२ शमूएल 23
23
दाऊदया दक्कलय् लिपांगु वचन
1दाऊदयागु दक्कलय् लिपांगु वचन थुपिं हे खः –
यिशैया काय् दाऊदं धाःगु खँ थ्व हे खः,
व मनुखं धाःगु खँ, सुयात परमेश्वरं तःधंकादिल,
सुयात याकूबया परमेश्वरं जुजु अभिषेक यानादिल,
सु इस्राएलया भजनत हालिम्ह खः,
वयागु वचन –
2परमप्रभुया आत्मां जिके जुयाः नवानादिल,
वय्कःया वचन जिगु म्हुतुइ हे दु।
3इस्राएलया परमेश्वर नवानादिल,
इस्राएलयात ल्वहंधी थें रक्षा यानादीम्हं जितः धयादिल,
“गुम्हय्सिनं धार्मिकताकथं न्याय याइ,
अले परमेश्वरया भय कयाः शासन याइ,
4व सुपाँय् मदुबलय्या सुथसियागु निभाजः थें खः।
व वा वये धुंकाः जमिनं घाँय् बुइकीगु जः थें खः।”
5छु जिगु घराना परमेश्वरलिसें ठीक मजू ला?
छु वय्कलं जिलिसें फुक्क खँय् सुरक्षित व बल्लाःगु छगू न्ह्याबलेंया बाचा चिनादीगु मदु ला?
छु वय्कलं जितः ग्वाहालि मालीबलय् उद्धार यानाः मदी ला?
अले जिगु फुक्क इच्छा पूवंकामदी ला?
6तर मभिंपिं मनूत फुक्क कं थें वांछ्वइ,
सुनानं व कंमायात खालि ल्हातं मुंके फइ मखु।
7नयागु ल्वाभः वा भाला छ्यलेगु यायेमाः।
कंमा गन मुंकेगु याइ अन हे उकियात छ्वय्की।
दाऊदया नांजाःपिं बहादुर सिपाइँत
१ इति ११:१०-४१
8दाऊदया नांजाःपिं बहादुर सिपाइँतय्गु नां धलः थथे दु –
दकलय् न्हापां तहकमोनीपाखें योशब-बश्शेबेत#२३:८-३९ योशब-बश्शेबेत छुं सेप्टुजेन्ट हस्तलिपि कथं योशब-बश्शेबेत धाःम्ह इसबाल खः १ इति ११:१०-४१ खः – थ्व स्वम्ह बहादुर सिपाइँत मध्ये छम्ह खः। वं च्यासः मनूतय्त छकलं हमला यानाः भालां उपिं फुक्कसित स्यानाबिल।
9उपिं स्वम्ह बहादुर सिपाइँत मध्ये निम्हम्ह अहोही दोदैया काय् एलाजार खः। व दाऊदनापं पास-दम्मीमय् दुगु खः, गुगु थासय् लडाइँ यायेत मुपिं पलिश्तीतय्त इमिसं चुनौती ब्यूगु खः। इस्राएलीत बिस्युं वंबलय् व याकःचा हे दनाः लडाइँ जूगु थासय् ल्वानाच्वन। 10वं त्यानु मचातले हे पलिश्तीतय्त तरवारं हमला याना तुं च्वन। लिपा वं थःगु ल्हातं तरवार तक नं त्वःते मफुत। थुकथं उखुन्हु परमप्रभुं इस्राएलीतय्त त्याकादिल। अनंलि इस्राएलया मनूत सीपिन्त लुतय् यायेत जक एलाजारयाथाय् लिहां वल।
11अले स्वम्हम्ह बहादुर हरारी आगीया काय् शम्मा खः। पलिश्तीत दालया तसकं बांलाःगु बुँइ झ्वःलाक मुनाच्वंगु खः। अनंलि इस्राएलीत पलिश्तीतपाखें बिस्युं वन। 12शम्मा धाःसा व बुँया दथुइ हे दनाच्वन अले व बुँया रक्षा यानाच्वन। अनंलि पलिश्तीतय्त हमला यात। थुकथं परमप्रभुं तःधंगु विजय बियादिल।
