Matthew 28

Jesus deh liv agen!

(Mark 16.1-8; Luke 24.1-12; John 20.1-9)

1Now, afta di Sabat die, suun-suun iina di maanin pan di fos die a di wiik, Mary Magdalene ahn di ada Mary gaan, gaan luk pahn di tuum. 2Ahn az dehn get deh, aalava sodn wan uova big ort-kwiek paas, ahn wan a di Laad ienjel kom don fahn hevn, waak op tu di tuum, ruol weh di big rak fahn fronta ih, ahn sidong pahn ih! 3Di ienjel wehn luk jos laik wan laitnin; ihn kluoz wehn uova wait laik snuo. 4Di man dem weh wende gyaad di tuum wehn so fried a im dehn trimbl aal uova ahn stie jos laik dehn dah wehn ded man.

5Den di ienjel seh tu di uman dem, “Unu no fried! Ah nuo seh unu deh luk fi Jesus weh dehn niel'op pahn di kraas. 6Ihn no deh yahso; ihn don riez'op fahn mongs di ded jos laik how ihn wehn seh. Kom ahn luk pahn di spat weh ihn wende lidong. 7Mikies, unu golang kwik ahn tel ihn disaipl dem seh ihn don riez bak op fahn mongs di ded dem, ahn ihn gwain hed a unu dah Galilee lan; unu wi si'im dehso. Memba weh Ah jos don tel unu.”

8So dehn mikies gaan fahn di tuum; dehn wehn fraitn, bot dehn wehn uova glad tu, az dehn ron gaan tel ihn disaipl dem.

9Den, aalava sodn Jesus bok'op pahn dem lang di ruod ahn ihn hiel dem. Den dehn gaan op tu im, niil dong, huol ihn fut dem ahn staat waaship im. 10Ahn Jesus seh tu dem, “Unu stap fried! Golang ahn tel mi breda dem fi go out tu Galilee lan, ahn dehn gwain si mi deh.”

Di suoldya dehn tel di Hai Priis weh wehn hapm

11Wail di uman dehn wehn gwain pahn dehn wie, som a di suoldya dem weh wende gyaad di tuum gaan bak dah Jerusalem, gaan tel di hai priis dem evryting weh wehn hapm. 12So dehn miit'op wid di Jewish rilijos liida dem ahn dehn kom aanda agriiment fi pie di suoldya dem wan paila mony. 13Dehn tel dem, “Unu fi seh Jesus disaipl dem kom iina di nait ahn tiif Jesus bady wail unu wende sliip. 14Ahn if enybady tel di govana weh unu deh seh, wii pramis wii wi taak tu im ahn kiip unu outa prablem.”

15So di suoldya dem tek di mony ahn du evryting weh dehn tel dem fi du. Dah das wai ontil tudeh die dehn spred out dis siem stuory mongs di Jew pipl dem.

Di Griet Komishan fi priich aal uova di worl

(Mark 16.14-18; Luke 24.36-49; John 20.19-23; Acts 1.6-8)

16So di eleven disaipl gaan dah Galilee lan op pahn daty hil weh Jesus wehn tel dem fi go. 17Ahn wen dehn si Jesus, dehn staat waaship im, bot som a dem stil yet wende dout. 18Den Jesus kom op tu ihn falowa dem ahn tel dem, “God gi mi aal di atarity iina hevn ahn pahn ort; 19so unu fi go, go mek plenty disaipl fahn outa aal di difrent gruup a pipl evry weh dehn deh. Baptaiz dem iina di niem a di Faada, di Son, ahn di Holy Spirit, 20ahn tiich dem how fi obie aal di tingz weh Ah wehn komaan unu. Memba dis: Ai gwain aalwiez deh wid unu dongtu di en a di worl!”

Currently Selected:

Matthew 28: NTIC

Highlight

Copy