MAKI 16
16
Ziizɛ wu‐ziɣi ʋai saa ya
1Tei doowo foloi leveni, Meele Mɛdaliini ƃɔga Jĩi dee Meele é vɛɛ Saloomi va te gulo viɛ wũ‐nɛɛ‐nɛɛ geeani kɛɛ ʋaa ma te lii la te siɛ Ziizɛ mawomai ma. 2Te liini kabai la ga Laali ʋoloi ga subu‐zubu woza ɣɛi ma ƃɔɔ nɔ siɣizu ma. 3Te ɣɛni ɣɛɛzu ɣii ma, “Ƃɛ ɣa yá kwɔtii ɣili‐kili é siɣi kabai la de vɛ?” 4Tei te wũ bu ziɣini, te wɛlɛni kwɔtii va kili‐kiligɛi siɣiai kabai la. Kpakpai ɣɛ ga ʋikɛ. 5Tei te lɔɔni kabai zu, te wɛlɛni zolopo ta va é zeini ga te yee za‐su vele yogbo kwele ge kɔ ba. Maʋai te ɣɛɛni pɔ̃ɔ. 6É ɣɛni te ma, “Màʋai mɛ lɛ wo ɣɛ pɔ̃ɔ. Wa Nazɔi Yiizɛ ɣaa ziɛzu nii te kpakoni gului ma. É wu ziɣia saa ya. Ɛ́ lɛ vɛ. A wɛlɛ vɛ va te daani na. 7Kɛ̀ a li wo bo kala dopoi zɔitiɛ ma é vɛɛ Pite va wo ɣɛ te ma, ‘Tɔ liizu wo luo Geealali. Ná ɣa wa pɛtɛ na, è ɣɛ velei é boni la wo ma.’ ” 8Te wuloni kwɔti ɣabai zu te vela ga kpize, ƃɔvɛlaale te ɣɛni ƃelizu ga duo. Tɛ lɛ faa ta woni nu nɛpɛ ma, ƃɔvɛlaale te ɣɛni luozu.
Maki na kɔlɔi wɛ̃ɛ ma ɣaa. Kɛ̀ kɔlɔ wɔlɔ‐zaɣagi taniga te woi niitiɛ ʋɛɛni ba:
Mawoozagi wɛ̃ɛ‐suʋɛ Ziizɛ wuloni Meele Mɛdaliini ɣaazu
9Tei Ziizɛ wu ziɣini saa ya ga doowo folo wuloa‐ga subu, é wuloni Meele Mɛdaliini ɣaazu ga maa wũ pa. Na ɣa ga nui wɔlɔ é gɔʋɛ yowũ lɔfela ƃɛɛni pulu. 10Meele liini sa é bo niitiɛ ma te ɣɛni Ziizɛ va, tei te maa wõiyai ɣɛ tiɛ kpee loo. 11Kɛ̀ tei te mɛnini ga zɛʋui ɣɛni zéea, na ɣa ɣɛɛ na Meele pɛtɛga, tɛ lɛ ŋɛni laazu ga na.
Ziizɛ wuloni kala dopoi felegɔ ɣaazu
12Na wuloa su niitiɛ te ɣɛni bá wɔlɔ, é wuloni felegɔ ɣaazu ga pele zii ƃalaa su vele, tei natiɛ te ɣɛni liizu kpala ga. 13Te liini wulu te bo te vai zɔitiɛ ma te ɣɛni na wulu, kɛ̀ tɛ lɛ te woi ziɣini ga gaama.
Ziizɛ wuloni kala dopo puugɔ kai gilagi ɣaazu
14Tei na wuloni ba, Ziizɛ wuloni kala dopo puugɔ kai gilagitiɛ ɣaazu ta letele te ɣɛi ma laa miizu. É yii ɣaa wãlani te ma toku ge zei faa ziɣizu ƃaa ʋai va te vɛ ga gaama ta ta wui‐zu‐ƃɔlɔgi ƃɔvɛlaale bu ziɣiai ma saa ya taitiɛ te pɛtɛni tɛ lɛ te woi ziɣini ga gaama. 15É ɣɛni te ma, “A li zui ɣaazɔ zu wo woo niinɛ vagɔi wo nu ƃuse ɣaazɔ ma. 16Nui yá siɣi ga gaama te bataize ɣɛɛ la towaa valo. Kɛ̀ nui lɛ siɣini ga gaama faa ɣa yɛ ma. 17Taitiɛ ta siɣi ga gaama, niitiɛ ɣa ta te ɣɛ te dɛ ga seelea: Ta gɔʋɛ vowũa ƃɛ numaa wulu nà daa‐zeigi zu tiɛ zii woo niinɛa wo. 18Ani ta kaali zo na ɔɔ te sale yowũ ƃoale, ɛ́ lɛ faa ɣɛɛ ga tiɛ. Ta yee vɛɛ seeƃɛ vea ma natiɛ tiɛ valo.”
Gala ge lɛɛni ga Ziizɛ pɔ́ ʋɛ
19Tei sa de maliɣii Ziizɛ ƃɔɛni te wɔ, Gala ge siɣini é lɛɛ la wɔ vɛ. É zei sa ga Gala zee za‐su vele. 20Te liini te Gala goi wo ŋada ƃɔgɔpɛ. De maliɣii ɣɛni te va tiɛ tii ɣɛ ta tiɛni. É te woi maa viini ga velei seelea te ɣɛni la ba.]
Currently Selected:
MAKI 16: DN1971
Highlight
Share
Copy
Want to have your highlights saved across all your devices? Sign up or sign in
Loma New Testament © British and Foreign Bible Society, 1971.
