Matthew 24

Di trobl weh deh kom

(Mark 13.1-13; Luke 21.5-19)

1Az Jesus wehn gwain outa di Templ deh waak gwain lang, ihn disaipl dem kom op tu im ahn deh shuo im di uova prity Templ bildin dem. 2Bot Jesus seh tu dem, “Unu si aal demya tingz, unu si'it? Ah deh tel unu di chruut: nat iivn wan brik gwain lef pan tapa wan anada, weh dehn no gwain chruo dong.”

3Lieta, wen Jesus wende sidong him wan op pahn Alivz Mountin, di disaipl dem kom op tu im bai dehnself ahn seh, “Tel wi, wentaim demya tingz gwain hapm, ahn wish sain wi gwain si fos so wi kyan nuo seh yu deh kom bak ahn di worl gwain en?”

4Jesus ansa dem, “Unu wach out ahn no mek nonbady fuul unu op, 5bikaaz plenty pipl gwain kom deh yuuz mai niem deh seh, ‘Ai dah di Mesaya!’ Ahn dehn gwain fuul'op plenty a unu. 6Wen unu hier dehn taak bout plenty waar ahn rayat, no get fraitn, bikaaz aal demya tingz gwain hafy hapm fos, bot dat no miin seh dat dah di en yet. 7Di kontry dem gwain fait gens wan anada, ahn di kingdom dem gwain fait gens wan anada tu. Plenty pipl gwain paas hongry, ahn iina plenty difrent plies di ort gwain shiek. 8Aal demya tingz dah jos di biginin a plenty sofarin, laik di pien wan uman weh deh briid get jos bifuor ihn gat ihn pikniny.

9“Iina demde diez dehn gwain gi unu uova fi dehn mek unu sofa plenty ahn den dehn gwain kil unu. Evrybady evrywie gwain hiet unu sieka unu chros ahn fala mii. 10Den, plenty pipl gwain stap fala mi ahn dehn gwain bad-diil wan anada ahn hiet'op wan anada tu. 11Ahn plenty faals prafit gwain kom ahn fuul'op plenty pipl. 12Ahn jos sieka weh plenty muo pipl gwain get wikid ahn bad, di lov weh pipl wehn gat fi wan anada gwain get wiika ahn wiika. 13Bot enywan a unu weh kiip ihn fiet tu di en, gwain get siev. 14Ahn di gud nyuuz bout God Kingdom gwain get priich aal uova di worl fi pipl kyan hier di chruut, ahn den di en gwain kom.

Jesus tiich bout di Teribl Ting weh gwain hapm

(Mark 13.14-23; Luke 21.20-24)

15“So den, wen unu si di Uova Teribl Ting deh stan op iina di Holy Plies, weh di prafit Daniel wehn taak bout —mek di wan weh deh riid dis leta andastan dis— 16aala dem weh liv dah Judea lan fi hory, go'op pan di mountin dem. 17Di man weh deh pan ihn hous-tap no fi luuz taim deh kom dong fi tek out wat deh iina di hous, 18ahn di wan weh deh work iina ihn grong no fi go bak huom fi get ihn kluoz dem, bot ihn fi ron go striet op pan di mountin tu. 19How haad ih gwain bii iina demde diez fi di uman dem weh deh briid, ahn demde weh gat dehn likl bieby iina han! 20Prie fi di die wen unu hafy ron, dah no wan Sabat die nar hapm iina kuol taim, 21bikaaz iina daty taim plenty teribl sofarin gwain deh, di kain a sofarin weh neva hapm fahn di worl staat til now, ahn notn no gwain bii laik dis aftawod. 22Ahn eksep demde diez wehn shaatn op, nonbady wuda get siev; bot jos sieka dem weh God wehn chuuz, di taim gwain get shaatn.

23“Den if enybady tel unu: ‘Unu luk yah!’ or, ‘Unu luk deh! Dis dah Christ, di Mesaya!’ unu no biliiv dem. 24Bikaaz plenty faals Christ ahn faals prafit gwain kom op. Ahn dehn gwain trai trik di pipl dem deh shuo dem som uova big mirakl ahn wandaz tu. Dehn gwain iivn trai trik di pipl weh God don chuuz, if dehn kyan fuul dem tu. 25So unu wach out! Memba, Ah don tel unu evryting bifuor ih hapm.

26“So if dehn seh tu unu, ‘Luk! Di Mesaya deh iina di dezart,’ unu no fi go iina di dezart go luk far im. Ahn if dehn seh tu unu, ‘Luk! Di Mesaya deh iina wan siikrit plies weh nonbady kuda si'im,’ unu no fi biliiv dat niida. 27Bikaaz jos how unu si di laitnin deh flash kraas di skai fahn di iis tu di wes, dah rait so di Son a Man gwain kom bak, ahn den dehn wi si'im gud.

