Wambeela 33

Ogumana wa Yakobo ni Esawu

1Dhigeereye dhedhi Yakobo ahimaruwaga vevale asugwaga osogolo, ahimoonaga Esawu aaddamelaga agali ni alobwana aaye mazana mannayi (400). Vevale ahaagawaga anaaye, amohi omwinka Liya amohi Rakeli, amohiwa anamalaba ale abiili anaahiyana. 2Ahaasogolihaga anamalaba alene abiili ni anaaye, vooharela Liya ni anaaye, voogomihedha Rakeli ni Zhuuze. 3Yakobo ahaasogolelaga odhowa ogumana ni ddibile, ahikokoraga va oliye dila tanu nabiili.

4Esawu ahimuthamagelaga, omukubaarela, ombezhari oliye, aabiileene yahiinddaga vamohi. 5Esawu vaasugwiliiye ahiyana ni ahima, ahimukohaga, wiira: <<Ala baani?>> Yakobo ahaakulaga, wiira: <<Ala bi ahima ayene Mulugu mwa mahala egivahiliiye miyo, namalaba eenyu>>. 6Veva anamalaba aahiyana ale yahaadhaagana aniiwa, okokora va Esawu. 7Liya ni anaaye yahimwaaddamelaga, okokora. Voogomihedha ahidhaaga Zhuuze ni Rakeli, ala teto yahikokoraga va oliye.

8Esawu ahikohaga, wiira: <<Nikuru na aneenyama ndde gigumaniliimina mundila thawani?>> Yakobo ahaakulaga, wiira: <<Gafuna mugaakele pama nyoovo, nabwiya aaga>>. 9Esawu ahimwaakulaga, wiira: <<Miyo gihikanna dhijinji, ddibilaaga. Ndo dhikaleve dhaawo>>. 10Mbwenye Yakobo ahaakulaga, wiira: <<Naari! Mwaafunaga ogaakela pama, muthukule yoovaha ela ya mmadani mwaaga, vowi vowoona kove yeenyu enofwanafwana ni woona kove ya Mulugu. Vowi muhugaakela pama mookwaranya. 11Murumeedhe yoovaha yaaga ginowikiimini, Mulugu ohugiirela dhapama, kilivo enagihaleela>>. Yakobo ahimuwaddihedhaga, omagomelo wiwa Esawu ahaakelaga.#33.11 Mareeliho ni mvahi si ewogelo emohive mu eHeberi, mu ewogelo woobaliwana wa thalako ela. Yakobo aweliha mareeliho yawiiyiliye wa Esawu yaaka makumi meenddi dha mundduli.

12Esawu ahiiraga: <<Vano ndowe nthaananege>>. 13Yakobo ahimwaakulaga, wiira: <<Nyoovo nabwiya, muhunona wi ahima kinaaguviha weedda, miyo ginowukuuwa ni mabila ni ng'ombe dhendo dhinna ana-ahima eewa. Neera wi naaguvihege weedda, naari nlabo nimohi nenddi aneenyama aatene enookwa. 14Ginowuulobani, nabwiya aaga, wi musogolege. Miyo geeddege vang'onong'onove, giharihaga weedda wa aneenyama ni ahima, ofiyedha nikale vamohi ni nyoovo, nabwiya aaga, oSeyire>>.

15Esawu ahaakulaga, wiira: <<Kawiirena, ogihiye gaarume alobwana aaga wi yuukamihedhe>>. Yakobo ahaakulaga, wiira: <<Mwaha wa ddi, Nabwiya? Dhihaakwana veva mugaakeleliinyu pama!>>#33.15 Esawu afunile wiirana dhaatedhene wi amoonihe Yakobo wi ahimulevelela. Mudhidhi dhijinji kannafuna waalevelela ale enaninyengetha. Nnologolela nihidda wa aliwa mmirimani mweehu. Esawu ononooniha wi dhinowaandeya olevelela. Soofuneya niharege ekalelo yaaye nafunaga omudhivela Mulugu. 16Vevale Esawu ahisogolaga owelelaga owaniwa oSeyire. 17Mbwenye Yakobo ahidhowaga oSukoti wewo wamagiliiye nyuba yaaye, wewo fwaasasanyiliiye makola a aneenyama aaye. Mwa ela niburo ndde nneethaniwa Sukoti.#33.17 Sukoti mu ewogelo ya eHeberi enatapulela makola, naari wi: misasa.

18Ndala Yakobo awelaga oPadani-Aramu, ahifiyaga mmurenddeleni nluwa na oXikemu, elabo ya oKanani, ahitibelaga misasa dhaaye okalaga mwemo vowaaddamela ni nluwa. 19Ahigula mburo wa ahima a Hamori, babe a Xikemu, korowa zana (100), vevale vamagiliiye misasa dhaaye.#33.19 Kalivo ononile mutheengo wa korowa nda, neera nifwanafwanihe ni korowa dha peeno. 20Vevale ahisasanyavo ebuwa ya mukutho, othwa ndina <<Mulugu, Mulugu aEzarayeli>>.

Currently Selected:

Wambeela 33: tke

Highlight

Copy