Matayo 27

Yesu okutwarwa owa Pilaato

1Ku bwaseesire, abanyamurwa abakuru boona n'abakuru b'eihanga baahanuura hamwe oku baraite Yesu. 2Baamuboha, baamutwara, baamuhayo ahari Pilaato omutegyeki.

Yuda okwehanika

3Kandi Yuda owaamureebize, ku yaareebire orubanja rwasinga Yesu, yaayefuuza, yaagarurira abanyamurwa abakuru n'abakuru b'abantu ebyo bicweka by'efeeza makumi ashatu, 4naagira ati: Nsiisire okureebya eshagama etaine rubanja. Kwonka bo baagarukamu bati: Ebyo shi n'ebyaitu? n'orubanja rwawe. 5#Byak 1:18, 19; 2 Sam 17:23. Yaatambika ebyo bicweka by'efeeza omuri hekalu, yaashohora, yaagyenda, yaayehanika. 6Abanyamurwa abakuru baatorotoora ebyo bicweka by'efeeza, nibagira bati: Ebiragiro tibirikwikiriza kubita omu ibiikiro, ahabw'okuba n'obuguzi bw'eshagama. 7Baahanuura, baabiguramu ekibanja ky'omubumbi kuguma nibaziikamu abahinguzi. 8N'ahabw'ekyo ekibanja ekyo kyayetwa Ekibanja, ky'eshagama okuruga obwo n'okuhitsya hati. 9#Zek 11:12, 13. Okwo nikwo ekyagambirwe nabi Yeremia kyahikiriire, eki yaagizire ati: Bakatwara ebicweka by'efeeza makumi ashatu, nibwo buguzi bwe obu abamwe aha Baisraeli baamucwereire, 10baabiguramu ekibanja ky'omubumbi, nk'oku Mukama yandagiire.

Pilaato okucwera Yesu orubanja rw'okumubamba

11 # Luk 23:2, 3; Mak 15:2-5; Yoh 18:29-38. Yesu yaayemerera omu maisho g'omutegyeki: omutegyeki yaamubuuza ati: Weeza ori Omugabe w'Abayudaaya? Yesu yaamugarukamu ati: Eki waagamba nikwo kiri. 12#Isa 53:7. Kwonka ku yaatabaariziibwe abanyamurwa abakuru n'abakuru b'abantu, tiyaagarukamu na kakye. 13Pilaato nikwo kumubuuza ati: Tohuriire ebi byona ebi barikukushinja ku biri bingi? 14#Yoh 19:9. We tiyaamugarukamu n'obu kyakuba ekigambo na kimwe; n'ahabw'ekyo omutegyeki yaatangaara munonga. 15#Luk 23:13-25; Mak 15:6-15; Yoh 18:39—19:1. Kandi aha bugyenyi nk'obwo omutegyeki akaba amanyiire kurekurira abantu embohe emwe, ei baabaire bamushaba. 16Omu biro ebyo bakaba baine embohe erangainwe ahabw'obubi erikwetwa Barabba. 17Boona ku baaherize kuteerana, Pilaato yaababuuza ati: Nimwenda ngu mbarekurire oha? Barabba nari Yesu orikwetwa Kristo? 18#Yoh 11:47, 48; 12:19. Ahakuba akamanya ku baamuhayo ahabw'eihari.

