१ शमूएल 11
11
शाऊलं अम्मोनीतय्त बुकूगु
1अम्मोनी जुजु नाहाशं याबेश-गिलादयात हमला यानाः घेरय् यात। याबेशया मनूतय्सं नाहाशयात धाल, “जिपिंनापं सन्धि यानादिसँ अले जिपिं नं छिकपिनि प्रजा जुइ।”
2तर नाहाशं इमित लिसः बिल, “छगू हे जक खँय् जिं छिपिंनापं सन्धि याये। जिं छिपिं मध्ये फुक्क मनूतय्गु जवय् च्वंगु मिखा लिकयाबी अले थुकिं यानाः फुक्क इस्राएलीतय्गु बेइज्जत जुइ।”
3अले याबेश-गिलादया थकालितय्सं धाल, “इस्राएल देय्न्यंक खबर यायेत मनूत छ्वयेत जिमित न्हय्न्हु तक बियादिसँ। अनंलि सुनानं जिमित ग्वाहालि मयात धाःसा जिपिं छिथाय् वयाः थःपिन्त लःल्हाये।”
4खबर यायेत वंपिं मनूत शाऊलया गिबाय् वनाः थःगु खबर ब्यूबलय् अन च्वंपिं फुक्क मनूत तस्सलं ख्वल। 5शाऊल धाःसा बुं द्वहं ज्वनाः वयाच्वंगु खः। अले शाऊलं न्यन, “मनूतय्त छु जुल? छाय् फुक्क मनूत ततःसलं ख्वया हयाः च्वंगु?” अले याबेशपाखें खबर बीत वःपिं मनूतय्सं न्यंकूगु खबर फुक्क शाऊलयात धयाबिल।
6शाऊलं थ्व खँ न्यंबलय् परमेश्वरया आत्माया शक्ति वयाके वल अले व तसकं तंम्वल। 7अले वं छज्वः द्वहं कयाः कुचा कुचा जुइक पालाः व कुचात कयाः खबर यायेत वःपिं मनूतय्त बियाः इस्राएल देय्न्यंक थथे धकाः खबर छ्वत, “सु सु शमूएल व शाऊलया ल्यूल्यू लडाइँ यायेत वइ मखु इमि द्वहंयात नं थथे हे यायेगु जुइ।” अले मनूतय्सं परमप्रभुया भय काल व इपिं फुक्क छप्पँ जुयाः पिहां वल। 8शाऊलं इमित लडाइँ यायेगु निंतिं बेजेकय् मुंकल। अन इस्राएलया मनूत स्वंगू लाख व यहूदाया स्विद्वः मनूत वःगु खः।
9इमिसं खबर यायेत वःपिं मनूतय्त धाल, “याबेश-गिलादया मनूतय्त थथे धा, ‘कन्हय् निभाः छाइबलय् छिमिगु उद्धार जुइ।’” याबेश-गिलादया मनूत व खँ न्यनाः तसकं लय्ताल। 10अले इमिसं अम्मोनी जुजुयात धाल, “कन्हय् जिपिं पिहां वयाः छिथाय् वये अले छितः छु याये मास्ति वः जिमित यानादिसँ।”
11कन्हय् खुन्हु शाऊलं थः मनूतय्त स्वंगू पुचःयात। सुथ न्हापां इपिं अम्मोनीतय्गु छाउनी दुने दुहां वन अले निभाः छाःबलय् तक अम्मोनीतय्त स्यानाच्वन। अनंलि म्वाःपिं निम्ह छथाय् मजुइक फुक्क छ्यालब्याल जुल।
12अले मनूतय्सं शमूएलयात धाल, “शाऊलं झीत राज्य याये मते धकाः धाःम्ह सु खः? इमित स्यायेत जिमिगु ल्हातय् लःल्हानाब्यु।”
13तर शाऊलं धाल, “थौं छम्ह नं स्यायेगु जुइ मखु छाय्धाःसा थौंयागु न्हिइ परमप्रभुं इस्राएलीतय्त बचय् यानादी।”
14अले शमूएलं इमित धाल, “झीपिं फुक्कं गिलगालय् वनेनु अले हाकनं छकः शाऊलयात थः जुजु धकाः घोषणा याये नु।” 15अथे जुयाः इपिं फुक्क गिलगालय् वनाः परमप्रभुया न्ह्यःने मेलबलि छाल अले परमप्रभुया न्ह्यःने शाऊलयात जुजु घोषणा यात। शाऊल व फुक्क इस्राएलीतय्सं खुशी जुयाः तःधंगु नखः हन।
Currently Selected:
१ शमूएल 11: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
