Matthew 23

Jesus waan di pipl bout dem weh tiich di Laa

(Mark 12.38-40; Luke 11.43, 46; 20.45-47)

1Den Jesus seh tu di paila pipl ahn tu ihn disaipl dem, 2“Di tiicha a di Laa ahn di Pharisee pipl dem tink seh dehn gat aal di atarity fi tel di pipl dem how fi fala Moses Laa dem.#23.2 Or di vors kuda seh: “Di skraib ahn di Pharisee dem wehn tek dehn siit pahn Moses chier.” 3So du enyting weh dehn tel unu fi du, bot unu no fi fala dehn egzampl, bikaaz dem no du wat dehn seh dehn fi du. 4Dehn put wan paila strik ruul pan pipl, laik wan hevy bag pahn dehn shuolda, ahn neva iivn trai fi muuv wan finga fi help dem. 5Dehn du evryting jos fi pipl si dem. Jos so, dehn mek dehn filaktry ahn tasl dem#23.5 Nuotis seh: Wan filaktry dah wehn wan likl leda baks weh di Jew dem yuuztu tai roun dehn farid ahn roun dehn han dem tu fi huol som Skriptyo vors. Siem wie, dehn yuuztu tai tasl dem tu dehn kluoz fi shuo seh dehn dah wehn di wan dem weh obie Moses Laa. uova big. 6Dehn lov fi sidong iina di bes plies dem iina di paaty dem ahn get di muos impuotant siit dem iina di sinigag. 7Ahn dehn laik pipl fi hiel dem op iina di maakit plies dem ahn kaal dem ‘Griet Tiicha!’ 8Bot unu no fi mek nonbady kaal unu ‘Griet Tiicha,’ bikaaz unu ongl gat one tiicha, ahn aala unu dah breda. 9Yahso unu no fi kaal nonbady pahn ort ‘faada,’ bikaaz unu ongl gat one Faada, ahn him dah di wan weh iina hevn. 10Dehn no fi kaal unu ‘Maasta’ niida, bikaaz unu ongl gat one maasta, ahn him dah Christ! 11Di bigis porsn mongs unu fi bii unu sorvant. 12Unu si, enybady weh priez'op im uonself gwain get dreg dong. Ahn enybady weh ombl ihnself, gwain get priez'op.”

13Den Jesus kantinyo deh seh, “How haad unu gwain gat'ih, unu tiicha a di Laa ahn Pharisee pipl, unu hipokrit! Unu deh henda pipl fahn go iina di Kingdom a Hevn. Unu uonself neva gwain go iin, nar mek nonbady els go iin niida. 14[How haad unu gwain gat'ih, unu tiicha a di Laa ahn Pharisee pipl, unu hipokrit! Unu laik tek uova di hous fi di puor uman dem weh dehn hozban ded. Bot stil yet unu ton roun ahn waahn shuo aaf wid lang prayaz. Fi dat unu gwain get muo ponishment fi di bad tingz weh unu du!]

15“How haad unu gwain gat'ih, unu tiicha a di Laa ahn Pharisee pipl, unu hipokrit! Unu go aal uova di sii ahn pan lan fi mek pipl jain unu rilijan, ahn wen unu don, unu mek dem wot two taim muo an unu fi go dah hel.

16“How haad unu gwain gat'ih, aala unu weh dah laik uova blain man, bot stil yet waahn gaid di pipl dem! Jos so unu seh, ‘If enybady tek uot iina di Templ niem, dah non notn; bot if enybady tek uot iina di niem a di guol fi di Templ, den ihn hafy kompliit weh ihn wehn pramis fi du.’ 17Unu fuul ahn blain! Wat muo impuotant, di guol or di Templ weh mek di guol huoly? 18Den unu seh, ‘If enybady tek uot iina di alta niem, dah non notn; bot if enybady tek uot iina di gif weh deh pan di alta, den ihn hafy kompliit weh ihn wehn pramis fi du.’ 19Unu uova blain man! Wish wan a dem muo impuotant, di gif or di alta weh mek di gif huoly? 20So den, enybady weh tek uot iina di alta niem no ongl deh swie iina ih niem, bot iina di niem a evryting weh deh pahn ih tu. 21Ahn enybady weh tek uot iina di Templ niem no ongl deh swie iina ih niem, bot iina di niem a di Wan weh deh liv iina ih tu. 22Ahn enybady weh tek uot iina hevn niem no ongl deh swie iina ih niem, bot iina di niem a God chruon ahn God weh deh sidong pahn ih tu.

