MAKI 10

Ziizɛ kala‐bo boni é vile nu ɣɛlɛ ʋai va ŋaza va

1Ziizɛ ziɣini na é li Yudiiya ligi zu. É li Jɔdɛ̃ wuluvɛ vele. Kpɔ gwala ɣaa lɛɛni ba ma kɔnɔ. É te ɣala boni kɔnɔ è ɣɛ velei é ɣɛni la ga kɛɛ ʋaa wɔlɔ‐zaɣa. 2Favilesiitiɛ te vaani pɔ́ ga te su wɔ̃ɔ. Te gaa zaɣa kɛɛni te ɣɛ ma,“? Tɔ tɔ su ga zunu ɣɛlɛ ŋaza va?” 3É gaa woteni te ya é ɣɛ tea, “Zɛƃɛ ɣa Mooze daani wo ya ga tɔgi?” 4Te ɣɛ ma, “Mooze ʋaani bu ga nu ɣa kɛlɛ‐ba wɔlɔ wonɛ é ƃe sa ŋazai va.” 5Kɛ̀ Ziizɛ ɣɛni te ma, “Wa wui‐zu‐ƃɔlɔ fai ɣa é kɛɛni Mooze tɔgi nii wonɛ é da wo ya. 6Kɛ̀ é ziɣi ƃɔɔ ŋetea‐lɔɔ‐zei ʋolo ma, ‘Gala ge zunu ƃɛtɛni ta ŋaza nu.’ 7‘Nii mazaƃu ma zunu ɣa ƃe kéea va ta dée é ɣata ŋázai va. 8Na ɣa ɣɛɛ na te felegɔ te ɣɛ ga ŋɛni ɣila.’ Tɛ lɛ sa wɔlɔ‐wɔlɔ ga nu felegɔ, kɛ̀ ta ga nu ɣila nà mavelei ma. 9Na ma nii Gala ge pua kii ma maa lɛ nɛɛni nu nɛpɛ gɔ gaa wɛɛ.” 10Tei te ɣɛni pɛlɛi wu, ná kala dopoitiɛ te gaa zaɣa kɛɛni kɔnɔ é vile fai nii va. 11É ɣɛni te ma, “Nui nɛpɛ yá ŋaza loo ya é zɛba é ŋaza nu ƃɔnɔ kulo, a kɛ tii manui wɛ̃ɛ‐ziɛ boga ŋazai ma. 12Ani ŋaza nui ɣa wulo na pɔɔ nu ya é zunu ta ƃɔnɔ sei, a kɛ tii é wɛ̃ɛ‐zo tɔgi ŋala‐ŋalaga.”

Ziizɛ tuuyiɛ looni lopa woloitiɛ ma

13Numaitiɛ te ɣɛni vaazu ga lopaa Ziizɛ wɔ ga é ʋowũ te va. Ná kala dopoitiɛ wɔ te yii ɣaa wãla te ma. 14Kɛ̀ tei Ziizɛ ná vɛtɛni, é wãlani ma é ɣɛ te ma, “A ƃe lopaitiɛ va te va wo mɛ lɛ ƃesa te luo. Ƃɔvɛlaale te ɣavelei ɣa Gala na masadai te ʋaa ma. 15Gè bo wiɛ ga gaama, nui nɛpɛ ɛ́ lɛ yee zeiya Gala na masadai wu ga velei lopo wolo ɣa kɛɛ la, manui lɛ wɔlɔ‐wɔlɔ lɛɛ na.” 16É lopaitiɛ ziɣini sa é te zei yee lɔkɔ zu é tuuyiɛ loo te ma yíɛ yee vɛɛ tiɛ.

Kpɛtɛ nui

17Tei sa Ziizɛ ɣɛni ná siɛi wulozu pɛlɛ wu, zunu ta vaani ga kpize é vɛɛ kɔwɔ wu é gaa zaɣa kɛ é ɣɛ ma, “Kala‐mɔɔ vagɔi, zɛƃɛ ɣa pagɛi gè kɛ gè zɛʋui nii zɔlɔ wo kwɛ̃ɛ gɛ lɛ ba?” 18Ziizɛ ɣɛ ma, “Zɛƃɛi é kɛɛ yìɛ tìli ga nu vagɔ? Nu ta nɛpɛ gɛ lɛ ga nu vagɔ é wulo Gala tɔ ɣilekpu pulu. 19È Gala na tɔgitiɛ wɛ̃ni. Natiɛ ta ga: Mɛ lɛ nu vaa. Yài è ga ŋaza keea nu ɔɔ yài è ga zini‐bɛ nu, mɛ lɛ wɛ̃ɛ zo. Mɛ lɛ wũmɔ wo. Mɛ lɛ zɛɛ ʋaa zeele woo ʋe. Mɛ lɛ woia dɔ nu ma. Wũfe è ɣeea ma ta è lee.” 20Zunui ɣɛ Ziizɛ ma, “Kala‐mɔi, gè zia ga tɔgi niitiɛ ɣaazɔ é ziɣi ƃɔɔ nà lopo wolo ʋolo ma.” 21Ziizɛ wɛlɛni ba wõi so é ɣɛ ma, “Faa ɣila ka ɛ̀ lɛ dɛ kɛɛni. Li, ŋɛnii ɣaazɔ é è ya è te zɔ̃wɔ wulo è mazɔ̃wɔi leve maa‐wõi vea wɔ è weli ka ɣɛ Gala ta. Yà na ɣɛɛ na, è va sa è vile pùlu.” 22Woi na kɛɛni zunui ɣaazu yii gá é li sa ga maa wõi, ƃɔvɛlaale kweli tamai ɣɛ.

