Luka 8

Musibe wa namadhala

(Matewuzhi 13.1-23; Maruku 4.1-20)

1Nuwindo, Yesu ahivenyaga odhowa weddeedda nluwa ni nluwa, murudda ni murudda, alaleyaga awaaddelihaga athu Muselu Wapama wa Omwene wa Mulugu. Anamasuuza kumi ni abiili yaaligi vamohi ni oliye, 2teto ni ahiyana amohi ale yaayilihiiye mwa mineba dhabure ni dhiredda dhimohi, ahiyanaya baala: Mariya a oMagadala, oyene akumihiwe mineba dhootakala mitanu namiinddi, 3ni Zhuwana mwihiyanaaye Kuza musadoro a nyuba ya Heroddi, Suzana ni ahiyana amohiwa ajinjeene. Yamukamihedha Yesu ni dhookalana dheewa.

4Athu ajinjeene yoothamagelaga wa Yesu, edheelaga mudhi dhoohiyana-hiyana. Oliye ahiwogaga musibe ola, wiira: 5<<Namadhala ahidhowa odhala bewu. Adhalaga bewu, dhimohi dhamorelege moogomela dila onyingaleliwa, balame dhahidha oddoddavo oja. 6Bewu dhimohi dhamorelege vamabweni omela dhunnuwaga wumma, vowi kavaali munyetho. 7Bewu dhimohi dhamorelege vamiingani, dhigamelile dhahunnuwa vamohi ni miingadha, dhahihogeya. 8Vano bewu dhimohi dhahimorela theya yapama. Omela wunnuwa ofiyedha ovaha mazana ni mazana, okwaranya bewu dhadhaliwege>>.

Awogagave nda, ahikuwaga, wiira: <<Ole winna obaruni wowiiwa, eewe!>>

9Anamasuuza a Yesu yahimukohaga, wiira: <<Musibe ola onatapulela ddi?>> 10Oliye ahawaakulaga, wiira: <<Nyo muhuvahiwa ononelamo dha wipiini dha Omwene wa Mulugu, mbwenye amohiwa ginaawogana mwa misibe, vowi,

<yoonaga mbwenye kinoona;

yiiwaga mbwenye kineewelelamo>. # 8.10 Ezaya 6.9.

11<<Musibe ola onatapulela ndha. Bewu bi madhu a Mulugu. 12Bewu dhamorele moogomela dila, baale eneewa madhu a Mulugu, mbwenye adha Sathana aavenyihamo mmirimani mweewa wi enadhe eroromele, evulumusiwe. 13Bewu dhamorele vamabweni, baale eneewa madhu yawaakela ni ohagalala, mbwenye kinakanna misisi. Enaroromela mudhidhi vang'ono, voofiya dhooweeha, enowelela mundduli. 14Bewu dhamorele vamiingani baale eneewa madhu a Mulugu, yawaakela voovira malabo vang'ono, enohogeya ni oosanyeyela, dhooreela ni dhimohi dhoofuna egumi kinafiyedha ovaha. 15Bewu dhamorele theya yapama baale eneewa muupamani ni murima wowogoowa yaalogolela madhuya, ofiyedha ovaha furuuta ni ovilela.

Musibe wa panti

(Maruku 4.21-25)

16<<Kalivo muthu onahiddiha panti, akuneela ni mpika naari ohela vati va kama, eehi. Onahela vowooneyela wi enavolowegemo yoonege waara. 17Vowi kilivo yowiipiteya ehinadha yooneya, naari yoologoheya ehinadha enoniwa ni ovuhuleleya. 18Pole-pole, mwiiwe pama! Ole winna, onoweenjedhedhiwa; ole ohinna, elene enoobuweleliiye wi gihikanna onowaakiwa>>.

Amaaye ni addibile a Yesu

(Matewuzhi 12.46-50; Maruku 3.31-35)

19Amaaye a Yesu ni addibile yahidhaaga wi yoonane. Mwaha wa anamwinji kiyaakwanihilege ofiya vaaligi oliye. 20Vano muthu mmohi ahidhowaga omwaaddela, wiira: <<Mmeenyu ni addibilinyu eli ode wu, enafuna moonane>>.

