Luke 6

Jesus tiich bout wat rait fi pipl du pahn di Sabat die

(Matthew 12.1-8; Mark 2.23-28)

1Wan Sabat die, Jesus wende waak chruu wan wiit#6.1 Nuotis seh: Wiit dah wan trii-laik graas weh dehn gruo iina dehn grong iina demde diez. Ih prodyuus siid weh dehn kuda iit raa or gyada fi mek flowa. fiil, ahn ihn disaipl dem staat pik aaf som a di wiit hed, hoks aafa di trash wid dehn han, ahn den dehn iit'ih. 2Som Pharisee pipl weh wehn dedeh aks dem seh, “Wai unu deh du weh di Laa seh wi no fi du pan di Sabat die?”

3-4Jesus ansa dem seh, “Unu neva riid bout di taim wen David#6.3-4 cf. Luke 1.27. wehn uova niid somting fi iit? David ahn ihn waria dem wehn hongry, so David gaan iina God hous ahn ihn iit di aafrin bred, ahn gi som a ih tu ihn waria dem tu. Ahn ongl di priis dem kuda du dis.”

5Den Jesus seh tu dem, “Di Son a Man, gat atarity dongtu fi seh weh rait fi pipl du pan di Sabat.”

Jesus kyuor wan sik man pahn di Sabat die

(Matthew 12.9-14; Mark 3.1-6)

6Wan neks Sabat Jesus gaan iina di sinigag ahn tiich di pipl, ahn ihn nuotis seh wan man wehn dedeh wid ihn rait han weh wehn kripl. 7Som Pharisee pipl ahn di tiicha a di Laa dem wehn dedeh tu, weh wehn waahn si Jesus deh du rang. So dehn dag im fi si if ihn wehn gwain kyuor pan di Sabat die. 8Now, iivn duo Jesus wehn nuo weh dehn wende tink iina dehn haat, ihn seh tu di man wid di kripl han, “Get'op ahn stan op fronta evrybady.” So ihn get'op ahn stan op rait dehso. 9Den Jesus seh tu dem, “Mek Ah aks unu somting: Wat wi Laa seh wi fi du pan di Sabat die? Gud or bad? Fi help pipl or fi haam dem? Fi siev wan man laif or fi distrai'im?” 10Jesus luk roun pan aala dem, ahn den ihn seh tu di man, “Strech out yo han!” Ahn di man strech'ih out, ahn rait dehso ihn han get gud jos laik di ada wan!

11Bot di Pharisee pipl ahn di tiicha a di Laa dem wehn beks ahn staat taak wid wan anada bout weh dehn fi du wid Jesus.

Jesus pik out ihn twelve apasl

(Matthew 10.1-4; Mark 3.13-19)

12Iina daty taim Jesus gaan op pan wan mountin, gaan prie, ahn ihn spen di huol nait deh prie tu God. 13Di neks maanin, Jesus kaal ihn disaipl dem, pik out twelve fi deh wid im, ahn niem dem apasl. 14Demya dah dehn niem: Simon —huu Jesus wehn kaal Peter— ahn ihn breda Andrew. Den yo wehn gat: James, John, Philip, Bartholomew, 15Matthew, Thomas, ahn James —dat dah Alphaeus son. Den Simon, huu dehn kaal di zealot.#6.15 Nuotis seh: Di zealot dem dah wehn som lan difenda iina demde diez weh neva waahn di Roman atarity iina dehn lan. 16Den Judas —huu dah wehn James son— ahn di laas wan, Judas Iscariot, di wan huu weh wehn gwain sel out Jesus.

Jesus tiich ahn kyuor di pipl dem weh kom fahn aal uova di plies

(Matthew 4.23-25)

17Den Jesus gaan dong wid ihn disaipl dem ahn stan op pan wan flat piis a lan. Wan big kroud a Jesus disaipl wehn dedeh tu, ahn wan huol paila pipl fahn aal uova Judea lan —fahn Jerusalem, ahn fahn di sii kuos a Tyre ahn Sidon sity wehn dedeh tu. 18Dehn wehn kom fi hier weh Jesus wehn gat fi seh, ahn fi get kyuor fahn aal dehn paila siknis. Ahn dem, weh wehn gat iin bad spirit, wehn get kyuor tu. 19Aal di pipl wende trai fi toch Jesus, bikaaz powa wende kom outa im, ahn dehn wende get kyuor.

Blesin ahn trobl weh deh kom

(Matthew 5.1-12)

20Den Jesus luk striet pan ihn disaipl dem ahn seh:

“Unu weh puor now, bles;

bikaaz God Kingdom dah fi unu!

21Unu weh hongry now, bles;

bikaaz unu gwain get ful'op.

Unu weh hala now, bles;

bikaaz unu gwain laaf.

22“Ahn unu gwain get bles wen dehn hiet unu, ahn rijek unu, ahn insolt unu, ahn dehn seh unu uova bad jos sieka unu chros iina di Son a Man. 23Get glad wen dat hapm ahn daans wid jai, bikaaz wan big gif deh wiet fi unu iina hevn. Memba seh: dehn ansesta dem wehn du di siem ting tu di prafit dem lang taim bifuor unu.

