२ शमूएल 22
22
दाऊद त्याःगु लसताय् हाःगु भजन
भज १८
1परमप्रभुं दाऊदयात शाऊल व मेपिं इमि फुक्क शत्रुतपाखें बचय् यानादीबलय् वं परमप्रभुया न्ह्यःने हाःगु भजन थथे दु,
2परमप्रभु जिगु निंतिं ल्वहंधी थें खः
वय्कः जिगु किल्ला व जितः उद्धार याइम्ह खः।
3जिमि परमेश्वर जिगु निंतिं ल्वहंधी थें खः।
गुकिं जितः रक्षा याइ।
वय्कः जिगु ढाल खः।
वय्कः जितः बचय् याइगु शक्ति खः,
वय्कः जिगु किल्ला खः,
वय्कः जि शरण कायेगु थाय् खः।
छि जितः उद्धार याइम्ह खः,
छिं हे जितः ग्यानापुपिं मनूतपाखें बचय् यानादी।
4जिं परमप्रभुयाके प्रार्थना याये,
वय्कः प्रशंसा याये बहःम्ह खः,
वय्कलं जितः जिमि शत्रुतय्पाखें बचय् यानादी।
5कालया खिपतं जितः स्वतुमतु स्वय्कल।
दुःखया खुसिबालं जितः चुइके यंकल।
6पातालया खिपतं जितः प्यखें हीन,
कालया म्हुतुं जितः पियाच्वन।
7दुःख जूबलय् जिं परमप्रभुयात लुमंका,
जिं ग्वाहालिया लागि परमेश्वरयात प्रार्थना याना।
जिगु प्रार्थना वय्कःया देगलय् थ्यन,
वय्कलं न्हाय्पं बियाः जिगु सः न्यनादिल।
8पृथ्वी खात, अले भ्वखाय् ब्वल,
आकाशया जग क्वारा क्वारा सन।
उपिं थुरथुर खात, छाय्धाःसा परमेश्वर तम्वयादीगु खः।
9वय्कःया न्हाय्प्वालं, कुँत्याः पिहां वल।
वय्कःया म्हुतुप्वालं भस्म याइगु मित्याः व च्यानाच्वंगु ल्वहं ह्यंग्वाः पिहां वल।
10वय्कः आकाश ह्वखनाः कुहां झाल।
वय्कःया पालि तःलय् हाकुगु सुपाँय् दु।
11वय्कः करूबया म्हय् च्वनाः ब्वयाझाल।
वय्कः फय्या पपुतिइ च्वनाः ब्वयाझाल।
12वय्कलं थःत खिउँनं त्वपुल।
अले हाकुगु सुपाँचं थःत भुन।
13वय्कःया न्ह्यःनेया मिजलां
मिया ह्यंग्वाः ह्वाना ह्वाना च्यात
14अले स्वर्गं परमप्रभु थ्वय्क हालादिल,
दक्वसिबय् तःधंम्हय्सिगु सः ताये दत।
15वय्कलं थःगु वाण त्वःताः थः शत्रुतय्त उखेंथुखें यानादिल।
वय्कलं मलखं कय्काः इमित बुकादिल।
16हे परमप्रभु! छिं तमं ब्वःबियादीगुलिं
अले छिगु न्हाय्प्वालं पिहां वःगु मित्यालं
समुद्रया बँ व पृथ्वीया जग खनेदत।
17वय्कलं आकाशं कुहां झायाः जितः ज्वनादिल।
वय्कलं जितः तःजाःगु समुद्रं थकयादिल।
18वय्कलं जितः जिमि बल्लाःपिं शत्रुतय्पाखें बचय् यानादिल,
अले जितः महीपिं जि स्वयाः बल्लाःपिं फुक्कपाखें नं बचय् यानादिल।
19जितः थाकुगु इलय् इमिसं जितः हय्क्काः वल,
अय्नं परमप्रभुं जितः बचय् यानादिल।
20वय्कलं जितः सुरक्षित थासय् यंकादिल,
वय्कलं जितः उद्धार यानादिल छाय्धाःसा वय्कः जिलिसें लय्तायादीगु दु।
21जिं भिं यानाजुयागुलिं
परमप्रभुं नं जितः भिं यानादिल।
अले जि दोष मदुम्ह जूगुलिं
वय्कलं जितः आशिष बियादिल,
22छाय्धाःसा जि परमप्रभुया लँय् जुयाच्वनागु दु।
अले जि जिम्ह परमेश्वरपाखें गुबलें नं फहिलामवना।
23जिं न्ह्याबलें वय्कःया व्यवस्था मानय् यानागु दु,
वय्कःया उजंयात न्ह्याबलें न्यनागु दु।
24जि दोष मदुम्ह धकाः वय्कलं स्यू
अले पापं चिलाच्वनागु दु।
25जिं भिं यानाजुयागुलिं व जि दोष मदुम्ह जूगुलिं
परमप्रभुं जितः भिं यानादिल।
26हे परमप्रभु! भलसा दुपिंलिसे छि थः नं भलसा दुम्ह हे जुयादी।
अले इमान्दारपिंलिसे इमान्दार हे जुयादी।
27शुद्ध नुगः दुपिं मनूतय्त छिं थःत शुद्ध क्यनादी,
तर मभिंपिं मनूतनापं छि चलाख जुयादी।
28क्वमिलुपिन्त छिं बचय् यानादी,
तःधंछुया जुइपिन्त धाःसा क्वह्यंकादी।
29हे परमप्रभु! छिं जिगु निंतिं मत च्याकादी
छिं खिउँ मदय्काः जितः जः क्यनादी।
30छिगु ग्वाहालिं जिं शत्रुतय्गु पुचलय् नं हय्काये फु
अले जिमि परमेश्वरया ग्वाहालिं जिं न्ह्याथें ज्याःगु पःखाः नं गये फु।
31परमेश्वरया लँपु सिद्धगु लँपु खः।
वय्कःया वचन सत्य खः।
वय्कःया शरणय् वंपिनिगु निंतिं वय्कः ढाल खः।
32उकिं परमप्रभु बाहेक मेम्ह सु परमेश्वर दु?