28“Laik how dehn seh, ‘Enywie weh wan ded bady deh, dah rait dehso di jankro dem gwain gyada op.’

Wat gwain hapm wen Jesus, di Son a Man, kom bak pahn ort

(Mark 13.24-27; Luke 21.25-28)

29“Rait afta di sofarin paas iina demde diez, di son gwain get daak, ahn di muun no gwain shain niida, ahn di staar dem gwain faal dong fahn op iina di ier; aal di powa dem fahn iina hevn gwain get shiek op. 30Den di sain weh dah di Son a Man, gwain apier'op iina di skai, ahn aal di traib dem pahn di ort gwain hala wen dehn si di Son a Man deh kom bak pahn hevn kloud dem wid plenty powa ahn gluory. 31Ahn ihn gwain sen out ihn ienjel dem wid wan big trompit ahn dehn gwain gyada tugeda dem weh God don chuuz fahn aal uova di worl, fahn wan en tu di ada en.

Dis dah how wi gwain nuo seh di taim deh nier

(Mark 13.28-31; Luke 21.29-33)

32“Unu laan wan lesn aafa di fig trii: wen di lim dem staat put out liif, unu nuo seh drai weda deh nier. 33Rait so, wen unu si aal demya tingz weh Ah deh tel unu bout staat hapm, unu wi nuo seh di taim deh nier, ahn ih gwain staat kwika an weh unu tink. 34Hier dis chruut weh Ah deh tel unu: Aal demya tingz gwain hapm bifuor di pipl weh deh liv iina daty taim ded. 35Disya hevn ahn ort gwain don weh wid, bot aal weh Ai deh tel unu gwain kantinyo fareva.

Nonbady no nuo di die nar di taim wen Jesus deh kom bak

(Mark 13.32-37; Luke 17.26-36)

36“Bot nonbady no nuo di die, nar di taim a di die wen di Son a Man gwain kom bak; nat iivn di ienjel dem iina hevn, nar di Son, bot ongl God di Faada nuo dat. 37Jos how tingz wehn hapm iina Noah diez, dah rait so ih gwain bii wen di Son a Man kom bak. 38Iina demde diez bifuor di ort get flod, pipl wende iit ahn drink op, deh get marid ahn deh put fi marid rait op til di die wen Noah gaan iina di big-big buot. 39Ahn dehn neva nuo notn til wen di flod kom ahn wash weh aala dem. Dah rait so ih gwain hapm wen di Son a Man kom bak. 40Iina dah siem taim two porsn gwain deh iina dehn grong; wan a dem gwain get ker weh, ahn di nada wan gwain get lef. 41Two uman gwain deh grain flowa dah di mil tugeda; wan a dem gwain get ker weh, ahn di nada wan gwain get lef. 42So unu beta kiip unu ai uopm, bikaaz unu no nuo pahn wish die yo Laad deh kom. 43Andastan dis: if di uona a wan hous wehn nuo dah wish owaz iina di nait wan tiif gwain kom, ihn wuda stie wiek ahn no mek di tiif brok iina ihn hous. 44Jos so, unu fi aalwiez redy tu, bikaaz pahn di siem owaz weh unu no espek di Son a Man fi kom, dah dat taim ihn gwain kom bak.

Di sensabl sorvant ahn di wan weh no fietful tu ihn maasta

(Luke 12.41-48)

45“Tel mi den: huu dah di fietful ahn sensabl sorvant weh ihn maasta kyan chros fi put im inchaaj a di ada sorvant dem ahn mek shuor seh dehn iit dehn fuud iin taim? 46Ih gwain gud fi dah sorvant, if di maasta kom bak ahn fain im deh du di jab weh ihn lef im fi du! 47Ah deh tel unu di chruut: di maasta gwain put dah sorvant inchaaj ah aal weh ihn gat. 48Bot supuoz di sorvant uova bad ahn ihn seh tu ihnself, ‘Mi maasta gwain tek wan lang taim fi kom,’ 49ahn ihn staat biit di ada sorvant dem, ahn iit ahn drink wid som ada jronkin man. 50Wel, di sorvant maasta gwain kom bak pahn wan die weh ihn gwain liis espek ahn sopraiz im. 51Den ihn maasta gwain gi'im wan tof ponishment; ihn gwain kot'im op iina piisiz ahn put im weh paat di hipokrit dem deh. Iina daty plies gwain gat plenty halarin, ahn dehn gwain grain dehn tiit sieka di pien weh dehn deh fiil.

Currently Selected:

Matthew 24: NTIC

Highlight

Copy