न्यायकर्ता 7
7
गिदोनं मिद्यानीतय्त त्याकूगु
1छन्हु यरूब-बाल अर्थात गिदोन व व नापं दुपिं मनूतय्सं सुथ न्हापां दनाः हरोदया बुँगाःचा तक वनाः अन हे छाउनी तल। मिद्यानीतय्गु छाउनी धाःसा इमिगु उत्तरपाखे मोरेया डाँडायागु क्वय् बेसीइ दुगु जुयाच्वन। 2परमप्रभुं गिदोनयात धयादिल, “मिद्यानीतय्त इमिगु ल्हातय् बीत जिगु निंतिं छलिसें यक्व मनूत दु। जिं मिद्यानीतय्त इमिगु ल्हातय् बी मखु। मखुसा जिमिसं थःगु हे बलं लडाइँ त्याकाःगु खः धकाः इस्राएलीतय्सं जिगु विरोधय् तःधंछुयाः धाइ। 3आः छ वनाः मनूतय्सं तायेक थथे धा, ‘ग्यानाः थुरथुर खाइपिं जुक्व गिलाद पहाडं लिहां वनेमा।’” उकिं निइनिद्वः मनूत लिहां वन, झिद्वः जक ल्यनाच्वन।
4अले परमप्रभुं गिदोनयात धयादिल, “आः नं मनूत यक्व दु, इमित क्वय् खुसिचाय् यंकि अले जिं छंगु निंतिं इमित ब्यागल तये। ‘थ्व मनू छलिसें वनी’ धायेबलय् व मनू छलिसें वनी, अले ‘थ्व मनू छलिसें वनी मखु’ धकाः धायेबलय् व मनू छलिसें वनी मखु।” 5अथे जुयाः गिदोनं मनूतय्त खुसिचाय् यंकल। परमप्रभुं धयादिल, “सुनां सुनां खिचां थें में फ्ययाः लः त्वनी इमित छखे ति, सुनां सुनां पुलिं चुयाः लः त्वनी इमित धाःसा मेखे ति।” 6स्वसःम्ह मनूतय्सं ल्हाः म्हुतुइ यंकाः लः फ्ययाः त्वन, ल्यंदुपिं सकसिनं पुलिं चुयाः लः त्वन।
7परमप्रभुं गिदोनयात धयादिल, “थुपिं में लः फ्ययाः त्वंपिं मनूतपाखें हे जिं छिमित बचय् याये व मिद्यानीतय्त छंगु ल्हातय् तयाबी। मेपिं सकसितं थथःगु थासय् लिहां हुँ धकाः धा।” 8अथे जुयाः गिदोनं स्वसःम्ह मनूतय्त जक तयाः ल्यंदुपिं इस्राएलीतय्त थथःगु पालय् लितछ्वल। इपिं स्वसःम्हय्सिनं नयेगु सामान व तुरही जिम्मा काल।
मिद्यानीतय्गु छाउनी इमिगु क्वय् बेसीइ दुगु जुयाच्वन। 9उखुन्हु चान्हय् परमप्रभुं गिदोनयात धयादिल, “दँ! व छाउनीइ ल्वायेत कुहां हुँ, छाय्धाःसा उकियात जिं छंगु ल्हातय् बीत्यनागु दु। 10ल्वाःवनेत छ ग्याःसा थः च्यः पूराहलिसें क्वय् छाउनीइ हुँ, 11अले इमिसं धयाच्वंगु खँ छं ताइ। अनंलि छाउनीइ ल्वाःवनेत छंके आँट दइ।”
अथे जुयाः गिदोन व वया च्यः पुराह लडाइँ याइपिं मनूत च्वनाच्वंगु थासय् वन। 12मिद्यानीत, अमालेकीत व पुर्बयापिं जातित क्वःबुइँचाया हुल थें ग्वाः ग्वाः मुनाः च्वनाच्वंगु जुयाच्वन। इमिके समुद्र सिथया फि ति हे अल्याख ऊँटत दु। 13स्व, गिदोन अन थ्यंबलय् वं छम्ह मनुखं थः सायात थःगु म्हगस कनाच्वंगु ताल। वं थथे धयाच्वन, “न्यँ, जिं म्हगसय् छपाः तछ्वमरि तुलाः मिद्यानया छाउनीइ वःगु खना, व मरि पालय् वयाः थुलि जोडं न्यात कि उकिं पालयात फातापुइकाः क्वथलाबिल।”
