Mako 4

Enfumu y'omubibi

1 # Luk 8:4-15; Mat 13:1-28. Kandi akagaruka yaatandika kwegyeseza aha rubaju rw'enyanja. Omutwe gw'abantu baingi munonga gwamuteeraniraho, n'ahabw'kyo yaaza omu bwato, yaabushutamamu omu nyana, n'abantu abo boona baashutama aha nkungu. 2Yaabeegyesa bingi omu nfumu omu kwegyesa kwe, yaabagambira naagira ati: 3Mutegye amatu, muhurire! 4Omubibi akashohora kubiba. Ku yaabaire naabiba, embibo ezimwe zaagwa omu muhanda; enyonyi zaija zaazitorotoora. 5Embibo ezindi zaagwa aha rukiri ahataine itaka ringi; ahonaaho zaamera, ahabw'eitaka kutaba ringi; 6eizooba ku ryajwire, omushana gwaziteera, zaahonga; kandi ahabw'okutagira mizi, zaayoma. 7Embibo ezindi zaagwa omu mahwa; amahwa gaamera, gaazinyuruza, tizaayera. 8Embibo ezindi zaagwa omu itaka rirungi; ku zaaherize kumera, zaakura gye, zaakanya, zaayera, ezimwe zaahitsya makumi ashatu, ezindi makumi mukaaga, n'ezindi igana. 9Kandi yaagira ati: Oine amatu agarikuhurira, ahurire.

10Kandi ku yaabaire ati wenka, abo abaabaire bamwehinguririize hamwe na bari ikumi na babiri baamubuuza aha nfumu egyo. 11Yaabagira ati: Imwe muhairwe okumanya emibonano y'obukama bwa Ruhanga, kwonka ab'aheeru bo byona babicwerwa omu nfumu, 12#Isa 6:9, 10. ngu okureeba kwo bareebe, kwonka barekye kwetegyereza, kandi okuhurira kwo bahurire, kwonka barekye kushoborokyerwa, ngu batakaahinduka bakasaasirwa. 13Yaabagira ati: Timurikumanya enfumu egi? Mbwenu shi, muryamanya muta enfumu zoona? 14Omubibi abiba ekigambo. 15Embibo ez'omu muhanda, ahi ekigambo kyabibirwe, abo nibo baheza kuhurira, ahonaaho Sitaane akaija, akabaihamu ekigambo ekyabibwa omuribo. 16Kandi ezaabibirwe aha rukiri, abo nibo bahurira ekigambo, bakarahuka kukiikiriza n'okushemererwa; 17ahabw'okushangwa bataine mizi ehamire, beehangaana omwanya mukye; bwanyima hakibaho obusaasi n'okuhiigwa nibaturwa ekyo kigambo, ahonaaho bagwa. 18N'ezo ezaagwire omu mahwa, nibo bahurira ekigambo; 19#Mak 10:23, 24. kwonka amaganya g'ensi, n'okubeihwabeihwa kw'obutungi bwayo, n'okwetenga ebindi, ku bikijwangamu, byanyuruza ekyo kigambo, kibura kwana. 20Kwonka ezaabibirwe aha itaka rirungi, abo nibo bahurira ekigambo, bakakiikiriza, bakaana ebyana emirundi makumi ashatu, makumi mukaaga, na igana.

Enfumu ezindi

21 # Luk 8:16-18. Kandi yaabagambira ati: Etabaaza ereetwa kujuumikirwa ekiibo, nari shi okugita omunda y'ekitanda? Tereetwa kuteebwa aha kikondo kyayo? 22#Luk 12:2. Ahakuba tihaine kyasherekirwe ekitaribonwa, nari eky'omubonano ekitarireebwa butunu. 23Oine amatu agarikuhurira, ahurire. 24#Mat 7:2. Kandi yaabagira ati: Mwerinde eki muhurira; endengo ei murengamu niyo murirengyerwamu, kandi muryayongyerwaho. 25Ahakuba oine niwe aryongyerwa; kandi otaine aryayakwa n'ekyo eki aine.

26Kandi yaagira ati: Obukama bwa Ruhanga nibushusha nk'oku omuntu abiba embibo omu itaka; 27akabyama kandi akaimuka nyomushana na nyekiro; embibo zikamera, zikakura, atamanyire oku zikuzire. 28Eitaka niryo rimeza ryonak; habanza akababi, hataho obushiisha, na bwanyima enjuma nkuru. 29#Yoel 3:13. Ku biheza kwera, ahonaaho areeta omusyo, abigyesha, ahakuba eigyesha rihikire.

30 # Luk 13:18, 19; Mat 13:31, 32, 34. Kandi yaagira ati: Mbwenu obukama bwa Ruhanga tukaabugyeranisa na ki? Nari tukaabushobooroza nfumu ki? 31Nibushusha nk'akajuma ka #4:31 Sinaapi reeba Mat. 13:31. sinaapi. Ku kabibwa omu itaka, kaba kari kakye okukira embibo zoona eziri omu nsi; 32#Dan 4:12, 21. kwonka ku kaheza kubibwa, kamera, kakura, karugamu ekiti kihango okukira ebindi byona, kagira amataagi mahango, kandi n'enyonyi z'omu mwanya zaarika omu mataagi gaako.

33Akaba abagambira ekigambo omu nfumu nyingi, nk'oku baabaire babaasa kushoborokyerwa; 34tarabaasize kubeegyesa atabirabize mu nfumu; kureka abeegi be nibo yaabaire ashobororera byona omu mubonano.

Yesu okucureeza enyanja

35 # Luk 8:22-25; Mat 8:18, 23-27. Aha izooba eryo ku bwabaire omu mwabazyo, yaabagira ati: Nimwije twambukye seeri. 36Ku baaherize kuraga omutwe gw'abantu, baamutwara omu bwato nk'oku yaabaire ari; kandi hakaba hariho n'agandi maato. 37Eihunga ringi ryaija, ebingonzi byateera obwato, amaizi gaabusheeshekamu, bwaba haihi kwijura; 38kwonka We akaba agwejegyeire, ayeeshegwire omushego enyima omu bwato. Baamusisiimura, baamugira bati: Mwegyesa, torikututaho mutima? Reeba twafa! 39Yaasisiimuka, yaakabukira eihunga, yaagambira enyanja ati: Reka, cureera! Eihunga ryacureera; haabaho obucureera bwingi. 40Yaababuuza ati: N'enki ekirikubatiinisa? Timukagizire kwikiriza? 41Baatiina munonga, baagambirana bati: Bantu 'mwe, ogu ni muntu ki, orikuragiira eihunga n'enyanja, bikamuhurira!

Currently Selected:

Mako 4: RR64

Highlight

Copy