न्यायकर्ता 11
11
यिप्ता
1यिप्ता धाःम्ह छम्ह मनू दु। व गिलादी खः, व तसकं बहादुर सिपाइँ खः। व छम्ह वेश्यापाखें बूम्ह गिलादया#११:१ गिलाद गिलाद लागाया काय् काय् खः। 2गिलादया कलाःपाखें यक्व काय्पिं नं बुइकल। तर इपिं तःधिकः जूबलय् इमिसं यिप्तायात पितछ्वल। इमिसं वयात धाल, “जिमि बौया छेँय् छंगु छुं नं हक मदु। छ ला मेम्ह हे मिसाया काय् खः।” 3अथे जूगुलिं थः दाजुकिजाया ल्हातं बचय् जुइत यिप्ता तोब देशय् च्वंवन। अले वं छपुचः ज्यालगय् मजूपिं मनूत मुंकल, इपिं वलिसें चाःहिलाः जुइगु जुल।
4छुं ई लिपा अम्मोनीतय्सं इस्राएलीतलिसें लडाइँ याःबलय् 5तोब देशं यिप्तायात हयेत गिलादयापिं थकालित वन। 6इमिसं वयात धाल, “जिमि सेनापति जुयादिसँ अले जिपिं अम्मोनीतलिसें ल्वाये फइ।”
7तर यिप्तां गिलादयापिं थकालितय्त धाल, “छु छिमिसं जितः जिमि बौया छेँनं हेपय् यानाः पितछ्वया हयागु, मखु ला? छिमित दुःख जूबलय् आः छाय् छिपिं जिथाय् वयागु?”
8इमिसं लिसः बिल, “न्ह्यागु हे जूसां आः जिपिं छिपाखे लिहां वयागु दु। छि जिपिंलिसें झायाः अम्मोनीतलिसें ल्वानादिल धाःसा छि गिलादयापिं जिपिं सकसियां न्ह्यलुवाः जुइ।”
9यिप्तां लिसः बिल, “जि छिपिंलिसें वंसा अले परमप्रभुं इमित जिगु ल्हातय् बियादीसा जि धात्थें छिमि न्ह्यलुवाः जुइ ला?”
10गिलादया थकालितय्सं हाकनं यिप्तायात धाल, “परमप्रभु झीगु दथुइ साक्षी जुल, जिमिसं धात्थें हे छिं धयादीगु थें हे याये।”
11उकिं यिप्ता गिलादया थकालित नापं वन, अले मनूतय्सं वयात थः न्ह्यलुवाः व सेनापति दय्कल। अले मिस्पाय् परमप्रभुया न्ह्यःने यिप्तां थःगु फुक्क खँ हाकनं धाल।
यिप्तां अम्मोनीतय्गु विरोध याःगु
12यिप्तां अम्मोनयाम्ह जुजुयाथाय् दूतत छ्वयाः न्यन, “जिमिगु देशय् हमला यायेत जिमिसं छंगु छु स्यंकागु दु?”
13अम्मोनी जुजुं यिप्ताया दूतय्त थ्व लिसः बिल, “इस्राएलीत मिश्र देशं वःबलय् इमिसं अर्नोनं यब्बोक व यर्दन तक जिमिगु देशया जमिन काःगु खः। अथे जूगुलिं आः व याउँक लितब्यु।”
14यिप्तां अम्मोनयाम्ह जुजुयाथाय् हाकनं थथे धयाः दूतत छ्वल,
15“यिप्तां थथे धयादी, इस्राएलीतय्सं मोआबीतय्गु देश काःगु मदु, अले अम्मोनीतय्गु देश नं काःगु मदु। 16तर इस्राएलीत मिश्र देशं थाहां वःबलय् इपिं मरुभूमि जुयाः लाल समुद्रय् वन अले कादेशय् थ्यन। 17इमिसं वयागु देश जुयाः वनेब्यु धकाः इनाप यायेत एदोमया जुजुयाथाय् दूतत छ्वल। तर व मानय् मजू। थुकथं मोआबया जुजुयाथाय् नं दूतत छ्वल तर व नं मानय् मजुल। उकिं इस्राएल कादेशय् हे च्वन।#गन्ती २०:१४-२१ ”
18“अनं लिपा इपिं मरुभूमि जुयाः वन अले एदोम व मोआबया सिथं सिथं जुयाः मोआबया पुर्ब वनाः अर्नोनया मेखेपाखे छाउनी तल। अर्नोन खुसि मोआबया सिमाना जूगुलिं इपिं मोआब देशय् दुहां मवं।#गन्ती २१:४”
19“अनं लिपा इस्राएलं हेश्बोनय् शासन याइम्ह एमोरीतय् जुजु सीहोनयाथाय् दूतत छ्वयाः वयात थथे धाल, ‘जिमित छिगु देश जुयाः जिमिगु थःगु हे थासय् वनेबियादिसँ।#गन्ती २१:२१-२४ ’”
20अय्जूसां सीहोनं इस्राएलयात वयागु देश जुयाः वने बीत पत्याः मयात। वं थः सकल सिपाइँतय्त मुंकल, अले यहसाय् छाउनी तयाः इस्राएललिसें लडाइँ यात। 21“अले परमप्रभु इस्राएलया परमेश्वरं सीहोन व वया सकलें सिपाइँतय्त इस्राएलयागु ल्हातय् बियादिल। इमिसं इमित बुकल। इस्राएलं व देशय् च्वंपिं एमोरीतय्गु फुक्क लागा त्याका काल। 22इमिसं अर्नोनंनिसें यब्बोक तक व मरुभूमिंनिसें यर्दन खुसि तक हे एमोरीतय्गु फुक्क लागा काल।”