23Ziizɛ wɛlɛni sa leelia é ɣɛ ná kala dopoitiɛ ma, “Niitiɛ te ƃɛtɛi towaa ɣɛ ga fai kpaanagɛi ga te lɛ Gala na masadai zu!” 24Goi wuloni ga ná kala dopoitiɛ ga kpakpaa. Ziizɛ ɣɛ kɔnɔ te ma, “Lopaa, a wɛlɛ velei va kpai la ga nu lɛ Gala na masadai zu! 25Tɔ ga faa ʋii‐ƃɛɛ suo ƃakpai nii ʋaa ma daa ga “keeamɔ” ga é leve siɣile wũ su é leve kpɛtɛ nu lɛɛ ʋaa va Gala na masadai zu.” 26É wuloni sa ga tiɛ é leve kɛɛzu va tiɛ ɣɛ ɣii ma, “Ƃɛi mu ka yá wulo su?” 27Ziizɛ wɛlɛni sa te va é ɣɛ tea, “Kpaavɛ nu ƃuse ʋaa ma, kɛ̀ Gala taale. Ƃɔvɛlaale fai pɛ ka zolowo Gala zeea.” 28Pite vɛɛ ga ɣɛɛ Ziizɛ ma, “Wɛlɛ, gé ƃega fai pɛ ba gé vile è wulu.” 29Ziizɛ ɣɛ tea, “Gè bo wiɛ ga gaama, nu nɛpɛ gɛ lɛ ƃega ná pɛlɛ va ɔɔ deɣea ɔɔ diɛni ɔɔ ná seelaa ɔɔ dee ɔɔ keea ɔɔ dea ɔɔ ná zuu màʋaa ma ta woo niinɛ vagɔi, 30manui ɔ́ ƃe pɛlɛ wũ gile‐gile maa zɔlɔ wosu nii ziɛgi zu ta deɣe wũ gile‐gile, diɛ wũ gile‐gile, zeela wũ gile‐gile, dee wũ gile‐gile, duu wũ gile‐gile ta zuu wũ gile‐gile. Kɛ̀ kpɔɔla ka vɛɛ natiɛ va zéea. Siɛgi zɔi é vaazu vaazu, manui ɣa zɛʋui nii zɔlɔ wo kwɛ̃ɛ gɛ lɛ ba. 31Kɛ̀ nu lamaa ta ga nu maa wũ zai ŋɛ ni tiɛ va ɣɛɛzu ga maɣaa ƃela, te lamai kɔnɔ te ga nu ɣaa ƃela tiɛ va ɣɛɛzu ga nu maa wũ.”

Ziizɛ ƃɔɛni wɔnɔ é vile ná saa ʋai va

32Ziizɛni te ɣɛni pelei ma tiɛ li Yɛlusulɛɛ, é ná luo. Nii wuloni ga tiɛ ga tamaa. Taitiɛ te vileni pulu te luoni. Ziizɛ na kala dopo puugɔ kai felegɔitiɛ wuloni te zaama kɔnɔ é vɛɛ ga boga te ma ga nii é vaazu ɣɛɛzu la 33yíɛ ɣɛ tea, “A wɛlɛ! A da liizu Yɛlusulɛɛ. Na ɣa ɣɛɛ na ta nu ƃuse lui yee la laa‐ʋaale gwalaitiɛ ya ta tɔ‐dɛɛ ɣala‐mɔitiɛ. Ta sa ta faa vɛɛ ba ga te paa. Na ɣa ɣɛɛ na ta sa ta zee la zii ƃalaagitiɛ ya. 34Ta ŋɛɛ wulo su, te laa yiɛ wu ma, te dowa, te paa. Folo saagɔ ɣa wulo na su, towaa wu ziɣi saa ya.”

