Matayo 25

Enfumu y'abaishiki ikumi

1 # Luk 12:35, 36; Kush 19:7. Omu biro ebyo obukama bw'omu iguru buryashusha nk'abaishiki ikumi, abaatwaire etabaaza zaabo, bakaza kubugana kishwera. 2Bataano aharibo bakaba bari abashema, n'abandi bataano bari ab'obwengye; 3ahakuba abashema ku baatwaire etabaaza zaabo, tibaatwara gandi majuta; 4kwonka ab'obwengye baatwara amajuta omu cupa hamwe n'etabaaza zaabo. 5Kandi kishwera ku yairiirweyo, boona baahungira, baagwejegyera. 6Bwanyima nyekiro omu itumbi haabaho orwari ngu: Reeba, kishwera yaija! mushohore tumubugane. 7Abaishiki abo baimuka, baashemeza etabaaza zaabo. 8Abashema baashaba ab'obwengye bati: Mutuhe aha majuta gaanyu, ahakuba etabaaza zaitu zaaza kuraara. 9Ab'obwengye baagarukamu bati: Nooshusha oti, tigarikutumarira twena; kureka mugyende ahu barikugatundira; mwegurire. 10Ku baabaire bagiire kugura, kishwera yaija; abaabaire beeteekateekire baataaha nawe, omu nju omu bugyenyi bw'okushwera; orwigi rwakingwa. 11#Luk 13:25, 27. Bwanyima abaishiki abo abandi nabo baija, nibagira hati: Mukama waitu, Mukama waitu, twigurireho. 12We yaabagarukamu ati: Buzimazima nimbagambira nti: Tindikubamanya. 13N'ahabw'ekyo mugume nimureeba, ahabw'okuba timurikumanya kiro n'obu yaakuba eshaaha.

Enfumu y'etalanta.

14 # Luk 19:12-27. Kandi nibushusha nk'eby'omuntu owaabaire naayenda kugyenda za omu nsi endiijo; ku yaabaire atakagyenzire, yaayeta #25:14 Omu Rugriika n'omuhuuku. abambari be, yaabatsigira ebintu bye. 15#Rom 12:6. Omwe yaamuha etalanta itaano, ondi ibiri, n'ondiijo emwe, nka buri omwe oku yaabaire naabaasa; yaaheza, yaagyenda. 16Owaahairwe etalanta itaano ahonaaho yaagyenda, yaazishuubuza, yaashaazyamu ezindi itaano. 17N'owaahairwe ibiri nawe yaashaazyamu atyo ezindi ibiri. 18Kwonka owaahairwe emwe yaagyenda, yaatimba omu itaka, yaasherekamu etalanta ya mukama we. 19Ebiro bingi ku byahingwireho, mukama w'abambari abo yaagaruka, yaabara nabo ebi yaabatsigiire. 20Owaahairwe etalanta itaano, yaija yaareeta ezindi itaano, yaagira ati: Mukama wangye, okantsigira etalanta itaano; reeba nshaagizemu ezindi itaano. 21#Luk 16:10. Mukama we yaamugira ati: Kazaare, iwe omwambari omurungi orikwesigwa! obaire omwesigwa omuri bikye, ndyakuha obushoboorozi kutegyeka bingi; taaha omu kushemererwa kwa mukama waawe. 22Owaahairwe etalanta ibiri nawe yaija, yaagira ati: Mukama wangye, okantsigira etalanta ibiri; reeba nshaagizemu ezindi ibiri. 23Mukama we yaagira ati: Kazaare, iwe omwambari omurungi orikwesigwa! obaire omwesigwa omuri bikye; ndyakuha obushoboorozi kutegyeka bingi; taaha omu kushemererwa kwa mukama waawe. 24Kandi n'ogwo owaahairwe etalanta emwe yaija, yaagira ati: Mukama wangye, nkamanya ku ori omuntu ogumire, ogyesha ahu otarabibire, kandi ohunika ebi otaraheheerize; 25n'ahabw'ekyo nkatiina, naagyenda naashereka etalanta yaawe omu itaka. Reeba ngigi, ogigarukane. 26Mukama we nikwo kumugarukamu ati: Iwe omwambari omubi kandi omweremwa! okamanya ku ngyesha ahu ntarabibire, nkahunika ebi ntaraheheerize. 27N'ahabw'ekyo okaba oshemereire kuha etaanta yangye ababiiki b'empiiha, naanye ku naakwizire, nkaagigaruriirwe n'enshaagi yaayo. 28Mbwenu mugimwakye, mugihe oine etalanta ikumi. 29#Mat 13:12. Ahakuba oine niwe ariheebwa, akagira bingi; kwonka otaine aryayakwa n'eki aine. 30N'omwambari ogwo otaine mugasho, mumunagye aheeru omu mwirima; okwo niyo abantu bariririra, bakanena enshaya.