23“अथे जुयाः परमप्रभु इस्राएलयाम्ह परमेश्वरं, एमोरीतय्त इस्राएलीतय् न्ह्यःनं ख्याना छ्वयादिल। आः थ्व लित कायेत छंगु छु हक दु? 24छिमि द्यः कमोशं छिमित छु बी छु व छिमिसं मकाइ ला? थुकथं हे जिमि परमप्रभु परमेश्वरं पितिना छ्वःपिं मनूतय्गु देश जिमिसं काये। 25हानं छ छु मोआबयाम्ह जुजु सिप्पोरया काय् बालाक स्वयाः भिं ला? छु वं गुबलें इस्राएलयात हमला यात ला?#गन्ती २२:१-६ 26स्वसः दँ तक इस्राएलीत हेश्बोन, अरोएर व वया प्यखेरं च्वंगु बस्तीतय् व अर्नोनया सिथय् च्वंगु फुक्क शहरय् च्वन। छिमिसं उबलय् उमित छाय् लित मकयागु? 27जिमिसं छिमित छुं स्यंकागु मदु, तर छिमिसं जिमित हमला यानाः स्यंकाच्वंगु दु। परमप्रभु न्याय यानादीम्ह खः। वय्कलं हे इस्राएलीत व अम्मोनीतय् दथुइ थौंया न्हिइ न्याय यानादीमा।”
28तर यिप्तां छ्वःगु बुखँयात अम्मोनीतय् जुजुं वास्ता हे मयाः।
यिप्तां भाकल याःगु
29अले परमप्रभुयागु आत्मा यिप्तायाके वल, अले व गिलाद व मनश्शे जुयाः गिलादया मिस्पां दुहां वनाः अम्मोनीतलिसें ल्वायेत न्ह्यज्यात। 30अले यिप्तां थ्व भाकल यानाः धाल, “छिं अम्मोनीतय्त जिगु ल्हातय् बियादिल धाःसा 31जि अम्मोनीतय्त बुकाः याउँक लिहां वयेबलय् जिगु छेँनं पिहांवःम्ह न्ह्याम्ह जिं नापलासां व परमप्रभुयाम्ह जुइ अले जिं वयात होमबलि याना छाये।”
32यिप्ता अम्मोनीतय्त हमला यायेत इमिपाखे वन अले परमप्रभुं इमित वयागु ल्हातय् बियादिल। 33वं अरोएरंनिसें मिन्नीत व हाबिल-करमीम तक निइगू शहरत नाश यानाबिल। थुकथं इस्राएलं अम्मोनयात त्याकल।
यिप्ताया म्ह्याय्
34यिप्ता मिस्पाय् थःगु छेँय् लिहां वःबलय् वयात पिने नापलायेत दम्फुत थाथां अले प्याखं हुहुँ झ्वात्त वया म्ह्याय् पिहां वल। व वया याकः म्ह्याय् खः, वया मेपिं सुं नं काय्म्ह्याय् मदु। 35यिप्तां वयात खंबलय् वं थःगु वसः खुनाः धाल, “अय् जिमि म्ह्याय्! छं जिगु नुगः क्वतुंका ब्यूगु दु। छाय् छं जितः दुःख बियागु? जिं परमप्रभुयाके छगू तःधंगु भाकल यानागु दु अले जिं व त्वाथुले मफु।”#गन्ती ३०:२
36वं लिसः बिल, “बाः, छिं परमप्रभुयात बचं बियादीगु दु। छिं गथे धयादीगु खः अथे हे जिलिसें यानादिसँ छाय्धाःसा परमप्रभुं छि शत्रु अम्मोनीतलिसें बदला कयादीगु दु।” 37अले वं थः बाःयात धाल, “जितः छगू दया यानादिसँ। थः पासापिंनापं थुपिं डाँडाय् ख्वयाः चाःहिला जुइत जितः निला तक त्वःतादिसँ। अबलय् जिगु ब्याहा गुबलें जुइमखुगुलिं इपिं नाप वनाः जि ख्वयाच्वने।”
38वं धाल, “छ वने फु।” अले वं वयात निलाया लागि वनेबिल। व थः पासापिंनापं वन, अले पहाड पहाडय् वनाः ख्वयाजुल, छाय्धाःसा वं गुबलें ब्याहा मयाइगु जुल। 39निला फुइ धुंकाः व थः बाःयाथाय् लिहां वल अले यिप्तां थःम्हं भाकल याःगु थें हे यात। व सुं मिजंनापं द्यंगु मदु।
40अनंनिसें इस्राएलया म्ह्याय्पिं प्यन्हु तक गिलादी यिप्ताया म्ह्याय्या लुमन्तिइ पिने पिहां वनीगु चलन इस्राएलय् शुरु जुल।
Currently Selected:
न्यायकर्ता 11: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
