Mase 5

Ya Ananiya ni Safila

1Mundu jwine soni, lina lyakwe Ananiya pampepe ni Safila ŵamkwakwe, ŵasumisye mgunda wawo. 2Mwakupikanganana ni ŵamkwawo, ŵasapwile mbiya sine kuti siŵe syawo siŵapatile ku mgundawo, ni ŵapelece syakusigala kwa ŵandumetume. 3Nambo Petulo* ŵatite, “Ananiya, ligongo cici Satana* agumbele mu mtima mwenu mpaka kumlambusya Msimu Ŵaswela pakusapula mbiya sine sya mgunda wenu? 4Pimwaliji mkanimsumisye, ana nganiwuŵa wenu? Nipo mli msumisye, ana mbiyasyo nganisiŵa myala mwenu? Nambi mwakundile uli yeleyi mu mtima mwenu? Pelepa nganimwalambusya ŵandu, nambo mumlambwisye Mlungu.” 5Piŵapikene maloŵe gelaga Ananiya, ŵagwile pasi ni ŵawile. Nipo ŵandu wosope ŵiŵapikene yeleyi wakamwile woga mnope. 6Ni acacanda ŵayice ni ŵamŵijilile nguwo ni ŵapite kukwasika mwilembe.

7Palipapite ma awala gatatu, ŵamkwawo ŵajinjile m'nyumbamo ali ngakumanyilila yele yiyatendekwe. 8Petulo ŵawusisye kuti, “Musalile, ana mgundawo pamo ni ŵamkwenu mwasumisye mbiya syakwe ni asi?”

Ŵakongwewo ŵajanjile kuti, “Elo, mbiya syakwe ni syelesi.”

9Nipo Petulo ŵamsalile kuti, “Ligongo cici mwapangene ni ŵamkwenu kulinga Msimu wa Ambuje? Mlole, ŵandu ŵiŵapite kukwasika ŵamkwenu mwilembe ali pa mlangopa, nipo jemanja pejo tamjigale nomwe ŵakwe kuja kukumsika mwilembe.” 10Papopo Safila wagwilile pasi pa sajo sya Petulo ni ŵawile. Piŵajinjile acacanda ŵala, ŵasimene ali awile kala. Ni ŵanyakwile kuja kukwasika mwilembe pakuŵandikana ni ŵamkwawowo. 11Nipo mpingo* ni ŵandu wosope ŵele ŵiŵapikene yeleyi, wakamwile woga mnope.

Ŵandumetume ŵatendaga yimanyisyo ni yakusimonjesya yejinji

12Ŵandumetume ŵaliji mkutenda yimanyisyo ni yakusimonjesya yejinji pasikati pa ŵandu wosope ŵiŵakulupilile Klistu* ŵasonganaga mwa mtima wakupikanganana mwipenu lya Solomoni. 13Mwa ŵandu ŵanewo paliji pangali atamose mundu jumo juŵalimbile mtima kuŵa nawo pampepe, nambope ŵandu wosope ŵalapililaga. 14Nambo ŵakulupililaga mwa Ambuje ŵatupilagatupilga mwakuti lyaliji likuga lyalikulungwa lya acalume ni acakongwe wose. 15Ligongo lya yiŵatendaga ŵandumetume ŵala, ŵandu ŵakopwece ni ŵakulwala wawo kuja nawo ku misewo, ni kwagonekaga myindanda ni m'mikeka kuti Petulo pakupita ciwulili cakwepeco cayicile ŵakulwalawo. 16Kwasonganaga ŵandu ŵajinji ŵakutyocela ku misi jakusyungulila Yelusalemu. Ŵaliji ali ŵajigele ŵakulwala ni ŵane ŵiŵaliji ni msimu wakusakala wosopewo ŵaposile.

Ŵandumetume ŵalasile

17Nambo jwamkulungwa jwaŵakutaga mbopesi ni wosope ŵele ŵiŵaliji nawo, ni ŵa mlikuga lya Asaduki,* wosope ŵaliji ŵawiwu. 18Nipo ŵakamwile ŵandumetume ŵala ni ŵaŵisile m'nyumba ja akayidi wamba. 19Nambo cilo lilayika lya Ambuje lyawugwile milango josope ja nyumbajo nipo ŵandumetume ŵala ŵakopwece. Ŵasalile kuti, 20“Mjawule ni mkajime m'Nyumba ja AMBUJE ni kwasalila ŵandu wosope maloŵe gosope gakwayana ni umi wasambanowu.” 21Ŵandumetume ŵala piŵapikene yeleyi, ŵajinjile m'Nyumba ja AMBUJE kundaŵindaŵipe nipo ŵatandite kwiganya.