Enfumu y'entaama n'embuzi

31 # Kush 20:11-13. Omwana w'omuntu ku ariizira omu kitiinisa kye hamwe na baamaraika be boona, aryashutama aha kitebe kye eky'ekitiinisa, 32#Rom 14:10. amahanga goona gateeranirwe omu maisho ge; kandi aryagashoroora, nk'oku omuriisa ashoroora entaama omu mbuzi. 33Entaama aryazita aha rubaju rwe rwa buryo, kwonka embuzi aryazita aha rwa bumosho. 34Obwo Mukama aryagira ab'aha rubaju rwa buryo ati: Mwije, imwe abu Tata yaahaire omugisha, muhungure obukama obwabateekateekyeirwe okuruga aha kuhangwa kw'ensi; 35#Enf 19:17; Heb 2:11. ahakuba nkaba nyine enjara, mwampa eby'okurya; nkaba nyine eiriho, mwampa eky'okunywa; nkaba ndi omugyenyi, mwankunira; 36nkaba njwaire busha, mwanjweka; nkaba ndwaire, mwaija kundeeba; nkaba ndi omu kihome, mwantaayaayira. 37Abahikiriire baryamubuuza bati: Mukama waitu, tukakureeba ryari oine enjara, tukakuha eby'okurya, nari oine eiriho tukakuha eky'okunywa? 38Tukakureeba ryari ori omugyenyi tukakukunira, nari ojwaire busha tukakujweka? 39Tukakureeba ryari orwaire, nari ori omu kihome tukaija kukureeba? 40Mukama aryabagarukamu ati: Buzimazima nimbagambira nti: Nk'oku mwabikoreire omwe ahari beene Tata abo abato okukira abandi, biri niinye mwabikoreire.

41 # Kush 20:10, 15. Bwanyima aryagira ab'aha rubaju rwa bumosho ati: Mundugyeho, imwe abakyeenirwe, muze omu muriro ogutaraara, ogwateekateekyeirwe Sitaane na baamaraika be; 42ahakuba nkaba nyine enjara, timwampa by'okurya; nyine eiriho, timwampa ky'okunywa; 43nkaba ndi omugyenyi, timwankunira; njwaire busha, timwanjweka; ndwaire kandi ndi oomu kihome, timwaija kundeeba. 44Nabo baryamugarukamu bati: Mukama waitu, tukakureeba ryari oine enjara, nari oine eiriho, nari ori omugyenyi, nari ojwaire busha, nari orwaire, nari ori omu kihome, tukabura eki twakukorera? 45Nawe aryabagarukamu ati: Nk'oku mutarabikoreire omwe ahari abo abato okukira abandi, biri naanye timurabinkoreire. 46#Yoh 5:29; Dan 12:2. Abo baryaza omu kubonabonesibwa okw'ebiro n'ebiro, kwonka abahikiriire bo baryataaha omu magara agatahwaho.

Currently Selected:

Matayo 25: RR64

Highlight

Copy