Luk 4

Yesu akulinjidwa ni Satana

(Mat 4:1-11; Mak 1:12-13)

1Yesu* piŵawusile kutyocela ku Lusulo lwa Yolodani, Macili ga Msimu Ŵaswela galiji pa ŵelewo, nipo Msimu wa Ambuje wamlongolele jwalakwejo kwawula ku cipululu, 2kwele kuŵalinjidwe ni Satana* kwa masiku makumi mcece musi ni cilo. Pa gele masikugo Yesu nganalya cakulya cilicose, myoyo jwalakwejo jamkwete sala.

3Satana ŵamsalile Yesu kuti, “Naga yili yakuwona kuti m'mwejo mli Mwanace jwa Mlungu, mlilamulile liganga ali kuti liŵe mkate.”

4Yesu ŵajanjile kuti, “M'Malemba yilembedwe kuti, ‘Mundu ngaŵa mkuŵa ni umi ligongo lyakulya mkatepe.’ ”#Det 8:3

5Pakumalisya Satana ŵalongene ni Yesu kwawula pa malo gakwela mnope, kweleko ŵamlosisye Yesujo yilambo yosope ya pasi pano kwa ndaŵi jamnono. 6Satana ŵamsalile Yesu kuti, “Tinampe macili ni lumbili losope, ligongo yipegwile kwa une, nipo ngusapeleka kwa jwalijose jungumsaka. 7Yosope yene tiyiŵe yenu, naga mkulambila une.”

8Pelepo Yesu ŵajanjile kuti, “Pakuti yilembedwe m'Malemba kuti, ‘Mwalambileje Ambuje Mlungu jwenu, ni kwatumicila ŵelewo pewo.’ ”#Det 6:13

9Pambesi pakwe Satana ŵajile ku Yelusalemu pamo ni Yesu, ni ŵamŵisile Yesujo penani pasyesyene pa Nyumba ja AMBUJE. Ni ŵamsalile kuti, “Naga yili yakuwona kuti m'mwejo mli Mwanace jwa Mlungu, mliponye pasi. 10Pakuti yilembedwe m'Malemba kuti, ‘Mlungu tacilamula malayika* gakwe kuti gamjangate m'mwejo.#Mas 91:11 11Malayikago tigacimjangata m'mwejo myala mwakwe kuti sajo syenu sikaligombesya pa liganga.’ ”#Mas 91:12

12Nambo Yesu ŵamjanjile Satana kuti, “Yilembedwe m'Malemba kuti, ‘Mkasimwalinga Ambuje Mlungu jwenu.’ ”#Det 6:16

13Satana piŵamasile kumlinga Yesu m'matala gakulekanganalekangana, ŵamlesile Yesujo ni kwembeceya ndaŵi jine.

Yesu akutanda masengo gakwe ku Galileya

(Mat 4:12-17; Mak 1:14-15)

14Kaneko ŵawujile ku Galileya mwakulongoleledwa ni macili ga Msimu Ŵaswela. Mbili jakwe jambone jajenele mcilambo cosope. 15Jwalakwejo jwajiganyaga m'nyumba syakupopelela sya Ayuda soni ŵandu wosope ŵaliji kumlapilila.

Ŵandu ŵamkanile Yesu ku Nasaleti

(Mat 13:53-58; Mak 6:1-6)

16Ndaŵi jine Yesu ŵapite ku Nasaleti kuŵakulile, pa lisiku lyakupumula* jwalakwejo jwajinjile m'nyumba jakupopelela, mpela muŵatendelaga ndaŵi syosope. Kaneko ŵajimi kuti aŵalanje Malemba. 17Ŵampele jwalakwejo buku jijalembedwe ni jwakulocesya* Yesaya. Yesu piŵawunukwile bukujo ŵajisimene ndime jijalembedwe kuti,

18“Msimu wa Ambuje Mlungu uli pa une,#Yes 61:1-2

Asagwile une kuti lalicile ngani syambone* kwa ŵakulaga.

Jwalakwejo andumile kuti njenesye kwa ŵataŵidwe kuti tacigopoledwa

ni kwa ŵakutatala kuti tacipakombola kulola soni.

Andumile kuti mbelece mtendele kwa ŵandu ŵali mkusawusidwa,

19ni kulalicila ya ndaŵi jitacakulupusya Ambuje ŵandu ŵakwe.”

20Yesu piŵamasile kuŵalanga ndimeji ŵawunicile bukujo ni kujipeleka kwa jwakutumicila jwa ku nyumba ja mapopelo kaneko ŵatemi pasi ni kutanda kwiganya. Ŵandu wosope ŵaliji kumlolecesya jwalakwejo. 21Kaneko Yesu ŵatandite kwajiganya jemanjajo acitiji, “Lelo jino yitendekwe yigaŵecete cilepe Malemba kwambaga ayi yimpikeneyi.”

22Ŵandu wosope ŵamlapilile mnope, ni ŵaliji ŵakusimonga pa maloŵe gakamula mtima giŵaŵecete jwalakwejo. Ŵanduwo ŵawusyanaga kuti, “Ana jweleju ngaŵa mwanace jwa Yosefe?”

