१ राजा 11
11
सोलोमनया कलाःपिं
1जुजु सोलोमनं यक्व विदेशी मिस्तय्त यय्कल। फारोया म्ह्याय् बाहेक वं मोआबी, अम्मोनी, एदोमी, सीदोनी व हित्ती मिस्तय्त ब्याहा यात।#व्य १७:१७ 2उपिं जातितय्गु बारे परमप्रभुं इस्राएलीतय्त थथे धयादीगु खः, “छिमिसं इपिंलिसें ब्याहा याये मते, छाय्धाःसा इमिसं छिमिगु मनयात इमि द्यःतपाखे हीकाबी।” अय्नं सोलोमन उपिं मिस्तय्गु मतिनाय् तःक्यन।#प्रस ३४:१६; व्य ७:३-४ 3सोलोमनया न्हय्सःम्ह जुजु खलःयापिं कलाःपिं दु। वया स्वसःम्ह मथ्याःपिं कलाःपिं नं दु। वया कलाःपिन्सं वयागु मनयात परमेश्वरपाखें तापाकाबिल।
4सोलोमन बुरा जूबलय् वया कलाःपिन्सं वयागु मनयात विदेशी द्यःतपाखे हीकाबिल। थः अबु दाऊद थें व दुनुगलंनिसें परमप्रभु थः परमेश्वरया भक्त मजू। 5वं सीदोनीतय् अश्तोरेत द्यःमय्जु व अम्मोनीतय् घच्चाइपूम्ह द्यः मोलोखयात पुजायात। 6वं परमप्रभुयात मयःगु बांमलाःगु ज्या यात। थः बौ दाऊद दुनुगलंनिसें परमप्रभुया ल्यू जूगु थें व मजू।
7यरूशलेमया पुर्बपाखेया पहाडय् वं घच्चाइपूम्ह मोआबी द्यः कमोश व अम्मोनीतय् घच्चाइपूम्ह द्यः मोलोखयात पुजा याइगु पुजा यायेगुथाय् दय्कल। 8वं थः फुक्क विदेशी कलाःपिनिगु निंतिं पुजा यायेगुथाय् दय्कल। अन इमिसं थः द्यःतय्त धुपाँय् च्याकीगु अले बलि छाइगु।
9परमप्रभु सोलोमन खनाः तंचायादिल। छाय्धाःसा निकः वयाथाय् खनेदय्कः झाःम्ह परमप्रभु इस्राएलया परमेश्वरपाखें व तापानावंगु खः। 10वय्कलं सोलोमनयात मेपिं द्यःतय्गु ल्यू जुइ मते धकाः धयादीगु जूसां सोलोमनं परमप्रभुया आज्ञा मानय् मयात। 11उकिं परमप्रभुं सोलोमनयात धयादिल, “छं थथे याःगुलिं अले जिं छन्त बियागु आज्ञा मानय् मयाःगुलिं जिं छंगु ल्हातं राज्य लाकाकाये अले छिमि छम्ह भारदारयात बी। 12अय्नं छिमि अबु दाऊदया निंतिं छ म्वानाच्वंतले जिं अथे याये मखु। तर छिमि काय्या ल्हातं राज्य लाकाकाये। 13अय्नं फुक्क राज्य ला लाकाकाये मखु तर जिम्ह दास दाऊदया निंतिं अले जिं ल्ययागु यरूशलेमया निंतिं जिं वयात छगू कुल बी।”
सोलोमन जुजुया शत्रुत
14अबलय् परमप्रभुं एदोमी जुजु खलःयाम्ह एदोमी हददयात सोलोमनया शत्रु दय्कादिल। 15व स्वयाः यक्व न्हापा, दाऊदं एदोमयात बुकेधुंकाः वया सेनापति योआब लडाइँलय् सीपिं इस्राएलीतय्त थुनेत अन वंबलय् उगु देशयापिं सकलें मिजंपिन्त स्याःगु खः। 16एदोमयापिं फुक्क मिजंतय्त मस्यातले योआब व इस्राएलया सेना अन खुला तक च्वन। 17अबलय् हदद मचा हे तिनि, व वया अबुया सेवा याइपिं छुं एदोमी हाकिमतलिसें मिश्र देशय् बिस्युं वन। 18इपिं मिद्यान जुयाः पारानय् वन। अले पारानं छुं मनूत ब्वनाः इपिं मिश्रया जुजु फारोयाथाय् वन। मिश्रयाम्ह जुजुं हददयात जमिन व छखा छेँ बिल, वयात नयेगु व त्वनेगु व्यवस्था यानाबिल।
19हददलिसें फारो तसकं लय्ताल। जुजुं वयात थः कलाः रानी तहपनेसया केहेँलिसें ब्याहा यानाबिल। 20तहपनेसया केहेँनं हददपाखें गनूबत नांयाम्ह काय् बुइकल। व मचायात तहपनेसं दरबारय् हल। अन गनूबत फारोया थः हे काय् म्ह्याय्पिंलिसें च्वन।
21दाऊद व वया सेनापति योआब सित धइगु खँ हददं मिश्रय् न्यन। वं मिश्रयाम्ह जुजुयात धाल, “जितः थःगु देशय् लिहां वनेबियादिसँ।”
22फारों न्यन, “थन छन्त मगाःगु छु दु धकाः छन्त थःगु देशय् लिहां वने मास्ति वःगु? हददं लिसः बिल,
“थन जितः मगाःगु छुनं मदु, अय्नं दया यानाः जितः वनेबियादिसँ।”