24Bot unu weh rich now, deh iina trobl;

unu don gat weh unu fi get.

25Ahn unu weh gat plenty fi iit now, deh iina trobl;

bikaaz unu gwain go hongry.

Ahn unu weh laaf now, beta wory;

bikaaz unu gwain muon ahn hala.

26Ahn trobl gwain kom pan unu wen evrybady taak gud bout unu; far, dat dah how dehn ansesta dem wehn triit di uol taim faals prafit dem.

Jesus seh, “Lov unu enimy dem”

(Matthew 5.38-48; 7.12a)

27“Bot Ah deh tel unu weh deh hier mii: Lov yo enimy dem! Du gud fi dem weh hiet yo. 28Bles dem weh kors yo; ahn prie fi dem weh triit yo bad. 29If enybady lik yo pan wan jaa, mek ihn lik yo pan di neks wan tu. Ahn if sombady tek weh yo jakit, mek ihn tek yo shot tu. 30Enybady weh beg yo, gi dem. Ahn if dehn tek wat dah fi yo, no aks dem bak fi it agen. 31Du fi ada pipl, jos wat yo wuda waahn dehn du fi yu.

32“If yo ongl lov di pipl dem weh lov yo, wai yo wuda waahn get bles den? Dongtu di sina dem lov huu lov dem. 33Ahn if yo du gud fi dem weh du gud fi yo, wai yo wuda waahn get bles den? Dongtu di sina dem du di siem ting, no chruut? 34Ahn if yo ongl len tu di pipl dem weh yo tink gwain pie yo bak, weh priez yo gwain get? Dongtu di sina dem len wan anada, ahn den dehn espek fi get bak ful pie. 35Nuo, lov yo enimy ahn du gud fi dem! Gi bitout wiet bak pan notn. If unu du dat, Di Muos Hai God gwain pie unu bak plenty, ahn unu gwain bii ihn pikniny, bikaaz God iivn shuo kainis tu dem weh on'grietful ahn wikid. 36Gat morsy, jos laik unu Faada gat morsy!”

Jojin di ada pipl dem

(Matthew 7.1-5)

37“Yo no fi joj, fi dehn no joj yu! Ahn yo no fi kandem, fi dehn no kandem yu! Fargiv, ahn yo gwain get fargivnis tu. 38Gi, ahn den yo wi get bak plenty. Bikaaz di siem amount yo gi, dah di siem weh yo gwain get bak.”

39Den Jesus tel dem disa parabl: “Wan blain man kyaahn liid wan neks blain man. If dehn du dat, di two a dem gwain drap iina wan huol, no chruut? 40Ahn wan disaipl neva beta an ihn tiicha, bot wen ihn don get aal ihn laanin, ihn gwain bii jos laik ihn tiicha.

41“Ahn wai unu si di mata weh deh iina unu breda ai, bot unu no si di lag weh deh iina fi unu uon ai? 42Or, how unu gwain seh tu unu breda, ‘Fren, mek Ah tek di straa outa yo ai,’ wen unu neva si di big piis a wuud iina fi unu uon ai? Unu dah som riil hipokrit! Fos unu fi tek di big piis a wuud outa unu uon ai; den unu gwain si beta fi tek di straa outa unu breda ai.

Wat som rilijos liida tiich dah laik fruut trii, som gud, som bad

(Matthew 7.16-20; 12.33-35)

43“Ah deh tel unu dis bikaaz wan gud trii kyaahn bier bad fruut, ahn wan trii weh no gud kyaahn bier gud fruut. 44Unu nuo evry trii bai di fruut weh ih bier; nonbady no pik aaf fig ahn griep aafa maka trii, no chruut? 45So, di gud man bring gud tingz outa di gud weh stuor op iina ihn haat, ahn di bad man bring bad tingz outa di bad weh stuor op iina ihn haat tu. Ahn enyting weh wan man ful'op ihn haat wid, dat dah weh gwain kom outa ihn mout!

Di parabl bout di waiz man ahn di fuul

(Matthew 7.24-27)

46“Wai unu deh kaal mi, ‘Laad, Laad,’ wen unu no deh du weh Ah tel unu fi du? 47Mek Ah tel unu how wan porsn hafy bii laik, weh kom tu mi: ihn hier weh Ah tiich im, ahn den ihn obie. 48Ihn jos laik wan man weh bil ihn hous, ahn ihn wehn dig diip dong, so ihn kuda put di foundieshan pan rak. So, wen di flod kom ahn di riva riez ahn hit pan ihn hous, ih stan op strang, bikaaz ih wehn bil gud pan di rak. 49Bot enybady, weh hier weh Ah deh seh ahn no pie mi non main, dah jos laik wan neks man weh bil ihn hous pan di grong bitout gud foundieshan. So wen di flod kom ahn ih hit pan ihn hous, ih faal dong ahn mash'op iina piisiz!”

Currently Selected:

Luke 6: NTIC

Highlight

Copy