19Ku yaashutamire aha kitebe ky'okucweraho emanja, omukazi we yaamutumaho naagira ati: Oyetantare ebigambo by'omushaija ogwo ohikiriire; ahakuba ebi mmurootsireho nyekiro binsaasize munonga. 20Kwonka abanyamurwa abakuru n'abakuru baayosya abantu ngu bashabe Barabba, baite Yesu. 21Omutegyeki yaagaruka yaababuuza ati: Ahari abo bombi nimwenda ku mbarekurira oha? Baamugarukamu bati; Barabba. 22Pilaato yaababuuza ati: Mbwenu shi, ngire nta Yesu orikwetwa Kristo? Boona baagarukamu bati: Abambwe aha musharaba. 23Yaababuuza ati: Ahanki? Ni kibi ki eki akozire? Baayeyongyera kuyomba nibagira bati: Abambwe! 24Pilaato ku yaareebire naayeruhiriza busha, kandi yaareeba ngu haza kubaho okurabanamu, yaayakiira amaizi, yaanaaba omu ngaro omu maisho g'abantu, naagira ati: Tiinyine rubanja ahabw'eshagama y'omuntu ogu ohikiriire; mubyemarire. 25#Byak 5:28. Abantu boona baagarukamu nibagira bati: Eshagama ye ebe niitwe yaatukurira n'abaana baitu. 26Pilaato nikwo kubarekurira Barabba. Kandi ku yaaherize kwasha Yesu, yaamuhayo kubambwa. 27#Mak 15:16-19; Yoh 19:2, 3. Bwanyima abaserukare b'omutegyeki baatwara Yesu omu kibuga ekirikwetwa Puratorio, omutwe gwabo gwona baagumuteeraniraho. 28Baamujuura ebijwaro bye, baamujweka omwenda gwa karari. 29Ku baaherize kuruka ekirunga ky'amahwa, baakimujweka omu mutwe, baamukwatsa ekibingo omu mukono gwe gwa buryo, baamutsimbira amaju, baamuteerera enaku nibagira bati: Singa, Mugabe w'Abayudaaya! 30#Isa 50:6. Baamucwera amacwante, baakwata ekyo kibingo, baakimuteera omu mutwe. 31#Luk 23:26, 33-49; Mak 15:20-41; Yoh 19:16-30. Ku baaherize kumuteerera enaku, baamujuura ogwo mwenda, baagaruka baamujweka ebijwaro bye, baamutwara kubambwa aha musharaba.

Yesu okubambwa

32Ku baabaire nibashohora, baabugana omushaija wa Kureene orikwetwa Simooni; ogwo baamugyema kwekorera omusharaba gwa Yesu. 33Ku baahikire aharikwetwa Gologosa, amakuru gaakyo ngu Omwanya gw'empanga y'omuntu, 34#Zab 69:21. baamuha viinyo ejwangiremu omubazi ogurikwetwa sumuruna; ku yaagirorizeho, yaayanga kuginywa. 35#Zab 22:18. Ku baaherize kumubamba, baabagana ebijwaro bye, nibabiteerera enteenyu. 36Baashutama ahansi, baaguma nibamureeba. 37Baahanika ebigambo ebi baamutabaariza ahaigur y'omutwe gwe, ebyabaire bihandiikirwe biti: OGU NI YESU, OMUGABE W'ABAYUDAAYA. 38#Isa 53:12. Kandi akabambwa hamwe n'abambuzi babiri, omwe aha rubaju rwe rwa buryo, n'ondi aha rwa bumosho. 39#Zab 22:7. Kandi n'abaabaire nibahinguraho baamutsyorera, nibamuzongoreza emitwe, 40#Yoh 2:19. nibagira bati: Iwe orikusheenya hekalu, okagyombeka omu biro bishatu, yejune! Ku oraabe ori Omwana wa Ruhanga, hanuka orugye aha musharaba. 41Abanyamurwa abakuru n'abahandiiki n'abakuru b'abantu nabo baamutsyorera batyo nibagira bati: 42Akajuna abandi; tarikubaasa kwejuna. Ngu, N'omugabe w'Abaisraeli! Naahanukye, arugye aha musharaba hati, naitwe tumwikirize. 43#Zab 22:8. Ayesiga Ruhanga, mbwenu naamujune hati, ku araabe naamukunda; ahabw'okuba yaagira ati: Ndi Omwana wa Ruhanga. 44Kandi n'abambuzi abaabaire babambirwe nawe nabo nikwo baamuteerera enaku batyo.

