TE ƔƐƐ VAITIƐ 13

1Tɔwɔ Ãteya Ɣala pɛlɛi na wu Gala daa woo‐wo bea te ɣɛni na é vɛɛ kala‐mɔa va, è ɣɛ velei Banaba la ta Simiã nii tɔ tili ga Naiga, Lusia nii é ga Saalĩi nui ta Maniã é vɛɛ Sɔɔ va. Maniã nii ɣɛni ga Yɛloo wɔ pɛlɛ wu nui ta, Yɛloo wɔ ge ga masa zee‐wu masa. 2Tei te ɣɛni de maliɣii ʋelizu te zigi zu, Gala baa ŋinɛgi ɣɛni tea, “A Banaba wulo su bɛ̀ ta Sɔɔ ga tee tii nii ʋaa ma gè te liliga ma.” 3Na ma tei zi fai wuloni ba ta Gala‐feliai, te yee vɛɛni te wũmɔ te te leve zui zu.

Ziizɛ na keelaitiɛ ta Gala goo wosu Saipɔlɔ

4Na ma tei tɔwɔ te levegɛi ɣɛ Gala baa ŋinɛgi vɛ, te liini Sɛluusia lai zu. Te wulo minɛ te yɛ kẽe su yuwu ɣa te li Saipɔlɔ. 5Tei te ziitini Salami lai zu, te Gala goi woni ga woo maa zeezea Dusiitiɛ ta Ɣala‐feli wɔtaitiɛ wu. Tɔwɔ Jɔ̃ ɣɛni na ga é ƃɔ te va. 6Tei sa te leve‐teveni ziɛ ligi nii wɔlɔ‐kɔlɔ ma ɣaali é yɛsu te ziili Pafɔ lai zu, te wuloni pote‐kɛɛ nu ta ma nii é ɣɛni ga Dusi nu é ga zɛɛ ʋaa Ɣala goo‐wo nu daa ga Baaziizɛ. 7É ɣɛni gɔmɛti nu walai Sɔjiɛ Pɔɔlɛ va, zunui nii kele‐ɣelegɛi ɣɛ, nii wɔnɔ é Banaba lilini ta Sɔɔ yíɛ pele ɣaa ziɛ ga é Gala goi mɛni. 8Kɛ̀ Ɛlima nii é ɣɛni ga pote‐kɛɛ nui (ƃɔvɛlaale Ɛlima laa‐zeigi zu‐wulo‐zu ɣa ga pote‐kɛɛ nu) é loni te la yíɛ gɔmɛti nu walai ƃe‐teve vele ɣaa ziɛ laa ʋai va ga zee‐la‐mai nii. 9Kɛ̀ Sɔɔ nii tɔ tili ƃalaa wɔnɔ pɛ ga Pɔɔ, nii zii laa ʋegɛi ɣɛ Gala baa ŋinɛgi vɛ, é wɛlɛ vele yowũni ba 10yíɛ ɣɛ tea, “Yài ŋɛ ni è ga dɛvele duu, è wɔɔ yɔ̃wɔ ga gaama ʋaa ɣaazɔ, è laa ʋegɛi ga pɛɛ ʋaa mazii ɣaazɔ ta tuo vele yowũ … ?Ɛ̀ lɛ loowuga de maliɣii na pele zakpai zu zeizu? 11Wɛlɛ! De maliɣii yee ɣa fai nii zu yá ɣɛ ga yìɛ. È ɣaazu ɣa wuu, ɛ̀ lɛ wɛlɛɛ foloi va é yɛsu ƃɔɔ ná ta kɛ.” Na ɣɛɛni ƃɔɔ nɔ gaazu ɣɛzɛgi maa ziɛ, gaazu ƃidi, é vile sa ga numaa ɣaa zia ga te yee loo zéea. 12Tei gɔmɛti nu walai wɛlɛni nii va é ɣɛɛni, é siɣini ga gaama, ƃɔvɛlaale de maliɣii na kala‐bogi vilini ma ga ki‐gaa‐ziɛ.