14वया पासां लिसः बिल, “धात्थें हे थ्व ला इस्राएली योआशया काय् गिदोनया तरवार हे खः। परमेश्वरं मिद्यानीत व फुक्क सिपाइँतय्त वयागु ल्हातय् बियादीगु दु।”
15व मनूया म्हगसया खँ व उकिया अर्थ न्यने धुंकाः गिदोनं क्वछुनाः परमेश्वरयात सुभाय् देछात। अनंलि व इस्राएलया छाउनीइ लिहां वयाः धाल, “दँ! परमप्रभुं मिद्यानीतय्गु छाउनीयात छिमिगु ल्हातय् बियादीगु दु।” 16अले वं इपिं स्वसःम्ह मनूयात स्वंगू पुचलय् ब्वथलाः इपिं सकसिगु ल्हातय् छपु तुरही व मिप्वाः दुगु खालि घः इपिं सकसित बिल।
17अले वं इमित धाल, “जितः स्व, जिगु ल्यूल्यू वा। अले छाउनीया लिक्क थ्यनीबलय् जिं गथे याये छिमिसं नं अथे हे या। 18जि व जिमि मनूतय्सं तुरही पुइबलय् छिमिसं नं छाउनीया प्यखेरं छिमिगु तुरही पु। अले तसकं हालाः धा, ‘परमप्रभुया निंतिं व गिदोनया निंतिं।’”
19बाचा इलय् पाः च्वनिपिं मनूत ह्यूगु भचा जायेवं गिदोन व व नापं दुपिं सछिम्ह मिजं छाउनीया लिक्क थ्यन। इमिसं थःगु तुरही पुयाः थथःगु ल्हातय् दुगु घः तछ्यात। 20इपिं स्वंगू पुचलं हे तुरही पुल अले घः तछ्यात। खव ल्हातय् मिप्वाः व जव ल्हातय् तुरही कयाः इपिं थथे हाल, “परमप्रभुया व गिदोनया निंतिं तरवार।”
21सकलें मनूतय्सं छाउनीयात घेरय् यानाः थथःगु थासय् दन। व खनेवं मिद्यानीत ग्यानाः तसकं हालाः बिस्युं वन। 22स्वसःम्ह मनूतय्सं तुरही पूबलय् परमप्रभुं शत्रुतय्त थथःगु तरवार ज्वंकाः छम्हय्सिनं मेम्हय्सित हमला याकादिल। अले मिद्यानी सेना सरेराया बेथ-शित्ता व तब्बात लिक्कया हाबिल महोला शहरया सिमाना थ्यंक बिस्युं वन।
23उबलय् हे नप्ताली, आशेर व फुक्क मनश्शे कुलपाखें इस्राएलीत सःतल। अले इमिसं मिद्यानीतय्त लित्तुलिल। 24गिदोनं एफ्राइमया पहाडयागु देश न्यंकं थथे धयाः दूतत छ्वल, “क्वय् कुहां वयाः मिद्यानीतलिसें लडाइँ या। अले यर्दन खुसि व बेथ-बरा तक इमिगु यर्दन खुसि छीगु थाय्त त्याका का।”
उकिं सकलें एफ्राइमतय्त सःतल, अले बेथ-बरातक यर्दन खुसि छीगु थाय्त इमिसं काल। 25इमिसं ओरेब व जएब नांयापिं निम्ह मिद्यानी शासकतय्त ज्वन। इमिसं ओरेबयात ल्वहंधिकय् स्यात, लिपा उकियात “ओरेबया ल्वहंधी” नां तल। अले जएबयात दाख तिसीगु सालय् स्यात, लिपा उकियात “जएबया दाख तिसीगु सा” नां तल। इमिसं ओरेबयात ओरबया ल्वहंधिकय् अले जएबयात जएबया दाख तिसीगु सालय् स्यात। इमिसं मिद्यानीतय्त लित्तुलिनाः हे च्वन लिपा इमिसं ओरेब व जएबयागु छ्यं यर्दन पारि गिदोनयाथाय् हल।
Currently Selected:
न्यायकर्ता 7: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
