༌གུན༌ བགོས༌ཏེ༌ ཏང༌ཨིན༌།”
40“སྟིང༌ཇུག༌གི༌ ཏུས༌ལ༌ ཨི༌ཇིབ༌བི༌ གྱལ༌པོའེ༌ སི༌རི༌ཡཱའེ༌ གྱལ༌པོའ༌ མག༌ ཏང༌ཨིན༌ ཨིན༌ནའང༌ ཁོའེ༌ རྟ༌རེལ༌ དང༌ རྟའེ༌ཀ༌ ཞོན༌ཁན༌ ཡང༌ མག༌གི༌ གྲུ༌ཟིང༌ མང༌པོ༌ ཉམ༌པོ༌ ཨི༌ཇིབ༌བི༌ གྱལ༌པོའ༌ སྤུང༌གོལ༌ ཀྲག༌པོ༌ ཅོ༌ཨིན༌། ཆུ༌ལོག༌ ཡོང༌ང༌ ཙོགས༌ལ༌ ཁོ༌ གྱལ༌ས༌ མང༌པོའེ༌ ནང༌ང༌ ཞུགས༌ཏེ༌ མི༌གུན༌ སད༌ཨིན༌། 41ཁོའེ༌ ལྡེ༌མོ༌ ནས༌ས༌ ཨིས༌ར༌ཨེལ༌ལི༌ཀའང༌ སྤུང༌གོལ༌ ཅོ༌ཨིན༌། གྱལ༌ཁམས༌ མང༌པོ༌ མེད༌ཁན༌ ཆེན༌ ཨིན༌ནའང༌ ཨི༌དོམ༌པ༌ དང༌ མོ༌འབ༌པ༌ ཡང༌ ཨ༌མོན༌པའེ༌ འུ༌སྐྱོང༌གུན༌ ཤོར༌ ཉན༌ཨིན༌། 42ཁོའེ༌ ཡུལ༌ མང༌པོ༌ ང༌ཡོག༌ག༌ ཁྱོང༌ཨིན༌, ཨི༌ཇིབ༌པ༌གུན༌ནའང༌ ཁོའེ༌ ཀ༌ནེ༌ མི༌ ཐར༌། 43ཁོའེ༌ ཨི༌ཇིབ༌བི༌ སེར༌, མུལ༌ དང༌ ཞན༌ གྱུ༌ནོར༌ ཚང༌མ༌ ཁོ༌རང༌ངི༌ ཝང༌ངི༌ ཡོག༌ག༌ ལེན༌ཨིན༌། ལི༌བི༌ཡན༌པ༌ དང༌ ཨི༌ཐིའོ༌པིའ༌པ༌ ཁོའེ༌ ཝང༌སྲུལ༌ལི༌ ཡོག༌ག༌ ཡོང༌ཨིན༌། 44ཨིན༌ནའང༌ ཤར༌ ཆོགས༌ དང༌ བྱང༌ ཆོགས༌ནེ༌ འུ༌ཡ༌ གྱུགས༌ཏེ༌ ཁོ༌ ཇིགས༌ཅུགས༌ ཡང༌ ཁོ༌ སྲོ༌ སྲན༌ཏྲེ༌ ནང༌ང༌ ཁྲེས༌ཏོར༌ ཅོའ༌ བིངས༌ ཡང༌ ངན༌པའེ༌ ཚུལ༌ལ༌ མི༌ མང༌པོ༌ སད༌ཨིན༌། 45ཁོའེ༌ གྱལ༌པོའེ༌ ཀུར༌བོ༌ མེ༌གྲི༌ཏྲེ༌རི༌ཡན༌ ཚོ༌ དང༌ ཡེ༌རུ༌ཤ༌ལེམ༌མི༌ ཏམ༌པ༌ ཆོད༌ཁང༌ རྩིགས༌ཁན༌ནི༌ རི༌ པར༌ལ༌ ཙུག༌ཨིན༌། ཨིན༌ནའང༌ ཁོ༌ མེད༌ཁན༌ ཆ༌ཅེས༌སི༌ ཏུས༌པོ༌ ལེབ༌ཨིན༌ ཡང༌ ཁོའ༌ སུའིང༌ རོགས༌ མི༌ཅོ༌།”
Currently Selected:
དཱ༌ནི༌ཨེལ༌ 11: lbj
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
