१ शमूएल 12
12
शमूएलं इस्राएलीतपाखें बिदा काःगु
1अले शमूएलं इस्राएलीतय्त थथे धाल, “जिं छिमिसं धाःगु फुक्कं खँ न्यना अले छिमिगु निंतिं जुजु नं ल्यया। 2आः व हे जुजु छिमि नायः जूगु दु। जि धाःसा बुरा जुयाः जिगु सँ तुयुसे च्वने धुंकल। जिमि काय्पिं नं छिपिंनापं हे दु। जि ला ल्याय्म्हबलय्निसें थौं तक हे छिमि नायः जुया वयाच्वनागु खः। 3जि थन हे दु। छिमि सुयां जिगु विरोधय् छुं धाये मास्ति वःसा थन परमप्रभु व वय्कलं ल्ययादीम्ह जुजुया न्ह्यःने हे धा। जिं सुयागुं द्वहं कयागु दु ला? जिं सुयागुं गधा कयागु दु ला? जिं सुयातं ध्वंलानागु दु ला? जिं सुयागुं दोष सुचुका घुस नयागु दु ला? जितः धा, जिं वयात पलेसा पुलाबी।”
4इमिसं लिसः बिल, “छिं जिमित ध्वंलाःगु मदु। छिं जिमित क्वत्यलादीगु मदु। छिं सुं मनूपाखें छुं कयादीगु मदु।” 5अले शमूएलं इमित धाल, “छिकपिन्सं जिगु ल्हातय् छुं दोष खंगु मदु धकाः परमप्रभु व वय्कलं अभिषेक यानादीम्ह जुजु थौं साक्षी दु।”
अले इमिसं लिसः बिल, “खः, परमप्रभु हे साक्षी खः।”
6शमूएलं मनूतय्त धाल, “मोशा व हारूनयात ल्ययादीम्ह अले छिमि पुर्खातय्त मिश्र देशं पितः हयादीम्ह परमप्रभु हे खः। 7आः थन हे दनाच्वँ, छाय्धाःसा परमप्रभुया न्ह्यःने जिं छिमित पाः याये, अले छिमिगु निंतिं व छिमि पुर्खातय्गु निंतिं वय्कलं यानादीगु फुक्क धार्मिकताया ज्याया बारे कने।
8“याकूब मिश्र देशय् वने धुंकाः इमिसं ग्वाहालिया निंतिं परमप्रभुयात प्रार्थना यात। अथे हे वय्कलं मोशा व हारूनयात मिश्र देशय् छ्वयाः छिमि पुर्खातय्त अनं पित हयादिल अले थ्व थासय् तयादिल।
9“तर इमिसं परमप्रभु थः परमेश्वरयात ल्वमंकल। अथे जुयाः वय्कलं इमित त्वःताः हासोरया सेनापति सीसरा, पलिश्तीत व मोआबया जुजुपिनिगु ल्हातय् लःल्हानादिल, अले इमिसं इस्राएलीतय्गु विरोधय् लडाइँ यात। 10अले इमिसं ग्वाहालिया निंतिं तःसलं परमप्रभुयात थथे धाल, जिमिसं पाप यानागु दु छाय्धाःसा जिपिं छि परमप्रभुपाखें फहिलाः बाल व अश्तोरेत मूर्तितय्गु पुजा यानागु खः। तर जिमित जिमि शत्रुतपाखें बचय् यानादिसँ। अले जिमिसं छिगु हे सेवा याये। 11अले परमप्रभुं यरूब-बाल, बाराक, यिप्ता व जि शमूएलयात छिमि प्यखेरं च्वंपिं शत्रुतपाखें छिमित छुत्कारा बीत छ्वयाहयादिल। अनंलि छिपिं याउँक च्वन।