23Yesu ŵajanjile jemanjajo kuti, “Nguwona timusalile citagu* acila cakuti, ‘Jwamtela mliposye mwasyene.’ Timusalile une soni kuti ndende yindu kumangwetu kuno yakulandana ni yimwapikene kuti nayitesile ku Kapelenaumu.” 24Yesu ŵasalile soni ŵanduwo kuti, “Pangali jwakulocesya jwakusanonyeledwa ni ŵandu ŵa ku mangwakwe.#Yoh 4:44 25Kuŵeceta yakuwona, mu ndaŵi ja jwakulocesya Eliya,* kwaliji kwangali ula kwa yaka yitatu ni miesi msano ni umo mcilambomo mwapali acakongwe ŵamasije* ŵajinji ŵaŵaliji mkulaga.#1 Ayi 17:1 26Nambo Eliya ŵatumidwe ni kuti ajawule kwa jwamkongwe jumope jwamasije jwa m'musi wa Salefati, ku msinda wa Sidoni.#1 Ayi 17:8-16 27Pandaŵi ja jwakulocesya Elisha, ŵapali ŵamatana ŵajinji mcilambo ca Isalaeli, mwakuti nganapagwa mundu ni jumo jose juŵaposyedwe kutyosyapo Namani jikape jwa ku cilambo ca Siliya.”#2 Ayi 5:1-14

28Ŵandu wosope ŵaŵaliji m'Nyumba ja mapopelo jila ŵapile mnope mitima piŵapikene ya nganiji. 29Jemanjajo ŵanyakwice ni ŵamkopocesye Yesu kusa kwa musi, nipo kaneko ŵajile najo Yesujo penani pa litumbi pipataŵidwe msinda wa jemanjajo kuti akamponyele jwalakwejo kwicenje. 30Nambo Yesu ŵagambile kupeleta pasikati pa jemanjajo ni kwawulaga.

Yesu ŵamposisye mundu juŵakamwilwe ni msimu wakusakala

(Mak 1:21-28)

31Yesu ŵapite ku msinda wa Kapelenaumu wele uli mu upande wa Galileya, ni ŵajigenye ŵandu pa lisiku lyakupumula lya Ayuda. 32Ŵandu ŵajinji ŵasimonjile ni wiganye wakwe pakuti majiganyogo gakamwile ŵandu mitima soni ŵajiganyaga mwamacili.#Mat 7:28-29 33M'nyumba ja mapopelomo mwaliji mwana mundu juŵakamwilwe ni msimu wakusakala. Jwalakwejo jwagumisile acitiji, 34“Ana twatandite cici ŵalakwe Yesu ŵakutyocela ku Nasaleti? Ana ayice kukutujonanga uwe? Ngwamanyilila ŵalakwe, ali jwakutumicila jwamswela jwa Mlungu.”

35Nambo Yesu ŵawujamwice msimu wakusakalawo acitiji, “Mtulale, mkopoce mwa munduju!” Msimu wakusakala ula wamgwisisye mundu jula pasi pameso pa ŵandu nipo msimuwo wakopwece nambo nganiwumwulasya mundujo.

36Ŵandu wosope ŵala ŵasimonjile mnope ni ŵaliji mkuwusyana jwine ni mjakwe kuti, “Ana majiganyo gelega gamti uli? Jwalakweju akwete macili gakujilamulila misimu jakusakala kuti jikopoce mwa ŵandu.” 37Myoyo mbili jambone ja Yesu japikanice mbali josope ja ku Galileya.

Yesu akuposya ŵandu ŵajinji ku nyumba ja Simoni

(Mat 8:14-17; Mak 1:29-34)

38Yesu ŵatyosile ku nyumba jakupopelela jila, ni ŵajile ku nyumba ja Simoni.* Pandaŵi jeleji akwegwe ŵawo Simoni ŵaliji mkulwala malungo, nipo ŵandu ŵanduwo ŵam'manyisye Yesu ya ulwelewo. 39Yesu ŵajimi pambali pa malo giŵagonile jwamkongwejo nipo ŵakujamwice kulipuka kula nipo kwalesile. Papopo jwamkongwejo jwajimwice ni kutanda kwatumicila jemanjajo.

40Ligulo, lyuŵa lili mkukapila ŵandu wosope ŵaŵakwete acimjawo ŵiŵalwalaga yilwele yakulekanganalekangana ŵayice nawo kwa Yesu. Jwalakwejo ŵamsajikaga magasa gakwe pa jwakulwala jwalijose, ni ŵaposisye wosope. 41Nombe najo misimu jakusakala jakopwece kutyoka mwa ŵandu ŵajinji jili mkugumila jicitiji, “Ŵalakwe ali mwanace jwa Mlungu!”

Nambo jwalakwejo ŵajijamwice misimu jakusakalajo, pangajikunda kuti jiŵecete, ligongo jele misimujo jamanyilile kuti Yesu ŵaliji Mkulupusyo.

Yesu ŵalalicile ku Galileya

(Mak 1:35-39)

42Pikwacele, Yesu ŵakopwece ni kuja ku malo gajikape kwangapitapita ŵandu. Likuga lya ŵandu lyatandite kumsosasosa, piŵamsimene ŵalinjile kutenda yakomboleka kuti Yesu akasiŵatyocela soni. 43Nambo Yesu ŵasalile kuti, “Ngwenela kulalicila Ngani Syambone syakwamba ya Ucimwene wa Mlungu* ku misinda jine soni, pakuti ayi ni yiŵandumile Mlungu kuti nayitende.”

44Myoyo jwalakwejo ŵaliji mkulalicila m'nyumba sya mapopelo* mu Yudeya.

Currently Selected:

Luk 4: YAWO

Highlight

Copy