Pɔɔ ƃɔga Banaba ta Ãteya, Pesiidia yui zu

13Pɔɔ ƃɔga baitiɛ te ziɣini sa Pafɔ te zei yuwu ɣa te va Pɛɛga lai zu é Pãfelia yui zu. Jɔ̃ ziɣi te wulu é li wulu Yɛlusulɛɛ. 14Kɛ̀ te leveni minɛ. Te ziɣini Pɛɛga te va Ãteya lai nii zu é Pesiidia yui zu. Tei doowo foloi ziitini, te liini Gala‐feli wɔtai wu te zei. 15Tei sa Gala na tɔgi ƃɔga Gala daa woo‐wo beaitiɛ ta wɔlɔi lodo fai wuloni ba, Gala‐feli wɔtai malo‐tuoitiɛ te keela leveni te wɔ vɛ yíɛ ɣɛ te ma, “Nà numaa, ani tɛnɛ goo ta ɣa wo la numaitiɛ ʋaa ma, a bo.” 16Pɔɔ wu‐ziɣi vele ɣa na é lo. Tei sa é yee ɣɛni te ma ƃɛ‐ƃɛ ga te na ɣɛ ƃu, é ɣɛni tea,

“Yezɔi veaitiɛ é vɛɛ waitiɛ va wa luo Gala ba, a wui lo. 17Galagi nii é ga Yezɔi niitiɛ ta Ɣalagi é yee ƃakoni de ɣeeani ba é kɛ numai natiɛ te maa wɔɔlɔ siɛgi nii zu te ɣɛni zeini la Iije yui zu. Na ɣa ɣɛɛ na é gaa‐ƃaa yee loo te ya é pele wulo ga tiɛ te wulo na va. 18É ziɛni te wu kpooʋei zu kwena tiigoi nii yee wu ɔ́ zoo é ziiti zee naagɔ zu. 19Tei sa é zii zei‐zu lɔfela zu ŋala‐ŋalani Keena yui zu, é ta yui ʋeeni de ɣeeani zeea ga po ŋɛni. 20É yɛ te ya kwena tiigoi nii yee wu ɔ́ zoo é ziiti wũ naagɔ zee looluo zu. Tei na wuloni ba, ɔ́ faa‐wo‐bo bea leve te wɔ é yɛsu é ziiti Gala daa woo‐wo nui Samia na yɛminigi ma. 21Te zɛba do sa te masa mamaa‐nɛɛnɛ bo. Gala ge Kisi dui Sɔɔ leve te wɔ. Zunui nii ɣɛni ga Bẽjemɛ̃ɛ nu zuwui mazii ta. É kwena zee naagɔ ɣɛɛni te maazu. 22Tei Gala ge goloni, é Deeve wu ziɣini ga é ɣɛ ga masagi, nii é mazeele woo ʋeeni é ɣɛ tea, ‘Gè wɛlɛɛ Jɛsi dui Deeve va ga nui maʋai zìi lai bɛ́, nii yá zìi‐mai ɣaazɔ ɣɛ.’ 23Zunui nii manu zuwui zu ɣa Gala ge nu‐valo nu wuloa na nii é ga Ziizɛ, é vaa la Yezɔitiɛ wɔ è ɣɛ velei é ki‐togi woni la. 24Ziizɛ ɔ́ vɛɛ vaazu, Jɔ̃ bataize‐ɣɛɛ ʋai maƔala goi woni Yezɔitiɛ ɣaazɔ ma é vile pulu‐ɣaa‐ʋe fai va faa yowũ va. 25Tei sa Jɔ̃ ɣɛni wolozu nii ma tevegɛi ɣɛ ma, é ɣɛni tea, ‘?Wo wuu zu, ƃɛ ɣa gè le? Nà lei gɔ̀ ɣɛ ga tɔ. Ɛ́ lɛ ŋɛ na. Kɛ̀ nu ɣa pùlu é vaazu nii gɛ̀ lɛ kuloni bu ga gè kɔwɔ‐ɣa zavala tokoi laa ʋũi.’

