Mase 4

Petulo ni Yohane ku Nganya ja Ayuda

1Petulo* ni Yohane* piŵaliji mkuŵecetana ni ŵandu ŵala, ŵayice ŵakutaga mbopesi ni jwamkulungwa jwa asilikali jwa ku Nyumba ja AMBUJE ni Asaduki.* 2Jemanjaji ŵatumbile ligongo lyakuti ŵandumetume ŵaŵiliwo ŵajiganyaga ŵandu ni kulalicila kuti, “Yesu* ŵajimwice ku ŵawe, ni kuti ŵaŵawile tacijimuka soni.” 3Papopo ŵakamwile ni ŵaŵisile m'nyumba ja akayidi, kwembecela kuti kuce ligongo kwaliji kuli kuswele. 4Nambo ŵandu ŵajinji ŵakulupilile piŵapikene maloŵe ga ŵandumetumewo, nipo ciŵalanjilo ca acalume cakwesile kwika mpela 5,000. 5Kundaŵi kwakwe ŵakulamulila ŵa Ayuda, acakulungwa ŵawo nipo soni aciŵalimu ŵa malamusi,* wosope ŵasongene pampepe ku Yelusalemu. 6Kwaliji soni Anasi, jwamkulungwa jwa ŵakutaga mbopesi* pamo ni Kayafa, Yohane ni Alekisanda ni wosope ŵa mwiŵasa lya jwamkulungwa jwa ŵakutaga mbopesi jula. 7Ŵajimice ŵandumetumewo pasikati pawo ni ŵawusisye kuti, “Ana yimwayitesile yila, mwayitesile m'macili kapena mu lina lya ŵani?”

8Nipo Petulo pakulongoleledwa ni Msimu Ŵaswela ŵatite kuti, “Jemanja acimlongola ni acakulungwa ŵa ŵandu ŵimli apa: 9naga akutuwusya lelo jino ya masengo gambone gatendekwe kwa mundu jwaliji jwamlemale jula, kuti aposile uli? 10Amanyilile sambano jemanja wosope, ni Aisalaeli wosope, kuti mundu aju lelo jino akwima alicenene pameso penu ligongo lya macili ga lina lya Yesu Klistu* jwa ku Nasaleti. Jwele jemanja mwamkomele pa msalaba, nambo Mlungu ŵamjimwisye ku ŵawe. 11Ya Yesujo, maloŵe ga Mlungu gakuti,#Mas 118:22

‘Liganga lyele jemanja amisili ŵakutaŵa nyumba mwalikanile,

lilyolyo ligalawice kuŵa liganga lyakusosekwa mnope.’

12Nipo pangali jwine jwalijose jwele mpaka akombole kulupusya ŵandu, pakuti pa cilambo cosope capasi pangali lina line lyele Mlungu liŵapelece kwa ŵandu kuti tukulupuce nalyo.”

13Ŵapanganya ŵala ŵasimonjile piŵaweni kulimba mtima kwa Petulo ni Yohane nipo soni pakumanyilila kuti ŵaliji ŵandu wamba ni ŵangalijiganya mnope. Pele ni piŵamanyilile kuti ŵaliji mkutama pamo ni Yesu. 14Nambo soni pakumwona mundu jwaposile ali ajimi pakuŵandikana ni Petulo ni Yohane, ŵasoŵile maloŵe gakuti ŵasisye nago. 15Myoyo piŵalamwile kuti akopoce mu nganya ja magambo mula, ŵanganyawo ŵatandite kuŵecetana. 16Acitiji, “Ana twatende cici ŵanduŵa? Pakuti ŵandu wosope ŵakutama mu Yelusalemu akumanyilila kuti jemanjaji atesile cimanyisyo cakuwoneka, nipo uwe ngaŵamkombola kose kana. 17Nambo pakogopa kuti mbili jeleji jikajenela posepose, kwende twakalamusye kuti akasaŵeceta soni kwa jwalijose mu lina lya Yesu.” 18Kaneko ŵaŵilasile, ni kwalamula kuti akasaŵeceta kose pane kwiganya mu lina lya Yesu. 19Nambo Petulo ni Yohane ŵajanjile kuti, “Lamulani mwacimsyene pameso pa Mlungu, naga kuli kwambone kumpikanila jemanja kupunda Mlungu. 20Uwe ngatuleka kuŵeceta yele yitwayiweni ni kuyipikana.” 21Ŵanganyawo piŵamasile kwajogoya ŵandumetumewo ni ŵagopwele. Nganasimana kose litala lyakwapela cilango, ligongo ŵandu wosope ŵaliji kumlumba Mlungu ligongo lya yosope yiyatendekweyo. 22Pakuŵa mundu jwaposile mwakusimonjesyajo jwaliji jwa yaka kupunda 40 yakupagwa.