Piŵayice jwamkulungwa jwaŵakutaga mbopesi pampepe ni wosope ŵiŵaliji nawo, ŵaŵilasile ŵanganya jajikulungwa, ni nganya josope ja acakulungwa ja Aisalaeli. Nipo ŵatumile acikapitawo kuti ajawule ku nyumba ja akayidi kula kuti akajigale ŵandumetume ŵala. 22Nambo piŵayice acikapitawo ŵala ku nyumbako, nganiŵasimana ŵandumetumewo, ni ŵawusile kuja kwasalila acitiji, 23“Pitwayice ku nyumba ja acikaidijo, twajisimene jili ciwugalile, nipo acilonda ali cimile m'milango nambo pitwawugwile matanga nganitusimana kose mundu.” 24Piŵapikene yeleyi, jwamkulungwa jwaŵakutaga mbopesi ni jwamkulungwa jwa asilikali jwakulondela Nyumba ja AMBUJE, ŵasimonjile ni ŵamasile nayo lunda, ni ŵasoŵile yakutenda ligongo nganamanyililaga yiyawonecele jemanjajo. 25Nambo mundu jwine jwayice kwasalila kuti, “Ŵandu ŵele ŵimwaŵisile m'nyumba ja acikayidi ŵala, ali m'Nyumba ja AMBUJE nipo akwiganya ŵandu.” 26Pelepo jwamkulungwa jwa asilikali jula pampepe ni ŵandu ŵakwe ŵapite kukwajigala ŵandumetumewo. Nambo nganiŵajigala mwangondo ligongo ŵajogwepe ŵandu kuti tacaponya maganga.

27Piŵayice nawo, ŵajimice pameso pa ŵanganya jajikulungwa jila. Nipo jwamkulungwa jwaŵakutaga mbopesi jula jwatandite kwawusya yiwusyo. 28Ŵatite, “Nambotu twamgombelecesye kuti mkasijiganya soni mu lina lya Yesu,* nambo jemanja mjenesye yakwiganya yenu mu Yelusalemu mosope, nipo mkusosa kututwika uwe ciwa ca mundu jweleju.”#Mat 27:25

29Nambo Petulo ni ŵandumetume ŵane ŵajanjile kuti, “Tukwenela kumpikanila Mlungu kupunda kupikanila mundu. 30Mlungu juŵamlambilaga acinangolo ŵetu ŵamjimwisye Yesu ku ŵawe, jwele jemanja mwamwuleje pakumkomela pa msalaba. 31Mlungu ŵamkwesisye jwelejo ku mkono ŵakwe wamlyo kuti aŵe jwakulongolela soni Mkulupusyo. Ŵatesile yeleyi kwapa Aisalaeli upile wakupitikuka mtima kuti ulemwa* wawo akululucidwe. 32Uwe tuli mboni sya yindu yeleyi, nipo soni Msimu Ŵaswela ŵele Mlungu ŵapelece kwa ŵandu ŵiŵampikanilaga jwalakwejo.”

33Piŵapikene yeleyi ŵanganyawo, ŵatumbile mnope ni ŵasosaga kwawulaga ŵandumetume ŵala. 34Nambo jwine mwa jemanjajo, Mfalisi* lina lyakwe Gamaliele,* mwalimu jwa Malamusi jwele ŵandu wosope ŵamcimbicisyaga, ŵajimi mu nganyamo. Ni ŵalamwile kuti ŵandumetumewo ajawule kaje kusa. 35Nipo ŵasalile ŵanganyawo kuti, “Aisalaeli acimjangu, mkalamuce ni yele yimkuti mwatende ŵandu aŵa. 36Pajatu ngaŵa kalakala mnope mundu jwine lina lyakwe Teudasi ŵawonecele kwa ŵandu nikulimanyisyaga, nipo ŵandu ŵajinji ŵakwana mpela 400 ŵamkuyisye. Jwalakwe ŵawulajidwe nipo ŵandu wosope ŵiŵamkuyaga ŵapwilingene niyamalile pelepo. 37Kaneka ndaŵi ja kalembela, jwayice soni jwine lina lyakwe Yudasi jwa ku Galileya, ŵandu ŵajinji ŵamjiticisye ni kumkuya, nombe najo jwawulajidwe nipo wosope ŵiŵamkuyaga ŵapwilingene soni. 38Ni ligongo lyakwe pa ngani jeleji ngumsalila sambano kuti, mwalece ŵanduŵa kuti ajawuleje. Naga yakuganisya jemanjaji pampepe ni yakutendayi yili yakutyocela kwa ŵandu, tiyicimala jika. 39Nambo naga yilikutyocela kwa Mlungu, jemanja ngamyikombola kose kuyilekasya, mwine mwakwe timsimanikwe kuti mkulimbana ni Mlungu.”

40Ŵanganyawo ŵajiticisye yiŵaŵecete Gamaliele yila, ni ŵaŵilasile ŵandumetumewo. Ŵaputile, ni ŵalekasisye kuti akasaŵeceta soni mu lina lya Yesu, nipo ŵakundile kuti ajawuleje. 41Ŵandumetumewo ŵatyosile ku nganyako ali mkusangalala kuti Mlungu ŵatesile aŵe ŵakwenela kunyosyedwa kwa ligongo lya lina lya Yesu. 42Nipo lisiku lililyose ŵaliji mkwiganya ni kulalicila m'Nyumba ja AMBUJE ni m'majumba ga ŵandu Ngani Syambone* syakuti Yesu Klistu ni Mkulupusyo.

Currently Selected:

Mase 5: YAWO

Highlight

Copy