LUKI 14

Ziizɛ seeƃɛ zunui ʋaloni

1Tei é ɣɛni ga doowo folo ɣila Ziizɛ li laa miizu to‐tuoi ta na pɛlɛ wu malo‐tuoi ga Favilesii ta, te ɣɛni Ziizɛ maa ʋɛɛnɛsu. 2Tɔwɔ zunu ta ɣɛni daa wu fe seeƃɛ ba. 3Ziizɛ ƃɔɛni sa tɔ‐dɛɛ ɣala‐mɔitiɛ wɔ ta Favilesiitiɛ yíɛ ɣɛ tea,“? Tɔ tɔ su ga te nu valo ga doowo folo ƃaa nu mɛ lɛ na ɣɛ?” 4Kɛ̀ te maazu ɣɛɛni ƃu. Ziizɛ wɔ ge seeƃɛ nui ziɣi sa é balo é ƃe ba é li. 5Ziizɛ ɣɛni te ma, “Wo ta zɛƃɛ ɣa duu ɣɛɛzu zéea ɔɔ nikɛ zinɛ toai ziɛ yeɣe zu, manui ƃe kulozu ga maa ʋilea ga doowo foloi?” 6Tɛ lɛ ŋɛni zoosu tɔ goi ɣaa wote.

Nu ƃɔɔlaa ƃɔga kolo

7Niitiɛ sa te te lilini daa‐mii ŋɛnii ma, tei Ziizɛ wɛlɛni na va ga velei te ɣɛni zeizu la to‐su‐ba vea zei‐zu, é sakpe sɔɔni te ma yíɛ ɣɛ te ma, 8“Ta è lili na ŋaza‐wulo wuu ma, mɛ lɛ zei to‐su‐ba nu zei‐zu, è mɛ lɛ yɛ su numaitiɛ te te liliga te ta ɔ́ va ɔ́ ɣɛ ga nu ɣaa wua ɔ́ leve è va. 9Na ɣa ɣɛɛ na nui sa é wo liliga wa tɔ ɔ́ va ɔ́ ɣɛ è ma, ‘Ziɣi vɛ, zunui nii zei na.’ Yá ɣɛ na ŋɛ na, yà sa yà zei sei‐zuvɛ vɛ ná loai bu wũfe maazu. 10Kɛ̀ ta è lili na, li è zei vɛ ná loai bu, kɛɛ ʋaa ma wo lili nui ɣa vaa na é ɣɛ è ma, ‘Bɔ̀i, li è zei munu ná ɣaa wuai.’ Wũfe‐ma ɣa ɣɛ sa è vɛ niitiɛ ɣaazɔ ɣaazu wa tiɛni wa ɣɛ daa‐miigi wosu. 11Ƃɔvɛlaale nui nɛpɛ yá ƃɔɔ ʋaa wɔɔlɔ, manui ɣa yii bu. Nui nɛpɛ ɛ́ lɛ ƃɔɔ ʋaa wɔɔlɔ, manui ɣa wɔɔlɔ.” 12Nui nii é Ziize lilini daa‐mii ŋɛnii ma Ziizɛ ɣɛni ma, “Ani yà diɣi ƃakpa ɣili na ɔɔ yìɛ kuu ɣa, mɛ lɛ yà wɛ̃ɛ vagɔitiɛ lili ɔɔ è leɣea ta è liɛni ɔɔ è ɣaa yɔ̃wɔa ɔɔ è zii yɔ̃wɔi niitiɛ te ƃɛtɛi, ta ƃalaa te mɛ lɛ va è lilisu ɔ́ ɣɛ ga ɣà wui‐wuloa. 13Kɛ̀ yà ɣɛ na kuu ɣaazu, mɔɔlɛ vea lili ta tɔbɔ‐zu‐ba vea, è ɣɛ velei mɛlɛ‐ŋɛlɛ bea te la ta gaazu‐wuu vea. 14Na ɣa ɣɛɛ na tuuyiɛ ɣa ɣɛ yìɛ, ƃɔvɛlaale tɛ lɛ zooga tɔ poto fe è ya. Yà dɛi woto ka ʋe tele‐bo beaitiɛ wu‐ziɣi‐zuvɛ saa ya.”

