Luka 9
9
Yesu onowaaruma anamasuuza kumi ni abiili
(Matewuzhi 10.5-15; Maruku 6.7-13)
1Nuwindo, Yesu ahawiithanelaga vameentoni vaaye anamasuuza kumi ni abiili, ahaavahaga owodha ni othongi wowiigarana mineba dhabure dhaatedhene ni oyiliha dhiredda. 2Yesu ahaaruma olaleya Omwene wa Mulugu ni oyiliha dhiredda. 3Ahawiirelaga kumi ni abiili: <<Kamuthukule yego ya voolenddoni; naari mukogodho, naari thumba na voolenddoni; naari mukaathe, naari korowa, naari kamuthukule maleya meenddi. 4Vaade vinafiyedhiinyu, mukalege vevo ofiyedha nlabo noovenyavo. 5Yahuwaakelani, tatani nthubi na manyalo eenyu mwakumaga muluwani mweewa. Okale onamoona wookoodda weewa>>. 6Vano yahimaruwaga, odhowa mudhi ni mudhi, elaleyaga Muselu Wapama yaayilihaga athu dhipaddi dhaatedhene.
7Namathonga#9.7 Namathonga Naari wi: tetararaka. Namathonga eeriwa tetararaka, athonga epaddi ya nennayi ya murudda mmohi. Heroddi ahiiwa dhaatedhene dheereya mwiilaboni mwaaye oGalileya, ahisimwelaga, vowi athu amohi yeera Zhuwawu divenyile muukwani; 8amohi yeera Eliyazi dikumelele; amohi yeera namavuhulela mmohi awale dhavenyile muukwani. 9Mbwenye Heroddi ahiiraga: <<Zhuwawu duuleene miyo gimpadhihiliimi nikohi. Ki muthu ola gineewiimi dhego nda baani?>> Oosayela omoona Yesu.
Yesu onowiinjiviha mikaathe ni somba
(Matewuzhi 14.13-21; Maruku 6.30-44; Zhuwawu 6.1-15)
10Egawelilewo arumiwi ale yahimwaaddelagamo Yesu dhaatedhene dhende dheeriliiwa. Nuwindo, Yesu ahaathukulaga arumiwi, odhowa nluwa nimohi, neeriwa Betisayida; 11mbwenye anamwinji eganonile, yahimuharaga. Yesu ahawaakelelaga, waawogagana anamwinji dha Omwene wa Mulugu ni waayiliha alene yafunaga oyilihiwa.
12Nduwa nigahalile vang'ono okodhowa, anamasuuza kumi ni abiili ale yahimwaaddamelaga Yesu, wiira: <<Mwaarumihe anamwinji edhowe mmavade wi yeesayelele yooja ni voogona, vowi oliihu wuno bu mburo wa mwiiddeddereni>>.
13Yesu ahawaakulaga, wiira: <<Mwaavahe nyeene yego wi eje>>. Aliwa yahiiraga: <<Ninna mikaathe mitanu ni somba biili, baahi. Kaahi nidhowe nagule yooja ya anamwinji aatene alena>>. 14(Vaaligi alobwana owaakwana vakukuuve macikwi matanu (5.000).)
Mbwenye Yesu ahawiirelaga anamasuuza aaye: <<Waakaraatiheni anamwinji mmakuruni a makumi matanu (50)>>. 15Anamasuuza yahiiragana ndo, aatene yahikaraatigi. 16Yesu ahithukulaga mikaathe mitanu ni somba biili, osugwa odhulu otamaala, opadhula mooharela, ahawinkaga anamasuuza wi yaagawele athu. 17Yahijaga aatene orubala. Anamasuuza yahiddoddelaga dhoonyenyeya dhahalilege odhaaliha middanga kumi ni miinddi.
Wiisoriha wa Peduru
(Matewuzhi 16.13-20; Maruku 8.27-30)
18Dhahipadduwa ayi Yesu ahipoothowaga odhowa vowi hivale, egi olobela ni anamasuuza aaye egali vakukuuve. Oliye waakohaga, eeraga: <<Athu eni miyo gili aani?>>
19Aliwa omwaakula, wiira: <<Amohi eni muli Zhuwawu Namabathiza, amohi Eliyazi, amohiwa namavuhulela awale ovenyile>>. 20Oliye owelela waakoha, wiira:
<<Ki nyo, muni gili aani?>>
Peduru ahimwaakulaga, eeraga: <<Nyo muli Kirixtu aroromelihiwe ni Mulugu>>.#9.20 Kirixtu mu ewogelo ya eGerego enatapulela Muthikitheliwi, Misiya, naari wi oosakuliwa a Mulugu, oyene onaavulumuse athu. 21Yesu ahaakooddihaga vajinjivene wi enaadhe emwaaddele muthu. 22Vano oliye aheenjedhaga, wiira: <<Enofuneya wi Mwaana a Muthu arabule vajinji, gikooddiwe mmadadani mwa apogo a aZhudewu ni apogo a anamakutha ni ale anamasuuziha a malamulo; ofiyedha opiwa ni ovenyihiwa nlabo na neethaaru>>.
