TE ƔƐƐ VAITIƐ 2

Gala baa ŋinɛgi vaa ʋai

1Tei sa Pɛ̃tɛkɔ wui‐ɣaa ʋolo ziitini, te pɛ te ɣaa lɛi ɣɛ ba ŋada ɣila. 2Na ɣɛɛzu ƃɔɔ nɔ gee wɔlɔgi zu li ge lɛ ɔ̀ ka nɔ è ɣɛ fãga ƃakpa ɣa é vaazu. Pɛlɛi nii te ɣɛni zeini bu fãgai ligi é na ziɣini ma yɛ̃gɛlɛ̃i. 3Ŋɛni ta wulo sa te ɣaazu ɔ̀ ka ga ŋabu‐zo gaa wɛi su kpɛ‐kpɛ é zei te ɣile‐giledai wũmɔ. 4Na ɣa ɣɛɛ na Gala baa ŋinɛgi é te pɛ te yii laa ʋeni te vɛɛ sa zii woo ƃalaaga woga va è ɣɛ velei Gala baa ŋinɛgi tɛɛni la te la.

5Tɔwɔ Dusiitiɛ te ɣɛni zeini Yɛlusulɛɛ te ɣɛni ga zinai niitiɛ te zɔƃɛlɛ ɣɛ Gala fai zu te wuloai zuu ɣile‐giledai zu ƃɔɔ é gee wɔlɔgi wu. 6Zɔɔ‐zɔɔ goi nii ma kpɔgi ɣaa lɛɛni ba te ɣɛ pɔ̃ɔ, ƃɔvɛlaale nui ɣile‐giledai ƃɔɔ laa zii woi mɛnini tiɛ bo. 7Fai nii wuloni ga tiɛ ga kpakpaa é ki‐gaa‐ziɛ vili tiɛ, tiɛ ɣɛ tea,“?Nii pɛgi goo lɛɛzu ta lei tɔ ɣɛ ga Geealali veaitiɛ? 8Tɔ ɣɛ le mu a de ɣile‐giledai de te woi mɛnisu tiɛ bo de ƃɔɔ zii woi zu? 9Dai de ga Patiɛ̃tiɛ, Miiditiɛ ta Iilamaitiɛ é vɛɛ sa Mɛsopoteemia, Yudiiya ta Kɛpɛdoosia veaitiɛ va. Dai wɔnɔ de ga Pɔ̃tɛ ƃɔga Eezia vea, 10Felegia ƃɔga Pãfelia vea, Iije vea ƃɔga Lebia veai niitiɛ te Saalĩi ligi zu é vɛɛ wɛ̃ɛtiɛ va te wuloa Loomɛ laa zu. Na ɣa ga dai pɛ de ga Dusi vea ƃɔɔƃɔɔgitiɛ ta dai wɔnɔ de vilega Dusi luoi wulu. 11Na ɣa ɣɛɛ na é vɛɛ sa de va dai de ga Kiliti veaitiɛ é vɛɛ Aleebiaitiɛ va, a de ɣaazɔ pɛ a diɛ te woo mɛni tiɛ faa wo é vile Gala na tii maa‐wɔlɔ‐wɔlɔgitiɛ va de ƃɔɔ zii woitiɛ zu.” 12É wuloni ga te ɣaazɔ ga kpakpaa é te ɣigi ɣɛ yɔʋɔ tiɛ ɣɛ ɣii ma, “?Nii zu‐wulo‐zu ɣa ga zɛƃɛ?” 13Kɛ̀ zɔitiɛ te ɣɛni ŋɛɛ wulozu te zu tiɛ ɣɛ tea, “Te laa ʋegɛ ga dɔɔ.”

Nii Pite boni Gala baa ŋinɛgi leve foloi

14Kɛ̀ pite ɣɛni loni nu puugɔ kai gilagi woba é woi lɛ ƃɔ gee zu é ƃɔɛ numaitiɛ wɔ yíɛ ɣɛ tea, “Wai wo ga Yudiiya veaitiɛ é vɛɛ waitiɛ ɣaazɔ va wo zeini Yɛlusulɛɛ, ƃe ba nii ɣɛ ga wo wɛ̃ɛ faa. Na ɣa ɣɛɛ na wo wui to gòi ma. 15Ƃɔvɛlaale dɔɔ lɛ zinai niitiɛ va è ɣɛ velei é la wo wuu zu, tei é dɛ nɔ ga folo wui su ƃaa. 16Kɛ̀ nii ɣa Gala daa woo‐wo nui Jowɛ boni wɔlɔ é ɣɛ tea,

17‘Gala ge ɣɛ tea, gaa‐ƃela‐suvɛ nii ɣa yá ɣɛ:

Gà bàa ŋinɛgi maʋaa laa loo ga nu ƃuse ɣaazɔ.