Sakpegi é ʋile kuu ƃakpa‐ɣaa ʋai ʋa

15Taitiɛ ta Ziizɛni te ɣɛni laa miizu, tei te ɣila ge fai nii mɛnini Ziizɛ boni, é ɣɛni ma, “Tuuyiɛ ɣa nui nii ma yá laa mi Gala na masadai zu!” 16Kɛ̀ Ziizɛ ɣɛni ma, “Zunu ta ɣɛni kuu ƃakpa ɣaazu é numaa lamaa lili. 17Kuu‐ɣaa ziɛgi zu sa é ná tii‐ɣɛɛ nui leveni ga é ɣɛ numai niitiɛ ma é te lilini, ‘A vaa na, Ƃɔvɛlaale ŋɛnii ƃɔgɔpɛ kavele ƃɛtɛvɛ sa.’ 18Kɛ̀ te pɛ te vɛɛni ga woo‐zu‐wuloa. Nu maa wũgi ɣɛni ma, ‘Gè zuu ta ɣeea. Kɛni gà li gè wɛlɛ na va. Gɛ̀ lɛ vaa vele ɣaa.’ 19Zɔi ɣɛ tea, ‘Gè nikɛ zinɛ puugɔ ɣeea. Gà liizu gè te maa ƃɛɛ. Gɛ̀ lɛ vaa vele ɣaa.’ 20Zɔi ɣɛ wɔnɔ tea, ‘Gè ŋaza wuloa. Na ma gɛ̀ lɛ zooga gɔ̀ va.’ 21Tii‐ɣɛɛ nui vaa vele ɣa na ɣɛ é kwena‐bogi nii wo na nu keea nu ma. Zii‐ɣaa‐wãla maazu pɛlɛ wũda nui ɣɛ ná tii‐ɣɛɛ nui ma, ‘Li ga maa ʋilea pele‐vɛɛgitiɛ ma ta pele woloitiɛ te tai zu è va ga mɔɔlɛ vea ta tɔbɔ‐zu‐ba vea, è ɣɛ velei gaazu‐wuu vea te la ta mɛlɛ‐ŋɛlɛ bea.’ 22Tii‐ɣɛ nui ɣɛ ma, ‘Kèea, nii è deʋea gè na ɣɛɛ, kɛ̀ ŋada yãka ɣa dɛ na.’ 23Ná nu keea nu ɣɛ ma, ‘Li pele walai ma ta pele‐wulo‐baitiɛ è kɛ numaitiɛ te va, kɛɛ ʋaa ma nà pɛlɛi laa ʋe. 24Gè bo yìɛ, numai niitiɛ gè te liliga ta nɛpɛ gɛ lɛ sa nà daa‐mii ŋɛnii ta vilega nɛ ma.’ ”

Nii yá nu ɣɛ ga Ziizɛ na kala dopo

25Nu ƃulu kpakpa wala vɛɛni Ziizɛ va. Tɔwɔ é liteni sa é ɣɛ te ma, 26“Ani nu ɣa ɣɛ na é va pɔ̀, manui lɛ zilini ga kpɔɔ ɣeeai ta dee ta ŋazai é vɛɛ dea va, deɣeni te vɛɛ diɛni ba, na ɣa ɣɛɛ na é ɣɛ ga fai maa nɛi ʋɔlɔ ƃalaa ga manui zili ga ƃɔɔ yɛʋui, ɛ́ lɛ zooga ɔ́ ɣɛ ga nà kala dopo. 27Nui nɛpɛ ɛ́ lɛ ƃɔɔ vɛɛ‐pulu wulu likpii ziɣia ɔ́ vile da pùlu, manui lɛ zooga ɔ́ ɣɛ ga nà kala dopo. 28Su‐wulo‐zu ɣa ga nii. Wo ta zɛƃɛ ɣa yá ɣɛ wõi ɣɛɛzu ga é sebe wooza to manui ƃe dɛ zeizu ɣaʋu pa ga nii liigoi yá ɣɛ ga to ŋɛnii é su zei ga é wɛlɛ na va ga ani nii liigoi é zéea towaa kulo‐ɣɛɛ wo ga é to? 29Ani na lɛ ɣɛ ɣɛɛni, manui ɣa toga lɔɔ zei na ɛ́ lɛ zooni ɔ́ daa wulo, taitiɛ ɣaazɔ te wɛlɛni ba é tɔɔ zei ta ɣɛ ŋɛɛ wulozu su 30tiɛ ɣɛ tea, ‘Zunui nii sebe‐loga lɔɔ zeini, tɔwɔ ɛ́ lɛ zooni ɔ́ daa wulo.’ 31Ɔɔ ɣalaso sɛƃɛ ɣa a ɣɛ liizu ƃɔɔ ɣalasogi nii luo é vaazu pɔ́ ga kɔɔ é ƃe dɛ zeizu ɣaʋu pa é su zei ga ani towaa zoo é wɔ bɔɔ ɣalasogi wɔ ga wuluƃo wulu puugɔ? Na ɣa ga ɣalasogi nii é vaazu ga é wɔ pɔ́ ga wuluƃo wulu zee felegɔ. 32Ani ɛ́ lɛ zooga ná la, towaa bɔi yɛ ƃɔɔ woozala é keela leve pɔ́ vɛ é tɛɛ vili ma. 33Vele nɔ na é la ga nui nɛpɛ ɛ́ lɛ yee wuloa ŋɛni ɣaazɔ ʋaa zu é zéea. Manui lɛ zooga ɔ́ ɣɛ ga nà kala dopo.”

Kpoloi tɔnɔ lɛ ba

34Ziizɛ ɣɛni tea, “Kpolo ɣa ga ŋɛni vagɔ. Kɛ̀ ani kpolo mayɛmi ka wulo na ba, ná kpololai ɣa sa a yɛ le? 35Ɛ́ lɛ sa vaga tulu gaa luule ʋaa ma ɔ́ nɔ ɣɛ ga ŋɛnii nii yá tulu gaa luule. Numaa ta pili nɔ ya. Nui faa‐mɛni gui wũ ba, pagɛ é mɛni.”

Currently Selected:

LUKI 14: DN1971

Highlight

Copy