न्यायकर्ता 8
8
जेबह व सल्मुन्ना
1एफ्राइमया मनूतय्सं गिदोनयात धाल – “छिं छाय् जिपिंलिसें थज्याःगु व्यवहार यानादियागु? मिद्यानलिसें ल्वाःवंबलय् छिं जिमित छाय् सःताः मदीयागु?” थ्व खँयात कयाः इपिं वलिसें कचकच याः वल।
2वं इमित धाल, “छिमिसं याःगु थें जिं आः छु यानागु दु धकाः? छु एफ्राइमयात त्वताःथकूगु दाख, अबीएजेरया#८:२ अबीएजेर गिदोन अबीएजेर वंशयाम्ह खः फुक्क बाली स्वयाः मभिं ला? 3परमेश्वरं मिद्यानयाम्ह शासक ओरेब व जएबयात छिमिगु ल्हातय् बियादीगु दु। छिमिसं याःगु थें ति जिं छु याये फत?” वयागु थज्याःगु खँ न्यनाः इमिगु तं क्वलात।
4गिदोन व वया स्वसःम्ह मनू यर्दनया सिथय् वयाः खुसि छित। इपिं त्यानुचासां इमिसं शत्रुतय्त लित्तु हे लिनाच्वन। 5सुक्कोतय् थ्यने धुंकाः वं अनयापिं मनूतय्त धाल, “जिमि थुपिं मनूतय्त नयेत मरि बियादिसँ, थुपिं त्यानुचाःगु दु। जिं मिद्यानया शासक जेबह व सल्मुन्नायात लिनाच्वनागु दु।”
6तर सुक्कोतयापिं हाकिमतय्सं लिसः बिल, “छु जेबह व सल्मुन्ना छंगु ल्हातय् लाये धुंकल ला? अथेसा छिमि सिपाइँतय्त जिमिसं छाय् मरि बियेगु?”
7गिदोनं धाल, “थुकिया लागि, परमप्रभुं जेबह व सल्मुन्नायात जिगु ल्हातय् बियादीबलय् जिं मरुभूमियागु कं व च्वामुगु कथिं छिमिगु लाय् कय्पुयाः बी।”
8व अनं पनीएलय् वन, अले अनयापिं मनूतय्त नं व हे खँ धाल। पनीएलयापिं मनूतय्सं नं सुक्कोतयापिं मनूतय्सं थें हे लिसः बिल। 9अथे जुयाः वं पनीएलयापिं मनूतय्त धाल, “जि त्यानाः लिहां वये धुंकाः जिं थ्व किल्लायात थुनाबी।”
10जेबह व सल्मुन्ना धाःसा झिंन्याद्वः ति सिपाइँतलिसें कर्कोर शहरय् च्वनाच्वंगु जुल। पुर्बयापिं सकल सिपाइँत मध्ये बचय्जूपिं उलि हे जक खः। १,२०,००० म्ह सिपाइँत तरवारं सी धुंकूगु जुयाच्वन। 11नोबह व योगबहाया पुर्बपाखे पालय् च्वनिपिं मनूतय्सं छ्यलीगु लँपु जुयाः गिदोन थाहां वन अले आकाझाकां शत्रुतय्त हमला यात। 12निम्ह मिद्यानी जुजुपिं जेबह व सल्मुन्ना बिस्युं वन। तर गिदोनं लिनाः इमित ज्वन। अले इमि फुक्क सिपाइँत ग्यानाः उखेलाः थुखेलाः मदय्क बिस्युं वन।
13योआशया काय् गिदोन हेरेसया भन्ज्याङ जुनाः लडाइँनं लिहां वल। 14अले लँय् वं छम्ह सुक्कोतयाम्ह ल्याय्म्हयात ज्वनाः वयाके न्यनेकने यात। व मनुखं सुक्कोतयापिं न्हयेन्हय्म्ह हाकिमत व शहरयापिं थकालितय्गु नां च्वयाबिल। 15अनंलि गिदोन सुक्कोतयापिं मनूतय्थाय् वयाः थथे धाल, “स्व, जेबह व सल्मुन्नायात, इमिगु बारे छिमिसं थथे धकाः जितः हेस्याःगु खः, ‘छु जेबह व सल्मुन्ना छिमिगु ल्हातय् लाये धुंकल ला? अथेसा जिमिसं छिमि त्यानुपिं मनूतय्त छाय् मरि बियेगु?’” 16वं शहरयापिं थकालितय्त ज्वन, अले कं व च्वामुगु कथिं दायाः सुक्कोतयापिं मनूतय्त सजाँय बिल। 17अनंलि व पनीएलय् वन अले वं अनयागु किल्लायात थुनाबिल, अले वं शहरयापिं मनूतय्त स्यात।
18अबलय् वं जेबह व सल्मुन्नायात न्यन, “तबोरय् छं स्यानापिं मनूत गथे च्वं?”