Na ɣa ɣɛɛ na wo lea zinaa ta wo lea ŋazaa ta dàa woo wo.

Ŋada ɣa wu wo mazolopoitiɛ ɣaazu, na ɣa ɣɛɛ na wo

maɣawɔlɔitiɛ ta ze.

18Gà bàa ŋinɛgi maʋaa laa loo ga nà zinaa lii‐ɣɛɛ vea ƃɔga

nà ŋazaa lii‐ɣɛɛ vea ƃalaa na maziɛ su.

Na ɣa ɣɛɛ na ta dàa woo wo.

19Gà faa maa‐wɔlɔ‐wɔlɔ dɛ gee wɔlɔgi zu wo maazuvɛ, gè

seelea lɛ zui zu é gee wɔlɔgi wu.

Faa maa‐wɔlɔ‐wɔlɔgi niitiɛ ƃɔga seelei niitiɛ ta ga ŋama

ƃɔga ŋabu ta ŋabu luuli.

20Foloi maa ɣa wote ga kpidi, ɣalogi maa wote ga ŋama, nài

gè ga wo maliɣii nà kui ɔ́ vɛɛ ziitizu, nii é ga faa maa‐wodo

ʋolo ɣaa wuai.

21Na ɣa ɣɛɛ na nii yá ɣɛ tɔ ga nui nɛpɛ yá nà daa‐zeigi lili,

nài gè ga wo maliɣii, towaa wulo faa zu.’

22Yezɔi veaitiɛ, a woi niitiɛ mɛni: Nazɔi Yiizɛ ɣa ga nui dɛ́i ga wiɛ Gala bɛ tii maa‐wɔlɔ‐wɔlɔgitiɛ ƃɔga faa maa‐wɔlɔ‐wɔlɔgitiɛ‐ɣɛɛ vele zu ta seele‐lɛɛ velei. Gala ge niitiɛ ɣɛɛni wo zaama Ziizɛ zaala zu, è ɣɛ velei wa ƃɔɔ wo kwɛ̃ni la. 23Ziizɛi nii kwɛ́i è ɣɛ velei é la ga Gala na deʋe ƃɔɔƃɔɔ ta ná faa yee‐luo‐vele‐wɛ̃ɛgai, wa ɣa wo kpakoni pɛɛ‐pulu wulu likpii ma wo paa. Wo nii ɣɛɛni tɔ‐maazu‐vɛtɛ tala vea zaala zu. 24Kɛ̀ Gala ge bu ziɣini, tei sa é fũini saa maɣaa‐wãlai ya. Ƃɔvɛlaale ɛ́ lɛ́ ŋɛni ga solowo faa ga é yɛ saa ya. 25Deeve faa woni é vile ba yíɛ ɣɛ tea,

‘Gè wɛlɛni màliɣii va gàazu luo ga ɣee nɛpɛ, ƃɔvɛlaale tɔ ga

zèe za‐su vele,

kɛɛ ʋaa ma gè mɛ lɛ lubu wó ma.

26Na ʋaa ma zìi nɛi ɣɛ kùu zu, kuu‐zu‐nɛɛ woo wulo dà,

na ɣa ɣɛɛ na kɔnɔ dɔ̀tɔi ɣa yɛ dɛ na, kì‐to‐su ɣɛ ma.

27Ƃɔvɛlaale ɛ̀ lɛ yee wuloa zɛ̀ʋui maʋaa zu gɔ̀ yɛ saa vea

ɣɛɛ‐zuvɛ,

ɔ́ nɔ ɣɛ ga è ƃe nui nii va è ʋaa wɔɔlɔi gáazu sú ŋala‐ŋala.

28E ŋetea‐ɣɛɛ veleitiɛ lɛɛ gàazu. Yà dàa ʋe ga kuu‐zu‐nɛɛ

ga yà ɣɛ‐kobai.’ ”

