Gen 46

Yakobo ni liŵasa lyawo akuja ku Iguputo

1Yakobo* ŵanyakwice ulendo wakuja ku Iguputo ni yosope yiŵakwete. Piŵayice ku Belesheba ŵapelece mbopesi kwa Mlungu jwa Isaki baba ŵawo. 2Mlungu ŵamwonecele Yakobo cilo m'mesomkulola, ni ŵamŵilasile Yakobo kuti, “Yakobo, Yakobo!”

Jwalakwe ni ŵajanjile kuti, “Une ndili apano.”

3Mlungu ni ŵatite, “Une Mlungu, Mlungu jwa baba ŵenu, mkajogopa. Jawulani ku Iguputo pakuŵa kweleko tingayiculuye yisukulu yenu. 4Uneji tinjawule namwe ku Iguputo, nipo yisukulu yenu tinjiwujila nayo soni akuno. Yosefe taciŵa ni m'mwejo pa ndaŵi ja ciwa cenu.”

5Kaneko Yakobo ŵatyosile ku Belesheba. Ŵanace ŵa Yakobo ŵakwesisye baba ŵawo, pamo ni acakongwe ni ŵanace, pa mageleta giŵatumisye Mwenye jwa ku Iguputo gala. 6Ŵajigele soni yilangwa yawo ni yipanje yawo yosope yiŵapatile ku Kenani kuja nayo ku Iguputo. Yakobo ŵajigele ŵandu ŵakwe wosope.#Mase 7:15 7Ŵajigele ŵanace ŵawo, ni yisukulu yawo yosope.

8Aga ni mena ga yisukulu ya Yakobo yiŵapite nayo ku Iguputo. Lubeni mwanagwawo jwandanda, 9ŵakwete ŵanace aŵa: Hanoki, Palu, Hesiloni, Kalimi. 10Ŵanace ŵa Simiyoni ŵaliji aŵa: Yemuele, Yamini, Ohadi, Yakini, Sohali ni Shaulo jwakupagwa mwa jwamkongwe jwa ku Kenani. 11Ŵanace ŵa Lefi ŵaliji aŵa: Geleshoni, Kohati ni Melali. 12Yuda ŵakwete ŵanace aŵa: Ele, Onani, Sela, Pelesi, Shela, (nambo Ele ni Onani ŵawilile ku Kenani kukoko). Nipo ŵanace ŵa Pelesi ŵaliji, Hesiloni ni Hamuli. 13Isakala ŵakwete ŵanace aŵa: Tola, Puwa, Iyobu ni Shimuloni. 14Ŵanace ŵa Sebuloni ŵaliji aŵa: Seledi, Eloni, ni Yalilu. 15Aŵa ni ŵanace ŵa Yakobo ŵakupagwa mwa Leya ku Mesopotamiya. Yakobo ŵakwete soni jwamkongwe lina lyakwe Dina. Yisukulu ya Yakobo yakupagwa mwa Leya yapali 33.

16Ŵanace ŵa Gadi ŵaliji aŵa: Sifiyoni, Hagi, Shuni, Esiboni, Eli, Alodi ni Aleli. 17Ŵanace ŵa Asha ŵaliji aŵa: Imuna, Ishifi, Beliya, ni jwamkongwe lina lyakwe Sela. Ŵanace ŵa Beliya ŵaliji aŵa, Hebele ni Malikeli. 18(Yisukulu 16 ya Yakobo yosopeyi yaliji yakupagwa mwa Silipa, jwamasengo jwele Labani ŵampelece kwa mwanace jwawo Leya).

19Ŵanace ŵa Lakelo, ŵamkwawo Yakobo ŵaliji aŵa: Yosefe ni Benjamini. 20Yosefe ŵakwete ŵanace ŵaŵili mcilambo ca Iguputo, Manase ni Efelemu ŵaŵaŵelecele mwa Asenati, mwanace jwamkongwe jwa Potifela, jwakutaga mbopesi jwa ku Oni.#Gen 41:50-52 21Ŵanace ŵa Benjamini ŵaliji aŵa: Bela, Beka, Ashibele, Gela, Namani, Ehi, Loshi, Mupimu, Hupimu ni Adi. 22Yisukulu 14 ya Yakoboyi yaliji yakupagwa mwa Lakelo ŵamkwawo.

23Dani ŵakwete mwanace jwawo jumo jwamlume lina lyakwe Hushimu. 24Ŵanace ŵa Nafutali ŵaliji aŵa: Yasili, Guni, Yesa, ni Shilemu. 25Yisukulu msano ni yiŵili ya Yakobo yosopeyi yaliji yakupagwa mwa Biliha, jwamasengo jwele Labani ŵampelece kwa Lakelo mwanagwawo.

26Yisukulu ya Yakobo yiŵapite nayo ku Iguputo yaliji 66, ngaŵalanjila aciŵamkwawo ŵa ŵanace ŵawo ŵacalume. 27Yosefe ŵakwete ŵanace ŵaŵili ku Iguputo peko. Pamo ŵandu wosope mwiŵasa lya Yakobo mu Iguputo ŵaliji 70.#Mase 7:14

Yakobo ni liŵasa lyawo ku Iguputo

28Yakobo ŵamtumile Yuda kwa Yosefe kukuŵenda kuti akacingamile ku Gosheni. Yakobo ali ayice ku Gosheni, 29Yosefe ŵakwesile ligeleta lyakwe kuja ku Gosheni kukuwonegana ni baba ŵawo. Piŵayice kwa baba ŵawo, ŵakumbatile. Nipo Yosefe ŵalisile ndaŵi jajilewu. 30Yakobo ni ŵatite, “Une mpaka ngombolece kuwa sambano, pakuŵa najiŵeni ngope jenu ni simicisye kuti mli cijumi.”

31Yosefe ŵasalile acalongo acimjakwe pamo ni liŵasa lyosope lya baba ŵawo kuti, “Tinjawule ngamsalile Mwenye jwa ku Iguputo kuti, ‘Acalongo acimjangu ni liŵasa lya baba ŵangu lyosope ŵatemiji ku Kenani, anguyiye une akuno.’ 32Ŵanduwo ali ŵakucinga, masengo gawo gakucinga yilangwa, ni ayice nayo soni yilangwa yawoyo pamo ni yipanje yawo yosope. 33Ni pitamŵilanje ni kuja kumwusya kuti, ‘Ana masengo genu gali cici?’ 34Mkajanje kuti, ‘Ŵamasengo ŵenuwe tuli ŵakucinga yilangwa kutandila tuli ŵacanandi mpela muŵaŵelele acibaba ŵetu.’ Mkajile myoyo kuti amkunde kuti mtameje mu Gosheni, ligongo Aiguputo akasiŵanyalapaga ŵandu ŵakucinga yilangwa.”

Currently Selected:

Gen 46: YAWO

Highlight

Copy