इमिसं लिसः बिल, “इपिं छि थें च्वं, सकसिगु ख्वाः जुजुया काय्पिनिगु थें च्वं।”
19गिदोनं धाल, “इपिं जिमि दाजुकिजापिं जिमि हे मांया काय्पिं खः। धात्थें परमप्रभु म्वाःम्ह खः थें, छिमिसं इमिगु ज्यान बचय् याःगु जूसा जिं छिमित स्यानाछ्वये हे मखुनि।”
20अले वं थः जेठाम्ह काय् येतेरयात धाल, “दनाः इमित स्या।” तर वं ग्यानाः तरवार लिमकाल छाय्धाःसा अबलय् व नकतिनियाम्ह ल्याय्म्ह मचा खः।
21उकिं जेबह व सल्मुन्नां धाल, “छिं थः हे दनाः जिमित स्यानादिसँ, ‘मनू गथे च्वं वयागु बल नं अथे हे जुइ।’” उकिं गिदोनं इपिं निम्हय्सित स्यात अले वं इमि ऊँटया गःपतय् दुगु तिसा काल।
गिदोनं मूर्ति दय्कूगु
22इस्राएलीतय्सं गिदोनयात धाल, “छिं इमित मिद्यानीतपाखें बचय् यानादिल। आः छि जिमि शासक जुयादिसँ, छिगु लिपा छि मचाखाचात जिमि शासक जुइमा।”
23गिदोनं लिसः बिल, “जि व जिमि काय्नं मखु तर परमप्रभुं हे छिमित शासन यानादी।” 24अनंलि वं धाल, “जिं छिमिके छगू खँ फ्वने। छिपिं छम्ह छम्हय्सिनं जितः लाकाहःगु सामानं छचाः छचाः मार्वरि ब्यु।” अबलय् इश्माएलीतय्#८:२४ इश्माएली मिद्यानीतय्गु मेगु नां इश्माएली खः न्हाय्पनय् लुँयागु मार्वरि तीगु चलन दुगु जुयाच्वन।
25इमिसं लिसः बिल, “धात्थें जिमिसं उपिं मार्वरित छितः बी।” अले इमिसं बँय् कापः छकू लायाः फुक्कसिनं थथःगु लाकाहःगु सामानं लुँयागु मार्वरि उकी तल। 26वयात ब्यूगु लुँयागु मार्वरितय्गु तौल निइगू किलोग्राम ति दुगु जुल। तर उकी मिद्यानी जुजुतय्सं पुनीगु तिसा, सिखः व बैजनी रंगयागु वसः अले उँटतय्गु गःपःयागु सिखःत मलाः।
27गिदोनं व लुं छगू एपोद दय्कल, अले व थःगु हे शहर ओप्राय् तल। अथे जूगुलिं सकल इस्राएलीतय्सं उकियात पुजा यानाः परमप्रभुयात विश्वासघात यात। अले व गिदोन व वया परिवारयात तक्यंकीगु जाः जुल।
गिदोन सीगु
28थुकथं इस्राएलीतय्गु ल्हातं मिद्यानीत बुत, इमिसं हाकनं छ्यं ल्ह्वने मफुत। गिदोन म्वानाच्वंतले पिइदँ तक देशय् शान्ति जुयाच्वन।
29योआशया काय् यरूब-बाल (गिदोन) थःगु छेँय् वनाः अन हे च्वन। 30गिदोनया कलाःपिं हे यक्व दुगु जुयाः वया काय्पिं हे न्हयेम्ह दु। 31शेकेमय् च्वनीम्ह वया मथ्याःम्ह कलाःपाखें नं छम्ह काय् दत। वं वयागु नां अबीमेलेक तल। 32योआशया काय् गिदोन तसकं बुरा जूबलय् सित, अले वयात वया अबुया सीगालय् अबीएजेरीतय्गु ओप्राय् थुन।
33गिदोन सीवं इस्राएलीत व्यभिचारीत थें बालद्यःया ल्यू वन। इमिसं बाल-बरीतयात थः द्यः दय्कल। 34प्यखेरं च्वंपिं इमि शत्रुतय्गु ल्हातं इमित बचय् यानादीम्ह परमप्रभु थः परमेश्वरयात इमिसं ल्वमंकल। 35यरूब-बालं (गिदोनं) इस्राएलया निंतिं याःगु फुक्क भिंगु ज्यायात ल्वमंकाः इमिसं वया परिवारयात यायेमाःगु दया मयाः।
Currently Selected:
न्यायकर्ता 8: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
