Yoh 19

1Kaneko Pilato* ŵalamwile kuti amjigale Yesu* ni akampute. 2Asilikali ŵapanganyisye cisoti ca ucimwene cakuluka kutyocela ku nyambi sya miŵa ni kum'weca mu mtwe mwakwe, kaneko ŵam'wecice mkanjo wa papo. 3Ŵayikagayikaga kwa jwalakwe ni kumtendaga, “Akole umi welewu mwenye jwa Ayuda!” Nipo ŵajawulaga ni kuja kumputa makofi.

4Pilato ŵakopwece soni pasa ni kuja kuŵeceta ni likuga lya ŵandu ŵala kuti, “Alole, une ngumkoposya mundujo pasa pano kuti jemanja amanyilile kuti nganguliwona ligongo lililyose lyakumjimbila magambo jwalakwejo.” 5Myoyo Yesu ŵakopwece pasa, ali awete cipewa ca ucimwene ca miŵa ni mkanjo wa papo. Pilato ŵatite kwa jemanjajo, “Alole! Ajutu mundu jula!”

6Acakulungwa ŵa ŵakutaga mbopesi ni asilikali ŵakulondela Nyumba ja AMBUJE piŵam'weni jwalakwe, ŵagumisile kuti, “Amkomele pa msalaba! Amkomele pa msalaba!”

Pilato ŵatite kwa jemanjajo, “Amjigale jemanja acimsyene, ni akamkomele pa msalaba. Une nganguliwona ligongo lililyose lyakumjimbila magambo jwalakweju.”

7Likuga lya ŵandulyo lyajanjile kuti, “Uwe tukwete lilamusi, malinga ni lyele lilamusilyo, jweleju akuŵajilwa kuti awe, ligongo alitesile msyeneju kuti ali Mwanace jwa Mlungu.”

8Pilato piŵapikene yeleyi, ŵajogwepe mnope. 9Ŵajinjile soni m'nyumba ni ŵamwusisye Yesu kuti, “Ana mkutyocela kwapi?”

Nambo Yesu nganajanga kandu kalikose. 10Pilato ŵatite kwa jwalakwe, “Ana wawo ngakusosa kuŵeceta ni une? Ngakumanyilila kuti une ngwete macili gakuti ni kwagopola wawojo nambo soni gakukunda kuti wawojo ŵakomele pa msalaba.”

11Yesu ŵajanjile kuti, “Wawo ngamkanapakombola kwalamula ŵandu kuti andendele une yindu nambo ligongo Mlungu ŵakundile kuti atende. Myoyo mundu jwambelece une kwa wawojo ni jwapundile kola ulemwa.”*

12Piŵapikene yeleyi Pilato ŵalinjile kusosa nditu kuti amgopole Yesu. Nambo likuga lya ŵandu lyagumisile kuti, “Naga akumgopola jwelejo, ni basi wawojo nganaŵa mjakwe jwa Kayisala! Jwalijose jwakulitenda msyene kuti ali mwenye, akusisyana ni Kayisala!”

13Pilato piŵapikene gele maloŵega, ŵamkopwesye Yesu pasa ni ŵatemi pa citengu cakulamulila magambo pa malo gakolanjidwa “Pa liganga lyakusepa”. (Mcihebeli lina lyakwe “Gabata”.) 14Ndaŵi jaliji ciŵandika 12 koloko jamusi lisiku lyakulilinganyicisya cile cindimba ca Pasaka.* Pilato ŵatite kwa Ayuda ŵala, “Aju mwenye jwenu!”

15Jemanjajo ŵagumisile kuti, “Amwulaje! Amwulaje! Amkomele pa msalaba!”

Pilato ŵawusisye jemanjajo kuti, Ana akusosa kuti une nimkomele pa msalaba mwenye jwawoju?

Acakulungwa ŵa ŵakutaga mbopesi ŵajanjile kuti, “Mwenye jutukwete uwe ni Kayisalape basi!”

16Kaneko Pilato ŵampelece Yesu kwa jemanjajo kuti akamkomele pa msalaba.

Yesu akumkomela pa msalaba

(Mat 27:32-44; Mak 15:21-32; Luk 23:26-43)

Myoyo asilikali ŵamtyosisye Yesu. 17Ŵakopwece pasa, ali anyakwile msalaba wakwe, nipo ŵayice kumalo giŵagakolangaga kuti, “Malo ga Cikalakasa”. (Mu ciŵeceto ca Cihebeli gakusakolanjidwa kuti “Gologota”.) 18Kweleko ni kuŵamkomele jwalakwe, nipo soni ŵakomele ŵandu ŵaŵili, jumo mbali ja ku mkono wamlyo, jwine mbali ja ku mkono wa mciji wa Yesu, nipo Yesu ŵaliji pasikati pa jemanjajo. 19Pilato ŵalembile cimanyisyo ni kuciŵika pa msalaba. Maloŵe gakwe galiji gakuti, “Yesu jwa ku Nasaleti, Mwenye jwa Ayuda.” 20Ŵandu ŵajinji ŵaciŵalasile, ligongo malo giŵamkomele Yesu nganigaŵa kwakutalicila ni msinda. Cimanyisyoco ŵacilembile myiŵeceto ya Cihebeli, Cilatini ni Cigiliki.* 21Acakulungwa ŵa ŵakutaga mbopesi ŵamsalile Pilato kuti, “Akasalemba kuti ‘Mwenye jwa Ayuda’, nambo kuti, ‘Jwele munduju ŵatite kuti, “Une ni mwenye jwa Ayuda.” ’ ”

22Pilato ŵajanjile kuti, “Une linembile ni lembile basi.”

