TE ƔƐƐ VAITIƐ 1

Gala baa ŋinɛgi maɣi‐togi

1Fai gè ɣɛni ma kɔlɔ maa wũgi zu, Tiiyafɛlɛ, é ɣɛni ga nii ƃɔgɔpɛ Ziizɛ tɔɔ zeini ga é kɛ é dɛ 2é yɛsu foloi na ziiti nii Gala ge siɣini ma é lɛɛ la. Ɔ̀ vɛɛ lɛɛzu, é ná keelai niitiɛ leʋeni Gala baa ŋinɛgi zaala zu, niitiɛ é yee ƃakoni tiɛ. 3Tei sa ná daa‐nɔwɔ‐wo fai wuloni ba, ta ɣa é ƃɔɔ lɛɛni ga tiɛ zɛ́ʋu su nu‐ɣi‐daa‐wodo zeele lamai ba. É ɣɛni wulozu te ɣaazu folo yee naagɔ yee wu yíɛ ƃɔɛ te wɔ é vile Gala na masadai va. 4Tei é ɣɛni te wɔ vɛ é boni te ma ga te mɛ lɛ ziɣi Yɛlusulɛɛ. É ɣɛni tea, “Kɛni wa ki‐togi maa kpowũ bogɛi kèea Gala bɛ, nii wo gòo mɛnini gìɛ faa wo yíɛ vile ba. 5É ɣɛ velei wo kwɛ̃ni la, Jɔ̃ bataize ɣɛɛni ga ziɛ. Kɛ̀ su lɛ woozaa bataize ɣɛ ga wiɛ Gala baa ŋinɛgi zaala zu.”

Ziizɛ lɛɛ ʋai Gala ta

6Na ma tei te ɣaa lɛɛni ba ŋada ɣila, te Ziizɛ ɣaa zaɣani te ɣɛ ma,“? Gé maliɣii, siɛgi nii zu ɣa è vaazu masadai ʋeezu na wulu Yezɔitiɛ ya?” 7É ɣɛ te ma, “Wo vaa ʋaa lɛ ga wo siɛgitiɛ wɛ̃ɛ ɔ́ nɔ ɣɛ ga wo kui ta nɛpɛ kwɛ̃ɛ de ɣeea Gala toga ga tɔ ƃɔɔ ɣaa‐ƃaa. 8Kɛ̀ Gala baa ŋinɛgi ɣa vaa na wo wɔ, wa gaa‐ƃaa maa zɔlɔ wo. Na ɣa ɣɛɛ na wa ɣɛ ga nà seelea Yɛlusulɛɛ é vɛɛ Yudiiya yui zu ɣaazɔ va ta Sameelia yui é yɛsu sa é li zui wɛ̃ɛ ma.” 9Tei é nii woni, te ɣɛni ƃɔɔ nɔ wɛlɛzu é ƃekpe zui ma yíɛ lɛ, gee wɔlɔ kwelegi ziɛ maazu kpɔlɔwɔ te ɣaazu ƃea ma. 10Tei te ɣɛ dɛ nɔ wɛlɛzu gee‐zuvɛ va Ziizɛ yíɛ lɛ, tɔwɔ nù wɔgi te kɛɛzu nu felegɔ ɣɛni loni te wobavɛ seɣe wele ge te ma. 11Nui niitiɛ te ɣɛ te ma, “Geealali veaitiɛ, aƃɛ lo ka wo su vɛ wiɛ wɛlɛ gee‐zuvɛ va? Ziizɛi nii za kuloai wo ya é lɛ Gala ta, towaa va nɔ ga velei wo pɛtɛga la yíɛ lɛ Gala ta.”

Dudia wo‐ga nui wulovɛ

12Na ɣɛɛzu te ziɣi gizigi ma daa ga Alevɛ te gale ma wulu Yɛlusulɛɛ. Gizigi nii maa ƃuovɛ Yɛlusulɛɛ va ga doowo folo ziɛ‐wosu zɛligo nɔ. 13Tei sa te lɛɛni taa zu, te lɔɔni pɛlɛi wu te lɛ ná maazuvɛ lumui nii zu wɔlɔ te ɣɛni su. Tai te ɣɛ na ta ga Pite, Jɔ̃, Jĩi, Ɛ̃idulu, Fele, Taamɔ, Bɔtalɛmu, Mafiyu, Yafia dui Jĩi, Saimɔ nii é ɣɛ ga Zɛlai ta, é vɛɛ sa Jĩi dui Dudia va. 14Te ƃɔgɔpɛ te wũ kpadoni Gala‐feliai va te woo su ɣile ta Ziizɛ dee Meele vɛɛ ŋazai zɔitiɛ va ta Ziizɛ deɣeitiɛ.