Nii Jĩi ƃɔga Jɔ̃ te laa maa ʋelini ma

35Jĩi ƃɔga Jɔ̃, na ɣa ga Zɛbɛdi deaitiɛ, te wuloni te ɣɛ Ziizɛ ma, “Kala‐mɔi, gé wõini nii nɛpɛ gá è ɣaa zaɣa kɛ ma è kɛ gíɛ.” 36Ziizɛ ɣɛ te ma, “Zɛƃɛ ɣa wo wõini gè kɛ wiɛ?” 37Te ɣɛ ma, “Ʋa bu gé ya gé gila ge zei è yee za‐su vele, gilagi wɔ ge zei è wɔwɔ yee‐su vele yá zaala‐malai zu.” 38Kɛ̀ Ziizɛ ɣɛni te ma, “Nii wo maa ʋelizu wɛ lɛ kwɛ̃ni.? Wa zoo wo ƃoale ga kɔpui gà ƃoale da? Wa zoo wo ziɛ bataizei nii wu ga ziɛ bu?” 39Te ɣɛ ma, “Gá zoo.” Ziizɛ ɣɛ te ma, “Kɔpui gà ƃoale da, wa ƃoale da. Bataizei gà ziɛ bu, wo ziɛ na wu. 40Kɛ̀ nu zei ʋai ga zèe za‐su vele ɔɔ kɔ̀wɔ yee‐su vele, minɛ lɛ ga pɔ̀ɔ laa ga gè ná ʋe nu ya. Kɛ̀ tɔ niitiɛ ʋaa ma máʋaa ɣavele ƃɛtɛi te ʋaa ma.” 41Tei nu puugɔitiɛ te nii mɛnini Jɔ̃ ƃɔga Jĩi te kɛɛni, te maʋai ɣɛni wãlasu tiɛ. 42Ziizɛ te lilini pɔ́ vɛ é ɣɛ te ma, “Wo kwɛ̃ni ga gaa‐ƃaa ɣa zii ƃalaagitiɛ maazu‐ʋaa‐wo beaitiɛ ya te maazu, ta nu ƃaazagitiɛ ta gaa‐ƃaa wulo te maazu. 43Ɛ́ lɛ ŋɛ na wa dɛi zu. Kɛ̀ nui nɛpɛ yá ɣɛ é ɣɛ ga nu wala wo zu, maa nɛɛvɛ manui ɣɛ ga wa lii‐ɣɛɛ nu. 44Na ɣa ɣɛɛ na nui nɛpɛ é wõini é ɣɛ ga nu maa wũgi wo zu, maa nɛɛvɛ manui ɣɛ ga wo pɛ wa luo. 45Toku ge zei ga nu ƃuse lui ƃalaa lɛ vaani ga te mɔɔlɛ bɛ́, kɛ̀ to mu é mɔɔlɛ numaa vɛ é yɛʋui ʋe ga é ɣɛ ga nu lamaa wũ‐maa‐wo ŋɛni.”

Ziizɛ gaazu‐wuu nui Batimeea valoni

46Te vaani Jɛlikoo. Tei é ɣɛni ziɣizu na ta ná kala dopoitiɛ é vɛɛ kpɔ gwala va, gaazu‐wuu nu ɣila ge ɣɛni na é ga feli‐wo nu é zeini pele‐vɛɛgi woba. Daa ɣɛni ga Batimeea, é ga Timeea duu. 47Tei é mɛnini ga Nazɔi Yiizɛ ɣɛni levesu, é vɛɛni ga lobaga yíɛ ɣɛ tea, “Deeve dui Ziizɛ, gàazu‐maa‐wõi ɣa!” 48Nu lamaa goi leveni gá tiɛ bo ma ga é na ɣɛ ƃu. Kɛ̀ é lobani é leve minɛ va yíɛ ɣɛ tea, “Deeve dui, gàazu‐maa‐wõi ɣa!” 49Ziizɛ loni sa é ɣɛ tea, “A tili.” Te gaazu‐wuu nui lilini te ɣɛ ma, “Yii lɔ è wu ziɣi. Ziizɛ ɣa è lilisu.” 50É ná seɣei ƃoloni ma é wu ziɣi pu é va Ziizɛ wɔ vɛ. 51Ziizɛ ɣɛ ma, “Zɛƃɛ ɣa è wõini gè kɛ yìɛ?” Gaazu‐wuu nui ɣɛ ma, “Màliɣii, kɛ gàazuvɛ ziɣi ma.” 52Ziizɛ ɣɛ sa ma, “Yà lii wo. Yà yee‐la‐mai ɣa é è valoa.” Gaazuvɛ ziɣi sa ma ga maa ʋilea. É vile Ziizɛ wulu pelei ma.

Currently Selected:

MAKI 10: DN1971

Highlight

Copy