Okukaba kwa Yesu

45Okuruga aha shaaha ya mukaaga okuhitsya aha ya mwenda omwirima gwashweka ensi yoona. 46#Zab 22:1. Ku bwabaire buri haihi kuhika aha shaaha ya mwenda, Yesu yaagamba n'eiraka rihango, ati: Eli, Eli, laama sabakasaani; amakuru ngu; Ruhanga wangye, Ruhanga wangye, n'enki ekyakuntsigisaho? 47Bamwe aha baabaire beemereire aho, ku baakihuriire, baagira bati: Omushaija ogu naayeta Eliya. 48#Zab 69:21. Ahonaaho omwe aharibo yairuka, yaakwata ekyangu, yaakijabika omuri viinyo erikushaarira, yaakita aha kibingo, yaamuheereza kunwa. 49Abandi baagira bati: Reka tureebe Eliya ku araabe naija kumujuna. 50Bwanyima Yesu yaagaruka yaagamba n'eiraka rihango, yaahayo amagara ge.

Eby'okutangaaza ebyabaireho

51 # Heb 10:19, 20. Omukingo gw'omuri hekalu gwataagukamu ebicweka bibiri okuruga aha mutwe gwagwo okuhika ahansi, ensi yaatengyeta, enkiri z'amabaare zaayatika, 52ebituuro byaiguka; emitumbi mingi y'abahikiriire abaabaire bagwejegyeire yaazoorwa; 53baaruga omu bituuro bwanyima y'okuzooka kwe, baataaha omu rurembo orurikwera, baareebwa baingi. 54Omukuru w'abaserukare n'abu yaabaire aine nibarinda Yesu, ku baareebire omutsitsa n'ebindi byabaho, baatiina munonga, nibagira bati: Buzima kwo ogu abaire ari Omwana wa Ruhanga. 55Hakaba hariho n'abakazi baingi beemereire nibareebera hangahari; abo nibo baarugire Galilaaya bamukuratiire nibamuheereza; 56omuri abo hakaba harimu Mariamu Magadaleene na Mariamu nyina wa Yakobo na Yose, kandi na nyina wa beene Zebedaayo. 57#Luk 23:50-55; Mak 15:42-47; Yoh 19:38-42. Omu mwabazyo haija omushaija omutungi owa Arimasaaya, orikwetwa Yosefu, kandi nawe akaba ari omwegi wa Yesu.#Kur 34:25. 58Omushaija ogwo yaaza owa Pilaato, yaashaba omutumbi gwa Yesu. Pilaato yaaragiira kugumuha. 59Yosefu yaatwara omutumbi, yaaguzinga omu mwenda gwa kitaani ogurikwera, 60#Isa 53:9. yaagurambika omu kituuro kye kisya, eki yaabaire ayetimbiire omu rukiri; yaakumbagaza eibaare rihango, yaarikingisa aha muryango gwakyo, yaagyenda. 61Kandi Mariamu Magadaleene na Mariamu ondiijo bakaba bariho, bashutami nibareeba ekyo kituuro.

Okurinda ekituuro kya Yesu

62Ku bwaseesire aha izooba eryakuratiire ekiro ky'Okweteguura, abanyamurwa abakuru n'Abafarisaayo baateeranira owa Pilaato, 63baamugira bati: Mukama waitu, nitwijuka eki omubeihi ori yaagambire akiriho, ati: Ndyazooka bwanyima y'ebiro bishatu. 64Mbwenu ragiira barindire kimwe ekituuro okuhitsya aha kiro kya kashatu, abeegi be batakaija bakamwiba, haza bakagambira abantu ngu, Azookire omu bafu; kandi okuhaba okurirugamu kuryaba kubi okukira okw'okubanza. 65Pilaato yaabagarukau ati: Mwine abarinzi b'abaserukare; mugyende, mukirindire kimwe, nk'oku murikubaasa. 66Nabo baagyenda, baahamisa eryo ibaare akamanyiso, baataho n'abarinzi, ngu ekituuro kutaigurwa,

Currently Selected:

Matayo 27: RR64

Highlight

Copy