Matayo 19

1 # Mak 10:1-12. Yesu ku yaaherize kugamba ebyo byona, yaaruga Galilaaya, yaataaha omu ishaza rya Buyudaaya seeri ya Yorudani; 2emitwe y'abantu baingi yaamukuratira, yaabakirizayo.

Eby'okushenda omukazi

3 # Mat 5:31, 32. Abafarisaayo baija ah'ari, baamutega nibagira bati: Beitu Ebiragiro biikiriza omushaija kushenda omukazi we, yaaba aine eki arikumutura kyona? 4Yaabagarukamu ati: Timukashomaga ngu, Owaabahangire bwa mbere na mbere, akahanga omushaija n'omukazi? 5#Efe 5:31. Yaagira ati: Omushaija nikyo atsigiraho ishe na nyina, akaguma n'omukazi we; nabo bombi bakahinduka omuntu omwe. 6#1 Kor 7:10, 11. Baba batakiri babiri kureka omwe. N'ahabw'ekyo eki Ruhanga yaateeraine hamwe, omuntu atarikitaanisa. 7#Bir 24:1. Baagaruka baamubuuza bati: Ku kiraabe kiri kityo, ahabw'enki Musa akaragiira omuntu kuha ebaruha y'okutaana, ngu abone kushenda omukazi we? 8Yaabagarukamu ati: Ahabw'obugangaazi bw'emitima yaanyu Musa nikyo yaikiririize ku mutaana n'abakazi baanyu, kwonka bwa mbere na mbere kikaba kitari kityo. 9#Luk 16:18. Kandi naanye nimbagambira nti: Omuntu weena orishenda omukazi we atamutuzire bushambani, akashwera ondiijo, aryaba ashambaine; kandi n'orishwera oshenzirwe nawe aryaba ashambaine.

10Abeegi be baamugira bati: Eby'omushaija n'omukazi ku biraabe nikwo biri, ti kirungi kushwera. 11#1 Kor 7:7, 17. Yaabagarukamu ati: Abantu abarikubaasa kwemera ekigambo ekyo ti boona, kureka abo abakihairwe. 12Nimumanya ngu hariho abakonwa abaazairwe batyo okuruga omu nda za baanyinabo; hariho n'abakonwa abaakonirwe abantu; kandi hariho abakonwa abaayekonire ahabw'obukama bw'omu iguru. Orikubaasa kwemera ekyo, akyemere.

Yesu okwakiira abaana bato

13 # Luk 18:15-17; Mak 10:13-16. Bakamureetera abaana bato ngu abateho engaro, abashabire. Abeegi be baagambira kubi abaabareeta. 14Kwonka Yesu yaabagira ati: Murekye abaana bato baije ahariinye, mutabazibira; ahabw'okuba obukama bw'omu iguru n'obw'abari nk'aba. 15Yaabataho engaro, yaarugayo.

Eby'omutsigazi omutungi

16 # Luk 18:18-30; Mak 10:17-31. Kandi hakaija omuntu, yaamubuuza ati: Mwegyesa, nkaakora kirungi ki okutunga amagara agatahwaho? 17#Luk 10:26-28. Yaamugarukamu ati: Nombuuriza ki aha kirungi? Omurungi n'omwe. Ku oraabe nooyenda kutaaha omu magara, oyorobere ebiragiro. 18Onu yaamubuuza ati: Nibiiha? Yesu ati: Otariita, Otarishambana, Otariiba, Otaribeiherera abandi; 19#Lev 19:18. Otiine sho na nyoko; kandi Okunde mutaahi waawe, nk'oku oyekunda. 20Omutsigazi ogwo yaamugarukamu ati: Ebyo byona nkabyorobera; ekindi ekimbuzireho niki? 21#Luk 12:33. Yesu yaamugarukamu ati: Ku oraabe nooyenda kuba ohikire, gyenda otunde ebi oine byona; ebi oraihemu, obihe abooro; naiwe oryatunga eitungo omu iguru; haza oije onkuratire. 22#Zab 62:10. Omutsigazi ku yaahuriire ekigambo ekyo, yaagyenda aine enaku nyingi, ahabw'okuba akaba aine eitungo ringi.

23Yesu yaagambira abeegi be ati: Buzimazima nimbagambira nti: Kigumire omutungi okutaaha omu bukama bw'omu iguru. 24Kandi nimbagambira nti: Nikirahuka engamira kuraba omu nyindo y'empitirizo, okukira omutungi kutaaha omu bukama bwa Ruhanga. 25Abeegi be, ku baakihuriire, baatangaara munonga, baamubuuza bati: Mbwenu shi hoona, n'oha orikubaasa kujunwa? 26#Kut 18:14. Yesu yaabareeba, yaabagarukamu ati: Ekyo tikirikubaasika ha bantu; kwonka ahari Ruhanga byona nibibaasika.

27Petero nikwo kumugambira ati: Reeba itwe tukatsigaho byona, twakukuratira. Mbwenu turyatunga ki? 28#Luk 22:30. Yesu yaabagarukamu ati: Buzimazima nimbagambira nti: Omu bunaku obu ebintu birihindukiramu bisya, Omwana w'omuntu ku arishutama aha kitebe ky'ekitiinisa kye, imwe abankuratiire muryashutama aha bitebe ikumi na bibiri, mucwere enganda za Israeli ekumi na ibiri emanja. 29#Heb 10:34. Omuntu weena owaatsigireho amaju, beene ishe, banyaanya, ishe, nyina, abaana nari ebibanja ahabw'eiziina ryangye, aryaheebwa nk'ebyo emirundi igana, kandi ahungure amagara agatahwaho.

30 # Luk 13:30. Kwonka baingi ab'okubanza baryaba ab'enyima, kandi ab'enyima baryaba ab'okubanza.

Currently Selected:

Matayo 19: RR64

Highlight

Copy