झी परमेश्वर बाहेक मेम्ह सु ल्वहंधी दु?
33व हे परमेश्वर, सुनां जितः बल्लाकल,
अले सुनां जिगु लँपुयात तप्यंकाबिल।
34वय्कलं जिगु तुतियात चल्लायागु तुति थें यानादी।
अले जि ततःजाःथाय् नं तुतिं चुयाच्वने फइ।
35वय्कलं जिगु ल्हाःयात ल्वायेगु कलाः स्यनादी
वय्कलं जिगु लपुयात कँय्यागु धनु साले फय्केत बल्लाकादी।
36हे परमप्रभु! छिं जितः थःगु ढाल बियाः बचय् यानादीगु दु।
छिगु ग्वाहालिं जितः तःधंकादीगु दु।
37छिं जिगु तुतिया निंतिं गाक्क थाय् बियादीगु दु।
अले जि गुबलें नं क्वःदःगु मदु।
38जिं थः शत्रुतय्त लित्तुलिनाः ज्वना,
अले इपिं फुक्कसित नाश मयातले जि लिहां मवया।
39जिं इमित दने हे मफयेक क्वथला
इपिं जिगु तुतिइ क्वदल।
40छिं जितः ल्वायेत बल बियादीगु दु।
अले जिमि शत्रुतय्त जिगु तुतिइ तयादीगु दु।
41छिं जिमि शत्रुतय्त जिगु न्ह्यःनें ख्यानाछ्वत।
जितः महीपिन्त जिं नाश याना।
42इपिं ग्वाहालिया निंतिं हाल,
अय्नं इमित सुनानं बचय् याः मवः।
इमिसं परमप्रभुयात सःतल,
अय्नं वय्कलं लिसः बियामदी।
43जिं इमित धू जुइक दाया।
मनूतय्सं लँय् ध्याचःयात न्हुत्तुन्हुगु थें
जिं इमित न्हुत्तुन्हुया।
44छिं जितः विद्रोहीतय्पाखें बचय् यानादिल,
जाति जातितय् जुजु यानादिल।
जिं म्हमस्यूपिं मनूत नं आः जिगु अधीनय् जुल।
45मेगु जातियापिं मनूत नं जिगु न्ह्यःने क्वछुइ
अले जिं धाःथें च्वनी।
46थःगु साहस तंकाः
इपिं थःपिनिगु किल्लां ग्याग्यां पिहां वल।
47जिगु ल्वहंधी परमप्रभुया प्रशंसा या,
वय्कः म्वानाच्वंम्ह परमप्रभु खः।
जिगु ल्वहंधी जिमि परमेश्वरयात तःधंकि,
वय्कलं जितः बचय् यानादी।
48वय्कलं जितः जिमि शत्रुतलिसे बदला कयादी।
वय्कलं जाति-जातियात जिगु अधीनय् तयादी।
49अले जितः जिमि शत्रुतय्पाखें त्वःतकादिल।
जितः जिमि शत्रुत स्वयाः तःधंकादिल।
जितः मनू स्याना जुइपिनिपाखें बचय् यानादिल।
50उकिं हे परमप्रभु, जिं जात जातियापिनि दथुइ छिगु प्रशंसा याये।
छिगु नामय् भजन हाले।
51छिं थःम्हं ल्यःम्ह जुजुयात ततःधंगु ल्वापु त्याके बियादी।
छिं थःम्हं अभिषेक यानादीम्हय्सित
न्ह्याबलें माया यानादी, दाऊदयात व वया सन्तानतय्त।
Currently Selected:
२ शमूएल 22: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