12“अनंलि अम्मोनीतय् जुजु नाहाश छिमित हमला यायेत वयाच्वंगु छिमिसं खंबलय् परमप्रभु छिमि परमेश्वर हे छिमि जुजु जुयादीगु जूसां छिमिसं जितः धाल, ‘मखु, जिमित शासन यायेत छम्ह जुजु माल।’ 13छिमिसं हे ल्यःम्ह जुजु थन दु। छिमिसं वयात फ्वन अले परमप्रभुं हे वयात जुजु ल्ययादिल। 14छिपिं व छिमि जुजुं परमप्रभु थः परमेश्वरया भक्ति यानाः वय्कःयागु सेवा यात, वय्कःया आज्ञा मानय् यात अले वय्कया आज्ञाया विरोध मयात धाःसा फुक्क खँय् छिमिगु भिं हे जुइ। 15तर छिमिसं परमप्रभुया वचन मानय् मयात अले वय्कःया विरोध यानाः आज्ञा मानय् मयात धाःसा परमप्रभुं छिमि पुर्खातय्गु विरोधय् ल्हाः ल्ह्वंगु थें छिमिगु विरोधय् नं ल्हाः ल्ह्वनादी।
16“अथे जुयाः छिपिं गन दु अन हे दँ, अले परमप्रभुं छिमिगु न्ह्यःने यानादीत्यंगु अजू चायापुगु ज्या यात स्व। 17आः छ्व लयेगु ई खः मखु ला? जिं परमप्रभुयाके इनाप याये, अले वय्कलं नँ न्यासः व वा वय्कादी। थथे जुइबलय् छिमिसं परमप्रभुयाके जुजु फ्वनाः वय्कःया विरोधय् गुलि तःधंगु पाप याःगु दु धकाः सीका काइ।”
18अथे जुयाः शमूएलं परमप्रभुयात इनाप यात, अले उखुन्हु हे परमप्रभुं नँ न्याःगु सः व वा वय्कादिल। अनंलि फुक्क मनूत परमप्रभु व शमूएल खनाः तसकं ग्यात।
19अले फुक्क मनूतय्सं शमूएलयात धाल, “जिपिं सीगुपाखें बचय् जुइमा धकाः परमप्रभु छिकपिनि परमेश्वरयाके जिपिं छिकपिनि दासतय्गु निंतिं प्रार्थना यानादिसँ। छाय्धाःसा जिमिसं थःपिनिगु निंतिं जुजु फ्वनाः अझ अप्वः पाप यानागु दु।”
20अले शमूएलं फुक्क मनूतय्त धाल, “ग्याये मते,” छिपिं थथे मभिंगु ज्यायागु जूसां परमप्रभुपाखें फःहिलावने मते। तर थःगु दुनुगलंनिसें परमप्रभुया सेवा या। 21ज्यालगय् मजूपिं द्यःतय् ल्यू वने मते। इमिसं न त ग्वाहालि याये फइ न बचय् याये फइ छाय्धाःसा इपिं ज्यालगय् मजूपिं खः। 22थःगु तःधंगु नांया कारणं परमप्रभुं छिमित त्वःतादी मखु, छाय्धाःसा वय्कलं छिमित थः प्रजा यायेगु क्वःछिनादीगु दु। 23जिगु लागि धाःसा, छिमिगु निंतिं प्रार्थना यायेगु त्वःताः परमप्रभुया न्ह्यःने पाप यायेगु न्हि जिपाखें तापाक हे जुइमा। छु यायेगु पाय्छि जू अले छु यायेगु भिं व जिं छिमित स्यनेकने याये। 24परमप्रभुया भय का अले विश्वास यायेबहःपिं जुयाः वय्कःया सेवा या। छिमिगु निंतिं वय्कलं यानादीगु तःधंगु ज्याया बारे बिचाः या। 25छुं जुयाः छिमिसं मभिंगु ज्या याना तुं च्वन धाःसा छिपिं व छिमि जुजु नाश जुइमाली।
Currently Selected:
१ शमूएल 12: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