23Asilikali ŵala piŵamasile kumkomela pa msalaba Yesu, ŵajigele yakuwala yakwe ni kuyigaŵanya pacece, msilikali jwalijose ŵajigele cakuwala cakwe. Ŵajigele soni mkanjo, uŵawupanganyisye ni nguwo jimo jangali lutoto palipose. 24Asilikali ŵala ŵasalilene kuti, “Kwende tukawupapula, nambo kuti kwende tutende cisango kuti tumwone jutawujigale.” Ayi yatendekwe kuti malemba gatendekwe gakuti:#Mas 22:18

“Ŵagaŵene acimsyenepe yakuwala yangu nipo mkanjo wangu ŵawulondolele cisango.”

Nipo ayi ni yiŵayitesile asilikali ŵala.

25Ŵiŵajimi ciŵandika ni msalaba wa Yesu ŵaliji mamagwe, ni mamagwe ŵanandi, Maliya ŵamkwawo ŵa Kiliyopa, ni Maliya jwa ku Magadala. 26Yesu ŵaweni mamagwe ni jwakulijiganya juŵamnonyelaga jula ali ajimi pelepo, myoyo ŵatite kwa mamagwe, “Jwalakweju ni mwanagwenu.”

27Kaneko ŵamsalile jwakulijiganya jula kuti, “Aŵa ni mama ŵenu.” Kutandila jele ndaŵijo jwakulijiganya jula ŵajigele mama ŵala ni kujaga kutama nawo kumangwakwe.

Ciwa ca Yesu

(Mat 27:45-56; Mak 15:33-41; Luk 23:44-49)

28Yesu ŵamanyilile kuti yosope yene sambano yayice pambesi, nipo pakusosa kuti yitendece yigatite Malemba, jwalakwe ŵatite kuti, “Jingwete njota.”#Mas 69:21; 22:15

29Paliji pana lulo, lwagumbala ni finyo jwamcesuce, myoyo ŵaloŵece siponji mu finyojo ni kujisomeka ku litete ni kujikwesya mpaka kukamwa kwakwe. 30Yesu ŵamwele finyojo kaneko ŵatite kuti, “Yosope yene yitendekwe!”

Kaneko ŵajinamisye mtwe wakwe ni ŵawile.

Asilikali ŵamsomile Yesu mu mbalati

31Acakulungwa ŵa Ayuda* ŵamŵendile Pilato kuti ŵakunde akatemangule ngongolo sya ŵandu ŵiŵakomele pa msalaba ŵala, ni kuti akayitulusye yilu yawo pa misalabapo. Ŵaŵendile myiyi ligongo lyaliji lisiku lya Msano, nipo nganasosa kuti yiluyo yiŵe pa misalabapo lisiku lyakupumula lya Ayuda, pakuŵapo lisiku lyakupumula lya Ayuda lilyayikagalyo lyaliji lyalikulungwa. 32Myoyo asilikali ŵajawile ni kuja kutemangula ngongolo sya mundu jwandanda soni kaneko sya mundu jwine jula ŵiŵakomele pamo ni Yesu ŵala. 33Nambo piŵayice pa Yesu, ŵamsimene ali awile kala, myoyo nganatemangula ngongolo syakwe. 34Nambope jumo jwa asilikaliwo ŵasomile mumbalati mwa Yesu ni lipanga lyakwe, nipo ndaŵi jijojo miasi ni mesi yakopwece yalumo. 35(Jwele juŵayiweni yeleyi yili mkutendeka ni jwaŵecete yele yinduyi, kuti jemanja nombe nawo akulupilile. Yiŵaŵecete jwalakwejuyi yili yakuwona, nipo akumanyilila kuti akuŵeceta yakuwona.) 36Yeleyi yatendece myiyi kuti yiyalembedwe m'malemba yiŵe yakuwona yakuti: “Pangali atamose limo lya mawupa gakwe litacilitemangula.”#Eks 12:46; Num 9:12; Mas 34:20 37Nipo pana malemba gane gigalembedwe kuti, “Ŵandu tacimlolecesya jwele juŵamsomile ni lipangajo.”#Sak 12:10; Ciw 1:7

Akusika mtembo wa Yesu

(Mat 27:57-61; Mak 15:42-47; Luk 23:50-56)

38Panyuma pa yele yinduyi, Yosefe juŵatyocelaga ku msinda wa Alimateya, ŵamŵendile Pilato naga kwaliji kwakomboleka kuwujigala mtembo wa Yesu. (Yosefe ŵaliji jwakulijiganya jwa Yesu, nambo mwakulisisa, ligongo ŵajogopaga acakulungwa ŵa Ayuda.) Pilato ŵamsalile kuti akukomboleka kuja kujigala mtembowo, myoyo Yosefe ŵajawile ni kuja kuwutyosya. 39Nikodemo, juŵajawile pandanda kuja kukumlola Yesu cilo jula, ŵajawile ni Yosefe, ali ajigele mawuta gakununjila ga mule* gakuwanganya ni aloye gakusitopa ciŵandika makilogalamu 30.#Yoh 3:1-2 40Ŵele ŵandu ŵaŵiliŵa ŵajigele mtembo wa Yesu ni kuwuŵijilila mu nguwo jeswela ja bafuta pamo ni mawuta gakununjila gala mpela mwakusatendelaga pa misyungu ja Ayuda jakulinganyicisya mtembo pakuja kukuwusika. 41Pa malo piŵamwulajile Yesu wapali mgunda, uwakwete lilembe lyasambano mumkanamsiceje mundu jwalijose citandilile. 42Pakuŵapo lyaliji lya Msano, lisiku lyakupumula lya Ayuda mkinilikwane, pakuti lilembe lyaliji pakuŵandicila, myoyo ŵasicile mtembo wa Yesu mwelemo.

Currently Selected:

Yoh 19: YAWO

Highlight

Copy