TE ƔƐƐ VAITIƐ 14

Pɔɔ ƃɔga Banaba ta Aikoonia

1Pɔɔni te ƃɔni te lɔ Dusiitiɛ ta Ɣala‐feli wɔtai wu Aikoonia lai zu. Te ƃɔɛni ƃɔɔ te ƃɔɛ woi kɛ nu ƃulu kpakpa wala siɣi ga gaama. Nui niitiɛ te ɣɛni ga Dusia vɛɛ Geliikia va. 2Kɛ̀ Dusii niitiɛ tɛ lɛ ŋɛni siɣini ga gaama te zii ƃalaagitiɛ yii wu ziɣini te yii yowũ Kolai maa veaitiɛ ʋaa ma. 3Na ma te yɛni na ga su wooza tiɛ ƃɔɛ ga duo lala vele de maliɣii ʋaa ma. Woi te boni é vile ná gaazu‐maa‐wiõ‐ɣaa ƃɔ‐bai va é maa viini é ʋa bu te faani kɛ te dɛ ga seelea ta faa maa‐wɔlɔ‐wɔlɔga. 4Kɛ̀ numaitiɛ ɣaa wɛi ɣɛ su tai zu. Taniga te ɣɛni Dusiitiɛ wulu, taniga wɔ te Ziizɛ na keelaitiɛ wulu. 5Tei zii ƃalaagitiɛ ta Dusiitiɛ é vɛɛ sa te maazu veaitiɛ va te ná wɔ̃ɔni ga te te zo pele yowũ te te vaa ga te woolaga ga kwɔti, 6natiɛ te kwɛ̃ɛni te vela te li Lesetela ta Dɔɔbi. Natiɛ ta ga Lekaonia laitiɛ. Te liini kɔnɔ na wobavɛ ligi zu. 7Ná ɣa te woo vagɔi woni na.

Pɔɔ zɔɔvɛ ga kwɔti Lesetela

8Lesetela zunu ta ɣɛni zeini na nii ɛ́ lɛ ŋɛni faa ta nɛpɛ kɛɛ ga wɔwɔi. É ɣɛni ga nui nii mɛlɛ‐ŋɛlɛgɛi ɣɛ é ziɣi kaa ʋolo ma, nii ɛ́ lɛ wɔlɔ‐wɔlɔ ziɛni. 9É wui toni Pɔɔ woi ma yíɛ ƃɔɛ. Tei Pɔɔ ɣaazu ƃakoni ba é wɛlɛ na va ga zee‐la‐ma ɣɛni zéea ga ɔ́ valo, 10é boni ma ga woo wala é ɣɛ tea, “Ɣaa lɔ è lo wɔwɔi ɣa.” Nà wu ziɣi sa pu é ziɛ. 11Tei kpɔgi wɛlɛni nii va Pɔɔ kɛɛni, te woo lɛɛni gee zu tiɛ bo Lekaonia woi zu tiɛ ɣɛ tea, “Galagitiɛ te yiiya gé ma nu ƃuse mawo‐kɔ̃ɔ su!” 12Te Banaba laa zeini ga Zuusi. Tei tɔwɔ Pɔɔ nɔ ɣa ɔ́ te laa ʋai bɔɔlɔ kele bo, te daa zeini ga Hɔɔmi. 13Galagi Zuusi ʋeli wɔta walai ɣɛni tai ɣaazu luo. Malaa‐ʋaalegi vaani ɣɛ ga nikɛ zinaa ta gulu wuo ʋũiga taa ziɣi zeɣei la. É ɣɛni wõizu ta numaitiɛ te zalaɣa wulo. 14Kɛ̀ tei Ziizɛ na keelai Banaba ƃɔga Pɔɔ te mɛnini, te ta zeɣeitiɛ velini gá te zakpa kpɔgi zaama tiɛ loba tiɛ ɣɛ tea, 15“Nùmaa, aƃɛi é kɛɛ wo nii ɣɛɛzu? Gá nɔ ga nu ƃusea è ɣɛ velei wo la. Gé vaa wo wɔ ga woo vagɔi. Woo vagɔi ɣa ga wo wulu ɣaa ʋe faa yãkai niitiɛ va wo va Galagi nii wɔ é na ga ƃɔɔƃɔɔ su, nii é gee‐zuvɛ ƃɛtɛni é zui ƃɛtɛ ta ziɛi é vɛɛ te zu ŋɛni ɣaazɔ va. 16Wɔlɔ‐wɔlɔi zu é ʋaani bu ga zii ɣaazɔ li ga yii‐ma vele. 17Kɛ̀ na ƃalaa ɣɛɛvɛ ɛ́ lɛ ŋɛni ƃeni seele ɣɛɛzu ƃɔɔ ʋaa va, ƃɔvɛlaale é faa vagɔ ɣɛɛni é tine ʋe wo ya yíɛ wulo gee wɔlɔgi zu. É kui nii ʋe wo ya daa‐mii ŋɛni laa ɣa loo ma yíɛ wo yii la ga daa‐mii ŋɛni ta kuu‐zu‐nɛɛ.” 18Velei ƃalaa te woi niitiɛ woni la, é ɣɛni ga faa ƃaanaga ga te numaitiɛ ƃe teve zalaɣa‐wuloai va kɛɛ ʋaa ma Pɔɔni te daa zo te vɛ.

