Matthew 27

Dehn ker Jesus fronta Pilate

(Mark 15.1-5; Luke 23.1-5; John 18.28-40)

1Wen di maanin kom, aal di chiif priis ahn di ada Jewish rilijos liida dem wehn gyada op fi disaid fi kandem Jesus tu det. 2Ahn dehn tai op Jesus ahn ker im uova tu Pilate, di govana.

How Judas ded

(Acts 1.18, 19)

3Den Judas, di wan weh wehn sel out Jesus, get ripent aafa weh ihn wehn du wen ihn si weh dehn gwain du wid Jesus. So ihn ker bak di thirty piis a silva chienj tu di chiif priis ahn di ada Jewish rilijos liida dem, 4ahn seh, “Ah sin bikaaz Ah sel out dis man weh no du notn bad ataal.” Bot dehn seh tu im, “So weh wii kier? Dat dah fi yo bizniz now!”

5Ahn Judas chruo don di mony pahn di fluo iina di Templ, ahn den ihn gaan out, gaan heng ihnself.

6Den di hai priis dehn pik op di mony ahn seh, “Ih deh gens di Laa fi put dis mony mongs di Templ mony, bikaaz dah blody mony.” 7So dehn disaid mongs demself fi yuuz di mony fi bai wan piis a lan fi ber di strienja dem iina; dis lan wehn yuuztu bilang tu wan man weh mek pat outa mod. 8Dah dis wai, op tu now dehn kaal disya piis a lan “Blody Grong.”

9Den jos weh di prafit Jeremiah wehn seh kom fi hapm, wen ihn seh, “Dehn tek di thirty piis a silva chienj, di prais weh som Israel pipl wehn gwain put pahn im, 10ahn dehn bai piis a lan weh yuuztu bilang tu wan man weh mek pat outa mod. Dis dah jos laik how di Laad wehn tel mi gwain hapm.”

Wat Pilate aks Jesus

(Mark 15.2-5; Luke 23.3-5; John 18.33-38)

11Den, dehn mek Jesus stan op fronta di govana, ahn di govana aks Jesus, “Dah yuu dah di King fi di Jew pipl dem?”

Ahn Jesus ansa, “Dah yu yoself deh seh Ai dah him.”#27.11 cf. Luke 26.64. 12Now di chiif priis ahn di ada Jewish rilijos liida dem wende bliem Jesus, bot ihn neva ansa dem ataal. 13Den Pilate seh tu im, “Yo no deh hier di paila tingz weh dehn deh seh yo du?” 14Bot Jesus neva ansa im ataal, so di govana get uova sopraiz ahn wanda wai Jesus neva deh ansa.

Pilate kandem Jesus fi ded

(Mark 15.6-15; Luke 23.13-25; John 19.1-15)

15Now di govana wehn gat wan kostom fi le'go wan prizna evry yier dehn wehn gat di Paasuova selibrieshan, ahn ihn yuuztu le'go eny prizna di pipl dehn waahn. 16Iina dah siem taim dehn wehn gat wan uova bad prizna weh wehn niem Barabbas. 17So, wen di pipl dem don gyada op, Pilate aks dem, “Wish wan a di man dem unu waahn Ah le'go fi unu, Barabbas, or Jesus, weh dehn kaal Christ?” 18Pilate seh dis bikaaz ihn wehn nuo seh dehn wehn han Jesus uova fi ihn gi'im di det sentens sieka dehn wehn jalas afta him.

19Bot wail ihn wende sidong iina di chier weh ihn joj iina, ihn waif sen wan mesij fi im. Ihn seh, “No put yoself iina notn fi dah raichos man, bikaaz laas nait Ah wehn gat wan uova bad driim bout im.”

20Bot di chiif priis ahn di ada Jewish rilijos liida dem kanvins di pipl dem fi aks fi ihn le'go Barabbas, ahn fi aks fi dehn kil Jesus. 21So di govana seh tu dem, “Wish wan outa di two man unu waahn Ah le'go fi unu?”

Dehn seh, “Barabbas!”

22So Pilate seh tu dem, “So weh Ah fi du wid Jesus, weh unu kaal di Christ?”

