१ शमूएल 2
2
हन्नाहया प्रार्थना
1हन्नाहं थथे धकाः प्रार्थना यात,
“परमप्रभुं जिगु मन तसकं लय्ताय्कादीगु दु,
वय्कलं यानादीगु ज्या खनाः जि तसकं खुसी जुयागु दु।
जि जिमि शत्रुतय् न्ह्यःने न्हिले,
अले परमप्रभुं जितः ग्वाहालि यानादीगुलिं जि तसकं लय्तायागु दु।
2“परमप्रभु थें पवित्रम्ह
सुं हे मदु, अले वय्कः थें ज्याःम्ह सुं हे मदु।
झी परमेश्वर थें रक्षा याइम्ह मेपिं सुं हे मदु।
3“छं घमण्ड यायेगु त्वःताछ्व
अले तःधंछुया न्वंवायेगु त्वःताछ्व।
छाय्धाःसा परमप्रभु फुक्क खँ स्यूम्ह परमेश्वर खः।
अले मनूतय्सं याःगु फुक्क ज्याया न्याय यानादी।
4“तसकं बल्लाःपिनिगु धनु त्वधूगु दु,
तर लुफिं हानाः क्वःदपिन्सं बल काये खंगु दु।
5गाक्क दुपिं नसाया निंतिं ज्यामि ज्या यानाः जुइमाली,
बरु नये मखंपिनि धाःसा गुबलें नये मास्ति वइ मखु।
थारिम्ह मिसां न्हय्म्ह मचा बुइकूगु दु।
अय्नं यक्वसिया मांयाके छम्ह नं मचा मदु।
6“परमप्रभुं स्यायेगु व जीवन बियेगु नितां यानादी,
वय्कलं हे मनूतय्त पातालय् छ्वयादी अले इमित हाकनं म्वाकादी।
7परमप्रभुं हे चीमि व तःमि यानादी,
वय्कलं सुयातं नम्र यानादी अले सुयातं तःधं यानादी।
8वय्कलं चीमिपिन्त धुलं थकयादी,
वय्कलं मगाःमचाःपिनिन्त नउया द्वं थकयादी,
अले इमित इज्जतया थासय् तयादी,
इमित राजकुमारतय् दथुइ तयादी।
“पृथ्वीयागु जग परमप्रभुयागु हे खः
अले उकी हे वय्कलं संसारयात थापं यानादिल।
9वय्कलं विश्वास याये बहःपिनिगु रक्षा यानादी,
दुष्टतय्त धाःसा खिउँगु थासय् सुम्क तयादी,
“सुं मनूयागु शक्तिं वयात त्याकेफइ मखु।
10परमप्रभुया विरोध याइपिं नाश जुयावनी,
वय्कः इमिगु विरोधय् स्वर्गं नँ न्याःगु सलं हालादी।
पृथ्वीया कुंकुलामय् तक नं वय्कलं न्याय यानादी।
“वय्कलं जितः शक्ति बियादीगु दु
अले थम्हं अभिषेक यानाम्हय्सिगु छ्यं धस्वाकादी।”
11अले एल्काना थःगु छेँ रामाय् लिहां वन। मचाम्ह शमूएल धाःसा पुजाहारी एलीं धाःकथं परमप्रभुया सेवा यायेत अन हे च्वन।
एलीया लुच्चापिं काय्पिं
12एलीया काय्पिं लुच्चात खः, इमिसं परमप्रभुयात वास्ता मयाः। 13मनूनापं पुजाहारीतय्सं याना वयाच्वंगु थज्याःगु चलन दु – सुं मनुखं बलि छाये हइबलय् उकियागु ला दाय्कीबलय् पुजाहारीयात ग्वाहालि याइम्हय्सिनं धुसू ज्वनाः वइ, 14अले फ्वसि वा कराई वा जःसि न्ह्यागु थलय् च्वंगु जूसां धुसुलिं तियाः वक्क ला पुजाहारीं यंकिगु याइ। शीलोमय् आराधना यायेत वःपिं फुक्क इस्राएलीतय्त इमिसं अथे हे व्यवहार याइगु खः। 15तर आः दाः च्याके न्ह्यः पुजाहारीया ग्वाहालिमिं बलि छाइम्ह मनूयात थथे धाइगु, पुजाहारीया निंतिं दय्केत जितः छुं ला ब्यु, दाय्कातःगु ला वं काइ मखु, कचिगु जक काइ। 16व मनुखं “न्हापालाक्क दाः छ्वय्कावा, अले छन्त गुलि माःगु खः यंकी” धकाः लिसः बीगु। पुजाहारीया ग्वाहालिमिं धाःसा थथे धाइगु, “अथे मखु! न्हापालाक्क जितः निं ब्यु, मखुसा जिं लाकाः यंके।” 17उपिं ल्याय्म्हपिं मनूतय्गु पाप परमप्रभुया न्ह्यःने तसकं अप्वयावन छाय्धाःसा इमिसं परमप्रभुयात छायेहःगु बलितय्त तसकं क्वह्यंकल।
18उबलय् शमूएल भिंगु सूती कापःया एपोद फिनाः परमप्रभुया न्ह्यःने सेवा याना हे च्वन। 19दँय्दसं वया मांनं वयागु निंतिं जामालं सुइगु अले थः भाःतनापं दँय्दसं बलि छायेत वनीबलय् शमूएलया निंतिं व यंकाबीगु खः। 20एलीं एल्काना व वया कलाःयात सुवाः बियाः थथे धाइगु, “छिमिसं परमप्रभुयाके फ्वंम्ह थ्व काय्या पलेसा परमप्रभुं छिमित थ्व मिसापाखें मचाखाचात बीमाः।” अले इपिं थःगु छेँ लिहां वनीगु जुयाच्वन।