29Pite ɣɛ wɔnɔ tea, “Nà numaa, gà zoo gè bo wiɛ ga velei kì daa wodoai la de mama gwalai Deeve ʋaa zu ga é zaani te doowu. Na ɣa ɣɛɛ na Deeve mawɔti ɣabai ɣa de woba za ƃalaa. 30-31Deeve ɣɛni ga kwɛ̃ɛga ga Gala ge woto leveni zéea ga towaa Deeve ƃɔɔ mazuwui ta zei ná kpɔkpɔgi ɣa. Na ma tei tɔwɔ é ɣɛni ga Gala daa woo‐wo nu, é ná yee luo vele vɛtɛni é ƃɔɛ é vile Kolai wu‐ziɣi ʋai va saa ya, yíɛ bo ga Gala gɛ lɛ yee wuloni Kolai maʋaa zu ɔ́ yɛ saa vea ɣɛɛ‐zuvɛ ɔ́ nɔ ɣɛ ga málɔtɔi zu ŋala‐ŋala. 32Gala ge Ziizɛi nii wu ziɣini saa ya. Tɔwɔ gé ɣaazɔ gá ga na mazeelea. 33Na ʋaa ma velei Kolai lo‐su wɔɔlɔi la ga Gala zee za‐su vele, tɔwɔ kí togɛi kéea Gala bɛ ga baa ŋinɛgi, towaa é nii laa loa wo pɛtɛsu wiɛ mɛni. 34Ƃɔvɛlaale Deeve lei ɔ́ lɛ gee wɔlɔgi zu, kɛ̀ tɔ ƃɔɔ é ɣɛni tea,

‘Gala ge ɣɛ màliɣii ma, zei ga zèe za‐su vele,

35é yɛsu gè è wɔɔ yɔ̃wɔ̃itiɛ vɛɛ è wɔwɔ wu.’

36Na ʋaa ma kɛni Yezɔitiɛ te mazii ɣaazɔ te kwɛ̃ɛ ga ƃɔɔƃɔɔ su ga Gala ge Ziizɛ ɣɛɛ ga de maliɣii é kɛ ga Kolai, Ziizɛi nii wo kpakoni pɛɛ‐pulu wulu likpii ma.”

37Tei te nii mɛnini, te yii te lowani te bo Pite ma ta Ziizɛ na keelai mataitiɛ te ɣɛ te ma, “Nà numaa, aƃɛi sa gá kɛ?” 38Pite ɣɛ te ma, “A wulu ɣaa ʋe wa ʋaa yowũi va wo ɣile‐giledai wo bataize maa zɔlɔ wo Ziizɛ Kolai na daa‐zeigi zu wa ʋaa yowũitiɛ zu‐ʋaa‐yɛ faa ma. Na ɣa ɣɛɛ na wa faa‐nɛɛ zɔlɔ wo, na ɣa ga Gala baa ŋinɛgi. 39Ƃɔvɛlaale ki‐togi ɣa wo ʋaa ma ta wo lea é vɛɛ niitiɛ ƃɔgɔpɛ ba te maa woozai, na ɣa ga niitiɛ nɛpɛgi de maliɣii Gala ka te lili wɔɔ vɛ.” 40Pite seele woo ʋeeni ga woo lamaa taƃɔnɔga é te yii lɔ yíɛ ɣɛ tea, “A ƃɔɔ wulo koto‐kata ŋeteai nii zu.” 41Na ma niitiɛ te yee zeini gói wu te bataize maa zɔlɔ woni. Nu liigoitiɛ te vɛɛni Ziizɛ wulu veaitiɛ va nà maʋoloi tɔ zoo te ɣɛ ga nu wulu saagɔ. 42Numai niitiɛ te wũ kpadoni Ziizɛ na keelaitiɛ ta ɣala‐bogi va ta siɛ‐pului é vɛɛ kpoolo‐ʋɔɔ zu‐ɣaleai va ta Gala‐feliai.

Ziizɛ wulu veaitiɛ luo velei ga ɣii

43Duo‐luo ge vilini nui pɛ dɔtɔ zu. Na ɣa ɣɛɛ na faa maa‐wɔlɔ‐wɔlɔ tamaa ɣɛɛni, faa lamaa ɣɛ ga seele Ziizɛ na keelaitiɛ zaala zu. 44Niitiɛ nɛpɛgi te Ziizɛ ʋaa ziɣini ga gaama te ɣɛni ɣii ma, ŋɛnii ƃɔgɔpɛ ge te ya su ɣilekpu. 45Te weligi maƃaaza pɛ maƃulu‐kpulu pɛ sɔ̃wɔ wuloni te te mazɔ̃wɔi ɣaa wɛɛ niitiɛ nɛpɛ bɛ te balai ɣɛ. 46Folo ɣile‐giledai tɔ ƃɔ su te li Gala‐feli wɔta walai wu, te ƃɔ su te kpoolo‐ʋɔi zu ɣale‐ɣale ta vɛlɛitiɛ wu, te ƃɔ su te laa mi ga kuu‐zu‐nɛɛ ta gaazu‐wodo, 47tiɛ Gala daa maa lɛ te maʋai nu pɛ zii lai bɛ́. Niitiɛ te ɣɛni wulozu faa yowũ zu, de maliɣii ɣɛni te vɛɛzu Ziizɛ wulu veaitiɛ va folo ɣile‐giledai yee wu.

Currently Selected:

TE ƔƐƐ VAITIƐ 2: DN1971

Highlight

Copy