१ शमूएल 3
3
परमप्रभुं शमूएलयात ल्यःगु
1थुबलय् मचाम्ह शमूएल एलीं धाःकथं परमप्रभुया सेवा याना तुं च्वन। उबलय् परमप्रभुया वचन कम जक न्यने दइगु अले दर्शन नं उलि बियादी मखु। 2एलीया मिखा बुलुसे च्वने धुंकल अथे जुयाः वं बांलाक स्वये नं मफु। छन्हु चान्हय् एली थः न्ह्याबलें आराम कायेगु थासय् ग्वार्तुलाच्वन। 3शमूएल धाःसा परमेश्वरया बाचाया सनू दुगु पवित्र पालय् द्यनाच्वंगु खः। परमेश्वरया मत च्याना हे च्वंगु खः। 4अनंलि परमप्रभुं शमूएलयात सःतादिल। शमूएलं लिसः बिल, “जि थन हे दु।” 5अले एलीयाथाय् ब्वांय् वनाः वं धाल, “छिं जितः सःतादियागु ला। जि थन हे दु।” तर एलीं धाल, “मखु, जिं छन्त मसःता। हुँ, द्यं हुँ।” अले व द्यं वन।
6हाकनं परमप्रभुं सःतादिल, “शमूएल!” अले व दनाः एलीयाथाय् वन अले वं धाल, “जि थन हे दु। छिं जितः सःतादियागु खः ला?” एलीं धाल, “जिमि काय्, जिं छन्त मसःता। हुँ, द्यं हुँ।” 7थुबलय् तक नं शमूएलं परमप्रभुयात म्हमस्यूनि। अले परमप्रभुया वचन नं वयात मब्यूनि।
8परमप्रभुं स्वकः खुसि वयात सःतादिल, अले वं हाकनं एलीयाथाय् वना न्यं वन, “छिं जितः सःतादियागु खः। जि थन हे दु।” अनंलि परमप्रभुं हे थ्वयात सःतादीगु खः धकाः एलीं थुइकल। 9वं शमूएलयात धाल, “वनाः सुम्क ग्वार्तुला च्वँ, छुं जुयाः वय्कलं हानं सःतादिल धाःसा थथे धा, ‘परमप्रभु, धयादिसँ, छिकपिनि दासं न्यनाच्वंगु दु।’” अले शमूएल वनाः थःगु थासय् ग्वार्तूवन। 10अनंलि परमप्रभु वया न्ह्यःने दंझाल अले न्हापा थें तुं सःतल, “शमूएल, अय् शमूएल।” शमूएलं लिसः बिल, “धयादिसँ, छिकपिनि दासं न्यनाच्वनागु दु।”
11परमप्रभुं वयात धयादिल, “स्व, जिं इस्राएलय् याकनं हे छुं याये त्यनागु दु, थ्व न्यनाः फुक्क छक्क जुइ। 12उखुन्हु हे जिं एली व वया परिवारया विरोधय् धयागु फुक्क खँ शुरुंनिसें अन्त तक हे पूवनी। 13परमेश्वरया विरोधय् वयाः काय्पिन्सं पाप याःगु स्यूसां वं इमित मपंगुलिं वयागु परिवारं न्ह्याबलेंया निंतिं सजाँय फयेमाली धकाः जिं वयात न्हापा हे धयागु दु। 14अथे जुयाः जिं पाफयाः एलीया परिवारया बारे धयाच्वनागु दु, ‘एलीया परिवारं याःगु पापया प्रायश्चित न बलिं न अन्नबलिं छुकिं गुबलें नं जुइ मखु।’”
15शमूएल सुथय् तक हे द्यनाच्वन। अले वं परमप्रभुया पवित्र पालया लुखा चाय्कल। शमूएलं एलीया बारे खंगु दर्शन कनेत ग्यात। 16तर एलीं शमूएलयात सःताः धाल, “शमूएल जिमि काय्!” वं लिसः बिल, “जि थन हे दु।”
17एलीं धाल, “परमप्रभुं छन्त छु धयादिल? जितः फुक्कं खँ मसुचुकुसे धा। छुं जुयाः छं वय्कलं धयादीगु खँ सुचुकल धाःसा परमेश्वरं हे छन्त कडा न्याय यानादीमा।” 18अथे जुयाः शमूएलं वयात छुं नं खँ सुमचुकूसे फुक्क खँ धयाबिल, अले एलीं धाल, “वय्कः परमप्रभु खः। वय्कःयात छु भिं ताल व हे यानादीमा।”
19शमूएल ब्वलना वन। परमप्रभु व नाप दी, अले वय्कलं यानादीगु अगमवाणी छगू नं सितिं मवं फुक्कं पूवंकादिल। 20अनंलि उत्तरय् दानंनिसें बेर्शेबा तकयापिं फुक्क इस्राएलीतय्सं शमूएल परमप्रभु पाखेंयाम्ह अगमवक्ता खः धकाः म्हसिल। 21परमप्रभुं हानं शीलोय् नापलायेगु पालय् दर्शन बियादिल, अन वय्कलं थःगु वचनपाखें थःत शमूएलयाथाय् क्यनादिल।
Currently Selected:
१ शमूएल 3: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