Ŵakulupililawo ŵapopesile pampepe

23Petulo ni Yohane ali ŵagopwele, ŵapite kwa acimjawo ni ŵamanyisye yosope yele acakulungwa ŵa ŵakutaga mbopesi ni acakulungwa ŵane ŵa Ayuda yiŵasalile. 24Piŵapikene yeleyi, wosope ŵapopesile pampepe mwakwesya maloŵe gawo kwa Mlungu acitiji, “AMBUJE Ŵamaciligosope, ŵapanganyisye kwinani ni cilambo capasi, nyasa ni yindu yili mwelemo.#Eks 20:11; Neh 9:6; Mas 146:6 25Mwa Msimu Ŵaswela ŵaŵecetekasisye nangolo jwetu Daudi,* jwakutumicila jwawo pijwatite kuti,#Mas 2:1-2

‘Ligongo cici ŵandu ŵa mitundu jine* akusaka kutenda ciswamba,

ana uli ŵandu ŵeleŵa akuganisya yangali mate?

26Ayimwene ŵa cilambo capasi ŵaliŵicile cile,

acakulungwa ŵa Boma ŵasongene pampepe

kulimbana ni Ambuje, ni jwakusagulidwa jwakwe jula.’

27Mwambone, Helodi* ni Pontiyo Pilato ŵasongene mu msinda muno pampepe ni ŵandu ŵa mitundu jine ni ŵandu ŵa ku Isalaeli, kulimbana ni jwakutumicila jwawo jwamswela Yesu, jwele juŵasagulidwe.#Mat 27:1-2; Mak 15:1; Luk 23:1, 7-11; Yoh 18:28-29 28Myoyo ŵatesile yosope yele yiŵaŵicile cile kala mwamacili gawo ni lunda lwawo kuti yitendekwe. 29Ni sambano Ambuje, alole akutujogoya, atukunde uwe ŵakutumicila ŵawo kuti tuŵecete maloŵe gawo mwakulimba mtima, 30atambasukule mkono wawo ni kuposya ŵandu nipo kuti yimanyisyo ni yakusimonjesya yitendekwe mu lina lya jwakutumicila jwawo jwakusagulidwa, Yesu.”

31Piŵamasile kupopela, nyumba jele jiŵasongenejo jatenganyice, wosope ŵapocele macili ga Msimu Ŵaswela ni ŵatandite kuŵeceta maloŵe ga Mlungu mwakulimba mtima.

Ŵakulupilila akugaŵana yindu yawo

32Likuga lya ŵakulupilila ŵala ŵaliji ni mtima umo, nganapagwa mundu juŵatiga kuti, yingwete yosope yili yanguyangupe, nambo jwalijose ŵaliji mkupeleka yakwe yosope kuti yiŵe ya wosope.#Mase 2:44-45 33Ŵandumetume ŵaliji mkutenda umboni mwamacili mnope kuti Ambuje Yesu ŵajimwice ku ŵawe, nombe Mlungu ŵaliji mkwapa upile wosope mwakwanila. 34Paliji pangali mundu juŵaliji mkusoŵa kandu pasikati pawo, ligongo wosope ŵele ŵiŵakwete migunda pane nyumba ŵaliji mkuyisumisya, mbiya syakwesyo ŵapelekaga kwa ŵandumetume. 35Nipo mbiyasyo ŵaliji mkwagaŵila ŵandu malingana ni kusoŵa kwawo.

36Paliji pana mundu jwine lina lyakwe Yosefe, jwa lukosyo lwa Lefi, jwakutyocela ku Saipulasi, jwele ŵandumetume ŵala ŵampele lina lyakuti Banaba, gopolela kwakwe “Jwakulimbisya mtima.” 37Nombe najo ŵasumisye mgunda wakwe, ni ŵajigele mbiya syakwe kuja kusipeleka kwa ŵandumetume.

Currently Selected:

Mase 4: YAWO

Highlight

Copy