26“Nà numaa, wai wo ga Eeƃɔlɔhɛ̃ɛ vɛlɛi wu nu zuwui é vɛɛ zɔitiɛ va te wo zaama ta luo Gala ba, da ɣa balolai nii maɣeela woi levegɛi de wɔ. 27Nutiɛ te zeini Yɛlusulɛɛ é vɛɛ te maazu veaitiɛ va ta dɛi tɛ lɛ Ziizɛ wɛ̃ɛni. Tɛ lɛ ƃalaa wɔnɔ woi niitiɛ ɣaa ɣaani Gala daa woo‐wo beaitiɛ te boni nii ta dodo doowo folo ɣile‐gileda zu. Nii mavele ma te Gala daa woo‐wo beaitiɛ woo leveni ma ga velei te faa yɛni da má ga woo. 28Velei ƃalaa tɛ lɛ ƃega zoo da tɔ kɛɛ‐zɔ bo ga nii ɔ́ kulo‐ɣɛɛ wo ga é za su, te Paila ɣaa‐zaɣa kɛɛni ga ani ɔ́ ʋa bu é kɛ te paa. 29Tei sa te nii ɣaazɔ leveni ma ponɛi ɣɛ é vile ba, te kuloni gului ma te da kwɔti ɣaba zu. 30Kɛ̀ Gala ge bu ziɣini saa ya. 31Na ɣa ɣɛɛ na é wuloni niitiɛ ɣaazu folo lamaa yee wu, niitiɛ ta tiɛni te ziɣini Geealali te va Yɛlusulɛɛ, niitiɛ za te ga ná seeleitiɛ numaitiɛ ɣaazu. 32Na ma gé vaa ga woo vagɔi wo wɔ ga nii Gala ge de ɣeeani ki toni la 33towa é tevea ma de ya, dai de ga te leaitiɛ, ga velei é Ziizɛ wu ziɣini la. Ponɛvɛ wɔnɔ ŋɛ ni kɔlɔi nii loso ʋele kelei zu Gala kɔlɔi ʋaa va daa ga Gala gui yíɛ ɣɛ tea,

‘Yà ɣa è ga dùu zunui,

za ɣa gè è ɣaa la.’

34Ani bu‐ziɣi ʋai Gala bɛ saa ya su mɛ lɛ wɔlɔ‐wɔlɔ ŋala‐ŋala wɔnɔ nà velei zu ve, vele ɣa Gala ge boni la,

é ɣɛni tea, ‘Gà nà tuuyiɛ maa‐wuai ʋe è ya é ɣɛni Deeve ma nii ɛ́ lɛ ziɣia ma.’

35Na ma tɔ bosu wɔnɔ Gala gui ta ƃɔnɔ su yíɛ ɣɛ tea,

‘Ɛ́ lɛ ƃega ba yà nui nii è ʋaa wɔɔlɔi gaazu su ɔ́ ŋala‐ŋala.’

36Ƃɔvɛlaale tei Deeve nii ɣɛɛni Gala ge deʋeni é da zéea ta dɔ ŋeteai zu, é zaani te da keeani koba su ŋala‐ŋala. 37Kɛ̀ nui nii Gala ge bu ziɣini, su lɛ ŋala‐ŋalani. 38Na ma nà numaa, ƃe ba é ɣɛ ga wo wɛ̃ɛ faa ga zunui nii zaala zu ɣa faa yowũ zu‐ʋaa‐yɛ faa wogɛi na wo ma ga woo maa zeezea. 39Sáala zu ɣa fai ziɣiai la nui nɛpɛ ba yá maʋai ziɣi ga gaama, nii Mooze na tɔgi lɛ ƃega siɣi wiɛ. 40Na ma a ƃɔɔ maazu vɛtɛ wo mɛ lɛ yɛ su fai nii ɔ́ yɛ ga wiɛ nii bogɛi Gala daa woo‐wo beaitiɛ ta wɔlɔi zu Gala bɛ yíɛ ɣɛ tea,