23हानं परमेश्वरं एल्यादाया काय् रेसोनयात सोलोमनया शत्रु यानादिल। व थः मालिक सोबाया जुजु हददेजेरपाखें बिस्युं वंम्ह खः। 24दाऊदं सोबाया सेनायात नाश यायेधुंकाः रेसोन मनूत मुंकाः विद्रोहीतय् नायः जुल। अले इपिं दमस्कसय् वन, रेसोनं दमस्कसय् राज्य यात। 25सोलोमन म्वानाच्वंतले रेसोन इस्राएलया विरोधी जुल अले हददं थें हे वं नं समस्या बिल। वं इस्राएलयात घृणा यात अले अरामय् राज्य यात।
यारोबाम सोलोमनया विरोधी जूगु
26जेरेदायाम्ह छम्ह एफ्राइमी नबातया काय् यारोबाम नं जुजुया विरोधय् विद्रोही जुल। व सोलोमनया अधिकृत खः। वया मां विधवा सेरूआ खः।
27व विद्रोही जूगु कारण थथे दु – सोलोमनं तिबः बीगु तगिंत दय्कल, अले थः अबु दाऊदया शहरया पखाःया प्वाः तिनाबिल। 28यारोबाम छम्ह खुबी दुम्ह मनू खः, व ल्याय्म्हम्ह मनूया मेहेनत खनाः सोलोमनं वयात योसेफया कुलतय् सितिकं ज्या याइपिनि नायः ल्यल।
29उबलय् हे यारोबाम यरूशलेमं पिने वनाच्वंबलय् शीलोया अगमवक्ता अहियाहं लँय् वयात नापलात। अहियाहं न्हूगु गा न्ययाच्वंगु खः। ख्यलय् इपिं निम्ह हे जक दु। 30थःम्हं न्ययाच्वंगु गा खुनाः अहियाहं झिंनिकु यात। 31अले वं यारोबामयात धाल, “थुकिं झिकू छं का, छाय्धाःसा परमप्रभु इस्राएलया परमेश्वरं छन्त थथे धयादी, ‘स्व! जिं सोलोमनया ल्हातं राज्य कयाः झिगू कुल#११:३१ झिगू कुल उबलय्, इमिगु मतिइ शिमियोन कुल धाःगु यहूदा कुलयागु हे छगू ब्वः खः। अथे जुयाः इमिसं निगू कुलयात छगू हे कुल कथं ल्याः खाइगु खः। छन्त बी। 32तर जिम्ह दास दाऊदया निंतिं व इस्राएलया फुक्क कुलं ल्यःगु शहर यरूशलेमया निंतिं छगू कुल धाःसा वयागु जुइ। 33जिं थथे याये, छाय्धाःसा इमिसं जितः त्वःताः सीदोनीतय् अश्तोरेत द्यःमय्जु, मोआबीतय् द्यः कमोश व अम्मोनीतय् द्यः मोलोखयात पुजा यात। इपिं जिगु लँपुइ जूगु मदु, जितः यःगु ज्या याःगु मदु, सोलोमनया अबु दाऊदं मानय् याःथें जिगु विधि व नियम इमिसं मानय् याःगु मदु।
34“ ‘अय्नं थुबलय् जिं वयागु ल्हातं फुक्क राज्य लाकाकाये मखु। जिगु आज्ञा व विधि मानय् याःम्ह जिं ल्ययाम्ह दास दाऊदया निंतिं सोलोमन म्वाना च्वंतले वयात शासक याना हे तये। 35वया काय्या ल्हातं कयाः झिगू कुलया राज्य धाःसा छन्त बी। 36जिगु नां तयेत ल्ययागु शहर यरूशलेमय् जिगु न्ह्यःने जिम्ह दास दाऊदया छप्वाः मत च्यानाच्वनेमा धकाः छगू कुल जिं वया काय्यात बी। 37अले जिं छन्त ल्यये, छंगु मनं इच्छा याःपिं सकसितं छं शासन याइ। छ इस्राएलयाम्ह जुजु जुइ। 38जिम्ह सेवक दाऊदं थें छं जिगु आज्ञा मानय् यात धाःसा अले जिगु लँपुइ वन धाःसा अले जिगु विधि व आज्ञा मानय् यानाः जितः यःगु ज्या यात धाःसा जि न्ह्याबलें छनापं दइ। जिं छंगु वंशया निंतिं नं दाऊदया निंतिं याना थें छगू न्ह्याबलें दयाच्वनीगु वंश दय्के। 39थुकिं यानाः हे जिं दाऊदया सन्तानतय्त क्वह्यंकेबी, तर न्ह्याबलेंया लागि मखु।’ ”
40अनंलि सोलोमनं यारोबामयात स्यायेत स्वल, तर यारोबाम मिश्र देशय् शीशक जुजुयाथाय् बिस्युं वन, सोलोमन मसीतले व अन हे च्वन।
जुजु सोलोमन सीगु
२ इति ९:२९-३१
41सोलोमन जुजु जुयाच्वंबलय् जूगु फुक्क खँ, वं याःगु फुक्क ज्या व वयागु बुद्धिया बारे सोलोमनया इतिहासया सफुलिइ च्वयातःगु दु। 42सोलोमनं यरूशलेमं इस्राएल न्यंक पिइदँ तक शासन यात। 43सोलोमन थः पुर्खात थें सित अले वयात वया अबु दाऊदया शहरय् थुनाबिल। वया लिपा वया काय् रहबाम जुजु जुल।
Currently Selected:
१ राजा 11: NEW
Highlight
Share
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