21Yesu ahawaakulaga, wiira: <<Amma ni addibilaga baale eneewa madhu a Mulugu ni wiirana dhinawoga madhuya>>.

Yesu onomaaliha nipevo nuulubale

(Matewuzhi 8.23-27; Maruku 4.35-41)

22Nlabo nimohi Yesu ahivolowaga mmwanddeyani vamohi ni anamasuuza aaye, ahawiirelaga: <<Kabeni nilabuweni nidhowe kobela emohi ya nyaza>>. Omaruwa. 23Elabuwaga, Yesu ahidhaaleliwaga kove, ogonaga. Vano nahitatamuwaga nipevo nuulubale munyaza, mmwanddeyani mwahambeelaga odhaala mahinje, okala yego yowoopiha wa aliwa ohala nenaa ni obwina. 24Yahimususedhaga, omvenyiha ekuwaga, yiiraga: <<Namasuuziha, Namasuuziha, nnokwa hiyo!>> Yesu ahivenyaga, ohiiha nipevo ni owali wa mahinje; dhaatedhene dhahimaalaga, okala murenddele. 25Nuwindo, ahaakohaga, wiira: <<Ororomela weenyu oli wuuvi?>>

Aliwa owoveene yootikinaga, ekohanaga vakaleligiisu, yiiraga: <<Ki olaya baani? Onafiyedha olamula nipevo ni kuluzi, dhimwiiwelelaga>>.

Oyilihiwa wa mulobwana mmohi ahiddiwe ni muneba wootakala

26Yahaabuwelaga elabo ya oZherasa, eli epaddi emohiya ya Nyaza ya oGalileya. 27Yesu akitagawene, ahithamageliwaga ni mulobwana a muluwani mwemule. Oyene ahiddiwe ni muneba wootakala. Mudhidhi mujinjeene kaawara, kaakala vaade, akalesa munsiyeni.#8.27 Masiye a mudhidhi olene yakala wona nikungu. 28Vano agamoonile Yesu, ahikokoraga vameentoni vaaye, ahikuwaga ni ndhu nootaama, wiira: <<Yesu, Mwaana a Mulugu a Mudhulu-dhulu, munafuna ddi ni miyo? Ginowuulobani kamugirabulihe!>> 29Mwaha wi Yesu ahilamulaga wi muneba wabure ovenyemo mwa oliye. Woomwihidda wiinddi-wiinddi. Athu yommaga ni fingwi madada ni meddo wi aang'aneliwege; oorunddumula dhaatedhene, woomuthamagihedha muneba wabure mukokolani.

30Yesu ahimukohaga, wiira: <<Ndina naawo oli aani?>>

Ahimwaakulaga, wiira: <<Nili anamwinji>>.#8.30 Anamwinji mu ewogelo ya eGerego madhu ala eni Lezhiyawu, enatapulela wi nikuru na anyakoddo macikwi matanu ni nimohi. Aaneba ole ahiromolaga ndina nenddi otapulela wi mineba dhootakala dhedho dhaali mwa oliye dhaali dhijinji wona nikuru nuulubale na anyakoddo. Vowi mineba dhootakala dhijinjidhene dhahivolowa mwa oliye. 31Mineba dhootakala dhahimulobaga Yesu wi ahiigarele omuliddini ohinna omagomelo.

32Vevale voojihiwaga nikwedda nuulubale na kumba omwaangoni. Mineba dhootakala dhahimulobaga wi arumeedhihe dhivolowe mukumbani. Yesu ahirumeedhihaga. 33Mineba dhootakala dhigakumilemo mwa mulobwana ole dhahivolowaga mukumbani, kumbadha dhahikitaga dhithamagelaga musiddo omorela munyaza, okwa.

34Amakambuzi a kumba egoonile nde dhapadduwilege, yahithawaga, odhowa olaleyaga muluwani ni mmavade. 35Athu yahikumaga, odhowa wi yoone dhende dheereyile. Egafiyile vakukuuve vaaligi Yesu, yahimfwanyaga mulobwana ole akumihiwemo mineba dhabure agakaraatile omanyaloni a Yesu agawarile, aganna zelu dhoobaliwana. Yahikalagana woova. 36Ale yoonilege nde dhiireyaga yahawaaddelihagamo teto mwemule mwamuyiliheliiye muliba minebadha. 37Nuwindo, athu aatene yaapeelelege Zherasa yahimulobaga Yesu wi avenyewo, vowi yahikalagana woova wuulubalewene.

