Mark 11

Di pipl fahn Jerusalem risiiv Jesus laik wan king

(Matthew 21.1-11; Luke 19.28-40; John 12.12-19)

1Wen Jesus ahn ihn disaipl dem get nier Jerusalem, dehn wende paas chruu di toun dem weh niem Bethphage ahn Bethany, nier Alivz Mountin. Den Jesus sen two a ihn disaipl hed a im. 2Ahn ihn tel dem, “Unu golang iina di toun hed a unu. Wen unu get deh, unu gwain fain wan kuolt tai op, weh nonbady neva raid yet. Luus ih weh ahn bring ih yah fi mi. 3Ahn if enybady aks unu, ‘Wai unu deh du dis?’ tel im seh, ‘Di Laad niid ih, ahn ihn gwain sen ih bak siem taim afta ihn don.’ ”

4So dehn gaan ahn fain di kuolt bai di saida di ruod tai pan wan hous duo. Ahn wen dehn wende luus im, 5som pipl weh wende roun deh aks dem, “Ey! Dah weh unu deh le'go di kuolt fah?”

6Ahn di disaipl dem ansa jos how Jesus tel dem. So di pipl mek dem gaan wid ih. 7Wen dehn ker di kuolt tu Jesus, di disaipl dem chruo som a dehn jakit pan di animal bak ahn Jesus get'op pan ih. 8Afta dat, plenty pipl weh wende mongs di kroud tek aaf dehn jakit ahn spred ih pahn di ruod fronta Jesus. Ahn som a dem chruo dong som paam liif fronta him tu, weh dehn wehn kot dong aafa di trii dem, weh wende nier iina di bush. 9Ahn di pipl dem weh wende hed a him, ahn dem weh wende fala bihain, staat baal out, “Huzaana! Priez di Laad! God bles di wan weh kom iina di niem a di Laad! 10God bles fi wi faada#11.10 Or: “God bles fi wi ansesta David…” David Kingdom weh deh kom! Huzaana! Priez di Laad iina hevn!”

11Wen ihn get dah Jerusalem, Jesus gaan striet iina di Templ ahn luk roun pan evryting. Ahn, bikaaz ih wehn liet aredy, ihn gaan bak dah Bethany wid ihn twelve disaipl.

Di fig trii weh neva bier notn

(Matthew 21.18, 19)

12Neks die iina di maanin wen dehn wende kom bak fahn Bethany, Jesus get hongry. 13Ahn ihn si wan fig trii fahn foor ful a liif. So ihn gaan op tu ih fi si if ihn kuda fain eny fig pan ih fi iit. Bot wen ihn gaan, ihn ongl fain liif, bikaaz dah neva fig taim yet. 14So Jesus tel di trii, “Nonbady no gwain iebl fi iit fig aafa yu agen.”

Ahn ihn disaipl dem hier weh ihn seh.

Jesus ron di pipl dem weh mek mony outa di Templ

(Matthew 21.12-17; Luke 19.45-48; John 2.13-22)

15Wen dehn get dah Jerusalem, Jesus gaan iina di Templ ahn staat ron out aal di pipl weh wende iin dehso, deh sel ahn deh bai. Ahn ihn ton uova aal di tiebl fi di pipl dem weh wende chienj mony, ahn di bench a di pipl dem weh wende sel dov. 16Ahn ihn neva lou nonbady fi yuuz di Templ laik wan shaat kot fi bak dehn luod chruu. 17Den Jesus tiich di pipl seh, “Ih rait dong iina di Skriptyo seh, ‘Mai hous fi bii wan plies fi prie fi aal di pipl dem uova di worl,’ bot unu ton ih iina wan tiifin bizniz plies!”

18Wen di chiif priis ahn di tiicha a di Laa dem hier dis, dehn staat luk wan wie fi kil Jesus. Bot dehn wehn fried fi him, bikaaz di huol kroud wehn uova glad fi hier aal weh Jesus wende tiich.

19Liet iina di iivnin wen ih niely daak, Jesus ahn ihn disaipl dehn lef di sity.

Wat wi laan fahn di fig trii lesn

(Matthew 21.20-22)

20Di neks maanin, wen Jesus ahn ihn disaipl dehn wende waak lang di ruod, dehn si seh di fig trii wehn don drai op fahn di ruut. 21Peter memba weh Jesus wehn seh tu di trii ahn ihn seh, “Tiicha, luk deh! Di fig trii, weh yu kors, don drai op aredy!”

22Jesus ansa dem ahn seh, “Gat fiet iina God! 23Hier dis chruut weh Ah deh tel unu: if enywan a unu tel dis mountin fi get'op ahn go chruo ihself iina di sii, ahn ihn no dout seh ih gwain hapm, bot biliiv so, ih riily gwain hapm. 24Fi dis siem riizn, Ah deh tel unu: Wen unu prie ahn aks fi somting, biliiv seh unu get'ih aredy, ahn unu gwain get enyting weh unu aks fah. 25Ahn enytaim unu deh prie, unu fi paadn fos enybady weh du unu somting rang, ahn den unu Faada iina hevn gwain paadn fi unu sin. 26Bot, if unu no paadn dem weh du unu rang, unu Faada iina hevn no gwain paadn fi unu sin dem niida.”

Som rilijos liida kwestyan Jesus atarity

(Matthew 21.23-27; Luke 20.1-8)

27Wen Jesus ahn ihn disaipl dem get bak dah Jerusalem, ahn wen Jesus wende waak lang iina di Templ, di chiif priis, ahn di tiicha a di Laa, ahn di ada Jewish rilijos liida dem kom op tu im, 28ahn staat aks im, “Huu gi'yo di atarity fi du demya tingz? Huu gi'yo di rait?”

29So Jesus ansa dem, “Ah gwain aks unu wan kwestyan tu. If unu ansa it fi mi, Ah wi tel unu dah huu gi mi di rait fi du demya tingz. 30Tel mi now: weh John get di rait fi baptaiz pipl? Fahn God or fahn man?”

31So dehn staat taak'op mongs demself ahn seh, “If wi seh, ‘Dah God gi'im,’ ihn gwain seh tu wi, ‘Den wai unu neva biliiv John mesij?’ 32Bot if wi seh, ‘Dah wehn man,’ wi fried fi weh di pipl dem wi du wi, bikaaz aal di pipl dehn wehn gat John laik wan chruu prafit.” 33So dehn ansa Jesus ahn seh, “Wii no nuo dah huu gi'im it.”

So Jesus tel dem seh, “Wel, Ah no gwain tel unu niida dah huu gi mi di rait fi du demya tingz.”

Currently Selected:

Mark 11: NTIC

Highlight

Copy