न्यायकर्ता 10
10
तोला न्यायकर्ता ल्ययादीगु
1अबीमेलेक सी धुंकाः इस्राएलीतय्त बचय् यायेत इस्साखार कुलयाम्ह तोला धाःम्ह न्यायकर्ता जुल। व पुवाया काय् अले दोदोया छय् खः। व एफ्राइमया पहाडी देशयागु शामीर धाःगु थासय् च्वनीम्ह खः। 2व निइस्वदँ तक इस्राएलयाम्ह न्ह्यलुवाः जुल। व सी धुंकाः वयात शामीरय् थुनाबिल।
याईर न्यायकर्ता ल्ययादीगु
3वया लिपा गिलादयाम्ह याईर न्यायकर्ता जुल। व निइनिदँ तक इस्राएलीतय् न्ह्यलुवाः जुल। 4वया स्विम्ह गधा गया जुइपिं स्विम्ह काय् दु। इमिके गिलाद देशया स्विगू शहर नं दु। थौं तक नं इमिगु शहरतय्त हब्बात-याईर धकाः धाः। 5याईर सीधुंकाः वयात कामोनय् थुनाबिल।
पलिश्तीत व अम्मोनीतय्गु ल्हातय् मियादीगु
6हाकनं इस्राएलीतय्सं अराम, सीदोन व मोआबयापिं अले अम्मोनीत व पलिश्तीतय् द्यःत अले बालद्यः व अश्तोरेत द्यःमय्जुयात पुजा यानाः परमप्रभुया मिखाय् मभिंगु ज्या यात। इमिसं परमप्रभुयात त्वःतल अले वय्कःया सेवा नं मयात। 7अथे जुयाः परमप्रभु इस्राएल खनाः तंचायादिल। अले वय्कलं इमित पलिश्तीत व अम्मोनीतय्गु ल्हातय् मियादिल। 8इमिसं इस्राएलीतय्त उगु दँय् कसाः बियाः क्वत्यलातल। अले यर्दनया पुर्बपाखे एमोरीतय्गु देश गिलादय् च्वनीपिं सकलें इस्राएलीतय्त झिंच्यादँ तक तसकं दुःख बिया हे च्वन। 9अम्मोनीत नं यर्दन खुसि पार यानाः यहूदा, बेन्यामीन व एफ्राइम कुलयापिं मनूतलिसें लडाइँ यात। अले इस्राएलीत तःधंगु दुःखय् लात।
10अले इस्राएलीतय्सं थथे धयाः परमप्रभुयात ग्वाहालिया निंतिं बिन्ति यात, “जिमिसं थः परमेश्वरयात त्वःताः बालद्यःतय्त पुजा यानाः छिगु विरोधय् पाप यानागु दु।” 11परमप्रभुं इस्राएलीतय्त धयादिल, “न्हापा मिश्रीत, एमोरीत, अम्मोनीत, पलिश्तीत, 12सीदोनीत, अमालेकीत व मिद्यानीतय्सं दुःख ब्यूबलय् छिमिसं जिके ग्वाहालि फ्वन। छु जिं छिमित इमिगु ल्हातं बचय् मयाना ला? 13तर छिमिसं जितः त्वःताः मेपिं द्यःतय्त पुजायात। उकिं आः जिं छिमित हाकनं बचय् याये मखुत। 14वनाः छिमिसं ल्यःपिं द्यःतय्के ग्वाहालि फ्वँ, इमिसं हे छिमित दुःख जुइबलय् बचय् यायेमा।”
15तर इस्राएलीतय्सं परमप्रभुयात धाल, “जिमिसं पाप यानागु दु। जिमित छिं छु यानादी मास्ति वः व हे यानादिसँ। तर जिमिसं छितः बिन्ति याये दया यानाः थौं जिमित बचय् यानादिसँ।” 16अले इमिसं मेपिं द्यःतय्त त्वःताः परमप्रभुयागु आराधना यात। अले परमप्रभुं इस्राएलीतय्गु अप्वः दुःख जूगु स्वयादी मफुत।
17अम्मोनीत मुनाः गिलादय् वयाः अन हे छाउनी तल। इस्राएलीतय्सं नं मुनाः गिलादया मिस्पाय् छाउनी तल। 18अन गिलादया मनूतय् थकालितय्सं थःथवय् खँ ल्हात, “सुनां अम्मोनीतय्त हमला याइ व मनू हे गिलादय् च्वनिपिं सकलें मनूतय् न्ह्यलुवाः जुइ।”
Currently Selected:
न्यायकर्ता 10: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