41‘A wɛlɛ nii va, wai ŋɛ ni wo ga ŋɛɛ‐wulo‐su vea, na ɣa ɣɛɛ na é vili wiɛ ga ki‐gaa‐ziɛ wo zu ŋala‐ŋala,

ƃɔvɛlaale gà faa ta ɣɛɛzu wa ŋeteai zu, fai nii wɛ lɛ wɔlɔ‐wɔlɔ siɣia ga gaama, anɛɛ ƃalaa nu bo wiɛ.’ ”

42Tei sa te ɣɛni wulozu, numaitiɛ te pee ʋeeni ga te fai niitiɛ wo te ma wɔnɔ ga na wulu loowo foloi. 43Tei te wuloni Gala‐feli wɔtai mawũ‐pilegi zu, Dusi lamaa vɛɛ numai niitiɛ va te zɔƃɛlɛ ɣɛni Gala fai zu te vilegɛi Dusi luoi wulu, te vileni Pɔɔ wulu ta Banaba. Natiɛ te ƃɔɛ te wɔ te te yii lɔ ga te wũ kpado ɣɛɛ va Gala na gaazu‐maa‐wõi‐ɣaa ƃɔ‐bai yee wu.

44Na wulu loowo foloi, ná yɛni ga ta wolo tai zu vea ɣaazɔ te ɣaa lɛ ba ŋada ɣila ga te de maliɣii woi mɛni. 45Kɛ̀ tei Dusiitiɛ te wɛlɛni kpɔ gwalai va, te laa ʋeni ga sili tiɛ sakpe too nii zu Pɔɔ boni tiɛ daa ŋala‐ŋala. 46Na ma Pɔɔ ƃɔga Banaba te ƃɔɛni ga duo lala vele tiɛ ɣɛ tea, “Kɛni Gala goi ɔ́ wo wiɛ ga maa wũ pa. Kɛ̀ tei tɔwɔ wɛ lɛ yee zeini bu wiɛ dɛ wɔnɔ ga wɛ lɛ kuloni bu zɛʋui nii ʋaa ma kwɛ̃ɛ gɛ lɛ ba‐a wɛlɛ! Gá liizu zii ƃalaagitiɛ wɔ vele. 47Ƃɔvɛlaale vele ɣa na de maliɣii deʋea la é da gé ya yíɛ ɣɛ tea,

‘Gè è loga ga è ɣɛ ga ŋada wodoa zii ƃalaagitiɛ ʋaa ma,

kɛɛ ʋaa ma è li ga balolai zui wɛ̃ɛ ma.’ ”

48Tei zii ƃalaagitiɛ te nii mɛnini, te wuu zu nɛɛni te ƃaa la de maliɣii woi ma. Nu liigoi niitiɛ nɛpɛ zɛʋui nii kwɛ̃ɛ gɛ lɛ ba é ɣɛni te ʋaa ma, te Ziizɛ ʋaa ziɣini ga gaama. 49De maliɣii woi ziɛni minɛ ligi zu ɣaazɔ. 50Kɛ̀ Dusiitiɛ te lɔɔni ŋazai niitiɛ zu te zɔƃɛlɛ ɣɛni Gala faa zu te lo‐su wɔɔlɔi é vɛɛ zinai niitiɛ va te ɣɛni ga to‐tuoitiɛ tai zu, te numaitiɛ yii wu ziɣi ga te Pɔɔ ƃɔɔla ta Banaba. Te natiɛ ƃɛ ta yui zu. 51Kɛ̀ Pɔɔni te wɔwaa ƃɛkpɛnɛni ga fifiligi ga ɣɛlɛ vele te vɛ te li Aikoonia lai zu. 52Na ɣa ɣɛɛ na kala dopoitiɛ te laa ʋegɛi ɣɛ ga kuu‐zu‐nɛɛ te yii laa ʋegɛi Gala baa ŋinɛgi vɛ.

Currently Selected:

TE ƔƐƐ VAITIƐ 13: DN1971

Highlight

Copy