Okutandika 40

Yosefu okushoboorora ebirooto by'abaheereza ba Faraho

1Bwanyima y'ebyo omugabuzi wa viinyo ow'omugabe wa Misri n'omuteeki we w'emigaati baagwisa kubi mukama waabo, omugabe wa Misri. 2#Enf 16:14. Faraho yaagirira ekiniga abakuru abo bombi, omukuru w'abagabuzi ba viinyo n'omukuru w'abateeki b'emigaati; 3yaabata omu kihome ekyabaire kiri omu ka y'omukuru w'abarinzi, ahu Yosefu yaabaire akomeirwe. 4Omukuru w'abarinzi yaabakwatsa Yosefu kuguma naabaheereza; baamara ebiro bari omu kihome.

5Ekiro kimwe bombi baaroota ebirooto, buri omwe ekirooto kye, kiine amakuru gaakyo, omugabuzi wa viinyo n'omuteeki w'emigaati ab'omugabe wa Misri, abaabaire bari omu kihome. 6Yosefu ku yaizire kubareeba omu kasheeshe, yaashanga bagwirwe kubi; 7yaabuuza abo bakuru ba Faraho abaabaire bakomeirwe omu nju ya mukama we hamwe nawe, ati: Ahabw'enki eri izooba mwaimuka mugwirwe kubi? 8#Dan 2:11. Baamugarukamu bati: Turootsire ebirooto, twabura ow'okubitushobororera. Yosefu yaabagira ati: Okushoboorora shi t'okwa Ruhanga? Nimbashaba mubindootororere.

9Omugabuzi wa viinyo omukuru yaarootororera Yosefu ekirooto kye, naagira ati: Ndootsire omuzaabibu guri omu maisho gangye; 10ogwo muzaabibu gubaire gwine amataagi ashatu; ku guginire, gwarabya, gwaragaza ebijuma byagwo byahiisa. 11Obwo ekikopo kya Faraho kindi omu ngaro; naacwa ebyo bijuma, naabikamuurira omu kikopo kya Faraho, naakimukwatsa omu ngaro. 12#Dan 2:36. Yosefu yaamugira ati: Aga nigo makuru gaakyo: ago mataagi ashatu nibyo biro bishatu; 13#Yer 52:31. omuri ebyo biro bishatu Faraho naija kwimutsya omutwe gwawe akugarure omu bugabuzi bwawe, oheereze Faraho ekikopo kye, nk'oku waabaire omuheereza okiri omugabuzi we wa viinyo. 14#Luk 23:42; Yos 2:12. Ku oriba waabaire gye, naakweshengyereza onyijukye, ongirire embabazi, ongambe owa Faraho, onyihise omuri egi nju. 15Omanye ku naihirwe omu nsi y'Abaheburaayo; kandi na kunu tinkakorayoga ekyakuntaisize omu kihome.

16Omuteeki w'emigaati omukuru ku yaareebire ebi yaamushobororera byaba birungi, yaagambira Yosefu ati: Naanye ndootsire nyekoreire ebitemere bishatu by'emigaati. 17Aha kitemere eky'aha mutwe gw'ebindi hariho emigaati y'emiringo yoona ningitwarira Faraho; enyonyi zaija, zaagindiira aha mutwe ahari ekyo kitemere. 18Yosefu yaamugarukamu ati: Aga nigo makuru gaakyo; ebitemere ebyo ebishatu nibyo biro bishatu; 19omuri ebyo biro bishatu Faraho naija kwimutsya omutwe gwawe, agucweho, akuhanikye aha muti, amahungu gakushokoorereho. 20#Mat 14:6. Aha kiro kya kashatu, aha izooba ry'okwijuka okuzaarwa kwa Faraho, yaateekyera abairu be boona obugyenyi; yaimutsya omutwe gw'omugabuzi wa viinyo omukuru n'ogw'omuteeki w'emigaati omukuru ahagati y'abairu be; 21yaagarura omukuru w'abagabuzi ba viinyo omu bugabuzi bwe, yaaguma naabonetsya Faraho omu kikopo kye. 22Kwonka omuteeki w'emigaati omukuru yaamuhanika, nk'oku Yosefu yaashoboroire amakuru g'ebirooto byabo. 23#Zab 31:12. Kwonka omugabuzi wa viinyo omukuru tiyaijuka Yosefu, yaamwebwa.

Currently Selected:

Okutandika 40: RR64

Highlight

Copy