19Kɛ̀ Dusia te vaani na te ziɣi Ãteya ta Aikoonia. Tei te laa lɔɔni numaitiɛ va, te Pɔɔ zɔɔni ga kwɔti te kpokpo te kulo tai va tiɛ ka ga sai ɣɛ. 20Kɛ̀ tei sa kala dopoitiɛ te ɣaa lɛɛni ba koba, é wu ziɣini é lɛ tai zu. Na wulu ʋoloi te liini luo ma ta Banaba Dɔɔbi lai zu. 21Tei te woo vagɔi woni taa veaitiɛ ma te kɛ nu lamaa ɣɛ ga kala dopoa, te galeni ma wulu Lesetela ta Aikoonia é vɛɛ Ãteya va, 22tiɛ kala dopoitiɛ yii lɔ tiɛ te lɛnɛ ga te wũ gili ɣɛɛ va zee‐la‐mai zu, tiɛ bo te ma ga daa‐nɔwɔ‐wo tamaa maazu ɣa maa nɛɛ de lɛɛ la Gala na masadai zu. 23Tei sa te yee ƃadoni to‐tua va Gala pɛlɛ ɣile‐giledai ʋaa ma, te te ʋeeni de maliɣii nii ya te maʋai ziɣini ga gaama Gala‐feliai ƃɔga zi‐dɔɔ maazu.

Gale‐ma ʋai wulu Ãteya Siilia yui zu

24Te zɛba do sa te leve Pesiidia yui zu te va Pãfelia yui zu. 25Tei sa te woi woni Pɛɛga, te liini Ateelia lai zu. 26Tei te ziɣini minɛ, te zeini yuwu ɣa te li Ãteya vɛ te te wɔɔ laa looni na Gala na gaazu‐maa‐wõi‐ɣaa ƃɔ‐bai va tii nii ʋaa ma te kɛɛni. 27Tei te ziitini, te Gala pɛlɛ wu veaitiɛ ɣaa lɛɛni ba ŋada ɣila. Na ɣa ɣɛɛ na te tii nii ɣaazɔ mawona‐bo bo Gala ge kɛɛni ga tiɛ ta velei é zee‐la‐ma ƃogi laa laoni la zii ƃalaagitiɛ luo. 28Na ɣa ɣɛɛ na tɛ lɛ soloya lebi boni na ta kala dopoitiɛ.

Currently Selected:

TE ƔƐƐ VAITIƐ 14: DN1971

Highlight

Copy