Mark 2

Jesus, di Son a Man, gat powa pan ort fi paadn sin

(Matthew 9.1-8; Luke 5.17-26)

1Sevral diez lieta, Jesus wehn kom bak dah Capernaum, ahn iina nontaim ataal di nyuuz seh ihn wehn dedeh iina wan hous, gaan roun di huol sity. 2Ahn ih hapm seh di hous staat ful'op wid wan huol paila pipl. Ih wehn so ful til evrybady kudn huol, nat iivn bai di duo. Ahn den Jesus staat taak wid dem ahn tel dem di gud nyuuz. 3Wail dah taim kom, four man kom dehso, deh ker wan man weh wehn paralaiz —weh kudn muuv ataal— pahn wan strecha, 4bot dehn kudn get nier Jesus, sieka di kroud weh wehn so big. So dehn gaan op pan di hous-tap, uopm wan big huol iina di tap, ahn hais dong di sik man pan di strecha rait fronta Jesus. 5Wen Jesus si ho moch fiet di man dem wehn gat iina ihn powa, ihn seh tu di man weh wehn paralaiz, “Mi son, Ah paadn yo sin dem.”

6Now, som a di tiicha a di Laa weh wende sidong, deh seh iina dehn main, 7“Dah weh du disa man weh taak laik so; ihn tink seh him dah God iikwal? Huu kyan fargiv sin; dah no God aluon?”

8Siem taim Jesus nuo weh dehn wende tink mongs demself, so ihn aks dem, “Dah wai unu deh tink demya tingz iina unu haat? 9Wat iiziya fi seh, ‘Ah paadn yo sin dem,’ or ‘Get'op, tek op yo strecha ahn waak?’ 10Bot so unu wi nuo seh di Son a Man gat powa pan ort fi paadn sin, Ah gwain kyuor dis man.” 11Den Jesus ton roun tu di sik man, ahn tel im seh, “Get'op, tek op yo strecha ahn go huom; yu don get beta now.”

12Az di sik man hier dat, ihn get'op, pik op ihn strecha siem taim, ahn ihn shub ihn wie chruu di kroud, ahn gaan huom! Ahn aal di pipl dem get uova sopraiz ahn staat priez God deh seh, “Wi neva si notn laik dis yet!”

Jesus aks Matthew Levi fi fala im

(Matthew 9.9-13; Luke 5.27-32)

13Den Jesus gaan bak dah di liek ahn wen ihn get deh, wan paila pipl gyada op roun im, ahn ihn staat tiich dem. 14Ahn wail ihn wende waak lang di wie, ihn si wan man weh niem Levi, Alphaeus son, deh sidong iina ihn taks hous. Ahn Jesus tel im seh, “Kom! Fala mi no!” Ahn Levi get'op ahn gaan wid im.

15Lieta Jesus gaan iit dah Levi hous, ahn wan paila taks kalekta ahn som ada pipl weh dehn kaal “sinaz” wende sit dong wid him ahn ihn disaipl dem —bikaaz plenty pipl wende fala Jesus. 16Bot wen di tiicha a di Laa weh deh mongs di Pharisee gruup dem si Jesus deh iit wid di taks kalekta ahn di sina dem, dehn komplien tu Jesus disaipl dem ahn aks dem seh, “Bot how ihn kyan stan fi iit ahn drink wid demde kain a pipl?” 17Wen Jesus hier dis, ihn tel dem, “Dah huu weh sik, dah huu niid di dakta, ahn no demde weh tink seh dehn helty. Mii no kom fi huu tink seh dehn deh du rait, bot fi dem weh nuo seh dehn hafy ripent a dehn sin.”

Jesus tiich bout faastin laik paat a dehn rilijan

(Matthew 9.14-15; Luke 5.33-35)

18Wan taim John disaipl ahn di Pharisee disaipl dem wende faas ahn prie. So som a di pipl dehn aks Jesus, “Wai John disaipl dem ahn di Pharisee disaipl dem du dis, bot fi yo disaipl dehn no faas ataal?”

19Jesus ansa dem seh, “How unu espek di pipl weh go dah wan wedn paaty fi faas? Dehn no gwain du dat nontaim. So langs di man weh gwain marid dedeh wid dem, ihn fren dehn gwain iit wid im; dehn no gwain faas. 20Bot di die gwain kom wen dehn tek weh di man weh gwain marid fahn dem, ahn den ihn fren dem no gwain iit; dehn gwain ongl faas.

Jesus seh ihn nyuu tiichin no fi miks wid di uol pipl dehn tiichin

(Matthew 9.16-17; Luke 5.36-39)

21“Nonbady no gwain tek wan piis a nyuu klaat fi pach op wan huol pahn wan uol kluoz, bikaaz di pach gwain tier aafa di kluoz. If dehn du dis, di nyuu piis a klaat gwain tier aafa di uol kluoz, ahn di huol gwain get biga. 22Ahn nonbady no gwain chruo nyuu wain iina wan uol leda wain bag. If dehn du dat, di wain gwain bos#2.22 Nuotis seh: Az nyuu wain forment, ih mek plenty gaz weh wuda bos wan uol leda wain bag, bikaaz ih aredy don get drai ahn iizy fi tier op. So di pipl dehn aalwiez chruo dehn nyuu wain iina wan nyuu wain bag. di bag, ahn aal di wain gwain dash weh, ahn di bag gwain finish spail. Nyuu wain hafy go iina wan nyuu bag, no chruut?”

Jesus tiich bout wat rait fi pipl du pahn di Sabat die

(Matthew 12.1-8; Luke 6.1-5)

23Wan Sabat die, Jesus wende waak chruu wan wiit fiil, ahn ihn disaipl dem staat pik aaf som a di wiit#2.23 Nuotis seh: Wiit dah wan trii-laik graas weh dehn gruo iina dehn grong iina demde diez. Ih prodyuus siid weh dehn kuda iit raa or gyada fi mek flowa. hed fi iit'ih. 24So som Pharisee pipl weh wehn dedeh seh tu Jesus, “Luk deh! Wai fi yo disaipl dem deh du wat di Laa seh wi no fi du pan di Sabat die?”

25-26Jesus ansa dem seh, “Unu neva riid bout di taim wen David wehn niid somting fi iit? David ahn ihn waria dem wehn hongry, so David gaan iina God hous ahn ihn iit di aafrin bred, ahn gi som a ih tu ihn waria dem tu. Ahn ongl di priis dem kuda du dis. Dis hapm wen Abiathar dah wehn di Hai Priis.”

27Ahn fi don di aagyoment Jesus seh, “God mek di Sabat die fi man, no di man fi di Sabat die. 28So di Son a Man gat atarity dongtu fi seh weh rait fi pipl du pan di Sabat.”

Currently Selected:

Mark 2: NTIC

Highlight

Copy