15Na ziɛ su Pite wu ziɣini é lo báitiɛ zaama. Nu liigoi wɔgi é ɣɛ na ɔ́ ƃɔɔ ɣɛ ga wũ gila zee fele. É ɣɛ tea, 16“Nà numaa, kɛni Gala kɔlɔi zu woi ɔ́ leve ma nii wɔlɔ Gala baa ŋinɛgi zɛni na luo é bo yíɛ wulo Deeve la pilegɛi Dudia nii va é ɣɛni ga pele‐wulo nui ga niitiɛ te Ziizɛ zoni. 17Ƃɔvɛlaale é ɣɛni ga gé gila, na ɣa ɣɛɛ na pɔ́ɔ laa maa zɔlɔ wogɛi bɛ́ tii nii zu. 18Na ɣa ɣɛɛ na zunui nii zuu ta ɣeeani ga kuu‐zu‐ƃɔlɔ ŋɛnii nii é sɔlɔ woni. É zɛba do sa é laa vɛɛ kpulu kogi veli zaama zu kúu zu zɔɔlai ƃɔgɔpɛ ge wulo. 19Yɛlusulɛɛ vea ɣaazɔ te fai nii wɛ̃ɛni, na ma te zui nii laa zeini ga Akɛdama. Nii zu‐wulo‐zu ɣa ga ŋama yui. 20Ƃɔvɛlaale ponɛvɛ ŋɛ ni Gala gui wɔlɔi zu,

‘Ƃe ba kɛ́ɛ‐zuvɛ ɣɛ ga kpooʋe zu,

ƃe ba wɔnɔ nu mɛ lɛ zɔlɔ wo ɔ́ ɣɛ na.’

Na ɣa ɣɛɛ na,

‘Ƃe ba nui ta ƃɔnɔ ge lo to‐suvɛ.’

21-22Na ma kɛni zunu gila ka vɛɛ gé va ga Ziizɛ wu‐ziɣi ʋai saa ya mazeelei ta. Kɛni zunui nii ɣa ɣɛ ga nui niitiɛ te gila te vɛi ɣɛ gé va siɛ nɛpɛ su gá de maliɣii Ziizɛni gɔ́ ɣɛ lɔɔzu la gíɛ wulo, é ziɣi ƃɔɔ Jɔ̃ na bataize‐ɣɛɛ ziɛgi zu ma é loo Ziizɛ wulo ʋoloi ma de ya é lɛ gee zu.” 23Te nu felegɔ wuloni niitiɛ te laa ɣɛni ga Zoosɛ nii tɔ ɣɛ ma Basaba, daa‐zei kpɔnɔ ge wɔnɔ ba ga Jɔsita, é vɛɛ zɔi va daa ga Mataiya. 24Na ɣa ɣɛɛ na te Gala felini te ɣɛ tea, “Gé maliɣii, yài è nu pɛ zii zu wɛ̃ni, dɛ ga gíɛ nui è yee ƃadoga ba 25ga é lo vɛ Dudia é na yãka yɛga tii nii zu ta Ziizɛ na keela woo‐wogai, tei é wulu ɣaa ʋeni ná va é li lii‐zu.” 26Te faa laali ta ɣɛɛni ga nii tɔ kwɛ̃ɛ da ga nui Gala ge yee ƃadoga ba nu felegɔitiɛ zaama. Faa laalii nii wɔ ge dɛɛni ga Mataiya ɣa Gala ge yee ƃadoga ba. Na ma te Mataiya ziɣini sa é vɛɛ Ziizɛ na keela puugɔ kai gilagi va.

Currently Selected:

TE ƔƐƐ VAITIƐ 1: DN1971

Highlight

Copy