Mase 1

1Ŵakucimbicikwa Teofilo:#Luk 1:1-4

M'buku jangu jandanda jila namlembele yosope yiŵatendaga Yesu* ni kuyijiganya ndaŵi jiŵatandite masengo gakwe 2ni mpaka lisiku liŵajigalidwe kwawula kwinani. Mwamacili ga Msimu Ŵaswela, ŵaliji aliŵasalile yakutenda ŵandumetume ŵakwe ŵele ŵiŵasagwile. 3Kwa masiku makumi mcece panyuma pakuwulajidwa kwakwe, ŵalilosisye kakajinji mwakwasimicisya ŵanduwo kuti ali ŵacijumi. Ŵanduwo ŵam'weni Yesu, ni ŵaŵecete nawo ya Ucimwene wa Mlungu.* 4Piŵaliji wosope pampepe, Yesu ŵalamulile kuti, “Mkatyoka mu Yelusalemu, nambo mjembecele mtuka wele Atati ŵangu ŵatite tacimpa, mpela munaŵecetele mula.#Luk 24:49 5Pajatu Yohane* ŵabatisyaga ni mesi nambo mkanigapite masiku gamajinji, jemanja timcibatisidwa ni Msimu Ŵaswela.”#Mat 3:11; Mak 1:8; Luk 3:16; Yoh 1:33

Yesu ajigalidwe kwawula kwinani

(Mak 16:19-20; Luk 24:50-53)

6Ndaŵi jelejo ŵandumetume ŵala ŵaliji wosope pampepe ni Yesu, ni ŵamwusisye jwalakwejo kuti, “Ambuje, ana sambano jino ni ndaŵi jakuti awucisye Ucimwene kwa Aisalaeli?” 7Yesu ŵajanjile kuti, “Nganigaŵa masengo genu kuti m'manyilile ndaŵi jele Atati ŵangu jiŵaŵicile cilepe mwamacili gawo. 8Nambo timcipocela macili, Msimu Ŵaswela uli wumyicile pa jemanja, pelepo timcindendela umboni ku Yelusalemu, ku Yudeya ni ku Samaliya kosope, mpaka kumbesi kwa cilambo.”#Mat 28:19; Mak 16:15; Luk 24:47-48 9Piŵaŵecete yeleyi, Yesu ŵajigalidwe kwawula kwinani, jemanjajo alimkulola. Nipo liwunde lyamwunicile ni nganawoneka soni.#Mak 16:19; Luk 24:50-51

10Ŵandumetume ŵala piŵaliji mkulolecesya kwinani, Yesu ali mkwawula, mwacisisimucisya ŵandu ŵaŵili ŵawale yeswela ŵajimi pambali pawo 11ni ŵatite, “Jemanja ŵandu ŵa ku Galileya, ana ligongo cici mgambile kwima ni kulolecesyaga kwinani? Yesuju jwajigalidwe kwawula kwinani kutyocela pasikati penu, taciyika soni mpela yimkuti pakumwonamu pakwawula kwinani.”

Jwakwinjila m'malo mwa Yudasi

(Mat 27:3-10)

12Pelepo ŵandumetume ŵala ŵawujile ku Yelusalemu kutyocela Kwitumbi lya Olifi.* Mkuli wakwe wakwana kilomita jimo kutyocela ku Yelusalemu. 13Piŵajinjile mu msindamo, ŵakwesile kwawula ku cipinda ca mwinani mwele muŵaliji mkutama Petulo* ni Yohane, Yakobo* ni Andileya;* Filipi ni Tomasi,* Batolomeyo, Mateyu,* Yakobo (mwanace jwa Alifeyo), Simoni* Mselote, ni Yudasi mwanace jwa Yakobo.#Mat 10:2-4; Mak 3:16-19; Luk 6:14-16 14Wosope ŵaliji ni mtima wakupopela pamo, pampepe ni acakongwe ŵane, ni Maliya mama ŵawo Yesu ni acalongo acimjakwe ŵa Yesu.

15Gali gapite masiku gapanandi, Petulo ŵajimi pasikati pa ŵakulupililawo. (Ŵanduwo ŵaliji ŵakwana 120). Nipo Petulo ŵatite, 16“Acalongo acimjangu, yikwenela kuti yitendekwe yele Malemba gaŵecete ya Yudasi. Pakupitila mwa Daudi,* Msimu Ŵaswela ŵaŵecete ya jwelejo juŵalongolele ŵandu ŵiŵapite kumkamula Yesu. 17Yudasi ŵaliji jumo jwa likuga lyetu, nipo ŵasagulidwe kuti aŵe jwakutumicila pampepe ni uwe.”

18Ŵasumile mgunda ni mbiya siŵapatile pakutenda yangalumbana yila. Kweleko Yudasi ŵagwile cakulosya mtwe wakwe pasi, ni ŵawulice lutumbo, matumbo gakwe gosope gakusucile pasi.#Mat 27:3-8 19Yeleyi yapikanice kwa ŵandu wosope ŵakutama ku Yelusalemu, mwakuti mgundawo ŵaŵilanjidwaga m'ciŵeceto cawo kuti Akeledama, kugopolela kwakwe ni kuti “Mgunda wa miasi.”

20“Pakuti yilembedwe m'buku ja Masalimo kuti,#Mas 69:25; 109:8

‘Nyumba jakwe jiŵe lisame

akapagwa mundu jutatame mwelemo,’

yilembedwe soni kuti,

‘Jwine ajigale masengo gakwe.’

21“Sambano pakusosekwa jwine aŵe pampepe ni uwe kuti aŵe mboni jakuti Ambuje Yesu ŵajimwice ku ŵawe.#Mat 3:16; Mak 1:9; 16:19; Luk 3:21; 24:51 22Akwenela kuti aŵe jumo jwa ŵandu ŵele ŵiŵaliji mwikuga lyetu ndaŵi josope jele Ambuje ŵaliji mkwenda ni uwe, kutandila ndaŵi jiŵalalicile Yohane ya ngani sya ubatiso mpaka kwika pa lisiku lyele liŵajigalidwe Yesu kutyocela kwetuwe kwawula kwinani.”

23Pelepo ŵakolasile mena gaŵili; Yosefe ŵiŵaŵilanjidwaga Balasabasi (lina lyakwe ni Yusito), ni Matiyasi.* 24Ni ŵapopesile kuti, “Ambuje, ŵalakwe akumanyilila nganisyo sya jwalijose, sambano atulosye mwa ŵaŵiliŵa ŵele ŵaŵasagwile ŵalakwe 25kuti apocele masengo aga ga undumetume, m'malo mwa Yudasi ŵele ŵiŵalesile, kwawula ku malo gagamjenele.” 26Nipo ŵalondwele cisango pa ŵaŵiliwo, Matiyasi ni ŵiŵasagulidwe, ŵele sambano ŵaliji ŵakonjecesya mu likuga lya ŵandumetume likumi ni jumo.

Currently Selected:

Mase 1: YAWO

Highlight

Copy