23“How haad unu gwain gat'ih, unu tiicha a di Laa ahn Pharisee pipl, unu hipokrit! Dah chruut unu gi God ten porsent ah aal weh unu gat, iivn dongtu di mint ahn komin siizinin weh unu gat iina unu yaad, bot unu no pie no main fi di tingz dem weh riily impuotant iina di Laa. Unu no fier wid pipl, nar gat non morsy fi dem, nar unu fietful fi kompliit weh God seh unu fi du. Wail ih gud fi gi God ihn ten porsent, unu fi pie main tu di ada impuotant tingz tu. 24Unu dah laik uova blain man, bot stil yet waahn gaid di pipl dem. Unu strien out wan likl insek outa weh unu gwain drink, bot den swala wan kyamil!

25“How haad unu gwain gat'ih, unu tiicha a di Laa ahn Pharisee pipl, unu hipokrit! Unu mek shuor seh unu kliin evryting pan di outsaid weh pipl kyan si, laik unu kop ahn unu pliet, bot iina unu haat unu griidy ahn wikid! 26Pharisee pipl, unu blain! Fos unu fi kliin unu haat, laik unu kliin di iinsaida unu kop ahn unu pliet; den di outsaid kyan stie kliin tu.

27“How haad unu gwain gat'ih, unu tiicha a di Laa ahn Pharisee pipl, unu hipokrit! Bikaaz unu jos laik di griev dem wid wait pient, weh luk kliin ahn prity outsaid, bot iinsaid ful a ded man buon ahn som huol paila ada doty tingz. 28Dah jos so unu deh, pipl luk pahn unu outsaid ahn tink seh unu gud, bot iinsaida unu ful a unu hipokrit wiez ahn badnis.

Som rilijos liida deh iina dienja a God raat

(Luke 11.46-51)

29“How haad unu gwain gat'ih, unu tiicha a di Laa ahn Pharisee pipl, unu hipokrit! Unu bil tuum#23.29 Nuotis seh: Wan tuum dah wan plies weh dehn ber pipl; dis no siem laik di griev wen dehn ber iina di ort. fi di prafit dem, ahn prity op di griev dem fi ada raichos man. 30Ahn wen unu don, unu seh, ‘If wii wehn egzis iina fi wi ansesta dehn taim, wii wuda neva grii wid dem fi kil di prafit dem.’ 31Stil yet, unu deh sink unuself deh seh unu disen fahn dem weh wehn kil di prafit dem. 32So, gwaan ahn finish'op di uova bad tingz weh unu ansesta dehn wehn waahn du. 33Unu jos laik sniek iina graas, unu! How unu gwain get-weh, wen unu aredy don kandem fi go dah hel?

34“Das wai Ai deh sen tu unu som prafit, som waiz man, ahn som ada tiicha weh nuo bout God wiez dem. Som a dem unu gwain kil ahn niel'op pahn wan kraas, ahn som a dem unu gwain biit'op iina unu sinigag dem. Di res unu gwain ron dong enywie dehn go iina di toun dem. 35Sieka dat, unu gwain pie fi di det ah aal di raichos pipl dem weh dehn kil pahn ort, fahn raichos Abel tu Zechariah, Barachiah son, di wan weh unu kil bitwiin di huoly plies ahn di alta. 36Yees, Ah deh tel unu di chruut: aal demya tingz gwain hapm tu disya jinarieshan.

Jesus sary fi di Jerusalem pipl dem

(Luke 13.34-35)

37“Ai Jerusalem, Jerusalem pipl, unu weh kil di prafit dem ahn lik dong wid rak dem weh di Laad sen tu unu! Plenty taim Ah wehn waahn bring unu tugeda, laik how wan hen gyada ihn likl chikin dem aanda ihn wing, bot unu neva waahn Ah du'ih! 38Lisn! God no deh iina unu sity no muo; unu deh pan unu uon. 39Ah deh tel unu: unu no gwain si mi agen til di taim kom wen unu seh, ‘Bles dah di Wan weh kom iina di Laad niem.’ ”

Currently Selected:

Matthew 23: NTIC

Highlight

Copy