23Ahawaaddelaga aatene, wiira: <<Onafuna odha wa miyo, eekoodde yeeka, nlabo ni nlabo athukulege muraddi waaye, agiharege. 24Mbwenye ole onafuna ovulumusa egumi#9.24 Egumi Naari wi: muneba. yaaye oneere oyeleela. Ole onayelela egumi mwaha wa miyo onowiivulumusa. 25Muthu eyuugelela dha elabo yaatene voodha eerimeeliha ni wiitolosa yeekaaye, onapura ddi? 26Vowi muthu onagikalela manyazo miyo ni madhu aaga, Mwaana a Muthu onodha amukalele manyazo nlabo nnadhiiye munthithimihoni naaye na Ababe ni na angero oweela. 27Ebaribareene ginowuwaaddelani wi nyeene muli veva kamunafiyedhe okwa muhoonile Omwene wa Mulugu>>.
Ohiyaniheya wa kove ya Yesu
(Matewuzhi 17.1-13; Maruku 9.2-13)
28Vigavirile malabo matanu na maraaru agawogile madhu ala, Yesu ahimuthukulaga Peduru, Zhuwawu ni Tiyago, odhowa omwaangoni wi alobele. 29Alobelagave, mooneyelo a kove yaaye yahihiyaniheyaga. Dhoowara dhaaye dhaaligi dhoweela mbuu, dhegi ozherimela. 30Mowaaguva egi owoga ni alobwana abiili. Aaligi Mozezi ni Eliyazi. 31Alobwana ala mooneyelo eewa yaaligi a nthithimiho. Yawogaga dha okwa waaye weeriiye aakwanelihe oZheruzalemi.
32Peduru ni amohiwa yannigiiyena, yahinyemeliwaga ni kove dhuulubale. Vano egarurumuwe, yahoonaga nthithimiho naaye ni alobwana abiili ale. 33Evenyagavo ale vale vaaligiisu ni Yesu, Peduru ahiwogaga, wiira: <<Namasuuziha, eli yapama wi nikale wewuno. Nimage misasa miraaru; mmohi weenyu, mmohi wa Mozezi, mmohiwa wa Eliyazi>>. (Oliye kaanonaga dhawogigiiye.)
34Awogagave, wahidhaaga murabo waakuneela, egali mmuraboni mwemule. Anamasuuza yegi woova. 35Mmuraboni mule mwahikumaga ndhu, neeraga: <<Ola di Mwaanaga, gimusakuliimi.#9.35 Dhoolebiwa ni madada dhijinji dhineera: Oodhivela. Mmwiiwelelege oliye!>>#9.35 Wambeela 22.2; Masaalimu 2.7; Ezaya 42.1. 36Ndhu nigeeweyile anamasuuza a Yesu yahimoonaga wi olivo yeeka. Vano aliwa yahimaalaga okuma malabo alene, kayamwaaddelile muthu dhaatedhene dhooniligiiwa.
Yesu onomuyiliha muzombwe oohiddiwa ni muneba wootakala
(Matewuzhi 17.14-23; Maruku 9.14-32)
37Ode ogasile, yahikitaga omwaangoni, yahidhowaga anamwinji wi yamugumanena Yesu. 38Mulobwana mmohi vaari va anamwinji ahikuwaga ni ndhu nootaama eeraga: <<Namasuuziha, ginowuulobani wi mugoonele mwaanaga, vowi ginna mmohive. 39Mowaaguva muneba mmohi wamwihidda; muzombwe onokuwa moorurumusa, muneba omuddanddamuwihaga akumaga nipweru muwano. Kunaaguva omwihiya onofiyedha omvoreya. 40Gahaaloba anamasuuza eenyu wi yiigaremo muneba ole, mbwenye kayaakwanihile>>.