13बुँइ सःगु लयेगु ई शुरु जूबलय् स्विम्ह मू सिपाइँत मध्ये तसकं नांजाःपिं स्वम्ह सिपाइँत अदुल्लामया गुफाया लिक्क लाःगु ल्वहं तलय् दाऊदयाथाय् क्वहां वन। पलिश्तीतय्गु मेगु पुचः रपाईमया ब्यासिइ छाउनी दय्काः च्वनाच्वंगु खः। 14उबलय् दाऊद किल्लाय् दु, अले छपुचः पलिश्तीतय् सिपाइँत बेथलेहेमय् च्वनाच्वंगु खः। 15छन्हु दाऊदयात तसकं प्याः चाल, अले वं हालाः धाल, “बेथलेहेमया मू ध्वाखा लिक्क च्वंगु तुंया लः त्वने दःसा ज्यूगु।” 16अथे जुयाः उपिं स्वम्ह बहादुर सिपाइँत पलिश्तीतय्गु दथुं दुहां वनाः बेथलेहेमया ध्वाखाया लिक्क च्वंगु तुंथिं लः कयाः हयाः दाऊदयात बिल। तर दाऊदं व लः त्वने म्हाः धाल। अले परमप्रभुया न्ह्यःने व लः प्वंकाः वं थथे धाल, 17“हे परमप्रभु, जिं थ्व लः त्वने म्वालेमा। छु जिं थुपिं मनूतय्गु हि त्वनेगु ला? थुमिसं थ्व लः थःगु ज्यान पाना हःगु खः।” उकिं वं व लः त्वनेत म्हाः धाल।
थुपिं स्वम्ह बहादुर सिपाइँतय्सं अज्याःगु तःधंगु ज्या याःगु खः।
18सरूयाहया काय् योआबया किजा अबीशै उपिं स्विम्हय्सिया नायः खः। छकः वं भालां स्वसःम्हय्सित स्यात, उकिं व उपिं स्वम्ह थें हे नांजाःम्ह मनू जुल। 19उपिं स्वम्ह स्वयाः वयात यक्व इज्जत दयाः इमि नायः जुल तर उपिं स्वम्ह मध्ये छम्ह धाःसा मजुल।
20यहोयादाया काय् कब्सेलयाम्ह बनायाह नं छम्ह बहादुर सिपाइँ खः। वं यक्व बहादुर ज्या याःगु दु। मोआबयापिं निम्ह दकलय् ल्वायेसःपिं सिपाइँतय्त स्याःम्ह व हे खः। छकः च्वापु गायाच्वंबलय् वं छगू गालय् क्वहां वनाः छम्ह सिंहयात स्यानाबिल। 21वं तसकं तःधिकःम्ह छम्ह मिश्रीयात नं स्यात, वयागु ल्हातय् छगू भाला दु। बनायाहं ल्हातय् छपु तपुगु कथि ज्वनाः वयात हमला यात। अले व मिश्रीया ल्हातं भाला लाकाकयाः उकिं वयात हे स्यानाबिल। 22यहोयादाया काय् बनायाहं अज्याःगु तःधंगु ज्या याःगु खः। व उपिं स्वम्ह बहादुर सिपाइँत थें हे नांजाःम्ह सिपाइँ जुल। 23उपिं स्विम्ह मनू स्वयाः वयात यक्व इज्जत दत। तर व स्वम्ह मध्ये छम्ह मजू। वयात दाऊदं थः अङ्गरक्षकतय् नायः ल्यल।
24स्विम्ह बहादुर सिपाइँत थुपिं हे खः –
योआबया किजा असाहेल,
बेथलेहेमयाम्ह दोदैया काय् एल्हानान,
25हरोदी शम्मा, हरोदी एलीका,
26पल्ती हेलेस,
तकोयाम्ह इक्केशया काय् ईरा,
27अनातोतयाम्ह अबीएजेर,
हूशाती मबुन्ने,
28अहोही सल्मोन,
नतोपाती महरै,
29नतोपाती बानाहया काय् हेलेद,
अले बेन्यामीन गिबायाम्ह रीबैया काय् ईथै,
30पिरातोनी बनायाह, गाशया न्हसिकापयाम्ह हिद्दै,
31अर्बाती अब्बी-अल्बोन, बरहूमी अज्मावेत
32शाल्बोनी एल्याहबा, याशेनया काय्पिं, जोनाथन,
33हरारी शम्मा, हरारी शरारया काय् अहीआम,
34माकाती आहसबैया काय् एलीपेलेत,
गीलोनी अहीतोपेलया काय् एलीआम,
35कर्मेलयाम्ह हेस्रो, अर्बी पारै,
36सोबायाम्ह नातानया काय् यिगाल, हग्रीया काय्,
37अम्मोनी सेलेक, बेरोती नहरै,
गुम्ह सरूयाहया काय् योआबया ल्वाभः ज्वनीम्ह खः,
38यित्री ईरा, यित्री गारेब,
39अले हित्ती उरियाह।
फुक्कं यानाः स्विन्हय्म्ह नांजाःपिं बहादुर सिपाइँत दु।
Currently Selected:
२ शमूएल 23: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
