Matthew 22
22
Di parabl bout di big bankwet
(Luke 14.15-24)
1So Jesus taak tu dem agen deh yuuz parabl, ahn seh, 2“Yo kyan kompier hevn wid wan king weh mek wan bankwet fi ihn son, bikaaz ihn gwain get marid. 3Ihn sen ihn sorvant dem gaan kaal aala dem weh ihn wehn invait dah di wedn, bot dehn neva waahn kom. 4So ihn sen som muo sorvant, bot fos ihn seh tu dem, ‘Tel dem weh Ai invait: Luk yah, Ah don pripier aal di fuud. Ah kil di kow ahn som ada animal weh Ah wehn gat deh fatn, ahn evryting don redy, so unu beta kom dah di wedn fiis.’ 5Bot di pipl dem neva pie non main ahn gaan weh. Wan gaan dah ihn grong, ahn di ada wan dah ihn bizniz. 6Ahn di res a di pipl dehn grab di king sorvant dem, haraas dem op, ahn den dehn kil dem! 7Bot wen di king hier bout'ih, ihn get uova beks. Ihn tek ihn suoldya dem ahn sen dem fi mek dem kil dem weh kil ihn sorvant dem ahn fi bon'op dehn sity tu. 8Den di king seh tu ihn sorvant dem, ‘Di wedn redy now, bot dem weh Ah wehn invait neva gud nof fi kom. 9So unu golang di ruod ahn invait enybady weh unu kyan fain tu di wedn fiis.’ 10So di sorvant dehn gaan out pahn di ruod ahn invait aal di pipl dem weh dehn fain. Dehn invait evrybady —gud pipl ahn bad di siem wie— ahn di wedn wehn pak'op wid aal di pipl weh dehn wehn invait.
11“Bot wen di king kom fi si di pipl dem, ihn si wan man weh neva gat aan non kliin suut fi di wedn. 12So ihn seh tu im, ‘Mi fren, dah how yuu get iin yah bitout non kliin suut fi di wedn?’ Bot di man neva gat non eskyuuz, so ihn neva seh notn. 13Den di king tel ihn sorvant dem, ‘Tai op ihn han ahn ihn fut dem, ahn chruo im outa di hous iina di daaknis! Out dehso gwain gat plenty halarin ahn dehn gwain grain'op dehn tiit iina pien.’ ”
14Den Jesus don ahn seh, “Bikaaz plenty pipl get invait, bot jos likl bit a dem get pik out fi deh yah.”
Som rilijos liida trai fi trik Jesus
(Mark 12.13-17; Luke 20.20-26)
15Den som Pharisee pipl gaan plan op wan wie fi trai trap Jesus wid weh ihn seh. 16So dehn sen dehn disaipl ahn som a King Herod falowa tu Jesus, ahn dehn seh tu im, “Tiicha, wi nuo seh yu tel di chruut aal di taim ahn yo tiich God wie bitout non lai. Yu no wory bout wat pipl gwain seh, ahn yu no pie main pan dehn kandishan. 17So tel wi weh yu tink: ih deh gens fi wi Laa or no, fi pie taks tu Caesar di Roman Empara?”
18Bot Jesus wehn nuo wat dehn wehn op tu, ahn ihn seh tu dem, “Unu hipokrit, wai unu waahn trap mi? 19Unu shuo mi wan a di mony weh unu yuuz fi pie di taks.”
So dehn gi'im wan silva chienj, 20ahn ihn aks dem, “Dah fi huu fies ahn niem deh pahn dis mony?”
21Dehn ansa im seh, “Caesar!”
So Jesus seh, “Wel, unu gi Caesar weh dah fi him, ahn unu gi God weh dah fi him tu!”
22Wen dehn hier dis, dehn wen uova sopraiz how ihn ansa dem. Den dehn lef Jesus dehso ahn gaan bout dehn bizniz.
Som ada pipl aks Jesus bout laif afta det iivn duo dehn no biliiv dat
(Mark 12.18-27; Luke 20.27-40)
23Dah siem die som Sadducee pipl —weh wende seh non ded kyaahn liv agen— kom tu Jesus ahn aks im, 24“Tiicha, Moses wehn rait iina ihn Laa seh, ‘If wan man ded ahn neva gat non pikniny wid ihn waif, di ded man breda fi marid tu di waif weh ihn ded lef, ahn gat pikniny wid im fi di pikniny ker di ded man siem taikl.’ 25Wel, wan taim seven breda wende mongs wi, ahn di uolda wan marid, bot ihn ded ahn neva gat non pikniny wid ihn waif, so di waif marid tu di neks breda. 26Ahn di siem ting hapm tu di sekant breda, ahn den di third, ahn rait so ih hapm tu aal di breda dem. 27Tu di laas, di uman ded tu. 28So tel wi now: iina di die a rezorekshan, wen aala dem kom bak fahn di ded, fi wish wan a di seven breda waif ihn gwain bii, bikaaz ihn dah wehn aala dem waif?”
29Jesus ansa seh, “Unu rang, ahn unu nuo wai? Unu niida andastan di Skriptyo nar God powa. 30Bikaaz iina di die a rezorekshan, nonbady no marid tu nonbady, bikaaz evrybady gwain bii laik di ienjel dem iina hevn. 31Now, bout weda pipl kom bak tu laif or nat, unu neva riid God Wod weh paat ihn seh, 32‘Ai dah Abraham God, fi Isaac God, ahn Jacob God tu.’ So wi kyan si seh God dah no di God fi di ded dem; ihn dah God fi dem weh deh liv!”
33Ahn wen di pipl dem hier weh Jesus seh, ih lef dem sopraiz.
Moses muos impuotant Laa
(Mark 12.28-34; Luke 10.25-28)
34Bot wen di Pharisee dem hier seh Jesus wehn hosh op di Sadducee dem, dehn get tugeda. 35Ahn wan a dem, weh dah wehn wan tiicha a di Laa, aks Jesus wan kwestyan fi trai im out, 36“Tiicha,” ihn seh, “wish wan a Moses Laa dah di muos impuotant outa aala dem?”
37Jesus seh tu im, “ ‘Unu fi lov di Laad unu God wid aal unu haat, wid aal unu suol, ahn wid aal unu main.’ 38Dis dah di bigis ahn di muos impuotant komaanment. 39Ahn di sekant wan impuotant tu; ih seh: ‘Unu fi lov unu nieba dem laik how unu lov unuself.’ 40Aal di Laa ahn di prafit dem dipen pahn demya two komaanment.”
Jesus taak bout wan a King David disendans
(Mark 12.35-37; Luke 20.41-44)
41Di Pharisee dem wehn stil miit'op deh, so Jesus aks dem, 42“Wat unu deh tink bout di Mesaya?#22.42 Or: di Christ. Him dah fi huu son?” Ahn dehn tel im, “Fi David.”
43So Jesus aks dem, “Den how David, chruu di Holy Spirit, kaal im ‘Laad’ wen ihn seh,
44‘God tel mai Laad:
Sidong dah mi rait said,
til Ah put yo enimy dem aanda yo fut.’
45“So, if David kaal di Mesaya ihn Laad, den how ihn gwain bii David disendans tu?”
46Bot non a dem kudn ansa im ataal, ahn fahn daty die nonbady els kom trai im out wid wan nada kwestyan.
Currently Selected:
Matthew 22: NTIC
Highlight
Share
Copy
Want to have your highlights saved across all your devices? Sign up or sign in
The New Testament in Islander Creole © Sociedad Bíblica Colombiana and © Wycliffe Bible Translators, Inc., 2015.