21परमप्रभुं हन्नायात सुवाः बियादिल अले वं स्वम्ह काय् व निम्ह म्ह्याय् बुइकल। उखे मचाम्ह शमूएल परमप्रभुया न्ह्यःने च्वन्ह्यानावन।
एली व वया काय्पिं
22आः ला एली तसकं बुरा जुइ धुंकल। थः काय्पिन्सं इस्राएलीतय्त याःगु व्यवहारया बारे व परमप्रभुया नापलायेगु पालया ध्वाखाय् सेवा याइपिं मिसात नापं द्यनिगु खँ तक नं एलीं सिल। 23वं काय्पिन्त धाल, “छाय् छिमिसं थज्याःगु ज्या यानागु? छिमिसं तसकं मभिंगु ज्या याना जूगु दु धकाः जिं सकलें मनूतय्गुपाखें न्यनागु दु। 24थथे याये मज्यू जिमि काय्पिं! परमप्रभुया मनूतय्सं छिमिगु बारे धाःगु खँ तसकं बांमलाः। 25छुं जुयाः छम्ह मनुखं मेम्ह मनूया विरोधय् पापयात धाःसा परमप्रभुं मिलय् यानादी, तर परमप्रभुया विरोधय् हे पापयात धाःसा सुनां मिलय् याइ?” तर एलीया काय्पिन्सं थः बौयागु खँय् ध्यान मब्यू, छाय्धाःसा परमप्रभुं इमित स्यायेगु क्वःछिनादी धुंकूगु खः। 26अले मचाम्ह शमूएल परमप्रभु व मनूतय्गु दया मायां ब्वलना वन।#लूक २:५२
एलीया परिवारया विरोधय् अगमवाणी
27परमप्रभुया छम्ह अगमवक्ता एलीयाथाय् वयाः थथे धाल, “परमप्रभुं थथे धयादी, ‘छु छिमि पुर्खात मिश्रय् फारोया दास जुयाच्वंबलय् जि इमिथाय् खनेदय्क मवया ला? 28जिं इस्राएलया फुक्क कुल मध्ये छिमि पुर्खा हारूनयात जिमि पुजाहारी जुइत, जिगु वेदीइ बलि छायेत, गुँगू थनेत व जिगु न्ह्यःने पुजाहारीया भिंगु सूती कापःया वसः फिनाः वयेत ल्ययागु खः। इस्राएलया फुक्क विशेष देछा छिमि पुर्खातय्गु निंतिं अलग तयाबिया। 29छाय् छिमिसं जि च्वनेगु थासय् जिं छा धकाः उजं बियागु बलित व देछायात क्वह्यंकागु? छाय् छं जितः स्वयाः थः काय्पिन्त अप्वः हनाबना यानागु? छाय्धाःसा जिमि प्रजा इस्राएलं छाय्हःगु ब्व नयाः छ व इपिं ल्ह्वंगु दु।’
30“अथे जुयाः इस्राएलया परमप्रभु परमेश्वरं धयादी, ‘छिमि पुर्खां व छिमि परिवारं न्ह्याबलें जिगु न्ह्यःने सेवा यायेमा धकाः धयागु खः। तर परमप्रभुं थथे धयादी, थथे जुइ हे मज्यूगु खः। जितः हनाबना याइपिन्त जिं हनाबना याये अले जितः हेला याइपिन्त जिं नं हेला याये। 31थज्याःगु ई वयाच्वंगु दु कि, जिं छ व छिमि परिवारया बल कम यानाबी अले छंगु परिवारय् सु नं बुरापिं मनूत दइ मखु। 32जि च्वनेगु थासय् संकट जूगु छं खनि। इस्राएलया निंतिं भिं यायेगु जुइ अय्नं छंगु परिवारय् थनिनिसें छम्ह नं बुरापिं मनूत दइ मखु। 33अथे जूसां छं सन्तानपाखें छम्ह म्वाकातये अले व पुजाहारी जुयाः जिगु सेवा याइ। अले व कां जुइ व निराश जुइ। छं मेपिं सन्तानत धाःसा ग्यानापुक सिनावनी।
34“‘छं निम्ह काय् होप्नी व पीनहासया बांमलाःगु अवस्था छंगु निंतिं छगू चिं जुइ। होप्नी व पीनहास निम्हं छन्हुं हे सी। 35जिं जिगु निंतिं छम्ह विश्वास याये बहःम्ह पुजाहारी ल्यये। वं हे जिगु मनय् व नुगलय् च्वंगु खँकथं याइ। जिं वया परिवारयात थापं याये अले वं हे जिं जुजु अभिषेक यानाम्ह मनूया न्ह्यःने सदां सेवा याइ। 36छंगु परिवारय् म्वानाच्वंपिं सकलें वयाः चकूगु छकू वहः व छपा मरिया निंतिं वय्कःया न्ह्यःने क्वछुनाः थथे बिन्ति याये मालि, “जितः पुजाहारीतय्त ग्वाहालि यायेत तयादिसँ अले जिके छपा मरि दयेमा।”’”
Currently Selected:
१ शमूएल 2: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