41Yesu ahaakulaga, wiira: <<Mulogo woohukanna nroromelo oovirigana moobuwelelo, ofiyedha alini gineeriimi givilele ni nyo? Mudhena wuno mwaanawo>>. 42Muzombwe ole amwaaddamelaga Yesu, muneba wootakala wahidhaaga, omutongwihedha vati otalataleyaga. Mbwenye Yesu ahinyanyuwelaga muneba wabure, omuyiliha muzombwe ole, omwinka babe. 43Aatene yaaligi ootikiniheya ni kopolo dhuulubale dha Mulugu mwa dhaatedhene nde Yesu dheeriliiyena. Oliye ahawiirelaga anamasuuza aaye: 44<<Muvuruwanesese pama dhedho ginafuniimi guwaaddeleni: Mwaana a Muthu oneere ogulihiwa aveleeliwe mmadani mwa athu>>. 45Mbwenye aliwa kayeewelelagamo madhu ale yatapuleligiiwa; yaaligi owiipiteya wi enadhe yiiwelelemo. Yowoovaga omukoha yootapulela ya madhu ale.
Mpogo baani?
(Matewuzhi 18.1-5; Maruku 9.33-37)
46Dhahipadduwa mudhidhi mmohi anamasuuza yegi ovaanyihana wi aakale mpogo#9.46 Yawogaga dha mpogo kinawoga wunnuwa wa muthu mbwenye enawoga dha osogolela mabasa, nlogo, naari elabo. mwa aliwa baani. 47Yesu, voonona moobuwelelo eewa, ahimuthukulaga mwaana mmohi omwiimeliha vaaligiiye. 48Wawiirela: <<Olene onamwaakela mwaana ola mu ndina naaga, onagaakela miyeene. Vano ole onagaakela, onamwaakela ole ogirumile. Oli mwa nyo oneeyevihe, oyene dinaakale pogo>>.
49Zhuwawu ahaakulaga, wiira: <<Namasuuziha, nihimoona muthu mmohi akumihaga mineba dhabure ni ndina neenyu, hiyo nihimwihiiha mwaha wi kaali vamohi ni hiyo>>. 50Mbwenye Yesu ahimwiirelaga: <<Kammwihiihe ole ohunavaanyihana ni nyo, ola deenyu>>.
Yesu onokooddiwa ni athu a oSamariya
51Nuwindo, dhahipadduwa waaddamelaga mudhidhi wowi athukuleliwe odhulu, ahilibihedha odhowa oZheruzalemi. 52Yesu ahaaruma aliba muselu vasogolo. Edhowaga aliwa yahivolowaga murudda wa oSamariya wi emusasanyedhele mburo; 53mbwenye athu a murudda ole kayamwaakelile Yesu vowi yahinona wi onadhowa oZheruzalemi. 54Anamasuuza Tiyago ni Zhuwawu vowoona nda yahimukohaga, wiira: <<Nabwiya, munofuna niithane munddo wa odhulu waapahe?>> 55Mbwenye Yesu ahaarugunuwelaga, waasumulula.#9.55 Enofwanyeya madhu owi dhiiraga <<Nyo kamunonile musawo wa muneba mwinniinyuna, vowi Mwaana a Muthu kadheele obwanyula egumi ya athu, mbwenye wi givulumuse>> elebiwe mu dhoolebiwa ni madada dhimohi dhixa. Mbwenye anamasuuza ajinji enoobuwela wi madhu ala kiyalebiwe ni Luka. 56Vano yahidhowaga murudda mmohiwa.
Eli yoorusa omuhara Yesu!
(Matewuzhi 8.19-22)
57Yesu adhowaga mundila ni anamasuuza aaye, mulobwana mmohi ahiiraga: <<Gineerege wuuharani oli waatewene onadhowiinyu>>.
58Yesu ahimwaakulaga, wiira: <<Makala ehikanna makungu eewa, balame dha odhulu dhihikanna dhitunji, mbwenye miyo, Mwaana a Muthu, kaginna voosameeliha muru>>.
59Ahiira wa mulobwana mmohiya: <<Giharege>>. Mbwenye mulobwana ole ahimwaakulaga, wiira: <<Nabwiya, gihiyeni vowambeela gaatibele ababa>>.
60Mbwenye Yesu ahimwaakulaga, wiira: <<Waahiye anookwa etibelanege anookwave. We odhowe walaleye Omwene wa Mulugu>>.
61Muthu mmohiya ahiiraga: <<Gineere wuuharani, Nabwiyani, mbwenye vowambeela mugihiye gaapaganye anaamudhi>>.
62Yesu ahimwaakulaga, wiira: <<Kalivo muthu oni agahiddeelile iba, alimaga aang'anaga mundduli, afwaneelela Omwene wa Mulugu>>.
Currently Selected:
Luka 9: tke
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
