Gen 45
45
Yosefe akulilosya kwa acalongo acimjakwe
1Papopo Yosefe ŵalepele kupilila pameso pa ŵamasengo ŵakwe ŵala, ni ŵalamwile kuti akopoce pasa. Myoyo paliji pangali ŵandu ŵane ndaŵi jiŵasalilaga acalongo acimjakwe, kuti, “Unetu Yosefe.”#Mase 7:13 2Ŵalisile mwakupikanika mwakuti ŵandu ŵa ku Iguputo ŵakupikene kulilako, ngani ja kulilako japikanice mpaka kwa Mwenye jwa ku Iguputo. 3Yosefe ŵawusisye acalongo acimjakwe ŵala, kuti, “Ana baba ŵangu ali ciŵela ni umi?” Nambo acalongo acimjakwe ŵala nganapakombola kumjanga ligongo lya woga. 4Yosefe ni ŵatite kwa acalongo acimjakwe ŵala kuti, “Conde ŵandicilani kundili une kuno.” Piŵaŵandicile, jwalakwe ŵatite kuti, “Kweli, une ndili mlongo mjenu jula Yosefe, jumwamsumisye ku Iguputo. 5Nambo sambano mkajasa mtima kapena kudandawula, pakuŵa Mlungu msyene ni juŵalongwesye une akuno, kuti akulupusye umi wa ŵandu ŵajinji. 6Caka acino cili caka caŵili ca salaji. Nambo yisigele yaka yine msano, pa yakayi yeleyi ŵandu ngasalima kapena gowola. 7Mlungu ŵalongwesye une cile akuno, kuti namkulupusye jemanja pamo ni yisukulu yenu. 8Myoyo ngaŵa jemanja ŵimwandumisye une akuno, nambo Mlungu. Jwalakwe ambisile une kuŵa nduna jajikulungwa mnope mcilambo cosope ca Iguputo.
9“Sambano mjawule kwa baba ŵangu mwacitemacitema, mkasalile kuti, mwanagwenu Yosefe akusala kuti, ‘Mlungu ambisile une kuŵa jwamkulungwa jwa cilambo cosope ca Iguputo, sambano ayice akuno, akakokoŵa.#Mase 7:14 10Takombolece kutama akuno mcilambo ca Gosheni, kuti atame mwakuŵandikana ni uneji. Ayice kutama akuno ŵalakwe, ŵanace ŵawo, yisukulu yawo, yilangwa yawo ni yindu yosope yakwete. 11Pitakatame ku Gosheni, une tingasamalileje. Yaka yasala yisigele msano. Une ngingusosa kuti ŵalakwe alaje pamo ni liŵasa lyawo, ni ŵandu wosope ŵali nawo ni sala.’ ”
12“Sambano jemanja wosopemwe, pamo ni mpwanga Benjamini, mkukomboleka mumbecetele yindu yosopeyi kumanyilila kuti une kweli ndili Yosefe junguŵeceta ni jemanja. 13Mkasalile baba ŵangu ya ucimbicimbi wungwete une akuno ni yiliyose yimyiweni. Ni mkayiceje nawo baba ŵanguwo akuno mwacitemacitema.”
14Ali amasile kuŵeceta gele maloŵego, Yosefe ŵamkumbatile Benjamini mpwakwe jula, ni ŵatandite kulila soni, Benjamini nombe najo ŵatandite kulila ali akumbatilene. 15Yosefe ŵakomasisye acalongo acimjakwe wosope ŵala kwine ali mkulila. Kaneko acalongo acimjakwe ŵala ŵatandite kukunguluka najo Yosefe jula.
16Ngani jakuti acalongo acimjakwe ŵa Yosefe ayice japikanice ku nyumba ja Mwenye jwa ku Iguputo. Yeleyi yamnonyelesye Mwenye jwa ku Iguputo pamo ni ŵamasengo ŵakwe. 17Nipo Mwenye jwa ku Iguputo ŵatite kwa Yosefe, “Mwasalile acalongo acimjenuwo kuti ŵatwice acibulu ŵawo ni awujile ku cilambo ca Kenani. 18Akajigale baba ŵawo ni maŵasa gawo ni akawujileje akuno. Tinape malo gambone mnope mcilambo cosope ca Iguputo, ni tacilya yagowola ya mcilambo ca Iguputo. 19Mwasalile soni kuti ajigale yigeleta yakunokuno kuti akakwelemo ŵanace ŵawo ni aciŵamkwawo ni akajigale baba ŵawo ni akayiceje akuno. 20Akasadandawula ya yindu yawo yitayilece kukoko ligongo yindu yosope yambone ya mu Iguputo yili yawo.”
21Ŵanace ŵa Yakobo* ŵatesile yeleyo nipo Yosefe ŵapele yigeleta mpela muŵalamulile Mwenye jwa ku Iguputo. Ŵapele soni yakulya ya pa ulendo. 22Yosefe ŵapele acalongo acimjakwe ŵala yakuwala yine, jwalijose cimocimo. Nambo Benjamini ŵampele mbiya sya silifa* 300 kwisa soni yakuwala msano. 23Kwa baba ŵawo ŵatumisye, acibulu likumi ali anyakwile yindu yambone ya mcilambo ca Iguputo, acibulu ŵane likumi ali anyakwile tiligu, mkate ni yine yakulya pa ulendo ya baba ŵawo. 24Ni ŵasalile kuti ajawuleje, piŵanyakukaga jwalakwe ŵasalile kuti, “Mkasimkangana mwitala.”
25Ŵatyosile ku Iguputo kuwujila ku Kenani kuŵaliji baba ŵawo. 26Ni ŵasalile baba ŵawo ŵala kuti, “Yosefe ali cijumi,” nipo “Jwalakwe ni jwali jwakulamula jwa cilambo cosope ca Iguputo.” Yakobo ŵaliji ŵakutenguka nipo nganakulupilila.
27Nambo piŵamsalile maloŵe gosope gakutyocela kwa Yosefe, nipo piŵayiweni yigeleta yila yiŵatumisye Yosefe kuti takwele, ŵatandite kulupilila. 28Kaneko Yakobo ŵatite, “Basi yambone, mwanangu Yosefe ali cijumi, tinjawule ngamlole mkinimbwe.”
Currently Selected:
Gen 45: YAWO
Highlight
Share
Copy
Want to have your highlights saved across all your devices? Sign up or sign in
Chiyawo Bible: Buku Jeswela © Bible Society of Malawi, 2014
