Mase 2

Kuyika kwa Msimu Ŵaswela

1Pilyakwanile lisiku lya kusangalalila cindimba ca Pentekosite,* ŵakulupilila wosope ŵaliji pampepe m'nyumba jimo.#Lef 23:15-21; Det 16:9-11 2Mwacisisimucisya kwapikanice lisegwe kutyocela kwinani mpela mkokomo wa mbungo jamacili ni jagumbele m'nyumba mosope mwele muŵaliji mkutama mula. 3Nipo ŵagaweni malulumi mpela malamba ga moto gali mgaŵanyika, ni gagwilaga pa jwalijose jwa jemanjajo. 4Wosope ŵala ŵapocele Msimu Ŵaswela ni ŵatandite kuŵeceta yiŵeceto ya cilendo,* mpela yiŵatite Msimuwo pakwaŵecetekasya.

5Mu Yelusalemu mula mwapali Ayuda ŵane, ŵandu ŵiŵaliji kumlumba Mlungu ŵakutyocela myilambo yakulekanganalekangana pa cilambo cosope capasi. 6Piŵapikene cimkokomo cila, likuga lya ŵandu ŵajinji lyasongene ni lyatojime ligongo jwalijose jwapikene ŵakulupililawo ali mkuŵeceta ciŵeceto cakwe. 7Ŵasimonjile kwakumasya lunda acitiji, “Ana ŵandu wosope ŵakuŵecetaŵa ngaŵa ŵakutyocela ku Galileya? 8Nambi uli jwalijose jwetuwe akwapikana ali mkuŵeceta ciŵeceto ciŵapagwile naco? 9Uwe tukutyocela ku yilambo ya Apati, Amedi ni Elamu, ŵane akutama ku Mesopotamiya, ku Yudeya ni ku Kapadokiya, ku Pontasi ni ku Asiya,* 10ku Filijiya ni Pamfiliya, ku Iguputo, ni mbali sya ku Libiya kwakuŵandikana ni ku Kilene. Ŵane ni acalendo ŵakutyocela ku Loma. 11Ayuda ni ŵandu ŵane ŵiŵakuyaga ya dini ja Ciyuda, nipo ŵane ŵa uwe tukutyocela ku Kilete ni kwa Alebiya, nambope wosopewe tukwapikana alimkuŵeceta myiŵeceto yetu kwamba ya masengo gamakulungwa gatesile Mlungu.” 12Wosope ŵasimonjile ni lwamalile lunda, ni ŵawusyene kuti, “Ana yeleyi ni yicici?”

13Nambo ŵane ŵagambaga kuseka acitiji, “Akolelwe finyo jwasambano.”

Utenga wa Petulo

14Kaneko Petulo* ŵajimi pampepe ni ŵandumetume likumi ni jumo, nipo Petulo ŵaŵecete mwakwesya maloŵe kuti: “Jemanja Ayuda, ni wosope ŵamkutama ku Yelusalemu kuno, mpikane ni kupikanicisya maloŵe gangu. 15Ŵandu aŵa nganakolelwa mpela yimkuti pakuganisya, pakuti ndaŵi jili 9 koloko ja kundaŵi. 16Nambo yeleyi ni yiŵaŵecete jwakulocesya* Yoweli kuti,

17‘Mlungu akuti, tiyiciŵa pa masiku gakumalisya,#Yow 2:28-32

Tinjiŵika Msimu wangu mwa ŵandu wosope.

Nipo ŵanace ŵenu ŵacalume ni ŵacakongwe tacilocesya.

Acacanda ŵenu taciyiwonaga yindu m'mesomkulola,

nipo ngalamba syenu tisicisagamila sagamisi.

18Elo, atamose pa ŵakutumicila ŵangu ŵacalume ni ŵacakongwe,

tinjiŵika pa jemanjajo Msimu wangu masiku gelego,

nipo tacilocesya.

19Tinjitenda yakusimonjesya kwinani mnope,

nipo yimanyisyo ya pacilambo capasi cino nayi:

miasi, moto ni lipundugulu lya lyosi.

20Lyuŵa tiliciŵa bii mpela cipi,

nombe mwesi tiwuciŵa psyu mpela miasi,

mkaniliyice lisiku lyalikulungwa lya Ambuje Mlungu lya lumbili.

21Nipo pa ndaŵi jelejo tiyiciŵa

kuti jwalijose jutacilumba lina lya Ambuje mwakuŵenda, tacikulupuka.’

22“Jemanja Aisalaeli, mpikanile maloŵe aga. Yesu* jwa ku Nasaleti ŵaliji mundu jwele juŵamtumile Mlungu kwa jemanja. Mlungu ŵamsimicisye yeleyi ya macili, yakusimonjesya ni yimanyisyo yiŵapanganyisye mwa Yesu pasikati penu, mpela yimkuti pakumanyilila. 23Sambano Yesujo ŵapelecedwe mwakusosa ni kumanyilila kwakwe Mlungu, m'makono genu. Ni jemanja mwamwuleje pakumpeleka kwa ŵandu ŵakusakala kuti amkomele pa msalaba.#Mat 27:35; Mak 15:24; Luk 23:33; Yoh 19:18 24Nambo Mlungu ŵamgopwele ku yipwetesi ya ciwa, ni ŵamjimwisye ku ŵawe, ligongo yaliji yangakomboleka kuti apundidwe ni ciwa.#Mat 28:5-6; Mak 16:6; Luk 24:5 25Paja Daudi* ŵaŵecete ya jwelejo kuti,#Mas 16:8-11

‘Nawonaga Ambuje ndaŵi syosope pasogolo pangu,

pakuti akutama ku mkono wangu wamlyo, kuti ngatenganyika kose.