Ahn aala dem seh, “Niel'im op pan wan kraas!”

23Den Pilate aks dem, “Wai? Dah wat ihn du bad, so unu waahn im fi ded?”

Bot di pipl dem kiip deh seh haada ahn haada, “Niel'im op pan wan kraas!”

24Pilate si seh ihn kudn get notn ataal fi help Jesus; di ongl ting ihn si seh gwain hapm, dah wan big skaandal gwain suun brok out. So ihn tek som waata ahn wash ihn han dem fronta di pipl dem, ahn seh, “Ai inosent fahn enyting weh hapm tu dis man. Dah unu unuself gwain rispansabl fi wat gwain hapm.”

25Ahn aal di pipl dem ansa seh, “Mek ihn blod drap pahn wi ahn pahn wi pikniny dem tu!”

26Den Pilate le'go Barabbas fi dem, bot ihn aada ihn suoldya dem fi wap'op Jesus, ahn get im redy fi kruusifai.

Di suoldya dehn mak Jesus

(Mark 15.16-20; John 19.2, 3)

27Den di govana suoldya dem ker Jesus iina di plies dehn kaal di Praetorium,#27.27 Nuotis seh: Di Praetorium dah di baraks weh paat di govana suoldya dem yuuztu liv iina demde diez. ahn aala di Roman suoldya dem gyada op roun Jesus. 28Den dehn niekit im ahn mak im: dehn put aan wan lang porpl goun pan im laik him dah wan ruula. 29Ahn wen dehn don, dehn plat'op wan kroun outa prikl, put'ih pan Jesus hed, ahn put wan piis a stik iina ihn rait han. Den dehn niil dong fronta im ahn staat mek juok aafa im; deh seh, “Liv fareva, Uo King fi di Jew pipl dem!” 30Den dehn spit op pahn im, ahn tek weh di stik fahn im, ahn staat hit'im pahn ihn hed. 31Ahn afta dehn don mak im, dehn tek aaf di goun aafa im, put bak aan di kluoz weh ihn wehn gat aan aredy, ahn tek im out fi ker im dah di plies weh dehn wehn gwain niel'im op pan di kraas.

Dehn niel'op Jesus pan wan kraas

(Mark 15.21-32; Luke 23.26-43; John 19.16-27)

32Wen dehn wehn gwain pahn di wie, dehn bok'op wan man fahn Cyrene sity weh wehn niem Simon, ahn dehn fuos im fi bak Jesus kraas. 33Ahn wen dehn get dah di plies weh dehn kaal Golgotha, weh miin “Hed Skol Plies,” 34dehn aafa Jesus wain miks wid wan drogz fi pien weh niem “gaal,” bot wen Jesus ties ih, ihn neva drink'ih.

35Ahn afta dehn don niel'op Jesus pahn di kraas, dehn gyambl wid dais fi si huu wuda get wish piis a ihn kluoz. 36Den dehn sidong rait dehso, deh gyaad im gud. 37Ahn rait uova Jesus hed dehn put wan sain buod weh seh weh dehn kil im fah, weh wehn seh: “Dis dah Jesus, di Jew pipl dehn King.” 38Dah siem die two tiif wehn get niel'op pahn two kraas saida Jesus tu; wan pahn ihn rait said ahn di nada wan pahn ihn lef said.

39Ahn di pipl dem weh wehn stil deh paas dehso wende insolt Jesus, deh shiek dehn hed, 40ahn seh, “Dah yuu di siem man weh wehn gwain brok dong di Templ ahn bil'ih bak iina three diez? Wel den, if yuu so powaful, siev yoself no! If yuu dah God Son fi chruut, kom dong aafa di kraas!”

41Jos so di chiif priis dem wid di tiicha a di Laa ahn di ada Jewish rilijos liida dem wende mek juok aafa Jesus tu. Dehn kiip deh seh, 42“Ihn siev ada pipl, bot ihn kyaahn siev ihnself! If ihn dah Israel pipl dehn king, mek ihn kom dong aafa di kraas, ahn den wii gwain biliiv im! 43Ihn chros iina God; mek God siev im, if God kier bout im fi chruut. Dah no him di siem wan weh seh, ‘Ai dah God Son.’ ”

44Ahn dongtu di tiif dem weh wehn niel'op saida im, dehn wehn stil kos im op iina di siem wie.