Vano Yesu ahigwelaga mmwanddeyani dila biili wi adhowege, 38mulobwana ole akumihiwe mineba dhootakala ahimulobaga wi amuharege. Yesu ahimpaganyaga, omwiirela: 39<<Owelele vaade vaawo wawoge dhaatedhene nde dhuwiirele Mulugu>>. Nuwindo, ooyilihiwa ole ahidhowaga olaleyaga muluwani mwaatemwene dhego nde dhaatedhene dhamwiirele Yesu.

Yesu onomuyiliha mwaana a Zhayiro ni mma mmohi

(Matewuzhi 9.18-26; Maruku 5.21-43)

40Yesu awelagawo anamwinji yahimwaakelelaga ni ohagalala mwaha wi aatene yoomujejihaga. 41Vevale mulobwana mmohi aaligi mpogo a nyuba ya matugumano eeriwa Zhayiro. Ahidhaaga okokora omanyaloni a Yesu, omuloba wi afiye vaade vaaye. 42Anna mwaanaye mmohive, mwaana-mwihiyana anna yaaka kumi ni biili, ahalilege nenaa ni okwa. Yesu adhowaga, anamwinji yoompinyaminyaga. 43Vahikalaga mwihiyana mmohi arabulile yaaka kumi ni biili ni maredda oomweerini [ahinoonga dhookalana dhaaye dhaatedhene ni anamugu;] kaalivo muthu aakwanihile omuyiliha. 44Ahidhaaga odduli wa Yesu, okahinya nipiyo na yoowara yaaye, mowaaguva maredda ale omweerini yahimala.

45Mbwenye Yesu ahiiraga: <<Ogikahinyile baani?>> Aatene egarunile. Peduru ahiiraga: <<Namasuuziha, anamwinji ehuwaapeelelani ni wuupinyaminyani vano muni: [<Ogikahinyile baani?>]>>

46Mwa dhaatedhene Yesu ahikalelaga ntidi, eeraga: <<Ohukalavo ogikahinyile; mwahaya gihoona wi mwa miyo owodha ohukumamo>>.

47Mwihiyana ole agoonile wi kadhaandeya wiilogoha ahaaddamelaga osogolo wa Yesu okokora agurumelaga. Omwaaddelihamo vameentoni va athu aatene mwahaya wamukanyiheligiiye mowaaguva ayila. 48Nuwindo, omwiirela: <<Mwaanaga, nroromelo naawo nuhuuyiliha!#8.48 Nuhuuyiliha Naari wi: nuhuuvulumusa. Dhowa ni murenddele>>.

49Yesu awogagave, ahifiyaga muthu ookumela vaade va Zhayiro, musogoleli a nyuba ya matugumano. Omwaaddela, wiira: <<Ii, muhumukukumule namasuuziha, mwaaninyuya ohumariheya>>.

50Mbwenye Yesu, ageewile nda, ahiiraga: <<Kawoove; ororomele baahi, mwaanawo onovulumusiwa>>.

51Afiyiligiiye vaade kaamwihiyilege muthu bure ovolowa mba vamohi ni oliye, mbwenye Peduru, Zhuwawu ni Tiyago, ababe ni amaaye a mwaana ole. 52Athu aatene yowunddaga ekuwaga. Vano Yesu ahawiirelaga: <<Kamuundde! Ola kakwile mbwenye onoogona>>.

53Aatene yegi omuteya moomunyemula, vowi yahinonaga pamadhene wi mwaanaya ohukwa. 54Vano Yesu ahimwihiddeelaga ndada, owoga ni ndhu nootaama, wiira: <<Mwaana-mwihiyana, kavenya!>> 55Egumi yaaye yahiwelelagamo, ovenya mowaaguva. Yesu ahawiirelaga wi mvaheni yooja. 56Ababiinya yahitikiniheyaga, mbwenye Yesu ahaasinjeedhaga wi enadha emwaaddele muthu nde dhapadduwilege.

Currently Selected:

Luka 8: tke

Highlight

Copy