26Ni ligongo lyakwe mtima wangu wasangalele,

nipo naŵecetaga mwakusangalala,

mnopemnope soni cilu cangu cicitama mcembeceyo.

27Pakuŵa wawo ngasandeka une ku malo ga ŵandu ŵawe,*

kapena kumleka jwamswela jwawo kuti awole.

28Ŵamanyisye une matala ga umi,

nipo tacimba lukondwa mnope pitacimbonecelapo.’

29“Acalongo acimjangu, ngupakombola kuŵeceta mwakumsimicisya jemanja ya nangolo jwetu Daudi. Jwalakwe ŵawile ni ŵasicidwe mwilembe, ni lilembe lyakwe lyaciŵelape mpaka lelo jino. 30Paja jwaliji jwakulocesya nipo jwamanyililaga yele yiŵaŵecete Mlungu mu cilanga* cakwe, mwakulumbila kuti jumo mwa yisukulu yakwe tacijigala ucimwene wakwe.#Mas 132:11; 2 Sam 7:12-13 31Ni kuti Daudi ŵala ŵayiweni cile, yakuti Klistu* tacijimuka ku ŵawe, ni pelepo ŵaŵecete maloŵe gakuti,

‘Klistu nganaŵicidwa ku malo ga ŵandu ŵawe

soni cilu cakwe nganiciwola kose.’

32“Yesu jujojo, Mlungu juŵamjimwisye ku ŵawe, nipo uwe wosope tuli mboni sya yeleyi. 33Jwalakwe ŵamkwesisye ni kuja kutama ku mkono wamlyo wa Mlungu, ni ŵapocele Msimu Ŵaswela mwacilanga ca Atati, ni ŵatumisye yele yakuyiwonayi ni kupikanayi. 34Paja Daudi nganakwela kwawula kwinani nambo jwele msyene ŵatite,#Mas 110:1

‘Ambuje ŵasalile Ambuje ŵangu

kuti tamani ku mkono wangu wamlyo,

35mpaka sandusye amagongo ŵenu kuŵa cakuliŵatila sajo syenu.’#2:35 Cakuliŵatila sajo syenu: Kuti ampikanileje m'mwejo.

36“Sambano Aisalaeli wosope amanyilile mnope kuti, Yesu jwele jemanja mwamkomele pa msalaba, Mlungu ŵamtesile kuti aŵe Ambuje ni Mkulupusyo.”

37Piŵapikene yeleyi ŵandu ŵala yasawisye mu mtima, nipo ŵamwusisye Petulo ni ŵandumetume ŵane ŵala kuti, “Jemanja, ana sambano uwe tutende cici?”

38Petulo ŵasalile kuti, “Mpitikuce mitima, nipo jwalijose jwa jemanja abatisidwe mu lina lya Yesu Klistu. Pelepo yakulemwa yenu tacimkululucila nipo timcipocela mtuka wa Msimu Ŵaswela. 39Pakuti Mlungu ŵatesile cilanga ni jemanja pampepe ni ŵanace ŵenu kwika soni ŵandu wosope ŵakutama kwakutalika, wosope ŵele Ambuje Mlungu jwetu tacaŵilanga.”

40Petulo ŵajendelecele kuŵeceta maloŵe gane gamajinji, ni ŵaŵendile kuti, “Mtame kwakutalikangana ni cilango cacikwisa ni ŵandu ŵangalumbana aŵa.” 41Papopo ŵandu ŵaŵapikene maloŵe gakwego ŵakulupilile ni ŵa ŵabatisidwe, nipo pa lisiku lilyolyo ŵandu ŵakwana mpela 3,000 ŵajonjecesyedwe mwikugalyo. 42Ndaŵi josope ŵaliji mkusongana kuti apikane yele yiŵajiganyaga ŵandumetume ŵala, soni ŵaliji mkusyoŵekana nipo ŵalyaga mkate ni kupopela pampepe.

Ndamo sya aklistu ŵandanda

43Ŵandu wosope ŵaliji mkutenda woga ligongo lya yakusimonjesya ni yimanyisyo yejinji yele yiŵatendaga ŵandumetume ŵala. 44Wosope ŵakulupililawo ŵaliji pampepe, nipo ŵagaŵanaga yindu yawo yosope.#Mase 4:32-35 45Ŵasumisyaga yindu yawo, mbiya syakwe ni ŵagaŵanaga ni ŵandu wosope mwakulingana ni kulaga kwa mundujo. 46Lisiku ni lisiku ŵasonganaga pampepe m'nyumba ja Mlungu jakupopelela, nipo ŵalilaga pamo msimangwawo. Ŵalyaga yakulya yawoyo mwakusangalala ni mwakulitulusya. 47Ŵaliji kumlumba Mlungu, nipo ŵandu wosope ŵatendelaga canasa jemanjajo. Lisiku ni lisiku Ambuje ŵaliji mkwajonjecesya ŵane ŵandu ŵakupocela cikulupusyo.

Currently Selected:

Mase 2: YAWO

Highlight

Copy