Jesus ded

(Mark 15.33-41; Luke 23.44-49; John 19.28-30)

45Dah wehn migl die now, wen daaknis kom uova di huol lan fi three owaz. 46Den, bout three aklak Jesus hala out haad-haad, “Eloi, Eloi, lema sabachthani?” weh miin, “Mi God, Mi God, wai yo abandon mi?”

47Wen som a di pipl weh wende roun hier dis, dehn seh, “Dis man deh kaal'op pahn Elijah!” 48Siem taim wan a di man dem ron aaf, tek wan sponj, ahn suok'ih iina som wain viniga. Den ihn put'ih pahn wan stik ahn aafa Jesus wan drink.

49Bot di res a dem kiip deh seh, “Wiet! Mek wi si if Elijah gwain kom ahn siev im!”

50Den Jesus baal out agen, bluo fi di laas taim ahn ded.

51Aalava sodn di kortn iina di Templ tier iina two fahn tap tu batam, di ort staat shiek op, di rak dem split uopm, 52di griev dem uopm op tu, ahn di bady a plenty raichos ded pipl dehn kom bak laiv outa dehn griev! 53Den, afta Jesus kom bak fram di ded, dem weh wehn kom outa di griev gaan iina Jerusalem, di huoly sity, ahn plenty pipl si dem!

54Now, wen di kyapm a di suoldya ahn dem weh wehn wach Jesus wid im si di ort-kwiek ahn aal di ada tingz weh wende hapm, dehn wehn get uova fraitn ahn seh, “Dis man dah wehn God Son fi chruut!”

55Ahn plenty uman wende dehso tu, deh wach fahn foor. Dem dah wehn di wan dem weh gaan lang wid Jesus fahn bak iina Galilee lan deh aafa fi help im wid weh dehn wehn gat. 56Mongs dem dah wehn Mary Magdalene, den di ada Mary —James ahn Joseph muma— ahn den di muma fi Zebedee son dem.

Dehn ber Jesus

(Mark 15.42-47; Luke 23.50-56; John 19.38-42)

57Den, wen iivnin kom dong, wan rich man fahn Arimathea gaan tu Pilate. Ihn niem dah wehn Joseph, weh wehn ton wan a Jesus disaipl tu. 58Dis man gaan op tu Pilate fi aks im fi Jesus bady, ahn Pilate seh, yees, ahn ada ihn suoldya dem fi gi'im di bady. 59So, Joseph gaan ahn tek Jesus bady fahn aafa di kraas ahn rap'ih op iina som kliin linin klaat. 60Dehn ihn put'ih iina ihn uon nyuu tuum, weh wehn dig out iina wan raky hil. Ahn afta ihn put im iin deh, ihn ruol wan big rak uova di duo fi shet'ih op, ahn den ihn gaan. 61Bot Mary Magdalene ahn di ada Mary stie dehso, deh sidong fronta di tuum.

Som suoldya gyaad Jesus griev

62Now di neks die, weh dah wehn di Sabat die, di hai priis ahn som Pharisee pipl dehn gyada op fronta Pilate, 63ahn dehn seh, “Saar, wii memba weh daty man —weh wende fuul'op di pipl— wehn seh bifuor ihn ded, ‘Afta three diez ded, Ah gwain liv agen.’ 64So, aada yo suoldya dem fi go main di tuum til di third die, or ihn disaipl dem gwain go ahn tiif di bady ahn den go tel pipl seh, ‘Ihn kom bak fahn mongs di ded.’ Den di laas sityuwieshan gwain bii wosa an di fos wan!”

65So Pilate seh tu dem, “Aarait, Ah deh gi unu som gyaad. Sen dem fi go tek kier a di tuum jos how unu waahn du'ih.”

66So dehn gaan wid di suoldya dem ahn siil di duo fi sikyuor di tuum, ahn lef dem fi gyaad ih.

Currently Selected:

Matthew 27: NTIC

Highlight

Copy